4/28/2019

ang gihandom mo nga gubat, ang nahitabo human sa wa nimo maantos nga kunuhay pagdaog-daog

ang mga nahibilin
dili na mag-iyahay sa
paglubong sa mga
patay
inigkahuman sa 
matang sa gubat 
karon

ang mga nahibilin
naghambin sa dakong
kahinugon
nganong wala pa 
sila maapil

dili mainom ang tubig
init ang dagat
maaninag pa man
gani ang
panumduman
sa mga nakitang 
mga ugat
sa kamot
ug sa mga bukog
sa tanang
mga lawas

kadtong misupak
sa sugo nga dili molantaw
sa dakong ulbo
sa kahayag
ug sa pagtabon sa ilang
mga dunggan
aron dili madungog
ang nahisama sa dugdog
ug kilat
anaa
puros na mga buta
nga nangita kon asa ang
ikog sa maong elepante
kon asa na kaha ang
ilong, ang mata
ang taas nga ngipon
ang ikog nga naalaan
usab nga usa lamang
ka ilong

wala na ang mga
kahoy
ang mga sagbot
ang mga isda ang
mga kalanggaman

tungod kini lamang
sa kahabog sa garbo
sa kahalab sa usa ug
sa pagkawalay pasensya
sa usa

kon nasayod ka lamang
sa ilang giawayan
mabuang ka: kugmo lamang.

ang kaasgad
dili lami sama sa nahanaw
nga dagat.

buta nga patriotismo

manghambong ang
armas
gustong mosulong
andam na ang 
mga buluhaton sa
usa ka dakong 
gubat

haskang tuloga
sa puya didto sa
duyan

samtang ang iyang
inahan
atua pa sa silong
sa balay
nanglamba sa
nanimahong lampin

naturallismo

amang ang bulan
salimuang ang hangin
piang ang kabuntagon
sa gisakit
nga kagabhion.

4/26/2019

kanang hapit na kita malumos ug mamatay

wala pa ako
kaayo
nalugo sa kinabuhi

kon aduna man
ugaling
wala pa ako
kaayo masikwate
niini

busa ania
mabaw pa ang
akong
gitindigon
unya dili pa kaayo
tin-aw ang akong
gipondohan

kinahanglan pang
molakaw ako padulong
sa layo
hangtod nga ang tubig
moabot na sa akong baba
hangtod nga 
maglisod na ako
sa akong pagginhawa

dili ko molangoy
gusto nakong mabati
kadtong hapit kamo
malumos ug
mamatay

wala pa ako miabot
niini
busa pasayloa
ang akong kamabaw

kon moabot man ako
niini
sabta ang tanan
sa mga gidangatan

magpabilin kang
magmingaw
sa akong
pagkawala.

paghandom

dili lalim kon
anaa ka sa taas
sa pangpang

abi mog nindot
abi mog kini
kalipay
ikaw nga nagpungko
diha dapit sa
ubos

nagsigi kag
pangutana diha
sa shagit
kon unsa ba gayod
ang bation kon
makita na ang tanan
diha sa pangpang

kon unsa ba ang
bation kon mahikap
mo na ang mga panganod
kon unsa ang lami
sa makitkit nga
mga bitoon
og matam-os mo
ang bulan?

wala ako mitubag
kanimo
ania, gihandom ko ang
patag
sa nagkurog kong mga
tuhod.

alang kang Taslima nga miingon nga aron mabuhi ug gawasnon kinahanglan makamao ka gayod nga mamakak

Taslima
karon ka pa ba miabot
dinhi?

karon ka pa ba nakaamgo
nga aron kita mabuhi nga hapsay
magsigi kitag pamaka?

ay, Taslima, hagbay ra akong nasayod
niini, 
nagsugod kini sa dihang nakahawid ako
ug tirador dayon maayong pagkaigo nako
ang manok ni San Pedro

mitug-an ko nga naay San Pedro
nga naay iyang manok
unya ang iyang manok akong naigo
kang San Pedro kadto
busa ang tanan mitoo.

wala nasuko si Papa nako
wala ko bunali ni Mama.

gani, wala silay undang ug pangutana
kon unsay itsura sa manok ni San Pedro
kon unsa kataas ang bungot ni San Pedro
kon siya bisag tigulang na
usa ba ka gwapo.

