2/29/2020

Ulahi na ang tanan


Anha na sila mogimok
kon ulahi na ang tanan,
gani ang ulod nangluod
nikagiw na usab ang mga langgam
Kausik sa dugo sa mga martir
sa dili maihap nga mga tugon,
taliwala sa kangit-ngit
kalayo likod sa nagbagang dag-om
Isalikway kini nasod nga malimtanon
kay nadugta na ang maong pag-laom
kumkoma unya ang nagsilaab nga kasakit
nga ikaw mismo ang nagduslit
Nanghunaw ka sa asgad nga tubig sa lapyahan,
dugoon mong kamot usa lamang ka instrumento
ang imong sumbanan, alimoot nyang linitukan
matod mo, bisan sya demonyo pinadala siya sa Ginoo
Danlog ang utlanan tali sa langit ug impyerno
daghang nadakin-as sa sayop nga pagto-o,
mga kristyano nga mipalakpak sa iyang mga pagtamay
ang tugon sa balaanong bibliya imong gisalikway

Ang Sangputanan


Naula na lang ang tentang dugo
nga pinakatay sa maalam
apan dili paigo ang iyang gisulat
Wala gihapon hisabti sa mga panatiko,
hangtod nga niungot na lang
ang mga letra sa iyang tila-ok
Ang mga dumadapig sa hugpong Tsino
wala gihapon matugkad
og unsay unod sa akong biay-biay
Niabot ang sangputanan
nagdiwal-wal ang dila sa irong gutom

haiku


mabangbang pa ba?
gihay nga nangatagak
si-ot ang langit

2/28/2020

kanus-a pa ba?

kon wala ka
na, seguro mas malipayon
kami

seguro mas lunhaw ang
among hardin
mas disiplinado ang among
duha ka iring
seguro mas limpyo ang
kusina
unya ang salog walay bisag
gamay nga mantsa
seguro mas humot ug humok
ang mga ponda
seguro walay maputol nga kahoy
walay baboy nga maihaw
walay manok nga dungoyon
seguro walay kabayo nga 
makabuhi sa iyang gihuktan
seguro mas asul ang langit
mas hayag ang mga panganod
unya ang suba dili na lubog

kon wala ka na
apan kanus-a pa ba?

alang kang edna

ang  dili nako makalimtan
kadtong miingon siya sa uban
nga unta kon moanha ako
pahibalhon daan ang tanan
kay basig daghang dili na 
hinoon motambong kon 
moapil ako.

nakapangutana ko, naa ba
kaha akoy sakit nga makatakod?
hiloanan kaha ko? o kaha ba
sa iyang kamaot, hadlok siya
nga matiponan ug dili laksot?

kahilas ba ning bruna
bangengaka! kon nganong 
si tirso cruz pa gyod ang
iyang gilatos..

ikaw

kana bang giinsulto ka na
apan wala lang gihapon nimo
kadto bang nagtoo siya nga
nasakitan ka, unya wala 
ra diay gihapon nimo
kining duro niyang katawa
abi niyag nakadaug na siya
unya ikaw naa nagpakahilom
nagpalayo kaniya...

kana, kana mao ang saktong
pagdawat sa kinabuhi 
kana,kana mao ang tinood
nga kadaugan
kay sa tinood, malipayon 
ikaw, kansang kalipay 
nagumikan kanimo, unya
wala diha kanila, kay ikaw
ang hari sa imong mga 
hunahuna ug mga pagbati
dili sila kabuot, wala sab silay
labot. Yukbo sa kaugalingong
gahom, sa imong pagkaharianon.

2/26/2020

hagip-ot

bisan sa kahagip-ot
ning dalan
diin pati na gani ang
kabaw napiit na man

pati na gani ang tungaw
nakasyagit man
sa kasakit

anaa ka, wala mitingog
unya pagkaoran-oran nadungog
man lang gihapon
ang taghoy
gikan sa imong kasingkasing....

DIHA SA SALUG

ANG gibati mo mao
nga ikaw
morag mga papel nga
gigisigisi

gilabay
gitabyog tabyog sa hangin
hangtod nga
nagkatuagsa ka

apan wala ka
nagpalupig
kay sa dihang nahuman na
ang pagpanghulog
nakita mo pa man
ang imong larawan
diha sa salog....

