7/30/2017

ang dalaga nga kusog modagan

kusog ra kaayong
modagan ang akong hunahuna

wa sukad nga ikaw nga mipasalig
kanako nga nahigugma 
nakaapas paingon didto sa kadarohan
sa mga damgo

unta kon tinood ka man
naabtan mo na unta ako tungod sa usa
ka pangandoy nga inig kaabot didto
mahadkan ko nimo

hait ra kaayo ang akong mga kuko

hait ra kaayo ang
akong mga kuko
apan dili ko na gayod
kini putlan

naglisod ko kaniadto ug
abli sa imong sulat
nga gibalik balik nako
ug basa

ang akong hait nga mga kuko

mahimong magkuyog 
kita
apan walay hawiray

nahimo na nato ang 
paghinawiray bisan dili
kitang duha ang kuyog

gawasnon kita sa prisohan
sa ilang mga pagtoo
kadtong kuyog baboy
maoy ingon ni nanay

dugay na kitang nagkuyog
sa latas sa atong kinabuhi
apan wala ka pa gihapon 
nakaila kanako

kon moingon ka nga ako
maayong tawo
mabati ko dayon ang usa
ka pagpanuko

mora kog iring nga mobahag
ang ikog
dayog tilap sa akong kamot
lantaw sa hait kong mga kuko

sagol ang kasuko ug ang kaulaw

ayawg sulayi pagtudlo
ang buwan  kon unsaon 
pagtugdong diha sa 
aping sa baybayon
makaulaw ka na

ayaw sultihi ang adlaw
kon kanus-a mosubang
wala ka nasayod sa imong
gibuhat

gisultihan mo ang langit
nga unta anaa ang mga utlanan
aron mahibaw-an kon asa ang
padulngan

tungod kay managhigala man
kitang duha
nagpakahilom lamang ako
mipahiyom diha kanimo

ang tiguwang nga milabay kanato
nga nagpakilimos
gustong mobunal kanimo 
sagol ang kasuko ug ang kaulaw

naibtan ug tunok dayon namuwak

human sa pagtimbang
timbang
giputol ko ikaw gikan
kanako

unsa kaha ang
nahitabo nga wala na may
akoy nadungog?

ngano ba nga wala naman
usab akoy nakita?

diha sa pagputol 
nakita ko ikaw 
mas nadungog ko ang
akong kaugalingon

gidawat ko na ang
gasa sa usa ka pagbiya
diin kitang duha
naibtan ug tunok dayon
namuwak

dili ra sakit

ang pagputol
aron dili kaayo sakit
mahimong 
ipakalit mora lag
usa ka pakang
usa ka pakog

ang pagbiya mahimong
sa kaadlawon
samtang sirado pa ang
lawak
samtang tulog pa ang
mga manok

morag wala lang
mora ka lang ug mibangon
dayon wa ka kahinumdom
kon kinsa ang
ania dinhing dapita
kanang kainit nga nawala
daw hilanat
kanang mora lag kadyot lang
kay mobalik ra siya
apan wa na ka magdahom 
kon kanus-a

ang ninong sa kasal

pagawas na mi
pasulod ka pa lang

pauyonan ta ka
bahala na

hinoon sa laing
bahin
kaniadto haskang
halanga

7/26/2017

timbang timbang sa kalipay

ngano ba
pod kaha nga
sa usa ka pignit
nga kalipay
dakong sagpa
man pong
kasakit dayon
ang moabot?

pastilang
paita

gisunog ang
usa ka libo
tungod lang sa
nawalang
sinsilyo?

kinse minutos
lang baya
unya sa tibuok
niyang kinabuhi
siya 
nag-antos

unya ang pagmahay
walay kinutuban

apan makat-unan
ra lagi ang
tanan

irisgo ang tanan
walaon ang tanan
aron lang
gayod malipay

mas untop daw
mas nindot
mas kuyaw mas
lamian

 

7/23/2017

ikaw man ang buslot.

usa ka isla
nga walay adlaw

usa ka kangitngit
nga walay 
kahinam

walay bunga ang
lubi
ang alimango
walay unod

bisan sa kagamay
sa lugar
kanunayng gadagan
ang imong 
mga tiil

galibot-libot 
makalilong

hangtod kanus-a
ka kaha
maibot diha?