4/24/2019

alang sa china

nabalita ang 
pag-abot sa mga war ships
sa china
didtos scarborough shoal

gidugangan pas
mga larawan diin
gipanghakot ang
daghang
mga giant clams

ato ang scarborough
ato ang mga giant clams
gipanghakot sa mga insik

gubat na gyod ni
dili mahimo
maoy tutsada
sa patriotic
pinoy

gubat? asa ka?
gubat nuclear?

sa akong kabahin
ingna ko nga talawan
kasilagi ko bahin niini

apan dili ko 
makig-gubat tungod
lamang sa usa
ka kugmo

dakong sakripisyo
ang ihalad sa usa ka
kalinaw

oo, ako nga 
talawan
magpadaog-daog
gayod lamang

tungod sa bulbog
ug sa mga isda
tungod sa mga
pawikan
ug sa mga
tambasakan
aron sila
mabuhi lamang

(hinoon sa laing
bahin, andam na
ba ang imong
mga bato ug
tirador?)

intimacy

mas lami
pa ghihapon ang
tanday tanday sa
duha ka
paa

kaysa kapoy kaayong
 kiyod-kiyod
sa tulo ka
pus-on ug
lubot

bahin kanatong duha

dili kini
kabahin sa milantaw
kanato
kadtong milabay lang
sa atong bentana
samtang 
nagsalo kita sa 
tsokolate ug
puto maya

kabahin kini kanato
kita nga
nagsalo sa tsokolate
ug puto maya
sulod ning kan-anan
ni maria
sa kilid sa iyang
bentana

mibunok ang ulan
unya ang mga
nanglabay
nagkadiaya ug 
panagan

kabahin kini kanatong
duha
samtang mibunok usab
ang kusog nga ulan
sulod ning atong dughan
unya
way usa kanato 
ang misulay paglikay
o dagan
aron mangitag
pasilungan.

mangutana lang.

hangtod kaha
kanus-a nato makita
ang kalipay sa lagong
nga sa 
tae sa kabaw nagpatong?

gipangutana pod ba
kaha nato
ang atong mga kaugalingon
kon ang mga lagong
usab
nakapangutana bahin sa
atong matang
sa kalipay?


balak sa akong panahon

kon ania
si lao tzu sa akong
panahon
sulod sa akong
dakong lawak


alas tres sa kaadlawon
kanang 
wa ka kabalo kon
unsay buhaton

sa kahamugaway
sa air con
dris akong room

mabati pod kaha niya
ang balak sa akong
panahon?

awit sa hangin nga
gikan sa
machine.

4/23/2019

pagpamalak

nagyamayama ka sa
tungang gabii
duna kay nabungat 
sa bulan
nga nadungog sa
batan-ong lalake nga
nanulo sa suba nga
nakakuha ug kalong
nga nakahadlok kaniya
kabahin sa gidungog
nga abat sa 
sitio Supat.
kon nasayod pa lang
unta siya
diha sa imong pagsalimuang
sa mga damgong
wala gayod matuman
kon natun-an pa unta
niya ang imong
naagian,
makaingon gayod unta
siya
kon unsa ang
pagpamalak

kanato

kon mabasa mo kini
sama sa gihapon bation kag
kalood, 

walay lami, wala kay makitang
kaanyag
walay bag-o
walay angay nga kamingawan
walay angay nga
ipanugilon pagkaugma damlag

apan gibasa mo gihapon
kini 
gitultol matag buntag ug
gabii

kini mao ang nahisama
kanato.

4/21/2019

ang tampalasan

ang atong
tubag sa mga pangutana
nga kabalo opod baya
sila sa mga tubag
apan ambot gusto gihapon
gayod nilang
madungog gikan kanato
bisag nahibalo na silang
ang pagtubag niini makahatag
lang natog
kasakit mao lang gayod
ang kahilom dayon duyugan
sa hilaw kaayong pahiyom
dayog talikod sa usa ka
walay puangod nga
tampalasan

bayabas ug kapayas

human masaka ang
punoan sa kapayas
human makuha ang
hinog nga kapayas
human mo kini mapikas
human mo kini makaon
wala na dayon ang
kapayas
bisan gani sa kahumot
sa hinog nga kapayas
sa laing daghang punoan
ug hinog nga mga bayabas
wala na gayod ang kapayas.

