2019/09/30

pessimismo

upaw nga bulan
pinuting kahayag 
sa gaapas
nga kabuntagon...

mga sum-od
nga oras
langtong hangin
gabok nga
lawak sa akong
kahaponon

patik

kining mga butanga
ug hitaboa
gipatik ko dinhi

manimalos lang ang
mga pulong
sa mga dili na mapapas


mas malinawon baya
ang inyong gipanglibak
mas mauswagon baya
ang inyong gipangdaot

ang mga balak morag
papel diin gisulat mo ang
kabahin sa mga pako

inig kagabii nahimo kining
mga pako
ug ang mga pako nahimong
himsog nga mga langgam

nga nanglupad paingon sa
langit lapos sa kangitngit
sa dugay nga kagabhion

wala ko sa duha

bag-o lang siyang
nagbalita kanako nga
ang iyang duha ka anak
atua sa hongkong
nagbakasyon.....


(nalimtan kaha kini
niya?)

karon manghulam
siya ug dakong kwarta
kay magpatambal
daw siya

(tuod man makita
ang daghang hulagway
nga naka post sa
facebook, disneyland,
shopping, resto,
suroy diri suroy didto)

(wala ko mihatag)

human sa pipila ka
adlaw
mibutyag siya nga
duna siyay close friend
nga mihatag niya sa
maong kantidad

dayon niyag ingon nga
dili na lang siya
modayon ug hulam 
kanako

dayog buga sa Praise the
Lord,
God is Good all the Time,


(sayog ko nga gusto niyang
ihatag kanako ang usa ka basket
nga guilty feelings
apan mas midako ug milapad ang
akong pagsabot sa kinabuhi
ug sa mga lakat sa hunahuna sa
katawhan)

duha lang ka tawo niining
kalibotan
ang mangilad ug ang
giilad


wala ko sa duha.

limos

magpasug-o ang
kinabuhi sa
nag-ung-ong nga
gihunahunang
kamatayon
nangaliyopo nga
unta ang limos
iyang kuhaon kay
mas maayo
man god nga siya
ang mokaon
kaysa moadto lang
kini sa iyang lungon.

tabang

kamatyonon na
ang akong amiga
basin, duda ko, kon
tinood ba, basin,
pod, kon tinood, apan
usa lang ang iyang
hangyo, basin, desir
siya mamatay,
kaha puhon, nga ang
iyang gihangyo nga
150 k unta,
ihatag na nako.

2019/09/28

alang kang Y

dili buot ipasabot
nga tungod kay wala
kita magdayon nga
ako wala gayod 
nahigugma kanimo

adunay mga rason nga
ang rason ra ang nasayod
nakasabot ko nga
nasabtan mo na kini
gikan sa sabakan sa
tanang katuigan

mga pagbati nga nausik
sa akong pagwisikwisik.

hupong sa kwarta hagwa sa pamilya

sa akong
panglantaw
malipayon ang
iyang kinabuhi

napuno sa
grasya bisan
asa

hupong sa kwarta
hagwa sa pamilya

pila kaha ka tuig
nga gihandom ko
nga unta mahimo
akong sama 
kaniya?

dili na makab-ot
ang iyang
pagkagamhanan
ang iyang
pagkamalampuson

sa akong paningkamot
human sa pipila ka
tuig nahinumduman
ko usab siya

akong gitawagan
unya nakatubag ang
usa ka tingog nga
miingon nga hagbay
ra siyang namatay
upat na ka tuig ang
milabay.

alang kang X

gipili ta ang
kahilom

nasabtan ko ang
tanan

nakita ko ang
kalagot

sa wala mo 
paglantaw bisan

gamay na lang
diri kanako

giluwa mo ako
disir ka mibiya.

pagpili sa dili angay kanimo

adto na sa dihang
nakuha mo na ang tanan
miabot na dayon ang
matood: 

gibati mo ang kalood
unya naglibog ka ngano

naabtan mo ang samin
hilom, apan nasulti sa 
kayano ug kahapsay

sa paaging masabtan
mo ang imong
kaugalingong sayop sa
pagpili sa dili angay
kanimo

2019/09/27

keyboard

kasagaran gisulat ko
ang mga kasakit

dili ko moingon nga
mao kini ang akong gipili

labi na nga nakita mo
ako nga mikatawa

bisan diha sa pagluhod
sa adlaw

o pagpapas sa kahayag
o pagsarado sa payong

pila na ba ka balak? ayaw
panghambog

libolibo nga kasakit 
gipatik sa papel

usa ka gatos nga pagmahay
gidukdok sa keyboard.

salamat ug pagpangayog pasaylo

nasayod na ako
kon kanus-a dunganon

pag-ingon ang
thank you ug ang
i am sorry....


