2009/08/30

pagtoo

dili ako ang klaseng tawo
nga dali rang
moampo

dili ako mahadlok nianang

mga bangkaw sa kapakyasan

naanad na ako niana
og walay sundang

sa pagdumot ang makabuntog
kanako

dili ako talawan sa
pagkalalag o
pagkahulog diha sa pangpang
sa kapildihon

naagian ko na kana
og bisan og daghan kana sila kaayo
nga gani ang ilang mga ngalan
dili ko na mayubit
dili gihapon ako
malisang

ania ako
nagtindog lang gihapon bisan
samdan
bisan piangan
bisan og nagusbat na kining
akong lawas
bisan nadugmok na kining akong
dughan
og napulpog na kining akong
mga bukog

ania nagpaabot lang gihapon ako
sa giya sa akong mga bitoon

andam na ako sa akong panaw
paingon sa pagpangita
sa alang kanako

kay sayod ako
kay nagtoo ako nga aduna ako'y
luna diha
sa patag sa kalamposan

alang lang kana kanako
og kini
dugay na nga nagpaabot kanako

nagtoo ako niini
og walay makaagaw kanako niini
sud sa akong dughan

mitoo gihapon ako
hangtod sa pag-abot sa akong
palad
bisan pa diha sa bung-aw
sa akong kamatayon

dili gayod ako
magpatulo og luha diha
sa pagduda
dili og dili gayod

bahala na

miabot kita sa punto nga
ako motalikod na unta kanimo

mitalikod ka usab
naglikay sa akong mamahimong
pagbalik unya kanimo

gisugdan ko ang akong
paglakaw
pagawas na sa pultahan
sa dihang nadungog
ko ang imong pagbakho

dili makapamakak ang imong
kasingkasing
sa iyang awit sa gugma
nalitok na sa dila
ang imong pagkahinawaing
ang imong dughan
nangagho nianang
dako og lapad
nga pagkahaw-ang



mibalik ako sa sud
sa lawak sa mga pagbati
og gigakos ko ang imong mga bukton
gihagkan ko ang imong aping
og gipahiran ko sa akong mga kamot
ang imong mga luha

dili na ako magpalayo kanimo
og dili ka na mohilak pa bisan kanus-a

bahala na ang gugma
kay gamhanan man kaha siya

ang bato

kaniadto
ang bato walay labot
sa iyang palibot

hilom lang siya
nga nagpatong
sa lapok
sa kilid sa sapa

ang panganod
nga maanyag
naglagot kaniya

ang iyang katahom
wala maambat
sa bato nga
wala na maghandom
og pahiyom
bisan pa sa
balod sa tubig
o sa katawa sa
ulan


apan karong adlawa
gitulon sa bato ang iyang garbo
misangpit sa ngalan sa
panganod
nangayo og ulan

ang iyang higala mga
lumot hapit na nga mamatay
sa kauga sa iyang
lawas
sa pagpangliki
sa iyang palibot

bisan og supak
sa iyang pagkabato og
kasingkasing

miampo ang bato
nagpakilimos bisan na
lang og
usa ka yamog sa dahon
bisan lamang og
usa lamang ka tulo
sa ulan
sa kaadlawon

mabuhi lang ang iyang
gihigugma

2009/08/28

patas lang

milantaw ang
pula nga gumamela sa
pungpong nga
bulahan

og ang pungpong nga
bulahan mibalos
og tutok

"oo, pagkaanindot
sa imong pungpong
apan ikaw unya
ang ilang
batohon" miingon
ang gumamela

"ayayay, pagkamubo
ra usab sa imong
pagbukhad" mibalos
ang bulahan

ang gawas sa akong kalibotan

naglakaw ko gabii
sa fuente
lapos sa jones

gusto ko nga
malingaw
apan ngiob
kaayo ang
dalan bisan
pa sa kahayag

wala ko ambata
ang babayeng
mitutok kanako

misud ko sa
shakey's
nag-order og
greek salad
parisan sa
chocolate sundae
og mojos

milingkod ko sa
daplin og
adunay bata nga
niwang kaayo og
gakiang
hugaw kaayong
tan-awon og
mibukhad sa
iyang palad
nangayo

gibira kini sa
gwardya palayo
sa samin nga
dingding

giuna nako
og kaon ang sundae
og wala na ako
mag-ambat sa
lakaw sa kinabuhi

pagkatam-is
sa chocolate ice cream
pagkalami sa
red cherry nga
akong gidula-dulaan
sa akong dila

ahh, Dios na ang
bahala sa tanan......