uros uros

kalbaryo sa simod sa kanding
ang paraiso sa siwil

sama nga dili sab katood ang
bungot sa siwil sa tumoy sa hait
nga sungay sa kanding

managlahi ang paraiso sa tagsa
tagsa ka nilalang
daghan sab ang mga dios-dios
sa gugma-gugmang gauros-uros

lapok

lisod hunahunaon nga
ang imong ganahan mao man
kadtong dili
ganahan nimo
unga kadtong ganahan nimo
dili ka ganahan, 
lisod kwenahon ang mga
panghitabo
walay suman total ang mga
kahigayonan nga
nausikan apan unsaon ta man
nga mao may
tinood
walay gayoy dramang mahitabo
kon wala ang
kalbaryo
walay lami ang kinabuhi kon
dili aslom
kon wala ang kaasgad
kon talagsa ra ang kahapdos
saon ta man nga
mao man gayod ang tinood
dili matudloan ang kasingkasing
unya bisag unsa kahait ang
salabotan
magpabiling habol kini
sa gugmang bato
dili gani kadulot sa
mga lapok nga
pagbati....

4/16/2019

silang galutaw ug milabay lamang

lakat
padulong sa bukid
katkat
paingon sa 
taas
inig-abot nimo
didto
pangutan-a
ang mga panganod
ang hangin
kabahin sa imong
kahaw-ang
sa imong paglutaw
lutaw.

lingkod
panamini ang imong
taas na nga kuko
sa imong tiil

dungga ang imong
tunob diha sa bato
sa bungtod
nga gapakahilom
usab sama
kanimo

katie

pagkadaghan
sa mga labat ning
atong kalibotan

nagkulang na gani
ang mga pultahan

ang tanang maanindot
gibentanaan....

kahinumdom ko

kadtong 
nagkita tas davao

ako lang
seguro kadtong nangitag
enkwentro

gusto nimong
mosaka sa hotel
Uno
aron mosulod
sa akong 
kwarto

gibati kog
kahadlok basin
ug dili nako unya
kayang
maglukdo ug
daghang bagolbol sa
ako unyang mahimong
salaod

migawas kog
ako lang
unya kuyog tang duha
kutob ras
inom inom ug coke
pang-it ginagmay
sa humok nga mamon
hawid hawid sa kamot
tilaw tilaw sa 
sa lunok

dili mo gusto
ang chicharon
kay sabaan ra kaayo
ang iyang kagumkom

ang bolero ug ang kiat

kihat sa bolero
gipatolan sa 
hingwarting 
kiat

kuyog sa
kagabhion
kalipay
nga wala
madayon

way kwarta
ang bolero
nawa ang
katol sa kiat.

tango kriminal

gituyo baya nimog
tunob ang akong tiil
sa dihang nagtango tang
duha unya ang imong
kasingkasing
gaawas sa kapungot dihang
miarangkada sab ang
akong uyab kaniadto
sa pikas nga tampi diin
ang iyang gisayaw mao
ang tango kriminal
unya ang iyang dila
midiwalwal.

komedya

mas labaw ang komedya
kaysa politica

pero dili kalikayan usahay
nga ang ars poetica usa usab
sa biktima
sa biga sa politika

mao rang nawnga sa ungo
ug sa wakwak
sa anghel ug sa santos
sa altar sa
kaikag ug kasina...

kawras sa gugma

makasina sab ning
duha ka aninong gairing-iring
silong sa nagtibook
nga bulan

sabton ko na lang
nga di baya lalim kon makit-an
ang gugma diha sa
matas iring

anaa nabukog nga dagway
ang usa
kay gipakawras man ang
liog
sa kulungon og buhok

4/15/2019

kritika y kritiko

ang kalinaw
anaa lamang sa sulod
sa kasingkasing,

ang pagbag-o
anaa lamang sa sulod
sa kasingkasing

ang mga sakto, ang 
mga kamatooran,
ang pag-laom ang
pagpangita sa tanang
angayan kanato
ania lamang kanato

ayaw ug syagit diha
kay nabungol ko
ayaw panaway diha
kay ikaw usab
dakong salawayon

bungol buta ba ang
imong kasingkasing?

pag-alili ug pagpili, abi nako.....