nabungat ko 
silang duha
sayo sa kabuntagon

sa dihang sa iyang pagmata
midalidali sab siyag 
pahawa dayon......

pisik

kapakapon ko na usab
ang kahulugan niining tanan

kabahin sa dili mapugngan
nga dili ka unta ganahan

kabahin sa pagduda mo nga
ikaw namakak

balik -balik kining tanan
sama sa ulan ug init

unsa ba kini? ngano ba nga
wala na man kini mapugngi?

sabton mo na usab ang imong
mga mata diha sa samin

lamanohon mo na usab ang imong
kaugalingong kamot

hapuhapon mo na usab ang imong
buhok nga morag dili imo

ang mga adlaw manglabay
nagdala sa ilang mga bagahe

ang mga hunahuna manglupad
sama sa mga langgam nga gibugaw

moabot ka isip laing sundalo
nga nahutdan na ug mga bala

molingkod ka didto sa terminal
sa bus nga nakalimot kon asa ka padulong


gipakisama mo ang syudad nga usa
ka lapyahan

ang mga tawong nagdalidali sama
sa mga balod

ang tunob mo nga wala mo pa
makita gusto mo na nga papaon

balas lang kining tanan
pasaligan mo ang samdan mo nga dughan

ug nganong giatubang mo ang mga
nawong sa tawong gusto mo na nga papason

ang imong kinabuhi gustong matulog
apan aron walay mahuman

balikan mo ang mga platong walay
hugas nga gilantaw sa mga ok-ok

sa kabugnaw sa kaadlawon
sulaton mo na usab ang kagahapon


pagsugod

ang imong gipangsugdan
nga wala mahuman
sunugon mo na
kay wala na man usab
kini silay mga kapuslanan pa.

ang mga nahuman
sama sa naandan hikalimtan
na usab kay sama sa gihapon
wala na kini mga hinungdan.

ang tanan nga nahitabo
pagasamahon nga wala lang
busa magsugod na usab ang
adlaw sa paglimpyo sa salog
sa pagtrapo sa mga lamesa
sa pag-abre sa mga bentana
sa pagbuhi sa mga iro nga
imong gipanghiktan.

2019/09/23

sa lawod nga kagabhion

mosalig ang
gugma diha lamang
sa lantaw,

giayo kog lantaw
ang imong lawas

ang imong 
nawong nga

akong gihapohap
hamis

init nga lawas
dap-ig sa akong

init nga lawas
nagpasingot og

bulbog sa lawod
nga kagabhion.....

himaya

ang atong gugma
pagaw

kasagaran o sa atong
naandan

wala kini tingog, kay
hilom lamang

anaa ang kuhit sa kilid
anaa ang haploy sa buhok

sahay gani malimtan
ang tutok 

sa mga mata nga
kanunayng nagpiyong

sa upat ka libo nga
mga himaya....

ulagan

gisabot mo ang iro
nga miambak sa pader

aron maangkon ang
iyang kagawasan

niadtong gabhiona
lamang

miuli kini nga gikapoy
nanimahong abhong

nakatulog kini sa ilalom
sa lamesa sa inyong kan-anan

samtang nagdali kamog
pamahaw

wala kini nag-ambat sa mga
nahulog nga bukog sa 

manok nga nagpasad
sa giabog nga salog.

2019/09/20

tigmo alang sa huwes nga gadinangag

milupad ang papel
nga imong gipermahan
nahulog sa salog
dayog abot sa dakong
linog
ang mga priso nangahulog
morag mga manggang
hinog
didto sa salog
nanggihikog.

sa mga mata sa terorista

nindot nga lugar
merkado
daghang tawo
mga bata
bitbit sa inahan
namalit sa
tindahan

sa kilid sa
karsada
daghang nanglabay
sakay kanaog
sa mga habal
habal

dunay tawong
misulod
nakajacket og itom
sayong kabuntagon

pagkaalas-otso
sa buntag
kalit nga miboto
ang gitanom
nga time bomb

pulo ang patay
bente ang angol
tulo ka bata ang
samdan tupad
sa patay nga
inahan,


dunay nagtext sa
cellphone
sa tawong gajacket
og itom
" excellent job
congratulations!"