2009/08/25

ang sulat ug ang lakra sa gisulatan

giukab ko pagbalik kadtong mga gihay
sa akong karaang notebook
kung hain nahasulat ang imong
mga dinumerong pangaliya
sa akong pagbalik sa imong tiilan
haron muhalok kanimo
pag-usab ug ibayaw sa ka sa imong
kalibutan

apan hanap na ang tinta
dili ko na maklaro
dili na usab buhi kadtong mga lakra
sa imong kusog sa pagduot
sa ballpen nimong panda
nga itom ug agi

tingale angayan na gyong kalimtan
andam na ako sa akong pagdawat sa tanan.

igo na

mialisngaw na usabang imong pan-os
nga panglantawdaw gihay
sa mga walay puamod
nga unas nga gasigig kagaskas
panahon sa akong pagpahulay

kalimti na kanang imong mga sugilanon
pasalay-lua ang imong kagutom
palabya ang imong pagkahakog
hununga ang sonata sa kaibog mo
sa buhok sa bulan nga bulawan

wala na kini'y bili
buta na ako,
bungol,
ug binhod na ang akong mga unod
sa akong pagpamati kanimo.

kon nganong sa tungang gabii ko ihatag ang puti nga rosa alang kanimo


sayod ako
nga ikaw wala makatulog

og sayod ikaw
nga ako usab nahisama kanimo

busa ania ang
puti nga rosa alang kanimo

niining tungang gabii
itugyan ko kanimo ang akong

putli nga pagbati
tugbang sa tanang kahayag

nga akong gitago
sa matag adlaw

saksi ang bulan og mga bitoon
sa akong pagtukaw

sa tumang kabugnaw sa kagabhion
sa tumang kainit sa akong kasingkasing

sa dihang nangandoy ang usa ka gamay nga bato


sa dihang nangandoy
ang usa ka gamay nga bato
nga mahimong
panganod

nangyam-id ang
bungtod og ang hangin
mihunghong sa mga dahon

aduna na usay bag-ong
nawad-an og pagsalig sa iyang
kinaiyahan
aduna na usay nawala sa iyang
agianan

aduna na usay mga mata nga wala
makakita sa gahom
sa iyang kaugalingon

ang panganod namati
nakadayeg

sa pagkahanaw sa kataposang
alibangbang

mingawon kita sa hangin
nga gikan sa iyang puti nga pako

og sa matag dahon nga mahulog
sa sanga sa kahoy

atong mabati
ang iyang pagkawala

2009/08/23

panimalos sa kalimot

maayong buntag
kanimo kalimot

aduna unta ako'y
importanting isulti kanimo

dili kataw-anan
seryoso nga butang

makapausob sa dagan
sa imong kinabuhi

apan...
ako mang nalimtan.

2009/08/21

mga butang nga dili na nato pangayoon

mga balod sa dagat
aduna silay mga tinagoan nga awit
ang daplin sa baybayon
kanunay nga gihagkan
lapad ang dughan sa dagat
sama sa imong kasingkasing

manggihatagon
mapailobon
mabulukon
og sa kanunay naghatag kanako
og kalipay

mga panganod naglantaw
sa iyang walay sukod
nga kaanyag

og kitang duha
wala na mangayo sa bisan unsa pa
hingpit na ang tanan
kitang duha
sa tiunay nga gugma

kita na lang duha dinhi


namahawa na kaha sila wala na igdungog kon asa na dili ba kaniadto mora silag mga sayaw-sayaw sa punoan sa mangga? ang uban nagpadungog dungog nga magsalag ang uban misaad nga moawit sa matag adlaw aron ang kasubo nato dinhi unta mahupay ang uban nagpakita sa ilang mga pahiyom wala koy nakita nga nangyam-id niadtong pagsugod apan pagkagamhanan gayod sa kalimot og ang uban nga masaaron gitulon sa dakong baba sa kaligotgot ang uban nagpadaog sa mga bangkil sa kasapot og sa gamay lamang nga haguros sa hangin nanglupad sila sama sa mga langgam nga hadlok sa ulan sa linti sa dalogdog kita na lang duha dinhi gusto unta nakong makita nila ang atong gisaloan nga kalipay kalipay nga dili matukib sama sa pagtampisaw sa mga pato diha sa tubig