gipili ko sa GMA
gialisdan nako sa
Erap

abi nako og moasenso
na ang pilipinas......

gialisdan nako si
corona
gibutang nako si
sereno
abi nakong sakto na
kini

abi nako lang....

mogawas lang gihapon ang tinood

wala ko kadongog sa sama kaninyo
nga moingon nga kamo usab saypan
ning panghitabo karon

gikan pa kaniadto, sa gamay pa ako,
sa inyong pagpanaway, kamo lang gayod
ang sakto, ang sila, mao kanunay ang sayop
ang mga walay puangod

sa akong pagkaulitawo mikuyog ako
kaninyo, panon kita sa nipis nga agianan,
naghuot kita sa atong mga pagsyagit,
nag-aligi ang atong mga kapungot,

sa likod nato, daghan ang nahapla,
dunay nangamatay, apan kutob ra kita
sa pagsugid sa ilang mga ngalan,
unya ang ilang ginikanan, atua walay hunong
ang pagmahay, nganong kita ang
nagkuyog sa panon, misulong, dayon
mibiya.

miabot ang kabag-ohan sa akong kinabuhi,
wala na ako mitoo sa panon,
wala na ako diha sa kadaghanan

sa akong lamesa, anaa ang usa ka init nga kape
ug ang gamay nga pan,
alas tres na sa kahaponon.
sa akong bentana makita ko ang
kainit sa panahon, diha sa nangaloyloy nga
dahon
apan bisan pa niini
gikalipay ko ang gamayng kabugnaw sa 
hangin gikan sa kabungtoran
likod sa akong balay
lahos sa akong mga bentana nga abre
kanunay
sa pultahan nga walay
kandado o trangkahan

abre ang mga pultahan sa akong handomanan
ug sa akong mga gihandom
anaa ang bolpen ug blanko nga papel
sugdan ko na usab
pagsulat ang mga ngalan
sa mga gipatay ug sa nahibiling
mga buhi 
apan wala na dinhi sa atong lugar

nagpakahilom na usab sila
nga mora ba nga sama kanako
dili na kaayo ganahang
mangilabot

dayag gihapon ang mga bakak
dayag gihapon kaayo ang nagbalikbalik nga
kasaypanan
apan ang paglaom anaa kanunay
kay sa kataposan
mogawas gihapon ang tinood
unya kadtong sad-an
sa kanunay
pagasilotan. 

ang saktong panahon

daghang nangamatay
daghang gipamatay
tinood na
dili nato kini ikapamakak

dili kita ang mamumuno
daygon nato kining kamatooran

oo, miagas mibanak ang dugo
apan kinahanglan gayod
dili kita ang mamumuno
naglantaw lamang kita
kita ang namati
kita ang milubong kanilang
tanan sa hilom

ayaw pamatia ang ilang
pagpanghimaraot kanato
unsa ba ang atong sala?
kita lamang ang naglubong
kanilang tanan sa
kahilom

ang panahon nagpili sa
angay niyang buhion
siya ang nagpili sa mga 
binhi aron pabuhion ug
molabong
sa umaabot nga saktong
panahon

anaa ang antulihao
nagsyagit sa patay nga isda
nga iyang tula
anaa ang agila nga midagit
sa piso
nga nagpakahilom usab sa
kabusog
samtang ang inaan misyagit
sa kasakit
ug kamingaw

ang panahon makamaong
mopili 
kon unsa ang angay nga
mahitabo
kon kinsa ang mabilin
kon kinsa ang mabuhi

ang panahon nagpakahilom usab
duyog sa atong kahilom
apan human na niini
moabot ang atong sakyanan
paingon didto sa laing dapit
aron sugdan na usab nato
ang kabag-ohan ug
pagtubo 

pagpamilok

miabot na akog 
saysentay otso
makaingon kong
daghan na akog
nakat-onan sa paglabay
sa panahon

gikapoy na akog
labanlaban niadtong
imong mga anak
kadtong nakapakita nakog
dakong away
ug kasamok

natagbaw na ako nianang
pagpili sa imong mga
manok nga
igsalabong
sa akong paghandom nga
mausob ang dagan sa
akong kinabuhi

ang limbongan mipuli sa
laing limbongan
ang karaang bakakon nga
atong gialisdan
napulihan sa mas labawng
bakakon
ang demonyo nga ikugan
gipulihan nato ug laing
sungayan

walay mapili kanila
apan kinahanglan gihapon kitan
mopili

gipili ko ang sungayan nga
mipakaon sa batang puya
gipili ko ang ikogan nga
mibunal sa sawa
gipili ko ang demonyong nagdaob
sa lasang
aron mabati nato ang kainit
sa ngitngit ug bugnaw nga
panahon
aron makita nato ang kahayag
sa sydad nga sa kanunay
naghimo kanatong mga buta
sa atong mga udtong tutok.