ang ganghaan
anaa lamang sa
pagbuka sa imong
mga mata

ang sakayan nag
paabot kanimo
ikaw man ang buslot.

puy-i ang karon

puy-i ang karon
kini lang ang tinood

ang ugma mahimong
usa ka bakak
ang kagahapon usa
na lang ka
tinuhuan 

ang usa dili matuhog
ang usa walay tanod


gauna

ang kabalaka
lamang maoy nakapatay
nimo

nag-una man god ang
imong hunahuna

tan-awa namatay ka
lang hinoon sa walay hinungdan

bisan gani ang yawa
nagpanakla man


sayang daw ka
nindot ra ba unta ang mga
linya sa imong
kapalaran

nagsanga-sanga 
naalaang pobreng kahoy
wa ka paabot sa
saktong panahon sa pagpanahon
pagpamulak
paghitik sa daghan kaayong bunga

paabot lang gyod unta
maoy kulang nimo
kanang pagpaabot kanang
pagpailob

yanong kinabuhi

daghan  kag
makat-unan sa mga
palahubog
ug mga burit

kanang morag wala
lang god

makalad-ok lang usa ka
baso nga tuba
sumsom ug usa ka
putol nga kusahos

ok na.

kanta-kanta
katawa-katawa
hisgothisgot

duyan duyan
paingon sa katulugon

kana ra.

in search of deeper meaning

kon gihunahuna mo
ang lalom nga kahulugan
sa iyang panultion
gahagohago ka lang

mamasol pa baya
si felimon sa kadagatan
mamalhin pa si catalina
sa iyang kabaw

kalibangon sab si
karding
maong midagan sa
daplin sa baybayon
unya kay wa lagi kadala
ug ilo
iya rang gi-id-id sa
dakong bato

kadtong mga walay lingaw
kadtong nagtambay sa
tindahan ni maring
maoy maghatag sa lain
laing paghubad niining
mga hitaboa

gipangita ang mga 
bulawan
sa tunaa sa nagpahulay
pa intawon
nga hago kaayong
kabaw

unta .....

ug didto sa lawod
gilabay ko ang maong singsing
nga luag na sa akong 
tudlo

nabati ko ang tumang
kahaw-ang sa akong tudlo nga
wala nay singsing

pipila usab ka gabii ang 
nanglabay nga gikikawan mo ako
sa katulugon

apan sama sa kalipay
kini usab molabay lang

kining kasubo
kining kaulag ug kalaug
unta mga luag na nga mga singsing
sa atong
kasingkasing

ang iro sa among balay

mireklamo ang silingan nga
artificial ug kilay nganong kining
si bonbon nga among iro didto
man gayod malibang sa ilang
nataran

nadisturbo gyod kuno ang iyang
kalag bahin niining iroa nga 
moadto lang ug tuyo sa ilang
nataran aron mangihi ug 
malibang

karong buntaga gihangyo ako nga
unta prisohon na ang maong iro
aron dili na makabuhat sa maong
salaod

kon sa tawo pa unta kini
gikiha na seguro aron makaamgo
sa iyang daotang binuhatan

kapila na ako nagmaymay ni bonbon
nga unta diri na lang sa among nataran
malibang ug ngangon didto pa gayod
sa among silingan

sa dihang nag-atubangay na kami
mahitungod sa iyang hangyo ako
siyang gisultihan nga ang iro dili
na mahimong prisohon karon
tungod kay iro lang kini nga
wala pa kasabot kon unsa ang
angayang buhaton kon  kini 
malibang ug kon asang dapita
gayod ang saktong lugar apil na
gani ang ilang pagjerjer diha sa
kadalanan, sahay gahi didto pa
sa sulod sa simbahan nga nakadisturbo
usab gayod sa mga manong ug 
manang sa simbahan

ambot ug unsang hitaboa nga
naingnan man nako si Mrs. Mendoza
nga kon mahimo silang bonbon na
lang usab ang mag-estorya basin ug
magkasinabot silang duha

nasuko baya gayod ang maong
tigulang samtang migawas kini
sa balay ug dayon sab nakog panira
sa pultahan unya pagkahuman 
giatubang na usab ang irong 
kontrobersyal aron sa makausa
pa pagamaymayan

mitutok kini kanako mipiyong-piyong
sa iyang mata dayog pakiwil-kiwil sa
iyang ikog nga mora bag nag-ingon nga
"salamat amo ko, sa pagsabot sa akong
pagkairo"