rason

pangitaon ko ang wala
og ang naa na sa akong palad
ako kining ilabay

wala na kanako ang
tiunay nga gugma
ang anaa sa akong palad
mao ang kapakyas


alang sa ulog-ulogan

ang imong kasingkasing
lapad
ingon sila og ikaw nalipay
nga sila
midayeg og nanabi nga ang imong kasingkasing haskang
lapara

nagsige kang panghatag
pagkabantogan
nga pilantropo

morag pungot ka sa kwarta nga igo lang
modap-ig sa imong palad og dayon nimog labay niini
sa bisan asa na lang

hangtod nga usa ka adlaw niana
wa na ju'y nabilin bisag kulilo sa imong bulsa

didto nimo namatyagan nga
kon wala na gani yamo
wala na jud
bisan og usa ka dako nga
makuot sa imong
bulsang haskang laloma man gyod unta

karon, naunsa ka naman?
morag lata nga gisipa sipa sa daplin sa kalsada.

kay ang imong kasingkasing man god kuno
haskang lapara
apan ang imong utok
haskang nipisa....

antaytold

sa atong last chat
naglikay ko og kabahin sa sex
kay gusto nako
nga

something personal ang dating
kanang tender ang atong moment
morag petals sa flower
nga gitayhopan sa sea breeze

gusto gani unta nako maghisgot
og kabahin sa love
apan morag gibati ko og kaulaw


nangutana na lang ko
og tagpila ba ang gugma sa
merkado

og nagpalingaglingag ka
nga wa ka kahibalo
apan sayod ko
dunay presyo ang tanan
og ang tawong andam mobayad
makaangkon ra
gihapon og kalipay

hapit na lang ko moingon kon
tagpila ka
apan nagpabilin kunohay ang akong
sense of delicadeza

feel nako mora kog unggoy
nga nagbitay sa sanga
og ikaw bata nga
nanghalab sa imong sopas
sa walang kamot
og sa imong saging nga hinog kaayo
sa imong too.

morag nakalitan lang seguro ko
apan nakarecover ra gihapon
nakawhat ra pod nako
ang akong
sense of decorum

nahimo kong bata og ang akong mga
hands
naa sa front sa desk
samtang ang akong teacher nga mangkay
nanghambog
sa atubangan sa akong mga classmates
nga mga walay hilam-os

" look at ric, he is so behaved"

og miok-ok ang akong lagay
sud sa akong purol
nga haskang hugota kaayo
sa akong paa.


(hayy, pagkahipokrit gyod).
sa party
dunay nangayo og
prunes,

pero iyang gipasabot unta
prawns

(wa na lang ko nag-mind)

apan miabot sa punto ang
dialogue nga
siya miingon nga

"there is no such thing as a free male"

hayy, kabalo kos iyang bout ipasabot,
"free meal"

pero ok lang
idem sonam na lang.
ವಾಟ್ ದೊಎಸ್ ಇಟ್ ಮೀನ್ ಟು ಸತಿ
ಅ ಮ್ಯಾನ್ ಫಾರೆವೆರ್?

ಲೋವಿಂಗ್ ಯೌ ಲವಿಶ್ಲ್ಯ್ ಹಸ
ಬೆಕಾಮೆ ಮೈ ಪೈನ್

ಇ ವಿಶ್ ಇ ಕ್ಯಾನ್ ಕ್ವಿಟ್
ಬಟ್ ಹೌ ಕ್ಯಾನ್ ಇ?
ವಲ ಗಯೋದ್ ಮಗ್ದಹೊಂ ಅಂಗ ಹಂಗಿನ
ನಗ ಹಂಗಿನ ಲಾಂಗ್ ಗಯೋದ್ ಸಿಯ
ಹಂಗ್ತೋದ್ ಸ ಹಂಗ್ತೋದ್
ಸ ಇಯಂಗ್ ಕಿನಬುಹಿ

2009/08/20

Way Tukma Nga Alamdag

Ang mata mihiyong
lahos sa mikruskupyo.
Halos hubo ang dayag
nga mga pirasong lugas
nga mikumbitay sa tanud
taliwala sa langit ug yuta

Di ba kaha ang tigpaniid
misundog sa iyang
kaugalingong imahe?

