9/17/2018

duha ka babaye

sa gagmay pa sila
ang sinugdanan sa ilang
panag-away kabahin
lamang sa monyeka

karon nga nangatigulang
na sila
anaa gihapon ang panagbingkil
kabahin sa propiedad

ang kalaog ug kalimbongan
sa tawo
nahisama sa gamot

nahisama sa panit
nahisama sa palad

tapot, lubong, lalom,
anaa nang daan nga wala gayoy
pagkatangtang

walay nasayod

sa kanunay
anaa ang pahimangno
sa buwak
og alibangbang

dunay moingon kanato
karon na
dayon motikyop ang 
payong sa adlaw

unya mawala ang tanan
kinsa ba ang nasayod?

si nanay ug si tatay

si nanay ug tatay kaniadto
magsigig away

kon maglagot si nanay
molayas kini unya dalhon kaming
tanang mga bata

lima kaming tanan
duha ka lalaki ang
kinakusgan ni tatay
nga wala makalaban 
kaniya

motago si nanay 
unya ingnon mi nga dili 
magsaba

didto sa laing balay nga
biniyaan masakpan kaming tanan
unya maghinilakay silang duha
mag-uli

unya kaming lima 
nabyaan intawon samtang
silang duha
atua nagbalikbaliks sa ilang
mga saad
nga dili sila magbulag

wa na gani makabantay
nga kaming lima wala pay pamahaw

9/13/2018

tungod sa tomotomo

dili kini sama sa ikog
sa tiki nga kon maputol
 magsumpay rag dayon

nakita mo ba ang
tawong naglakaw
nga wala nay
liog?

tungod sa tomotomo
sa hangin
nahugpa ang 
batong balayan

kahambog ba sa umang
kapaspas bas iwon
kalagom bas dila sa
langit
pati ba ang mga balod
sa dagat
botboton na usab?

alibangbang ug tiki

mahibaw-an mo
ngano ang daghan
nganong
wala sa hunahuna
mabati mo

ania ang unos
sa kinabuhi
mikutaw sa
imong kape

dakong kasakit
pait nga pait
sa kasingkasing
mikulit

mahibaw-an mo
ngano
bisag dili na kini
isulti

nakakita ang
kasingkasing nga
masulub-on

nahimong buta
ang hunahuna nga
malipayon

dinhin dapita
ang mga gabon
nagkatipon
naulaw ang kahayag
diha sa mga dayag

sa tigmo sa langit
mibuhakhak ang yuta
putol ang pako
sa alibangbang
sa nasumpay nga
ikog sa tiki

pagtoo sa pulong

ang imong
pagtoo sa pulong
walay
paglubad

human ning
atong pagsandurot
kamong tanan
mopahawa na

bibo ang mga pulong
nagkasalibod

human niini
ang mga pulong
manugpa
sa mga lingkoranan

mopahuraray
magpakahilom sama
sa mga alugnan

paabot

galanoglanog ang
ulan
sa atop sa balay

sa abre nga bentana
anaa ang tiguwang

milantaw sa hilom
gapaabot sa panaw

mga tudlo ug kuko

ang  nawong sa
mga kuko

walay gibati
kabahin sa mga

wala magtupong
nga mga tudlo

ang tiguwang nga akong nahinumduman

kon gibalibaran ang
kwarta
unsa na lang kaha ang
gugma?

ang tiguwang wala
kaha kasabot
sa tiunay nga damgo
sa usa ka batan-on?

lapad ang langit
lalom ang dagat

daghan ang kalanggaman
nga naglupadlupad
daghang isda ang naglangoy
langoy

sayon kana sultion
lisod gayod pangitaon

ang langgam nga motugpa
sa imong palad
ang isda nga mokitkit
sa imong kiting

ang mga kuko

lima ang tudlo sa
imong kamot
nga wala magtupong

dili sab parehas ang
ilang gidak-on

lahi ang kumingking
lahi sab ang para sa
singsing

ang mga kuko lantawa
walay ilong walay mata

ang sanga sa kasingkasing

ang sanga sa kasingkasing
gisulayan kog balikog
aron mosubay sa saktong
kapaingnan

dili na madala, maoy ingon
sa tiguwang nga babaye

kon imong pugson mabali
ang sanga
ug dili mo na sab makita
pa ang gugma

kabalaka

kusog kaayo ang
ulan ug hangin diri

misakay ka ba sa
barko bisag anaa na
ang bagyo?