7/22/2017

ting-ulan

ning ting-ulan
nagtuk-ong kos bangko
sa kilid sa
bentana
lantaw sa harden

wala na ang mga
bata nga nagtampisaw
sa balilihan

humana ang tingbulak

dili sab tinghinog sa mangga
aron mamati tas
hugyaw sa mga bata nga
manggiilog sa mga pulak
niini

kadtong gilipay ang kaugalingon

wala nila ako
gipakisama nga
apil sa ihap

apan wala ko
mag-ambat

misayaw kog
akoa
gilipay ko ang
akong kaugalingon

kadtong
napungot mao ang
subo
kuyog sa mga
libat ug mga mata
mga itom ug
wait
mga baho ug 
baba

hisgot hisgot

byaan na
nato ang iring

human na
nato hisgoti
ang kabahin
sa kapon

karon mao
na ang
paglipay sa
usa ka dunggan
sa balahibo
sa manok

kanaas

mikanaas
na ang
kalamposan
nga hinimo
sa tumang
pagpakahilom

ang pan-os na

gusto ta kanunay
ug kausaban

kinsa bay ganahan
magbalik-balik ug
lantaw sa mao ra gihapong
sine?

walay ganahan ug
dugay nga kagabhion

walay ganahan ug 
dugay kaayong moabot nga
sakayan

gusto nako ang bag-o
ang karon
ayaw kog sukari ug gahapon
kinsa bay
ganahag pan-os?

dugaya oy

haskang dugaya
sang gitilaan sa babaye
ang sorbete

nakaihi na hinoon ang
sorbetero ug usab.

7/20/2017

ang hunahuna sa mangialamon nahisama sa atop

ang hunahuna sa usa ka
maalamon
nahisama sa atop

walay balibaran
maulan man o mainit
apil na ang mga iring ug
iro
apil pa gani kadtong gihungihong
nga ulan nga isda

sa ilalom niini
anaa nagpabilin ang baso sa ilimnon
mong bino
tupad sa sumsuman nga karneng baboy
nga naglana nga nagpahumot
didto sa kusina




kaahin sa nahimo

ang nahimo
nahimo na
ang dili na
mahimo nga 
himoon ta
nga kausa rang
nahimo ta
kaniadto gihandom
ko
hadumon mo
mahimong 
handumon ta

ang wala nahimo
nato kaniadto
mahimo pa ba
kahanng
himoon ta karon?

ang mga anunugba

nakat-on na ang mga
anunugba dinhing 
dapita

wala na akoy nakita nga
bisag usa nga nagpaduol
sa gasiga nga kandila

anaa nangumbitay na 
lamang sa kurtina diha
sa gipangsirad-an mo nga
mga bentana

ang langaw nga mitapot sa bag-ong pintal sa daan nga bongbong

naghikog kaha kining
langaw nga mitapot sa
puti nga pintal?

wala man unta naglihok
ang mga bongbong
sa kaisog sa baho sa 
enamel maingon kong
wala didto ang lingla
o kaha ba ang tintal 