2019/09/19

gihapon...

ang gugma
bisan asa ug
bisan kanus-a
kon gugma
gugma gayod.

ayaw na
paghandom nga
isuroy ka
o ipailaila

halok sa tago
gakos sa ngitngit
kabalaka ug
kahadlok
anaa miluklok

apan bisan
pa niini
ang gugma gugma
lang gayod
gihapon

pasensya lang
una
kay ang gugma
bisan pag unsa
o kanus-a
gugma lang gayod
gihapon....

arte

nagtuagsa ang
mga bato sa dalan

ang atong kaarte
mohatag niini ug
kaanindot

bato nga isda
naglangoy sa
balas nga dagat

bato nga barko
sa tunga sa tig-a
nga lawod

ang arte
maghatag ug
laing nawong
sa bato ug
balas

gani anaa
ania na ang langit
nga bato
ang mga bitoon
nga balas

ang kahayag
nga tig-a
sulod sa lawak
nga tubig

kurtinang bato
kilid sa bentana
nga dahon....

kasayoran

nasayod
kos iyang kabuang
apan
wa nako giambat

malipayon kos
akong kinabuhi
busa
wala na ako
nangilabot
sa mga kalaksot


2019/09/18

atubangan sa mga mangtas nga kamatooran

nawala na ang
kahadlok

hapit na niya
atubangon ang
mangtas nga
kamatooran

apan isip usa
ka bata sa nataran
sa gugma
andam siya sa 
iyang taming
ug espada, moingon
siya:

gugma, gugma
ang hinungdan niining
tanan, gugmang
wala pa gani
kaayo nako natilawan
kay sa taas nga
panahon ako
man ang gihikawan

moatubang ang
tanang mangtas nga
kamatooran
mobulhot sa kalayo
mopagapkap sa ilang
mga pako
mopakita sa ilang
hait nga mga kuko,

mopadayon siya
sa pag-ingon hawid
sa iyang kasingkasing,

sala ba diay ang
gugma? makasasala ba
ang tinood nga
nahigugma?

2019/09/17

ang kahiubos sa apo ni lolo isko

si lolo isko haskang kuripota. 
nangayo si junjun ug bayad sa red cross stub
balig piso ra baya gayod pod unta
mihatag man apan dalag tugon nga
'ingna imong mama bayran niya ni, ha?"

didto sa Sanggutan ( laing ngalan sa
lugar sa kapongan)
atua si lolo isko tupad sa iyang baye.

"laing ladies drink, please" hatag
sa mubog lupad, lain pa tong gisuksok
sa panty nga usa ka libo.


takod....

gipriso
mo ang imong mga
balak
sa usa ka libro

nahimo kining
lit-ag sa laing
mibasa niini

midako ang
prisohan

napiit kas 
laing kalibotan

bag-ong Li Po

pagpasiga mo
sa suga
nadugangan
kag kauban


ang imong anino
kainom mo
karon

migawas ka
anaa ang laing
kauban
ang miabot nga
bulan

naa pa ang
mihunghong nga
hangin

ang lingkoranan
nga misapupo kanimo

karon daghan
ka nag kauban

sama kang Li Po
ug kang
Li Bai

sa tinood lang

sa tinood
lang kon sutaoon
wala kay lugar
dinhi

bisag asang lugara
wala kay lugar
kon magpuyo ka
mamahawa sila

sa tinood lang
bisan pag mohatag
kag lugar
wala gihapon kay
lugar

puno ka kaayo sa
gugma
diha sulod sa
imong dughan

apan magpabilin
kas lugar
nga wala kanimo
magmahal

dili sayon

dili baya pod
sayon ang paghimo
niini

migasto ka usab
ug panahon

ang dili nila makita
mao ang nausik mo
nga buot

kasakit nga morag
kandila nga nagsunog
sa iyang
kaugalingong lawas

nagtulo tulo sa salog
hapit na maupos

ang dili para imo gidawat mo dili para imo

wala mo gipamugos ang
imong kaugalingon

naghimo kag imong kaugalingong
agianan

ang dili para imo gidawat mo
dili para imo

gibiyaan mo ang maong lugar
namapha kas abog

karon ania ka sa imong panimuyo
milingkod kas imong lingkoranan

gilantaw mo ang imong hawanan
pagkabugnaw sa hangin.

stage 4

ah. wa gihapon nimo
hikalimti kadtong nahulog kas
bangag.

nga morag nabuak ang
imong usa ka itlog
unya maayong pagkapiang
ang imong tiil

nangayo kag tabang apan
gikasab-an ka hinoon sa imong
kadangag

nagpakahilom ka lamang
nag-ampo sa Diyos

ah, karong gabhiona sa usa
ka salosalo nakita mo ang nangasaba
nimo nga nagturong.

stage 4 cancer sa iyang utok.
pagkamakalolooy nga nilalang
gikasab-an sa Ginoo.

mahimong ang balak.....

mahimong
ang balak sulat bahin
sa imong tanang
kahiubos,

mora kag nagpahungaw
lamang
maong kulang sa nindot
nga mga
metaphors,

sa laing bahin mahimo
sang 
kabahin kini sa imong
gugmang wala ka 
buto,
maong mora kinig
dakong balon nga puno
sa hangin,

gamayng kainit
mobuto...

duna pay lain
mahitungod kini sa dili
mo masulti,
tungod kay dili angayan
tungod kay segurado kang
dili man sab nila
masabtan,

tungod kaha nga kon
mahibaw-an nila
matuwad ang imong
kalibotan
unya tanang butang
mangahulog nga
morag ulan?