...ang pagmahal ko
kanimo maora ug bidlisiw-
bug-at sa akong abaga,
duha ka oras human
sa kaudtuhon, ako
migukod sa akong anino


...

2009/08/19

soft and beautiful

sa imong pagpangutana kon kinsay nabana
ni anita
og aron imong ma-imagine kon unsa ang itsura
miingon ko
kon nakaila ka man kaha ni Eduardo
kadtong potot nga tabonon
nga daghang ap-ap ang nawong,

pwes patas-a og duha ka tiil
walaa ang mga bugasbugas
og paputia dayong patamboka
gamay lang
og dayon ihatag ang
gamayng kiay sa imong bayot
nga manikurista
kadtong baho og baba

mao kana ang iyang nabana.
kay medyo bayoton man sab gamay
tawgon na lang nato siya nga

soft and beautiful.
ayaw og katawa kay basin makasala tang duha.
kapoy handomon
ang tamsi nga wala nay salag

ang salag nga nahulog
sa silong sa punoan sa mangga

og ang batang
mikatkat og nanaog sa punoan sa mangga
nagdagan nga malipayon
paingon sa ilaha

dala ang tulo ka itlog sa tamsi
nga wala nay salag

banag asawa

ang pinalanggang langgam
wa mahigam
kay
milupad
nawagtang

ang nahibilin
patay nga langgam.

haiku

kabahin sa pagpahumok: alang sa mga dili pa makadawat

nanghagad si Iso
sa iyang baligya nga
pangpahid
aron kuno ang humok
mogahi

aron way makadungog
miduol siya og
mihunghong sa usa ka
pangutana kon
duna ba siya'y laing
baligya
kanang para pahumok...

2009/08/18

Baybayon: Ikaduhang Semana sa Agosto 2009

Baybayon: Ikaduhang Semana sa Agosto 2009

13 ka mga balak ang midagsa sa Baybayon

Pananglitan ang Sakayang Papel ni Cindy Velasquez nga miabot sa baybayon nga daw gipalid lang sa hangin, unya namidpidpid lag iya sa lapyahan. Morag ayaay ang dagat, apan mora pod og dunay mga balod nga mihatod sa sakayan. Malinawon. Hapsay. Dunay mga hulagway nga mamidpid pod sa panimuot sa magbabasa, labi na ang pagkaayahay sa way sangit nga pagbasa niini.

Kon basahon pod nimo ang iyang balak nga Makighagwa sa langit mora pod og bation ang dakong kamingaw kun kahidlaw. Samtang gahangad sa langit, sa mga bitoon, ug sa unsa pang hinungdan, daw ikaw nanamin na man hinoon ug imong matataw ang kamingaw diha sa imong dughan.


Kinsay magdahom nga ang gilubong niining gibalak ni Ric S. Bastasa, mao diay ang gugma ko kanimo (mao pod ang titulo sa balak). Ug kinsay magdahom nga kini dili pa diay patay, inay buhi ug milabong pa. Bisan gikalimtan na sa naglubong sa iyang gugma, anaa pa gyod diay, gapadayon. Ang nindot ani, mao ang wa damha nga anaa pa. Diay!

Kalingawi ninyo'g basa. Ug kon duna moy ipadala nga balak, dire lang ipadala: lunsayngbinisaya@gmail.com

Lubi






Gituhil ang anino sa sakayang papel inig
salig niini sa agay ug pagtukaw sa tubig.

Nitapot sa papel ang hangin, namidpid
kini, lakip na ang gibug-aton sa panid.

Kini naunlod sa galiyok-liyok nga kabugnaw
diin ang mga letra nagkisikisi sa pagpanaw.

Ug nibukhad kini sa dila sa dagat
samtang gihapyod sa tumang kaparat.