ang miinom sa akong giimnan

gikuha niya
ang botelya sa
coca-cola nga
akong giimnan

iya  kining
giimnan diha sa
baba niini

dugay dugay
sab
balik balik
hangtod nga
kini
hapit na mahurot

ang iyang giuli kanako
mao na lang
ang tam-is kaayo niyang
pasalamat

7/18/2017

ang tinood nga kalipay

ang tinood nga
kalipay 

usa ka dakong
lawod nga mikuyanap

sa tibuok kalibotan
nga ang tanang

kahaw-ang iyang
gilunupan

dagko ang mga
balod niini

ang iyang mga
katuigan

mitumpag sa mga
pangpang

mipahamis sa
kahait mga 
buak nga bildong
kagahapon
usa ka bildo

sa imong katulugon

dili kinahanglang
ibutyag ang tanan

dunay panghayhay
usab diha sa landong

naay pulong nga
para lang sa pulong

nga kon imong litokon
mawa ang kahulugan
niini

ang kahilom usa usab
ka sayaw sa kalayo diha
sa pabilo

natawo ang kalooy
sa imong ngabil

samtang gisud-ong
ko ikaw sa imong
katulugon

kabag-ohan

sa tungang
gabii
gibasa niya ang
Daily Inquirer
nga issue kagahapon

nagpunay siyag
pangita kon asa ang
panid sa
katulugon

7/17/2017

ang kalinaw....

dungan tag
pamakak

makaayo
kini sa atong

pamuyo sa
atong kinabuhi

mas bililhon lang
gayod gihapon

ang kalinaw kaysa
sa gugma

ang kalinaw kaysa
kamatooran

ang kalinaw sa
kalinaw....

ang akong gisupakan

gihatag niya
ang bingka

ingon siya
ayaw kaona

gipahiluna niya
ang alugnan

maoy iyang ingon
ayaw katulog

busa giabihan ko
ang pultahan

gisul-ob ko ang
sapatos

ingon siya
ayaw ug lakaw


ang tanan akong
gituman

usa lang ang
akong gisupakan

7/14/2017

ang nakapatay sa bitin

nangingking ka
sa pagbitbit sa bata
nga pula
ug aping

morag mabolo ang
kapula
dili gayod pula
morag 
kahaponon

gibati ka ba ug
kaguol?
nausikan ka ba
sa panahon?

ang mga bata
badlongon
mangihi kog ganahan
bisag asa

nindot gihapon ang
atong kalibotan
wala kini baho sa
anso
walay kasaba sa
mga walay
liog

ang kalipay naa ra
sa atong mga kumingking
aron mas malipayon ka
ayaw ug hawid sa
mga kagingking

dili ba god nga ang
nakapatay sa bitin didto
sa balilihan mao man
ang imong kagingking?

dali lang diay

dili ako ang nagdala kanako
paingon nimo

ang ako lang nga mga tiil
samtang ang akong kalag durong

supak kabahin niini samtang ikaw
usab nagpaabot kanako 


sa tumang kahinam hangtod nga
nag-abot ang atong mga ngabil

tam-is ang atong dila.Kadyot lang
kini. Inig ka human, mobalik ako sa

kainit sa akong karsones og t-shirt
dayon mogawas ako aron 

mobalik sa akong naandan. Makamao
na ko kaayong magmugna ug mga 

sugilanon nga molipay kanako bahin
sa atong kasubo. Dali lang diay.

didto sa gawas molantaw kanako 
ang mga bentana unya mobabay ko

dali lang diay ang pagpahiyom
bisag wala kay ipasabot niini.

7/13/2017

didtong lugara

didtong dapita
kon molabay ka
sa ilang balay

wala kay makita
apan sayod ka
nga ang mga mata
anaa diha
milantaw kanimo
sa mga giwang
sa bentana

inig ka hapon 
madungog mo ang
danguyngoy sa 
subo kaayo nga
kampana

lisod dinhi
ginadili ang mga
bulgar
og mga 
kusog sa kisaw

dili mahimong
mag-inosara sa
paglakaw ang
usa ka babaye
sa plaza del
pilar

ang lalaki kinahanglang
magpaubos
ang babaye kinahanglang
magduko

mga iro lang
ang gawasnon
malipayong mga
mata
sa gisakyan sa
usa.

ag wa ko ganahi

gihimo niyang
panabon ang
mga pangadyeon

sa mga buslot sa
iyang kalag

sa mga oras nga
namaak

sa mga adlaw nga
gibikogan

gihimo niyang panapo
ang mga alampoanan

sa buling sa iyang
agtang
sa mantsa sa iyang
kalag

giludhan niya ang
tanan
ang bungtod ni
san jose
ang sapa ni 
santa maria

usahay madungog
ko ang dili mao
ang wa ko hisabti
ag wa ko ganahi...