mas kusog ang ulan
mas kusog ang hangin
dinhis akong dughan

9/11/2018

pataasay

nagpalalomay mo ug
mga balak

sa laing bahin sila
sab 
nagpataasay sa ilang
ihi

mas maayo pa tong
duha
nag-iyahay ug borda

nawong sa usa
lawas ang ikaduha

niining bahina
walay nalumos
wala say mikuyos

facebook

feeling close sa
facebook
apan sa dihang
nagtagbo na ang
mga dalan
didto sa tyanggihan
ayay dili man diay
kaila

nagtagbo ang
mga mata
unya iyahay ug
lihay
kay dili diay
kaila

labaw na nga
dili jud higala

sa facebook ra
kutob ra diha

dili sama kaniadto

mapasalamaton ako
sa imong kabag-ohan

nakapausab kaha ang
balaanong pagmahal?

ug nganong makamao
ka nang dili magtagad
sa mga tunok sa
rosas?

dali mo lang nakalimtan
ang pagkabuak sa 
porselanang tasa

wala ka na mangutana
kon asa na  kita
basin og dili na mao
kining atong giagian
sa kangitngit sa kagabhion

makausab diay ang tinooray
nga paghigugma
wala mo na mabantayi ang
akong sunog nga aping

wala mo na giihap ang mga
milabay nga mga oras
wala mo na mabati ang 
kauhaw ug kagutom

kitang duha lang dinhi
apan wala  ka na maghisgot 
ug kamingaw

nangka

pasayloa nga sa akong 
pagdalit nimo sa hinog nga
nangka

anaa natagokan hinoon ang
imong kamot ug
ngabil

saon man god nga 
nagpadilidili ka pa man
nga akong hungitan sa 
akong pinili nga
mga lusok  niini

tam-is, bus-ok unya
kagumkom pa gayod

9/10/2018

sukod

kon unsa gayod 
ka tinood ang gugma
unaha pagbubo ang mga
utot-utot nga
nangalaya na diha
sa daplin sa karsada
ning taas na kaayong
panahon sa 
atong hulaw.

kabahin sa pagsulat

ang pagsulat mao
ang pagpanambal sa
imong kaugalingon

ang sakit nga imong
gitambalan
walay kaayohan

matag adlaw mao 
ang pagpanambal
matag gabii ang
pagbangotan

ang imong tambal
wala makadulot sa samad
anaa nagpabilin kining
samad nga gusto mauwat

kanunay mong gibugaw ang
mga langaw nga bout
motilaw sa imong dugo
bisan gani anaa na ang nana

dili nimo matukib ang kabaho
ug ang kasakit
apan ang dakong katingalahan
mao ang milantaw ug ang mibasa

kaanindot kuno sa imong gisulat
gani mihangyo man sila nga
dugangan pa nimo kini sa matag
adlaw sa  matag gabii

wala ba nila masumpay ang
kasakit ug kalamian?
wala ba nila matuhog ang
samad ug ang uwat?

wala pa ba nila makita ang
lagom mong dila ug ang 
mat-an nga pinya? ang 
mata sa dagom, ang kabaw
nga ang sungay nagtulisok
sa namaypay nga dunggan 
sa ikog nga bunal?

dali na mo diri

usa lang ang
tinaguan aron dili 
maputol ang
tanod
nga gilatayan nato
sa atong duha
ka tiil

wala nato kini
ambata
nagpadayon lamang
kita sa pagtikang

sa atong kilid ang
mga panganod
sa atong ibabaw ang
mga bitoon
sa unahan ang mga
kamot sa adlaw nga
sa kanunay
miaghat kanato sa
pagpadayon

nga mora bag
miingon " ali mo diri
pagdali kay
lami kaayo 
ang akong hanyag 
diha kaninyo"

sa atong palibot
ang kabugnaw
sa unahan ang 
kainit....


9/09/2018

dilang lagom

sahay, mao sige nakong malitok
kining usahay

ang gipamulong mo sa tinood lang
nagpakita sa ikaw

kahinumdom kong Tiyo Mayeng
nga disir molakaw si Tiya Mameng

hikapon una ang iyaha dayon 
pagbalik hikapon na usab kon

nagbasa ba, unya masuko siya
kon ingnon nga seloso siya

maong duda ko sa tawong manghambog
nga siya dili limbongan

sa insik nga kuno siya ganahan sa
tawong matinod-anon

sa tawong suko sa mga kawatan
sa mga nagdumot sa mga mangingilad

ang dili lang nako masabtan
ikaw, nganong anaa naghilomhilom ka man

sa tungatunga sa dalan sa pag-abot
hangtod na sa talad kan-anan

ako sa akong bahin, misulat lang, 
sa inyong atubangan, miyango, 

miduko, mipahiyom, ug kon pangutan-on
itubag ang usa ka piyong, og kon molantaw

ihatag ang matang hiyong, ang tak-om
gitago ang dila nga lagom.