wala ako manghambog nga
mopili ako ug anghel
wala nay anghel dinhing dapita

wala ako miyukbo sa ginoo 
dinhing lugara
kining lugar sa mga kawatan
ug mga mamumuno

samtang ania pa ako dinhi
gipili ko na ang pagpakahilom
apan ayaw sabta nga sa pagpiyong
nako sa akong mata
nga ako nabutaan na

mopilok pilok ako panalagsa
aron lamang sa pagsulti kanimo
kon unsa ang angayang buhaton
samtang ania kita 
sa paraiso sa tanang 
demonyo.

alang sa kabag-ohan

puros baya sila bakakon
kadtong nagmaisogon nakat-on
usab sa pagpatay

dili tanang nakapatay sad-an
dili sab tanang bakakon kasilagan

dunay namakak aron salbahon ang
nasod
dunay mipatay aron molambo ang
atong kaugmaon

kon dili mo kini makita nan nabutaan
ka lang sa imong pagpangita sa
wala na diha

kon dili ka makamaong mopasaylo 
nan dili ka tawo

alang sa kabag-ohan moipis gayod ug
dugo ang mga demonyo
mamansahan usab gamay ang mga
balahibo sa imong mga anghel. 

May silbi ang ilang kamatayon


Andama na ang imong banig
unlan ug habol alang sa kagabhi-on.
Ayaw kalimti ang panyo
nga mopahid unya sa luha taliwala
sa imong kahilom
Sakit ang mabiktima,
pero mas sakit huna-hunaon
nga gigang-gang mo mismo ang imong
mga kamot ibabaw sa nagdilaab nga kalayo
Imposible ba ang pag-angkon
og mata sama sa iring aron
makit-an mo ang pagdagsang sa mga
dautang lihok sa demonyo?
Ayaw sungsungi ang imong dalunggan,
kay bisan pa sa kadugayon,
buhi pa gihapon ang saysay
sa atong mga bayani
Ayaw pakawad-a ang ilang kamatayon

On "one-night stand" offered by Duterte


"Para kang puta na naniwala sa pag-ibig
ng isang pokpok"
- Heneral Luna movie

Giunsa mo man pagkuso-kuso sa imong
tanlag, nga bisan og gihayhay
mo na kini sa ilalom sa udtong tutok
lagom man gihapon?
Makadismaya ang sabon
nga gipagamit sa imong ginikanan
kay wala may epekto
Mas epektibo man kanimo
ang pasalig sa demonyo
nga sama sa kinawat-kawat nga kalipay
ang sangputanan
mao ang imong pagkahagsa
Mas gipalabi mo man ang imong garbo
sa naangkong pekeng kaalam nga gipatik
sa demonyo sa imong alimpatakan
Kaming tanan naalahig

4/14/2019

Lalom


Gikatulgan na niya ang pagsidlak sa adlaw
Ang pagsalop sa adlaw dili  na mahulat

Kapoy na  og handom
Kapoy na og damgo
Kapoy na og pangandoy

Gibalibaran na sa makalolooy
ang nagdagsang tubig
nga haw-ang sa  kahidlaw

Walay-timik ang iyang mga ngabil
Hinay na ang iyang mga lakang
Lalom ang pagkatuslak
sa iyang bagulbagol







4/12/2019

akong kapakyas diha kanimo

wala gayod ka
kakita bisag usa na
lang ka hupas nga
bitoon sa
akong gialkitran nga
langit. 

saktong timpla

kulang lang gihapon
dili kaayo lami
kulang kaha sa asin
o sa asukar?

lisod kaayo tugkaron
ang timpla sa 
tigtilaw

kana kay nag-alagad
ka man kaniya

kinsa bay mokaon sa
imong niluto? nganong
siya man?

mas lami ang atong
kalami. Kita ang mokaon
sa atong giluto.

wala silay labot. Busa
padayon diha kay mopadayon
sab kog ako. 