unya ikaw man
lang hinoon ang
nabasa

nga morag piso
nga nawala sa
basakan
namatay sa tumang
katugnaw?

gara....

mao pa gani pag-abot nimo sa
manila, hapit sa ig-agaw nga asenso
na sa kinabuhi: naa nay balay sa usa
ka subdivision, bag-o ang kotse,
taas na og position sa opisina,
dako na kaayog sweldo,

milantaw kas noontime show,
gipalongan kag tv sa iyang anak
dayon nangutana silag "kanus-a man
ka mouli balik sa bukid?"

gara.

kadtong insik nga nakamenos nato

kadtong miabot ta sa iyang
party, dayon duna nay red california wine
sa table, dayon niyag kuha hipos sa
maong botelya nga mora bag wa
tay labot sa inom.

seguro iyang lantaw mahal ra kaayo
ang maong ilimnon alang kanatong
mayokmok.

di gyod makalimtan. asa ka? red wine.

2019/09/12

nakapabata

kadtong halok
mo kagabii
nakapabata
kanako, ako
nga natigulang
na intawon sa
kahaw-ang,

gitubuan ug
buhok ang
akong upaw
nga hunahuna
nagawsan ug
ngipon ang
akong dila.

2019/09/11

makalolooy nga mag-uuma

makalolooy nga
mag-uuma

ang tanan puros
misaka: abono, tubig,
sako, pang-ispri,
suhol sa trabahante,

gawas lang
sa presyo sa iyang
giani nga 
humay nga sa gihapon
gamay





daughter-in-law

gipauli ni liklik
sa iyang ugangan
ang tinonoan nga
nangka nga unta
isud-an nila sa
paniudto

"wala nay
kabutangan ang
among ref" giingnan
ang maid 
"dalha balik 
palihog"

ug nakaiyak baya
ang ugangan
dakog pagmahay
nganong ang iyang
anak nga lalaki
migawas pa man gayod
sa seminary
aron lang
magapos sa maong
tigre....

matod pa ni nanay rose sa dihang buhi pa siya isip inahan sa duha ka anak nga nahimong drug addicts

di masukod
ang kalipay
sa dihang
niabot silang
duha 
sa paghimugso
diha
kaniya,

milabay ang
panahon
nga silang duha
nanagko na

hangtod sa 
kadautan nga
panghitabo

unsang gatasa
kaha ang akong
napainom kanila?

gatas kaha
sa leon o kaha
ba sa tigre

basin nalihian
lang kini
sila sa uhipan
o sa bitin?

kaluha ba kaha
kini sila
sa sawa?

paghinumdom

ako ang
amo sa kabayo
nga puti nga
binuhi ni
Tatay.

didto ako sa
syudad 
nageskwela

ang kabayong
puti 
nabilin sa among
balangay
diin daghan ang
kumpay

palahubog si
Tatay
kon mosakay
sa kabayong puti
mapuno kini
sa kasaba
ug bunal.


niadtong gabhiona
gikapoy ang maong
kabayo
gigutom giuhaw

gisipa sipa niya
gipang-it pa
si Tatay maayo gani
kay wala kini
namatay.

kaniadto

ang dili nako
makalimtan hangtod karon
mao si Linda
nga nagsigig lantaw sa
larawan ni 
emanuel.

samtang nagtabyog
sa duyan sa bata nga
natulog
anaa si Linda nagsigig
handom ni
emanuel.

ako siyang gilantaw
sa iyang taas nga buhok
sa iyang nindot nga
dughan

mitutok siya kanako
nga iyang gitawag ug
Totoy
namalihog nga ako siyang
pulihan sa 
pagtabyog kay miabot
na si Emanuel
nga nagsakay sa kabaw
nga iyang
itugyan sa pasto ni
Tatay.

ang nahigugma

Dili mo baya
mapalit ang
adlaw.
Maglisod ka sa
mga bitoon.
Mapuyok mo ang
bulan
Dayon mog panghambog
nga ikaw
ang iyang kahayag.
Asa ka ba
padulong?

Si Panit, si Sima ug si Nador didto sa sitio Gata.