Usa ka eskultor ang kangitngit
nga makighagwa sa langit.
Apan ang iyang mga kamot, mokudlit
sa gilay-on sa mga bituon
ug karong gabii gatan-aw ko nila,
ug diha pod nako mahipalgan
ang tibuok nakong kamingaw.





duna kay gilubong
gusto nakong hinumduman
apan ikaw
dili na ganahan

nindot kadtong imong gilubong
ilalom sa yuta
imong gitago
apan kini mitubo

mangutana ka kon unsay ngalan?
kay imo man gyod nga sa dayon
gikalimtan

sa imong kabangis
ako nalooy
kadtong imong gilubong
gugma ko kadto nga karon
sa gihapon
milabong.



daghang balak na ang
nahimo, og ang akong mga kamot
dili na makatoo nga ingon ana diay ako
ka matootoohon sa gahom sa pulong
sa paghatag og kalipay
sa akong dughan nga nagusbat sa
tumang kasakit, ang akong kasingkasing
walay hunong sa pag-awit
ang akong mga tiil nagsikad nianang sayaw
sa ritmo uban sa mga tanghaga
ang akong mga tudlo mikitiw
og ang akong panumduman
sa tumang kakapoy
nanaghoy..... kanus-a pa? kanus-a pa ba
mahuman ang
pagyamayama niining mga ngabil
sa akong kapalaran?

wala ako masayod, og sa pag-abot sa
panahon nga wala na ako'y madungog og makita,
og mabati, basin og mao na kana ang akong
maabtan nga kahingpit
inubanan sa akong kahilom,

unya? ugma? ah, basin hapit na
mosalop ang akong adlaw.
pagkadaghan sa
mga habog nga mga tinukod nila
og kita nga naglantaw
mahingangha sa
katas-on og sa kalig-on
sa ilang giantosan
og gibilin kanato

daghang tawo ang
nangamatay
kada ang-ang kada
kwadro kada
hagdan
daghan ang nabalintong
og napandol
og nahapla tungod
sa kahalangdon sa ilang
mga gimugna

ako nga nagtindog og
milantaw pag-ayo
nausikan
kay bisan usa na lang
ka salog
og tipak sa haligi sa maong
kabantog
wala manginahanglan niini

ang ako
mao lamang ang paglantaw og
dayon paglakaw
paingon sa unahan....

gikapoy na kami og panagan
sa matag adlaw og gabii
sa pipila ka tuig

miul-ol na ang among mga tiil
og mibaga na ang kubal
sa among mga lapa-lapa

wala ka ba usab kapoya og
ginukod kanamo?
unsa ba gayod ang imong tuyo?
nganong migukod ka man kanamo?

wala kanamo ang gugma
og wala usab kanamo ang kasilag
wala na kanamo ang kalinaw
og dili usab namo tumong ang kasamok

mopahulay usa kami sa silong sa kahoy
mangutana ngano ba og naunsang hitaboa
nga sa tibuok namong kinabuhi
kanunay man kaming nagdagan og kanunay
ka man usab nga naggukod kanamo....

kape

kon timplahan mo ako sa
kape
ayaw palabihi og asukar
kay ang
katam-is sa akong pangidaron karon
morag lood na
nga pamation

naandan ko na ang katab-ang
og lami na usab
para kanako ang
kapait

ayaw usab palabii og kainit
ang tubig
kay ang akong tilaok
naanad na nianang
medyo bugnaw.

haiku

2009/08/17

pagsalig

ayaw dudahi ang
pagpunay og balik-balik
sa tugkaran sa balay

kanang
adlaw og gabii

ah, dili kana sila sama
sa tawo nga
miduaw kay anaay tuyo
kay anaay pangayoon

ah, sila miabot
tungod kay ila kanang
buluhaton
alang kanato

salig lang
nga ang adlaw magpabilin
nga ang bulan
mohatag pa gihapon sa iyang
hinulaman nga
kahayag

salig lang
nga ania pa gihapon ako
nagmahal og
naghandom kanimo

usahay

usahay miga makapangutana baya
upod ako
kon ako kahibalo na ba nga mangawras
sama sa iring
kay niadtong usa ka gabii
nga ako
nangita og kalipay didto sa kalibonan
dapit sa likod
sa inyong pantawan
sa atubangan sa inyong labat nga
kawayan
samtang ang bulan mitibuok
sa iyang kahayag
dakong katingala ang akong
nahigamhan
nganong ang akong anino aduna
may ikog og nganong
ako mora man og kamot nga
migukod niini.

Haiku

naggukod siya
sa naglutaw sa hangin ~
bangaw sa buwa



...