ULAN

og miulan ang
mga balak
namasilong tang
tanan
hadlok nga mabasa
dugay
ang atong gibati
mao ang tumang
kabugnaw....

walay babil

tabiling tabil
mayana nga gauga
wala nay babil

2/25/2020

haiku


tubig gaagas~
nagkang-ang mga tudlo
ayaw tubili


anaa

aduna anaa kanunay diha
ang hanyag sa hataas nga
kinabuhi

anaa ang mga ritual anaa
ang pagpili sa pagkaon anaa
ang pagdili anaa ang
paghunong

apan gihandom ko lamang ang
ginagmay nga kalipay sa matag oras
dili  na gani sa matag adlaw

layo na kaayo kanako ang mga katuigan
nga nahisama ra gihapon sa
pagsaka ko sa mga pangpang

nangita sa gamot nga mahawiran
nangapkap sa mga sagbot
aron lamang makaabot sa gipangandoy
balay nga kawayan giatopan sa nipa
didto sa tumoy sa bungtod nga bulawan

ako kini

dili mo matangtang
kanako
kini, kay ako kini,

bisan unsaon
bisag likayan, bisag asa,
anaa kini
gihapon napatik sa akong
agtang

gikalipay kini sa mga buhok
nga sa matag adlaw
naghinayhinay na og kamang
diha sa mga alugnan...

panagbulag

walo ang mga anak
upat ang sa iloilo didto sa
inahan gibahig
laing upat sa sindangan
gibilin sa amahan

abi kog ang mga anak
mao ang epoxy sa kaminyoon
dili man diay....

nurse

dali mo kaayong
nalitok
nga dili na angayan
pang iyakan
ang nahibilin nga
tipaka

apan sa dihang ikaw
na ang nahitaboan
sakit kaayong pamation
ang imong
gilitok mismo

anaa ka
migakos sa tipaka
gihalaran
ug mga buwak


anaa ang hingtundan
sa sulod sa iyang dughan
nag-agulo ang 
mga katawa....

edad

Dili na 
nindot lantawon ang
tiguwang
nga nagpang-os sa
tubo
sa walay ngipon niyang
lagos,

ang gilabay nga
napuno pa gihapon sa
tam-is nga
dugos....

2/17/2020

ikaw na ba gayod kana?

gikan sa america
mibalik ka dinhi

lahi na ang imong
ngalan
lahi na ang imong
kaugalingon

karong gabhiona
basahon mo ang imong
mga balak
mamati kami

ang among kamingaw
mangambak sa baso
sama sa nagbula pa nga
beer
nga wa nato damha
puno na sa atong kahubog

pabasahon mo ako sa
akong mga balak?
pasayloa, gimugna ko
kini alang lang kanako

ang akong mga pulong
wala pa nailhan sa akong
mga buhat

ang akong nawong wala
pa gayod nako 
nakita 
ang akong lawas
nangita pa sa iyang
panit

pasayloa, ako ug ang akong
mga balak
wala pa gayod 
nag-ila

napuno ako sa kalibog
apan wa ko na kini ambata

gitagay ko ang beer
miingon kog Kampai!
sa ako ra usab
nga kaugalingon

gibasa mo ang imong
mga balak
nan karon, ikaw na ba
gayod kana?

kasuko

ingon ka
kon mapungot ka
unya bation nimong
gidaogdaog ka na
gayod
imong gisulod sa
iyang lawak ang
maong ungo dayon
nimog hatag sa
imong dako nga
kinumo

gikan na man ko
diha
giundangan nako
kay kami man
gihapong
duha ang nangabun-og
kinsa man ang
midaog?