4/11/2019

gugmang amang....

nagpasalamat kos
imong pagkaamang

anaa nagpabilin pa
gihapon ang mge misteryo
nga dili nako
mahuman pagsulat


ang imong mga kamot
dakong amang usab.

gabasa ang imong
mga ngabil

mga tigre ang imong
mga mata nga nag-atang

sa imong baba, unya bisan
pag daghang halas ang 
imong mga buhok

bisan pa niining tanan
maanyag ka pa gayod gihapon
diri kanako. 

ako lang ang nakasabot niini

pagsukad nimos
pamahaw
wa damha nga
nagtagbo ang atong
mga mata

way kisaw ang
kusina
unya imong mata
morag nanakbas
kabahin sa dili
nimo
masugid

nakasabot ako 
niini
busa gipasagdan
ka nako
sa dihang
gihiwa nimo ang
milabay lamang
nga dyutyng
kahilom.....

kon nasayod ka
lamang
hagbay ra usab
nga nagdugo ang
akong kahaw-ang

ang kahumot sa
aso sa kan-on
nga bag-ong gihaon
miabot sa
atong langit.

butang gugma

nindot man gyod
ang iyang mga mata
pagkabalod sa
iyang pilok
pagkalamiang
tam-osan ang iyang
ngabil
laming tilaan ang
iyang aping
ug dakpon ang
iyang dila sa akong
dila....

bahala na og
dili siya
tinood.

ang mangingilad

ang mangingilad
nag-ampo nga unta
dili na nako siya
tawgon nga mangingilad
kay siya nasakitan gayod
kaayo kabahin niini.

nga unta magbaton kog
delicadeza kabahin sa
pagamit sa maong 
pulong.

4/09/2019

labay lang


milabay lang ko
sa inyong dakong syudad
nga sa kadaghang tawo
ambot nganong gibati 
pa man gihapon  nako ang 
tumang kamingaw 
ambot ngano nga sa kalami
unta sa mga pagkaon
wala man ako mabusog.

paghikalimot

pagkahuman nakog
adto sa maong dapit
nawala ka na kanako
wala na ako nagpangita
kanimo,  ang akong
gipangandoy kanunay
karon usa na lamang
ka payong nga bisag
sa ulan dili na nako
mahinumduman.

4/08/2019

kuyog sa panon didto sa panglao

giandam na ang mga lingkoranan
ug mga lamesa alang sa kagabhion
sa daplin sa baybayon sa panglao
diin ang mga tawo kuno malipayon.

isukad na unya ang mga pagkaon
iipis na usab ang mga ilimnon
daghan sila nga maghinangpon
paingon sa ngitngit nga kagabhion.

mokuyog ako sa panon
modutdot ako sa kadaghanan
molamog ako sa ilang katawa
aron matabonan ang akong kahingawa.

el nido

unsa ba ang akong
mahinumdoman bahin kanimo?

lain ang akong gihunahuna
dili ikaw, 
wala akoy masulti bahin
kanimo.

naunsa ba ang akong
gipangita? kadto mang makalanag
sa akong kalag

ikaw nga makasakit kanako
nganong ikaw man?

ikaw nga mogun-ob sa akong
kalibotan, nganong ikaw man
gayod?

ikaw nga sama sa halas mopaak
kanako
nga makamatay kanako?
nganong ikaw pa man?

kinsa ba ako nga nangandoy sa
akong kamatayon?

4/04/2019

pamatia ang tingog sa kasingkasing

pamatia ang
tingog sa imong
kasingkasing

ayaw kahadlok
sa iyang dahunog

pamatia ang tingog
sa iyang
kasubo
subaya kini hangtod
na sa isla
sa kalinaw

palabya ang shagit
sa amang
ang milagro sa 
bakol
ang yawyaw sa
baki

pamatia ang dahunog
sa imong
kasingkasing
human niini isulat
nimo ang imong
mga pangamuyo.

mantika

gikan sa kinagod
nga lubi
hangtod na sa
pagpuga niini

gikan sa tuno
hangtod sa kalaha
hangtod
sa iyang pagka
mantika

kadtong nabilin
nga uga
nga humot
nga morag dukot
nga lami
nga hangtod karon
di ka makalimot
kon unsa
apan ang iyang
ngalan
wala na.