ang mga bitoon

ang mga bitoon
dili lang sa langit

kon subayon ang
mga pagbati

naa sab kinis imong
buhok

ubos pas liog
ubos pas pus-on

gisarap ko ang
tanang bitoon

kon....

kon makita
lang unta nila ang
sulod
sa imong kasingkasing

mamunit kaha silag
bato
didto sa lapyahan?

kon madungog lang
unta nila ang mga
hungihong diha sulod
sa imong dughan

dili kaha sila
mangurog sa tumang
kapungot?

ang gamay mong kahayag miiwag sa tibuok kalibotan

mao kini ang
bag-ong papel sa 
balak

giiway ka sa yawa
gipalayo ka sa sala

sa pagsulat niini
madungog mo ang
pag-agulo sa mga
maninintal

inig ka human 
sa dihang nahan-ay na
ang tanang
tanghaga

misilang ang adlaw
diha sa imong agtang
ug ang gamay mong
kahayag
miiwag sa tibuok
kalibotan

yellow taxi nga gugma

kadtong nahitabo tali
kanato kagabii

ayaw na hisgoti
nahuman na kadto sama
sa usa ka
katulugon

unta magpabilin ang
damgo
mas nindot kini kon
magpabiling
hanap sa handumanan

sa kanunay wala nako
kini gihimong usa ka
sugilanon

usa kini ka mubo nga
balak
nga sa sa usa ka taxi
nga dili puti
ug sa akong dughan
hagtik ug patak

aduna nay bag-ong dalan paingon kanako

giusob na nako
ang akong 
paingnan

gibali ko ang
pultahan
gibalik ko na
ang suga
sa atubangan

limpyohan ko
na ang likod sa
akong nataran

ang labat patas-an
wala na ang drama
sa radyong karaan

aduna nay 
bag-ong dalan
paingon 
kanako

ikaw lang gihapon

naay wala 
sa pinisik sa ulan
naa sab diha
sa dakong baha
naay wala sa
kagabhion
apil na ang
pagsud-ong sa
mga bitoon
naay wala diha
sa panihapon
sa pagsulod sa
lawak
sa pagtutok sa
nag-inosara suga
nga galutok
sa kilid sa bentana

ikaw lang
gayod gihapon
ang wala
sa tanan
kanako

7/10/2017

kumpyansa

ang naghipos sa
imong tinagoan
maayong tawo

nakasabot kini
kanimo
nakalipay

mas dako nga
sekreto
mas dako usab
ang bayad

apan wa na nimo
kini igsapayan
nakahatag siyag
kumpyansa apil
na ang kalipay

ang gilabay sa tigulang sa daplin sa dagat

nindot ang sayong kabuntagon
sa baybayon sa katipunan

linaw kaayo ang dagat morag
seda nga saninang asul

sa dakong bato naglingkod ang
tambok nga lalaki 
tupad niya ang iyang puti nga
iro
silang suha puros naglantaw sa
mga sakayan nga nanagat
sa unahan

ako sab milantaw nga nagtindog
kay oran-oran mobalik na ako sa
balay

gikan sa iyang gamayng payag
migawas ang tigulang nga babaye nga
taas ug buhok nagdala ug usa ka
arenola nga iyang gilabay sa daplin
sa dagat

gihilap ang akong dughan
naguba ang akong kabuntagon

 

it-it

kadtong
it-it nga migukod
sa suringiw nga
ngiwngiw didto's
lasang
wala na gyod nako
nahibalag

dia ang punay
nagpunay ug panura
dia ang maya
latagaw sa mala.

7/09/2017

snapshots

likod sa
sampot

bugas-bugas
sa aping

ubos sa
pusod

nanambo
nga dila

utnga sa 
kumingking

baha sa 
singot

awit sa
baybayon

bombong 
dughan

buto-buto sa 
hypothalamus

snippets

giayo siyag
balikas sa iyang
bana

nganong niya
ka mang yawaa ka?

wa gyod ko masayod
niini
ngano diay ni?

peste ka
pabuang-buang ka
pa?

sakto nga kadtong
sulat nga
nalukip nimo sa
nobenahan

ako si madel imo
si maricel

nag-iyak ka sa
kaulaw

ingon ko nganong
magdugay pa man
kita dinhi

nia ang impyerno
nia ang yawa

unsa kaha ang
nakita nimo sa
kalibotan adtong
panahona?

napandol ka gihapon
sa karaang bato.

ang tinood

ayaw bantayi
ang gisulti baliki
balika ang
wala nimo madungog
kay didto
didto ang labing
tinood.