kitang makasasala

buot kong sayran ka
ako nga suheto kabahin
sa mangga

ang manggang hamis
dili kana tam-is

nakat-unan ko kini 
didto sa Buntod

dapit sa lugar nga 
ginganlag Bandera

mas lamian ang manggang
gitayumtom

di ba si Gerard man say
gaingon nga nindot  lantawon

ang isdang gitayomtom ang
bakang puting mansahan sa itom?

alang sa yabag nga gikaloy-an ni maestro raval

miangkon ang
yabag sa iyang pagkayabag

ang magtutudlo kamaong
malooy

busa giapil ang yabag diha
sa hinanoy

abre ang baba, kuyog ang
sadya nga nawong 

apan walay tingog diha
duol sa dalunggan sa maestro

nga mihangyo usab kaniya
ang bisag apil siya dili lang 

gayod siya mokanta, dili lang
moiskrima.

sa kanunay lahi gayod ang tatay kaysa atong nanay.

nahinumduman na hinoon
nako si tatay
niadtong gikawat ko ang
iyang kabayo
nga akong gisakyan paingon
sa bungtod
unya nakauli ako hapit na
ang kaadlawon

dakong kasamok ang nahitabo
ang akong dila lang ang way
labhag atong panahona

mipasaylo man ugaling si tatay
kanako
apan lahi na gayod ang sunod
nga mga adlaw

ingon siya, "pagbantay, pagbantay!"
anak ka lang, pagbantay!"
sa kanunay lahi gayod ang tatay
kaysa atong nanay.

sakayan diha sa suba nga duhay ayoyok

sakto gayod si
jose

kita ania nagsakay
sa usa ka sakayan

ikaw naa sa tuo
paingon sa pikas

ako sab nia sa wala
lantaw sa laing bahin

anaa ang laing naa
sa tunga

ang babaye nagkalo
nagdag buwak

ang lalake nga opaw
anaa nagsigig tagay

duha ka bugsay
sa usa ka sakayan

supak ang paingnan
nagtuyok tuyok ang

sakayan diha sa
suba nga duhay ayoyok

ang kristo

dili ako ang
naghimo sa maong
balaod

sulugoon lamang
ako


wala akoy katungod
sa pag-usob niini

mahimong basahon
ko kini pag-ayo dayon

maghimo akog akong
mga pangagpas

apan kutob na lang
ako dinha

ang martilyo ania
sa akong kamot

anaa ang lansang
tupad sa krus.

9/08/2018

panahon

dili na dagko 
ang mga balod
sa kahaponon

gamay lang ang
gilangoy
mas ganahan
tas lutaw-lutaw

ang kahayag
sa adlaw nga 
nagduka
mihaploy sa
mga dahon
sa kahoy

laing adlaw na
usab ang milabay
ning atong
lulinghayaw
unsa ba ang
nausik?

9/07/2018

sa tumang kaguol....

naunsa ba si sarah
karong nanganak na
siya 
unya wala diha 
ang amahan
mao man hinoon
ang pagtinood niyag
basa sa mga
balak

gibutang ang bata
sa duyan
sa iyang dughan
mitabyog
kay wala diha ang
amahan
mibasa sa mga balak
sa tumang
kaguol....

kadto ang walay hinungdan...(alang kang manuel)

mao gani
gidam-agan ka
samtang
naghawid ka sa
usa ka tasa nga
kape

nausik. ngano?
tungod kay naghawid
kas usa ka tasa nga
kape?

hmm, dili tungod
sa midam-ag?

ako sab
naghawid sa usa ka
tasa nga kape
ako lang usa
walay midam-ag
kanako
walay nausik

walay hinungdan.

dili tungod kay
naghawid kos
usa ka tasa nga kape

kadto kadto ang
hinungdan
kadtong midam-ag
kanako

dili ang usa ka tasa
nga kape ang
ngano

dili ako nga
nagdala lamang sa usa
ka tasa nga kape

dili ang kape
dili ang tasa
dunay midam-ag 
kanako

kadto ang walay
hinungdan...

kambyada larga.

unsa kadtong
nakita ko?
brutal, brutal
gayod

ang akong
nakit-an nagpiyong

sa kalami kaha?
o sa kasakit?

pagkahuman
sa tanan
ingon siya
sakit baya apan
lamian...

milabay ang
panahon
ako sab mibati
sa sakit
apan bisan pa
niana
gibalik ko ang
iyang 
gipamulong

sakit baya
apan lami pod baya

ayaw na ug
sabat pa kanako
sayod ka na
niini

mao ra ang agianan
diha sa sakit ug lami
sama niadtong 
babayeng
miiyak dayon mikatawa

miyaka dayon misayaw
mihangad midungo
mitutok mipiyong

nanaad nga iwakli
apan sa didto na
ug sa diha
gibira, gigakos
gihugtan pa gayod
kambyada larga.