Panit ang gingalan kaniya sa iyang inahan nga si Sima tungod kay dunay ulat ang iyang mata nga sa sura-sura sa iyang mga kadula, tawgon sab siyag Pekat.
Morag dako gayod kaayo ug pagmahay si Panit sa iyang kinabuhi tungod kay tanang kamaot anaa na man gayod kaniya: potot, medyo manokon, sakang ang tiil, unya kaniadto bungugon pa gayod siya. Mas dako ug pagmahay ang iyang amahan nga gaduda nga dili kini niya liwat. 
Si Nador nga iyang amahan dugay nga nga manananggot. Milambo ang iyang negosyo sa tuba, kay nakat-onan man usab niya ang pagpangompra ug pagbaligya sa tuba sa iyang mga kaauban nga manananggot didto sa sitio Gata.
Witwitan kini si Sima. Daghang reklamo sa iyang kinabuhi. Wala niya gitago ang pagmahay nganong si Panit ang nahimo niyang anak. Lahi siya sa mga inahan diin ang gugma sa anak dili gayod hitupngan.
Si Nador naglipaylipay sab sa iyang kaugalingon. Kon mouli kini hubog na kaayo unya nanimaho nag pahumot sa mga mugbog lupad didto sa lungsod.
Nasabtan na ni Panit ang kalibotan.
Usa ka gabii niana gikuha niya ang hait kaayo nga sanggot sa iyang amahan, gisulod ang ilang lawak, dayog abis niya sa liog ni Nador apil na usab ang liog ni Sima.
Dayon sab niyag abis sa iyang liog.
Milanab ang dugo sa maong lawak.
Tulo lamang sila sa maong balay.
Tulo sab ang dungag kamatay.

dili ko mangutana kay sama usab nimo dili ka usab maghikutar....

dili na ko mangutana
sama nimong dili na sab maghikutar
dinhing balaya diin wala na usab ang
mga pangutana
kay wala man sab dinhi ang mga
tubag
nga ato na lamang gipakisama nga
anaa diha nagyampungad
atubang kanato nga tungod kay
kita na man kaayo
dili na sab nato nganlan o
pagaambaton man lamang....

nausab ka na baya
kay kon kanus-a mikusog ang ulan
mao man usab ang imong pag-andam
aron ka molakaw, 
manabo o kaha ba mamisita sa imong
higala nga dili na kadawat sa
kemo,
wala ko mangutana apan
mikuyog ka kanamo
sa sakyanan ug kon asa ka ihapit
ikaw na ang mosulti
kay igo man lang usab akong mosunod
sa imong gusto

milanding na ang bagyong ginganlag 
marilyn
nangabasa tang tanan paingon sa sakyanan
nga nakaparking gawas sa balay
samtang ang driver mipahiyom
nga para kanako adunay kahulugan nga
lalom apan sa ginaingon ko dili ko
mangutana kay sama usab nimo
dili ka usab maghikutar....

2019/09/10

kandiis

ang gihatag ni tatay
nako sa akong adlawan niadtong
grade one pa ko
mao ang plastic nga helicopter
nga birahon mo nga morag kote
dayog tuyok sa iyang mga piraw

molupad kini apan dili kaayo
taas dayog balik tugpa sa yuta.

dugay nga nga panahon nga
nadawat ni tatay ang mga pangutana
bahin kanako nga abi 
kog ako ra ang nahibalo sa mga tubag
niini.

namatay siya nga magul-anon
gibati ko pa gihapon ang iyang
pagkugos kanako
bisan pa sa maong kamatooran.

hinoon, kon lantawon ko ang
iyang hulagway sa iyang kabatan-on
dili maglagyo ang among
mga nawong.

mas lalom pod hinoon ang
akong kandiis nga morag mitiglom
sa akong aping.

patay tanan

karon gamita ang imong kagawasan.
si nanay nagdumili kanako sa pagkuyog sa lubong ni Nong Miguel. Kalit ang iyang kamatayon nga siya lang usa sa kamalig sa sinakong humay.
ingon siya, init kaayo ang panahon. Unya maglakaw ra paingon sa menteryo, Dili nimo kaya.
Pagpuyo. 
Gilantaw niya ang taas nga linya sa katawhan nga
nagsubo. Ilubong na si Nong Miguel.
Tuod man init gayod kaayo ang adlaw. Nahiyong ang mga dahon sa boganbilya nga pula.
Nagtabisay ang dila sa iro nga gihiktan sa punoan sa doldol.
Nakapangutana siya, unsa kaha ang gihimong bililhon sa iyang nanay nga wala mipakuyog kaniya sa maong lubong?
Panimalos sa batang walay buot. 
Ahh, ang iyang mga african daisies nga sa matag adlaw iyang ginabubuan sa iyang ihi. 
Tambok nga mga tanom, nga baga kaayog bulak karong ting-init nga panahon.
Giibot niya ang tanan african daisies ug iyang gilabay didto sa karsada.
Milabay ang daghang trak paingon sa bukid.
Patay tanan.
Ang mga itsura sa kanhiay bus-ok nga mga buwak
napidyat.
dili na gyod maispeling.
giandam na niya ang tanang bakak
aron dili mahibaw-an ang
kamatayon sa mga maanyag.