7/08/2017

ang mga tingog sulod kanako

ganahan ko
maong misaka ko
kita ta
wala kay tingog
tingog unya
kon ako kang
lantawon 
molingiw ka
nga morag 
maya nga idlas
nga nabitik sa
laang

namasin ko
nga basig giganahan
sab ka

adunay tingog nga
miingon
padayon
ganahan mong 
duha

dunaylain nga
mibabag
ayaw, ayaw,
dili ka angayan
lahi ka

nabuhat ang
gana
nahuman na
miginhawa kog
lalom
namula ang
akong nawong
morab bombo
ang akong
kasingkasing

dunay tingog 
miingon
makaulaw ka
sukwahi kana
sa unta dili angay
kanimo

mibawos ang
tingog nga 
milaban kanako
"ayaw ug ambata
lami baya"
mipadayon kinig
pasalig
"giganahan
baya pod siya"

busa ania
pagkahuman
nangatulog ang
mga tingog
nga wala magkauyon
sa akong buhaton
ug sa akong nabuhat

ako kini
usa ra
nagsulat sa akong
tingog

wala koy gibasol
wala ko miingon
nga sad-an ang
usa sa mga tingog

mora kog voltes 5
natuagsa
dayon mibalik
sa usa.

ako kini.
ako ra. 
wala nay lain 
pa.

sa panahon
sa pagpanubag
ako ang
motubag niini

human sa pagputol sa lahing nga lubi

ang kahayag
sa adlaw sayong buntag
mihalok sa
bag-ong naputol nga
lubi

gihapohap kaha ang
samad sa tiilan?

ang nagputol nanaghoy
samtang gapas-an
sa powersaw pauli
sa balay

ang ginabsan nagtapok
ang ubang panit sa kahoy
nagtuagsa


rest in peace power woman

kinsa
goy wa kaila
niya

gamhanang
babaye nga
karon 
tiguwang na

kong gamitay
ang hisgotan
power gyod
to siya

namatay na
daw sa 
las vegas
cancer of
the tongue

kinsay
ganahang
hinumduman
siya?

ang kolokoy ug ang anay

ang tiguwang nga
ginganlag domeng
maoy nagtrabaho sa
renovation sa gabok
nakong bentana.

gusto nako nga ang
beam sementado na
unya duha ka dagkong
kabilya ang support 
niini. Dayon sa kilid
aron nindot ang kahayag
ibutang ang glass
monoblocks nga ang
design dunay duha ka
dahon mga mogilak
kon maigo sa adlaw.

wala na ko ganahi
sa daghang anay nga
iyang nakita sa mga
gabok nga bongbong.
hapit usa ka adlaw
niyang tangtang niini.
unya sa pagkaalas-kwatro
gihugasan na niya
ang kabra nga kuno
namansahan sa gimasang
semento.

busa ako siyang 
giingnan nga kutob
na lang siya karong
adlawa.

pasayloa ko sa 
pag-ingon nga sa
iyang sweldo nga
400 ang adlaw 
usa usab siya ka
anay sa usa ka
mas gabok pa nga
bentana.

nagpadungog
dungog ang akong
asawa nga dili sa
tanang adlaw
kolokoy ang huwes.

pagtudlo sa saktong balak

sakto ka
mas daghan
silag
masabtan
kon dili na
nato isulti.

mas dugay mas mubo mas haw-ang

ingon ana
diay
nga sa kadugayon
mas mogamay

daghang dili
ibutang

morag bentana
ikaw ang
molantaw.