2009/08/14

kagahapon

ang mga dahon nga laya
akong gidauban

og ang mga tipaka sa akong
mga kagahapon

akong gisilaban
aron akong mabawi ang tanan

diha sa mga abo og abog
nga ilang gibilin
sa dihang miabot na ang
kasumo sa gugma

kay bisan baya og unsa kalami
ang humba

moabot man gayod ang atong
kamingaw sa ginamos

og dili ba kinilaw nga bangus
nga gihilogan og biasong

midangop ako diha sa
pagpiyong sa akong mga mata

og pagkahuman nianang paboto
sa mga rebentador sulod sa akong karsones

magpabuta-bungol ako
og kon makalitan niining akong gihambin

nga mga kalibog
tutukan ko ang nag-inosarang bombilya

mora bag lami na man hinoon kanang
ako sa dayon mabuta

og mobalik ako sa humba
molamoy aron unta ako magsuka

2009/08/13

ang gugma ko kanimo

duna kay gilubong
gusto nakong hinumduman
apan ikaw
dili na ganahan

nindot kadtong imong gilubong
ilalom sa yuta
imong gitago
apan kini mitubo

mangutana ka kon unsay ngalan?
kay imo man gyod nga sa dayon
gikalimtan

sa imong kabangis
ako nalooy
kadtong imong gilubong
gugma ko kadto nga karon
sa gihapon
milabong.

2009/08/09

ang mga fashionista

nagpaabot sila
kanimo kay gustong motug-an
sa ilang
mga kagul-anan

og ikaw
mikatawa lang


tan-awa ang nangliki
nga panit
ang lawas nga napulpog
sama sa usa
ka haligi nga
walay kabilya

og dayon pamatia
ang iyang kataposang
ginhawa

huni kini alang kanimo

kalaay

ang dimalas
pirming nanampiling
nasina sa swerte
nga nagsayawsayaw
kay nakadaog og lotto

wala siya masayod
nga ang swerte
tulo na lang ka adlaw
ang gipaabot

kay kini mamatay na
og dayon ilubong
sa lugar diin
naghari ang yawa.

2009/08/08

walay makabuot sa kasingkasing

sayod ako nga walay
angay nga ikapanghambog
ang antulanga
tungod kay sa kahumot mo
malaya na siya sa tumang kasina

og sa dihang mibuswak ka
nga haskang pagkapula
kalit lang nalaksot ang
iyang mga gihay,

mibuhakhak ka sa atubangan
sa adlaw
naghugyaw ang imong mga dahon
sa imong kadaogan

apan bisan pa kon unsa ka katahom
kahumot og ka dinayeg
sa tanang mga naghandom
kanimo,

wala akoy mahimo
kay kadtong kulang sa kahomot
nga nalustay
mao man lang gihapon ang akong
gihigugma

ang mga bitoon
pati na ang bulan dili gayod makabuot
kon kinsa ang
makakitik sa panit sa akong
kasingkasing

bisan gani ako
nga nagtago og nagbuhi niini.

pagbalik sa agianan

sa kadugay na
sa mga katuigan
diri sa akong
mga kamot
nakat-unan ko
ang paglitok
sa mga pulong
nga tungod sa
kahapdos ako
na man untang
nahikalimtan,

miduol ako sa
usa ka hugpong
og nagsugod og
litok sa mga pulong
misulay anang
pag-antog sa
akong mga sinsilyo
diha sa bato nga
hantakan,

ikaw nga namati
mikalit og lingi
og sa usa ka senyas
adunay naglingolingo
og busa ako mihunong
og nahilom, og

mibalik ako sa akong
kagahapon kadtong
ako usa lamang ka
bato nga unta daghang
isulti apan wala nay
gahom sa paghisgot.

Sakayang Papel

Gituhil ang anino sa sakayang papel inig
salig niini sa agay ug pagtukaw sa tubig.

Nitapot sa papel ang hangin, namidpid
kini, lakip na ang gibug-aton sa panid.

Kini naunlod sa galiyok-liyok nga kabugnaw
diin ang mga letra nagkisikisi sa pagpanaw.

Ug nibukhad kini sa dila sa dagat
samtang gihapyod sa tumang kaparat.

Pag-abot

Sa mga gabii nga sama niini,
adunay pultahan nga nangita
sa imong mga tudlo.

Ug sa imong pag-abot, hinay-hinay
ko kining giablihan sa paglitok
sa imong ngalan.

Gabanos-gabos dayon ta og pagsubli
sa atong mga sugilanon, ug kining atong
mga kulokabildo nibuswak atong taknaa.