ako ug ikaw

ang namuswak
nga santan
gihawiran sa
kamot sa bulan
ang iyang mga
gamot
morag mga kamot
nga mihakop
sa yuta

sa tunga tunga sa
langit ug yuta mao
ang hangin
mao ang buswak sa
santan

ako ug ikaw
nasumpay lamang
tungod sa 
hangin

balak sa kabuntagon

sa sayong
kabuntagon
madungog ko
na usab
ang imong
pagtawag 
kanako,

namati ako
sa imong mga pulong
malinawon ako
sa pagsunod kanimo

masulob-on ang
imong pahimangno
hinay ang tanang
pagsugyot sa tuyo

ang dagat usa ka
seda nga panapton
nga gilatag 
sa lawod ko nga
panglantaw
ning sayong 
pagbutho sa adlaw
nga mahinangpanon.

4/03/2019

konsolasyon

ang akong
iro
nahigugma 
nako.

mokiwil kiwil
ang iyang 
ikog
matag abot 
nako.

miambak ambak
migakos nako
gihagkan ko
gitilaan ko.

ayaw lagi anang
kasubo.

4/02/2019

hangin

ang pagsulat
mao ang pagpangumpisal
sa imong kaugalingon

gihandom mo nga
ang nagbasa dili 
makasabot

gipangaliya lang nimo
nga kini
magpabiling handumanan
sa imong
gihigugma, 

kadtong lami apan pait
kadtong gisagol ang
kasakit ug kalipay

kadtong gusto nimong 
hawiran ug dugay
apan sama sa alibangbang
nga ugma mamatay
imo kining gibuhian

hangin ang tag-iya
hangin ang sinugdanan
hangin ang kataposan

sa naughan nga baba

talagsaon ang
kalipay
apan miabot kini
sa saktong
panahon

nagpungasi ang
kasakit
apan milalin kini
gihapon
sa saktong panahon

sakto kanunay ang
panahon
sama sa pagkahinog
sa napulak nga mangga
niadtong gabhiona

malinawon nga
pagkahinog
mas tam-is 
sa saktong panahon

kalipay

ang bulan ning akong kagabhion
nagpabilin nga mahigugmaon kanako

ang adlaw nga miabot sa kabuntagon
nagdala sa kainit sa daghang mga saad

ang paglaom miawas diha sa usa ka baso
nga kape nga ang kahumot 

miumog sa daghang kabulakan didto
sa unahan

diin ang mga alibangbang nanaglulinghayaw
diin ang kalinaw sa pagkahulog sa mga dahon

bisan kadali lamang nagpabilin pa gihapon
sa mga awit diris akong dughan.

kabahin sa mga luha

dili nako
iyakan ang sayop
nga akong nahimo
gahapon

kining akong mga 
luha giandam ko sa 
umaabot pang
mga kalipay sa akong
kinabuhi.

4/01/2019

panagbuwag

mabuhi ra
kini bisag walay ulan

ang dyutayng kainit
pabugnawon na lamang

ginagmayng ginhawa
wad-on na ang halok

nganong nagpabiling
mahadlokon ang mga adlaw?

kalimtan ang mga gakos
wad-on ang sikit 

ang hawid sa kamot
ang haploy sa buhok

mabuhi ra kini siya
bisag wala ang kahayag

ang kangitngit wad-on
na usab

duha kita sa abri nga bentana
sa abri nga pultahan

kusog ang tukar sa radyo
sa kabuntagon

makalilisang nga mga
balita sa patay

sa pag-among-among
nagpanghadlok ang mga kamot

sa posas, sa rehas sa pultahan,
wad-on ang kamingaw

mamati kita sa balita 
sa kabuntagon 

kape, bulad, kan-on, sili
sa suka, sakto na kini.

atong duha

ang atong kapaingnan
duha lamang

kadtong gibiyaan ka
ug kadtong namatay ka

gitagbo ko ang una
hadlok pa kos ikaduha

ang laing kalipay

Gipakli na nako
ang laing dahon

milantaw ko nimo
nga namahaw

ikaw lang usa 
tupad sa duha ka 
lingkoranan

gisirad-an nako ang
basahon

karon miabot na
ang laing kalipay....