kabahin ni esit

bisag unsa na lang
tresorera ka diay sa
inyong coop sa talim.
ug ikaw pod, duha ang
imong anak, ang usa
magbord egsam na sa
CPA. kadtong usa nga
liwat sa imong bana
sayong naminyo unya
gipalayas nimo ang iyang
bana nga dili kaayo 
motingog. Ikaw sab 
hilomon, naa nagtuk-ong
lang sa higdaanan nga
kawayan nga nag-ambo 
sa baybayon. Walay usa
ka ninyo ang ganahang
maligo. Sayang kristal
klir ang tubig karong. 
Init kaayo miingon ang
kamanghoran ninyong
bungi. Galisod kog sabot
unsay iyang gusto.
kadtong usa wala 
nagpaila, apan gusto
unta nakong ilailahon.
kumusta na ba si Esit?
kadtong gibinuangan
nato tupad sa litson.

naglisod kog unsaon 
nako nga kamong tanan
mabulag sa tagsa-tagsa
ninyo ka cellphone.
unta kay karon lang
kamo nagkita human
sa dugay nga katuigan
maghinangop unta apan
lahi na kaayo karon.

ang usa nagtulog-tulog
human durong kaon 
sa panit sa letson de leche.

unsaon ko kaha nga 
ma feel at home siya sa
bag-ong lugar.

stage four na pod diay ang
iyang breast cancer.
dili na siya mobalik sa
madrid isip domestic helper.
wala siya'y bana. wala siya'y
anak. Dunay pag-umangkon
nga gisaligan niya. Kadtong
gibinuangan nato tupad
sa lechon.

7/07/2017

tambag ko kanimo

ang wala nimo nabantayan nga
gibuhat niya. Ayaw sulayig tugkad.

ang habol nga wala mapilo ang
bulingon sa kama.

ang itoy nga nag-iyak kagabii
na nahilom human niya gibuhat kini.

ang napalong nga suga. ang bentana
nga kanunayg nanirado

ang matag adlaw nga pagsimba.
ang kampana nga lalom ug tingog.

ayaw tugkara ang sapa, basin ug
lalom. Basin malumos ka hinoon.

pasagdi ang mga walay ngalan.
ayaw pasakiti ang imong kaugalingon.

bantayi ang wala nahitabo kanimo.
hilom na lang. ayaw tugkara ang sapa

kay basin ug lalom, kay basin didto
nagpuyo ang saang mga maoy motug-an.

ayaw saka sa taas sa balay. ayaw ablihi
ang gitrangkahan nga pultahan.

dili mo kinahanglan ang kahayag.
ayaw pamugos, basin mao kini ang buta.

buhata ang matag adlaw. Pritoha ang
bulad. Paglipay sa naandang kaparat.

ig-ampo mo kami

anaa ikaw
nagpakabalaan
naglakaw
sa tanod
sulod sa mata
sa dagom
misayaw bisan
sa kahadlok
nga mahulog
dayon masunog
sa ubos
diin ang kalayong
walay pagkapalong
nagpaabot
sa imong ngalan

tiil nga gamhanan
kamot nga senyalan
mga mata nga
gitalhan
gasanga nga dila
baba nga gabula

ig-ampo mo kami
ig-ampo mo kami
anghel nga magbalantay
iiway mo kami
sa yawang kaaway.

anaa ang pagpakaaron-ingnon nga ikaw walay nahibaw-an

didto
gihimo mo lang
ang angayang 
himoon

walay daghang
sulti
gihupay mo ang
kagutom
sa paglung-ag sa
lagutmon

ang kauhaw
gihupay mo sa
tubig nga
imong gisag-ob
sa layo pa
nga tunggo

ang kalaay
gihangad mo sa mga
bitoon sa 
kagabhion

ang kalipay gihipos
mo diha 
sa imong dughan

daghang nangutana
kon amang ka ba?
kon bungol? nganong
wala kay
panahon sa pagpamati
kanila?
sa pagtubay sa ilang
mga pagsaulog?

gibuhat mo lang
ang angayang buhaton
kupos na ang
panahon
kulang na ang mga
adlaw
wala pa gayod ikaw
matagbaw
sa imong pagkaikaw.