Kini sama sa habohabo nga nikutkot
sa yuta hangtud ang imong mga agik-ik
ug buhakhak sama sa pagbundak sa uwan.

Kini buot motapad kanako aron tudlo-an
ko unsaon hunongon ang mga gulto, ug matag
paduol niini, dili kabugnaw ang akong masinati.

Apan kini kay talagsaong kainit ug kahadlok
nga nikatay sa akong panit ug bukog
samtang kini nanghagit sa kangitngit.

Sungka

Dili na hinungdanon kon bato
o liso sa sandiya ang gihakop
sa atong mga palad, basta
di lang intawn ka manikas,
kay hagbay nang parehas
ang atong mga banwa.

Kanang naa sa wala kay imoha.
Kining naa sa tuo kay akoa.

Apan nahibulong ta nganong kalit mang
nawalis ang gitapis natong pagkahimamat
aning duwaa sa pagsugod sa tuig.

Makighagwa sa langit

Usa ka eskultor ang kangitngit
nga makighagwa sa langit.
Apan ang iyang mga kamot, mokudlit
sa gilay-on sa mga bituon
ug karong gabii gatan-aw ko nila,
ug diha pod nako mahipalgan
ang tibuok nakong kamingaw.

Pangindahay

kagabii...
naghandom ako
nga nanglupad ta
ug gilamoy sa unos.

Nagtan-aw ko
kanatong duha
nga daw mga tulibong
taliwala sa
nagsagunson
nga damgo,
nagmaya sa kalipay
nga wa pa matawo,
nalamat sa hapuhap
nga wa pa nabatyagan

Gitandi ko ang hanap
mong panagway
sa hulagway sa
akong tamboanan...

kinahanglang ba kitang
manglupad sa suwab
ning kalibutan
aron batuhon
sa kaugalingong panudya?

sagubangon ko
ang mga pulong
nga giilad
sa mga panghupaw
ug batilaab

karon naghandom...

dili ko labngan
ang pangindahay



...

2009/08/06

kining mobalak ta

kining mobalak ko
tungod kini kay kita napaakan
ako sa usa ka
ligwan

og nagkabuang ko og

dagan
samtang ang iyang talinis
nga dagom mitusok na
sa akong aping
og ang iyang suyod
nagpabilin

pagkaoran-oran mihubag
apil na ang agtang
og wala na ako'y makita
kay nahimo na ako nga
puros aping

og ang mabati mao na lamang
ang kasakit
nga mikulitog sa mga ugat sa akong
kasingkasing

nakabalak ko dili sa kalami
nakabalak ko tungod sa kahapdos

sa kasakit nga
ambot
wala na tingali'y
kataposan

dili ko na lang gayod ibutyag

dili ko na isulti ang tanan
kabahin sa
gugma kong gitagoan
sakto na nga kini
akong gibati

sakto na ang kagilok
sa akong ilok

sakto na nga masaghid
usahay ang akong
pangagho diha sa imong
gininhawa

dili ko na kini isulti
kay sa higayon nga ako
kining ipadungog-dungog kanimo
sayod ko
nga unya mobahakhak ka sa
usa ka dakong katawa

dili kaha malumping kining
akong kasingkasing
kon imong dulaan kini
sama sa usa ka
lata sa gatas nga
kondensada?

dili ko na lang gayod kini ibutyag
kay basin unya og
ang akong kalag sa kasakit
mayagyag

2009/08/05

sausa ka hugot nga pag-ampo


sa usa ka hugot nga pag-ampo
kanang sagol dugo na ang imong mga luha
og mga singot sa hwerto

diha sa imong pangaliya
nga unta ihatag na sa Ginoo ang imong gusto

apan wala gayod niya gihatag
pakyas ka, maoy imo,

bisan pa og maayo nang pagkapiko ang imong mga tuhod
nga ikaw dili na lang gani gayod makatindog...

ah, siya ang mas nasayod sa tanan
ayaw pagmahay
wad-a ang kahiubos

mas nahibalo siya kon unsa gayod ang alang kanimo
og niana kita wala nay mahimo....

ah, lawod-lawod ang iyang kaalam og kasayoran
og dili gayod kini nato matupngan

ah, pagpasalamat kay kon wala kini gihatag kanimo
kini dili gayod kanimo makaayo ...