pinitik sa hunahuna

ang madyikero nangilad
sa mangingilad. duha ang giilad.
ang naninda ug dungog.
ang kawatan.
ang rabbit gikuha sa kalo nga
itom. 
nahimong buwak sa 
generasyon. nindot baya ang
panghitabo, ingon nila malipayon
ang tanan
sa dungan nga kamatayon.

ang usa nga nahibilin nangandoy
apan wala na ang Ginoo nga mohatag sa
iyang pangamuyo.


ang buwak sa henerasyon
ang mipatay sa Dios.
ang mga nangamatay wala na
sab namalik
bisan gani diha sa lawas
sa aninipot.

mugnaon pag-usab ang
Dyos. Labaw na kini sa langit.
unahan pa.
sulayan lang gihapon ug kab-ot
ang tua sa layo gamit ang
kuhit nga dunay hait nga
sanggot.

ang liog sa uniberso
dili na blackhole. Kon moabot ka
didto, ikaw na ang
mosulti kanako.

ako ang dili na
makaasoy sa imong
kagahapon.

kon wala pa kita nahitabo....

salamat
kon wala kitang
duha
nahitabo unsaon ko
kaha pagsabot
ang 
pagkamabudhion
sa tawo?

kini si Hudas
ug kini usab si
Kristo

gipapili ko ikaw
sa balaan

sagdi ako nga
mosandig una
sa imong
krus

dili baya usab
lalim ang
pagpaabot sa
mga bato nga unya
moulan
kanako

kon hagkan mo ako karong gabhiona

kon hagkan mo
ako

karong gabhiona
mananghid
kong daan nga laing

kahumot
ang imong
masimhot

dili na ako ang
imong maangkon

mabati mo na
ang kalainan

nagmatag buntag ang akong pinangga

usahay
sa pagbalikbalik
di na
masabtan kon 
migawas ka ba
o misulod

magmata kag
buntag
naglakaw ka
nga walay 
ulo

napapas ang
mga tunob
sa liki nga
salog.


nagmata kag
buntag
akong pinangga.

nag-amag ang
mata 
diha sa mga
agtang
nga mabudhion.

ang kandelang
puti
giribonan na
ug itom.....

5 STAR hotel

mao ni gidangatan nimo.
saon man, bisag asa ka ibutang kwarta man lang gayod ang naa sa imong utok. Unsaon paghimo ang daghang kwarta? Asa iistak ang maong kwarta.
ang tiles sa imong pito ka lawak nga mansion tag 5 thousand ang buok. Ang kahoy nga gihimo nimong agianan paingon sa imong swimming pool, gikan pas malaysia. Kadtong tiles gikan pas Italy.
Paborito mo sa Rah, sun god. Nagpahimo pa kag shrine para niya.
Gil-as pamation nga gikan kas kapobrehon. Tigsab-og rag tubig imong erpat kaniadto. Tiglala sa banig imong nanay. Nakalusot kas kapobprehon tungod lagi kay utokan ka man. Migasto ang pari nimo. Nag first honor sa high school hangtod sa college. Haskang brayta gyod nimo dodong.
Nausab ang imong timplada. Taas na kaayo ang imong pangandoy. Nihasama kas tore ni david. Nakalimot kas abog mong kagikan. Sa lapok mong dalan.
Naabogado, Nahuwes. NagMakati. 5 STAR hotel na kaayo imong dating. 
Disbarred karon.
Basin mapreso pa gani ka puhon. 

mawala ang mga kabalaka ug sa kalami makabalak ka.

ania na ang nindot nga
lit-ag sa gugmang
mihubag

halok gikan sa buhok
paingon sa
kiting

inig abot didto manirado
ang tiil

mokitiw ang mga tudlo
malubong ang mga kuko

mapiit ang imong liog
sa duha ka puti nga paa

mawala ang mga kabalaka
ug sa kalami makabalak ka.

kabahin sa giguba mong tulay

ang duha ka
isla
magpabiling
isla
bisag gub-on
mo pa ang
tulay nga nagsumpay
nilang duha.

manubo lang gihapon
ang mga lubi nga
nangapulak.

manaha lang gihapon
ang mga saging

mangudlot lang gihapon
ang mangga.

mas malipayon ang
suba kon wala na ang
tulay 

madungog mo ang iyang
awit

mobalik na ang sakayan
silong sa bulan


maghangos ang duha ka
managtrato

sa ibabaw sa sakayan
sa ilang init nga gakos

sa ilang pilit kaayo nga
mga halok.

panas nga yuta

panas ka nga
yuta sa akong
binhi

gisabwag ko
ang mga liso sa
mais

maayo man ang
ulan ug ang kainit

ingon gani sila
nagpista daw ang 
langit

dinhi sa akong 
payag
ang kalaay namayagpag


wala koy nakita nga
mitubo
bisan na lang gani
ang gamay kaayong
paglaum.....

kutob lang kitang duha dinhi

sa kinawat nga
higayon

gihatag ko ang
halok

nagdali ang panahon
nga masakpan
sa nagpahipi nga
kahayag

kutob lang kitang
duha dinhing
dapita

nangabasa nga dila
diha sa mitak-om 
nga baba.....