unsa pa ba ang
gamit sa pulong?
unsa pa ba ang
pulos sa 
pagpamati

pagkapaspas sa
panahon
pagkaidlas sa
kalipay
pagkasungugan
ang mga kasakit

ang katilingban
anaa
namaypay
gitabonan ang
baba
sama sa usa ka
babayeng
tabian
hilom kaayong
nanglibak kanimo
nagdalag punyal
aron itakbas
sa imong likod

anaa ang
pagpakaaron-ingnon
nga ikaw
walay nahibaw-an

7/05/2017

kabahin

kabahin sa wala 
mahimo
ug sa nahimo nga
walay bili
kabahin sa mga
maot nga
nahimo ug
sa nahimong 
maot
bisan pa sa
paningkamot

ihangad sa langit
dungan sa mga pangagho
ipahiluna ang pahiyom
dayog lakaw
bilin sa pasalamat

nihit nga kalipay

ang sakit
kabahin niini
ug niadto mao
nga ang wala
pagdawat
nga sa maong
hitabo
ikaw man lang
ang nalipay

wala ko na
gihunahuna ang
laing mas sakit
pa kabahin niadto
ug niini
nga sa laing bahin
sa laing suok sa
akong kinabuhi diha
kanimo
ako lang man usab
ang nalipad

ambot ba ngano
nga nihit man ang
kalipay nga
magdungan diha
sa duha

kadtong buto-buto
sa kaluwasan
diin pati ang mga
bitoon
nahilom sa tumang
kasina

7/04/2017

paglaum

ah, wala nato
gikalimtan ang atong
pagkamortal

mangamatay tang
tanan
dili man ugaling
magdungan

apan dili lang ako
dinhi kutob
sa mga nalata nga dahon
sa mga nanayaw
nga ulod
sa kahilom nga 
makabungol

ah, anaa ang milutaw
gikan kanako
mikayab kong kalag
ang laing kinabuhing
wala nay
labot sa atong kamatayon

didtos lubnganan

dalhon kos
lubnganan ang dili pa
gihapon nako
malitok

diha unya sa
mga lagom nga
ngabil
mopauraray sa
kalipay
ang mga tibugol
tang tinagoan
samas katam-is
sa kamay.


ang payong nga itom

nindot handumon ang
payong nga itom ug ang
kusog nga ulan
sa martes nga kabuntagon

mitaas ang tubig paingon
sa imong tuhod
ug samtang naghawid kas
payong mong itom
giwalis nimo ang sayal
mong brown

ug sama sa usa ka dag-om
bisag lagom makapabuhi man
kini gihapon sa hapit na
mamatay nga paglaum

7/03/2017

adunay mitungtong sa dakong bato aron lang unta makita pag-usab ang kalit lang nga nawala.

tungod sa atong
kagahian kaayog ulo
ania
gibasolan ta ang giguba
tang tulay
ang gisunog tang balay
nga karaan
ang agianan nga atong
gibutangan sa mga
tunok ug bitin

miabot kita dinhi sa atong
mga gidamgo
wala diay dinhi ang paraiso
gibasolan ta ang kaniadto
gikasuk-an nato ang karon

unsa pa ba ang nahibilin
sa kaugmaon?
unsang saad pa ba ang
iyang gibungat?
motoo pa ba kaha kita
karon sa atong kalisang
ug kalisod?

ania ang usa ka bagol
nga tambal sa labad sa
atong ulo
usa ka galon nga haplas
aron ihunol sa atong gasakit
nga lutahan
sa atong mga nabawog nga
likod

adunay mitungtong sa 
dakong bato
aron lang unta makita
pag-usab
ang kalit lang nga
nawala.

makalibog baya nganong diha sa pagpiyong sa mga mata mas natataw man hinoon ang kamatooran

nangapkap kita
sa kangitngit
tungod sa kadaghan
sa mga bakak
ug lingla

sa kataposan gipiyong
nato ang atong mga
mata
gibaid ang mga
balatian
giablihan ang mga
kumo nga kamot
sama sa usa ka pagbuswak
sa gumamela

dili humot ang kamatooran
maong ato kining hikapon
dili mo kini kaayo matultulan
sa kangitngit

makalibog baya
nganong diha sa pagpiyong
sa mga mata
mas natataw man hinoon
ang kamatooran