2/13/2020

pagkatalimaod

nabati mo na kini
kaniadto pa, o mahimong
karon lang

lood kaayong paminawon
nganong sa dugay nga
panahon
gihigugma mo siya

kon nganong niadtong
usa ka higayon
gihimo mo siyang usa ka
bathala


karon, nakapangyam-id
ka sa imong kaugalingon,

nagpasalamat pa gani,
 nganong 
wala ka niya sugta.

tagpila?

sa imong pangedaron karon,
mipahimangno ang iyang suod
nga higala,
ayaw kasuko,
ayaw na ug salig anang gugma-gugma,
dili ka buta,
kon aduna kay magustuhan,
prangka-prangka lang ba
sa walay pagdikidiki
pangutan-a na lang kon
tagpila.

alang sa akong ex

ganahan baya ko gihapon nimo,
ah, dili ikaw, apan ang imong kahilom.
bulawanon lang gihapon.
kadtong nahitabo gibilin nato sa
kagahapon, morag tsinelas nga wala
kasulod sa lawak, nga wala gisaka sa
balay.
ganahan ko gihapon nimo,
kadtong nahitabo kaniadto, nahisama
sa duha ka bongbong, gitung-an sa 
init nga hunghong, walay ngabil,
walay gilitok nga pulong, sa tumang
kalamian.
ganahan ko gihapon nimo,
diha sa imong pagpakahilom,
samtang gidagit ko sa hangin,
palayo kanimo.
karon, hilom tang duha,
walay matampo sa awit sa
gugma, sa atong kagabhion.

2/12/2020

kabahin sa bag-ong patay sa atong syudad

sa akong pagsulat niini
dili mo makita ang dugo,
wala kay samad nga makita
bisan gani ang gamay nga
ulat,

ang pagdugo sa kasakit
bation lamang, dili mo kini
makita kanako.

adunay nagsulat kabahin sa
gitago nga kasubo, 
sa gitabonan nga kabalaka,

pagkahuman lain na usab
ang magsulat kabahin sa mga
dili katoohan, gani dili na
kinahanglan, 
napatik, " Unsa? Dili ko
motoo! Dili ko katoo!"

ang kaniadto....

ang mga lugar nga
atong gibalikan dili na
sama kaniadto sa una
natong pag-anha.

anaa ang kasumo, 
ang kaniadto dili na
sama karon,
nakita ko na ang abog,
sakit na sa mata ang
mga bato,
wala nay malitok pa
ang mga ngabil.

halad

gihalad mo kanako
ang imong lawas
gihapuhap ko 
wala nako nabati
ang imong kasingkasing
busa mihunong ko
gabalik nako kanimo 
ang imong gihalad
kay dili kana ang makalipay
nako sa tiunay.

Paghinumdom


Basaha, Hinuktuki, Sabta
Naa nianang mga linya
Ang hulagway, kalipay nga nanglabay na
Nihanap nalang sa kadugay
Apan hayag pa ang imong pahiyom kanako
Nga nag-unlan sa imong bukton
Samtang imong gihalog sa imong mga tutok
Higda sa tabla tang salog
Sa akong nahinumduman
Wala ta gahisgot ug katapusan

Handumon Ko Nalang



Mga lab-as nga isda, tamala ug hunas
Bitbit mo dala gikan sa hunasan

Aya-ay ang dagat ug walay hangin
May dag-om apan wala muulan

Kalami ug katam-is sa init nga sabaw
Human mo gitula ang isda nga danggit

Paris sa bag-ong pinagaling nga humay
Atbang sa saging lakatan nga hinog sa punuan

Gihagpatan sa bukog aron ibutang sa akong plato
Gakinamot, gasalo, nga walay tingganay

Lanog kaayo, bisan walay maykropono
Klaro kaayo bisan wala pay kamera niadto

Gihigugma tika
Ug nahigugma usab ako kanimo

Apan katong tanan
Pitik nalang sa akong handurawan

Gusto man nakong balikan
Dili na matakdo ang huna huna ug dughan.

2/05/2020

corona

sa iyang
kagamay
dili makita
dili mahikap
apan
gikalisangan
kay makamatay
kon makatugpa
nimo
wa gani
ka kahibalo


2/04/2020

mabaw-an

kon mabaw-an mo
lang

lahi ang tinubdan
ning balak
kong 
daan

basta ayaw
na ug pangutana

makamenos ka
lang....

tunaan

makalibog
lapok ka man unta
apan lami 
ka man lunangan

kaniadto
gikaulaw ko ang
baboy ug
kabaw

karon sabton ko
ang pagkatapulan
labi na ang
pagkauwagan

bulawang baboy
sa lapok milunang

mestisong kabaw
sa tunaan 
nalipay