2019/09/09

panaw sa luha

ang atong
uyab, bisag gisip-on
lami lang
gihapon.

sa halok, dayog
piyong sa mata,
matagamtam
ang kaasgad

mihinumdoman
mo ang panaw
sa luha. 

Basin Puhon....

wala nako na siya ripa. Maoy asoy sa CHDF nga nadakpan duha na ka tuig ang milabay. 
Si Rita, minyo, kasado kang Kardo, nga siging wala sa ilang balay didto sa Sinuyak. Duna silay anak, usa na ka tuig kapin nga idulog niya matag katulog, sayo sa kagabhion, inig human nilag panihapon. Wala si Kardo tua sa lungsod nagbaligya sa gamay nilang kopra. Kon makauli kadto, seguradong hubog.
Nag-ulan ug kusog. Si Rita lang ug ang iyang anak nga lalaki didto sa taas sa payag. Bugnaw kaayo ang kagabhion.
Si Tonio, atua sa silong, nagpaabot kon kanus-a motuhik ang ulan kay mouli na usab siya sa iyang gipuy-an didto sa Ilihan.

Mikanaog si Rita, giingnan niya si Tonio nga mosaka kay kuno galain ang iyang ginhawa. Gipanuhot kuno unya gustong magpahilot sa haplas nga epikasent. 

Gihubo ni Rita ang iyang sinana,nagtalikod, unya gikuha ang kamot ni Tonio aron ipamasahe ang iyang likod. Nakulbaan si Tonyo. Apan mikalit kini si Rita ug atubang kaniya, wala nay sapot, Miluhod kang Tonio, dayog hawid sa iyang bakos, gitantang kini, ug gihubo ang iyang karsones.

Nahitabo ang angayng mahitabo. Mipatong si Rita kang Tonio dayon nahuwasan kini, Nawala ang panuhot dayon giingna niya si Tonio nga ilang duha ra unta kini.

Wala mitingog si Tonio, gisuot ug balik ang karsones, gihugot ang bakos, dayog kanaog sa maong balay. Ang batang lalaki nahinanok kini sa katulog tungod sa kabugnaw sa panahon, putos kaayo sa iyang habol. 

Unsang hitaboa nga nabaniog man ang tsismis, nga si Tonyo niadtong gabhiona, nga kusog ang ulan, dugay daw nga atua sa taas sa payag ni Rita.

Nasuko pag-ayo ang bana ni Rita bahin niini. Miangkon si Rita apan igo lang daw siya nagpahaplas kang Tonio tungod kay gipanuhot siya. Galain ang iyang ginhawa.

Sa  dugay nga sukitsukit, miiyak si Rita, madangoyngoy, dayog ingon nga gipanamastamasan gayod siya ni Tonyo, gitiunan ug pusil, maong wala gayod siyay nahimo. Wala kini niya gitug-an sa iyang bana tungod kay nahadlok siya basin unsa unyay iyang buhaton kang Tonio.

Nahitabo ang angayng mahitabo. Nagkwarenta na alang sa iyang bana. Si Tonio atua sa prisohan. Nasilotan sa iyang kasal-anan.

Si Rita, naghandom lang gihapon, basin puhon, basin puhon.

Bisag wala ang dumot.

Gamay siyang pagkalaki.Maalaan nga dose o kinse anyos. Itomon, mubo, hait ang iyang mga mata.
Gipangutana nako siya, kon nganong gipatay niya ang biktima. Ingon siya, tungod kay iya kong gigukod, unya dako man siyang tawo, naigo man gani sa iyang kinumo ang akong likod, apan wala ko natumba. Midagan ko, sige ko gihapon niyang gigukod. Sa akong kakapoy, unya wa naman koy kapaingnan kay pangpang na man ang unahan, mihunong ko ug ako siyang giatubang, dayon nakog handos sa akong hanting diha sa iyang tiyan, maong nagisi kini unya maayong pagkayagyag ang iyang tinae, dayon niyag kahayang. Milanab ang dugo. Giseguro nako siyang mamatay, maong akong gidugangan ug handos didto sa iyang dughan. Nagsiga ang iyang mata, apan wala ko batiag kalooy. 
Nganong imo man siyang gipatay? Duna ba kamoy dumot? Ingon siya, sa way pagpamilok diri kanako, tungod kay iya lagi kong gigukod. Gamay ko. Dako siya kaayo. Pangpang na sa unahan, unya kon dili nako siya patyon, ako man ang mamatay.
Dili ko ganahang mamatay Sir. Serbesyohan ko kinig otso dose. 
Otso dose? 
Misagbat ang Fiscal nga naglingkod sa lamesa. Otso ka tuig hangtod dose ka tuig. Naay tigtambag nila didto sa Provincial Jail. Si Mulok, kadtong mikidnap ug mipatay sa usa ka dose anyos nga bata didto sa Ilihan. 
Karon, mitoo na ko, nga dunay tawo mopatay bisag wala sila nag-away. Bisag wala ang dumot.