bisyon

tungang gabii
kanunay maoy 
imong itumaw
diri kanako samtang
ang akong dughan
naglagubo sa
kalipay
ning tumang kahilom
nadungog ko pag-ayo
ang imong hunghong

ang akong
dalunggan napuno
ang akong kasingkasing
misayaw

unsang pulong
ang imong gigamit
nganong 
wala ko man
kini masabti
dayon?

unsa kadto?
tulay, tubig nga miapaw
sulog nga lubog
putol nga pako
kalag nga nag-aginod
lawas nga mikapakapa
hapit na gayod
kini malumos
walay bisag usa ka
tawo nga
nakakita nimo

selos

unsa kining
iroa
nga matag
halok ko
kanimo
mangigi man?

ug nganong wala
kaha siya
maulaw sa iyang
kahimtang?

irong buang kini
apan nganong
wala man nimo
likayi?

kon wala ako
nganong imo man
kining
gisabak?

mas mahal mo
na ba ang 
iro kaysa kanako?

ang pagdili

ako na mismo
ang nagdili sa lami
apan dili makaayo
kanako

sa una
sayod ka nga 
nangadaot ang
atong mga 
ngipon

karon ang
atong mga ngabil

ugma kon dili
kita magdili
unsa na pod kaha
ang mangabali?

9/06/2018

kinsa

nagkuyog ang duha
ang kamatooran sa tuo
ang kalooy sa wala
gibira ko sa tunga
sa tak-om kong baba

gusto ba ninyong magisi
ko sama sa unas sa saging?
ayaw ko ninyo
papilia kay moabot ang 
panahon nga biyaan ko
kamong duha

mitaas ang kilay sa kamatooran
nasuko
ang kalooy miduko
nga morag naulaw nga morag
kaiyakon

higala
kabalo ka kon kinsa ang akong
gipili nilang duha.

9/05/2018

paslot

ang mga kamatooran
morag mga duaw diha sa
hospital nga 
nag-alirong kanako
samtang ako 
nagpaabot sa balita
nga moabot pa kuno
unya

daghan man diay
ang ilang nawong
sumala sa ilang mga
katuyoan
ug sumala usab sa
akong pagsabot
nilang tanan

usa lang ang akong
nasabtan bahin niini
apan sa tinood lang
dili sab ko segurado bahin
niini

nga kon ako mamatay
na wala na usab sila
wala silay makuha gikan
kanako
samtang ako wala na
usay pagbati

kay matod pa
didtong dapita wala na
ang kalipay ug kasakit
ang kasaypanan og
ang kasaktoan

tinood, mao kini 
ang tinood
wala ko masayod
kinsa ba ang
kaninyo diha nasayod?

kitang mga buhi
nagsigig kutaw sa atong
mga utok
sama sa pagkutaw nato
sa atong mga kape
samtang init pa kini
samtang makapaslot pa
kini sa atong mga dila...

abat

nagpasalamat ako
sa maong hitabo kay
kon wala kadto
wala akoy matugkad
wala nako mahibaw-i
kon unsa ang tanan
kon ngano ug kon 
unsa ako. 

kitang duha
wala magsultianay
namati lang sa
atong mga
hapuhap

daghan kitag nakat-unan
bahin niini
bahin sa tumang kahilom
bahin sa
pagdalidali aron ang atong
mga ginhawa
dili mag-abot

o dili ba kaha
aron dili maabtan.


dakong sulog

ania ang panahon
sa pagpahipi

baki sa kilid sa 
dahon sa gabi

waya-waya sa 
ilalom sa gamot
sa water lily

manananggot
sa ibabaw sa lubi

hubag nga babayeng
naligo

likod sa dakong bato
kilid sa dakong sulog.

 

kaniadto

ang kanhiayng puti nga
(di mo na gani malitok kon unsa

tungod guro sa kauwaw) karon
haskang lagoma na nga 

( sa imong gibati usa na lamang
ka lagong)

nakahinuklog ka sa ilalom sa
subo nga buwan ( ingon ana diay

ang mahitabo human sa panahon
nga ikaw magawsan na)

unya mibutyag ka sa kahayag
( dili na nimo malitok tungod sa

katinood) adtong panahona
wala man diay ang gugma

(nagtomotomo ka lang aron
duna kay kapahungawan) sa 

gatidlum nga pagbati didto sulod
sa imong purol

nga karon naughan na nga morag
yuta mong natawhan 
kaniadto.