feeling alone and yet happy

soft opening
pas oceanpark

selfie with the
macau parakeets....

dili pod kaayo
dakong hotdog
sa
resto tupad sa
gift shop

daghang nag-inosarang
nag-atubang sa
celfon.

pagkat-on sa pag-inosara

nakat-onan
ra ang pag-inosara

lisod na dawaton
pagbalik 
ang imong 
pagkuyog

nabalik na
kanako ang
akong mga pako

higala ko na
kaayo ang
hangin

wala say puas
ang hinguyog nga
mga panganod

walay kisaw ang
langit
karong gabii 
mga pahiyom
sa bitoon.....

2019/09/05

hungarian dance

giisa nako ang
akong kamot
aron kab-oton ang
mga bitoon

mikiay ang akong
hawak
gihawiran sa usa
ko ka kamot

dayon nakong
karatil ug dagan
gukod sa akong
kinabuhi..................>>>>>>>>>>>>>>>>>>>>$

tres lagrimas

kabahin man
unta kining awita
sa sugilanon sa
tulo ka luha apan
nganong maayo
man nimong sayaw
diha?
pagkanindot mong
mokiay
pagkabugdo ba
sa sampot
mo inday....

ahh, kalipay ba
ang kasakit sa uban?
dili pa ba 
kaayo nindot ang
pagkauga sa tulo
ka luha?

mananayaw

misayaw ka
sa tunga sa plaza
ang tanan
nanglabay lamang
wala gani
mitan-aw

misayaw ka
sa ilalom sa imong
ulan
basa sa luha
ang imong
suwang.

mipahulay
kas ilalom sa
kahoy
milingkod ka
sa bato

wala silay
madungog
sa imong
kaguol ug
kakapoy.

banag asawa

bildo ang imong
sumsuman
sa gasolina nimong
sawsawan
kinilaw mong
baga
samdan ka
sunog pa
gamhanang 
mabudhion 
gikulata ang
asawa
karon patay na
apan nawili pa
siya.

2019/09/03

kabahin sa daghang disgrasya karong adlawa

daghang nahitabong
disgrasya karong adlawa

amahan ug duha niya ka
anak nga nagsakay sa motor

unsang hitaboa nga mibangga
man ang maong motor sa
trak de carga
silang tulo puros patay.

nasunog ang barko gikan
sa cebu paingon sa dapitan
alas onse sa gabii dunay
mibuto durong dagan sa
mga pasahero palayo sa
gadilaab nga kalayo
tulo ang klarong naihap
nga patay apan ang laing
baynte kwatro wala nay
klaro.

milupad ang gamay eroplano
gikan sa dipolog sa may alas dos
sa hapon paingon sa manila
dalag pasyenteng australiano
nga gatinga tupad sa iyang batan-ong
asawa kuyog ang usa ka doktor
duha ka pilot ug tulo ka nurse
patay gihapon tanan....

si mrs zanoria nga misakay sa
easy ride balik sa katipunan gikan
sa dipolog tupad sa driver 
nangutana kabahin sa bag-o
na usab nga disgrasya didto sa
kurbada sa galas unya ang driver
siging pangambot samtang
hugot ang hawid sa manebela
lantaw sa daghang nanglabay
nga mga estudyante nga nangawas
sa eskwelahan niadtong hapona.

ingon siya nga morag nasuko
ang maong driver unya mitubag
ko niya nga ayaw paghisgot ug
disgrasya ug kabahin sa mga patay

ayawg pangutan-a ang tambok
nganong nanambok
ayaw ingna ang walay nahot 
kabahin sa presyo sa tambal sa
panohot.

sa Novo

alas dos sa hapon
nabanggaan ang
bata sa MUX 
patay
miabot ang pulis
sa nagkadugo nga
dalan
iyang gihabolan.

kabahin sa kahoy ug sa kinason

nakita sa kahoy
sa mga mata sa iyang
dahon ang
nagkamang nga kinason

bata pa ang maong
kinason
gili pa kaayo taas ang
iyang dila

naghinayhinay kinig
saka sa iyang gamot
paingon sa iyang sanga
paingon sa iyang
dahon nga puros
mat-an

nalipay ang maong
kahoy
sa batan-on pang kinason

dinhi natulog ang mga
mata sa dahon
nahimong panganod
ang maong kahoy....

Panginhas dire