unta mas maayo nga dili ka na lang mangayo
pamatia og pangitaa ang iyang gusto alang kanimo...

kay sa tinood, mao kana ang makaayo
og makatagbaw kanimo pag-ayo.

ligid sa kasagbotan

ligid sa kasagbotan
paglapok-lapok silong sa
kusog kaayo nga ulan

wala ba miabot sa imong
kinabuhi ang kalipay
usahay diha sa pagkamoritsing?

dili ba god makalingaw
lantawon ang atong mga buling?

sama ba unta sa usa ka bata
nga bulingiton
apan baya ang
nawong pagkamalipayon!

pagpauyon sa sulog sa usa suba nga pagbati

akong pahiran ang akong mga luha

panahon na sa pagsadya
sa pagpauyon sa sulog sa usa ka suba nga pagbati
sa gugmang tinipigan

panahon na ang paghubo og pag-ambak
og pagsalom og paglangoy diha
sa lam-aw sa kahinam
og kalipay
nga dili ko na gayod matukib

sa usa ka kahigal nga wala nay sabal
og bisan kon ang mga naglantaw
mosura kanako nga ako usa ka hangal
mangyam-id nga ako
usa ka butakal
dili ko na kini maambat

wala silay labot sa akong pagpaturatoy
niining gugma nga sa imong dughan
karon mitaroy.

kitang duha diha sa pag-ampo

gipiyong ko ang akong mata
samtang ako
miampo diha kanimo

abi nako og lig-on ako
apan sa dihang mitupad ka na kanako
og gisimhot mo ang akong dughan
og gihagkan mo ang akong
aping og ngabil

nahumok ako
nahuyang sa imong katahom
sa imong kahumot
sa kaanindot sa imong kalag
sa kalami sa imong lawas

gipiyong ko na lang ang akong mga mata
sa dihang
ako usab sa kataposan

giampoan mo

og sa dihang giablihan mo na ang ganghaan sa langit
misulod ako og miawit

bulahan ang magpaubos

bulahan ang
magpaubos

kadtong imong gikasab-an
nga wala motingog
kadtong imong giinsulto
nga wala mobalos
kadtong imong gisipa
nga natikay-ang og
wala kabangon
kadtong imong giyatakan
og nagpatara lamang

bulahan siya
kay iya na ang imong kalipay

bulahan ang magpaubos
kay iyang nakita
ang mga bato nga bulawan
nga imo lang gilud-an

pagkabulahan gayod sa
nagpaubos
kay siya lang ang hatagan
og luna diha
sa langit

og ikaw nga mapahitas-on
mahulog sama sa usa ka bitoon


ang maldita na si marinel

si marinel
og si samsam
gamay ra og kalainan

anang ilong nga
galisngag
anang wait nga itom
og aping nga
hulog

mas angayan pa gani gamay
ang among
si samsam
labi na og kini
mo-aw-aw

kabahin sa babayeng relihiyosa

pagkaswerte ba
sa babayeng relihiyosa
gigiyahan man god kuno
sa ginoo
kay nakabana
og buotan nga
lalaki

ambongan og
adunahan pa
gayod

og pagkadimalas
gayod sa maong
lalaki

pagkadako gayod
niyang sipyat

2009/08/04

yano nga kalipay

nasulayan ko na
ang paglingkod sa
bugnaw og lunhaw
nga carabao
grass

hilom kaayong
misalop ang adlaw

og sa dihang
miabot ang kangitngit

dayog abot usab
sa hayag kaayo nga bulan

walay kisaw ang
kinaiyahan
wala magdali ang
mga kalanggaman

ang usa ka haloan
nauwat nga mitukog
sa lingin nga bulan

unsa ba ang kalipay sa pagkakontento?

babaye nga
nga migakos sa iyang
anak nga lalaki
nga nahinanok
sa kalinaw sa
iyang dughan
dinuyogan
sa awit sa
kahilom

gamay nga bata

magmahay ba ako
kon ikaw wala miabot sa
akong kinabuhi?

gipaabot ko ikaw
og bisan og unsaon ko og
paningkamot nga ikaw hikalimtan lamang
kanunay kang
nagpakita sa akong panumduman

sama sa usa ka damgo
kabahin sa usa ka siwil nga naglangoy
sugat sa sulog sa usa ka suba
og dayon sa kalit nawala

dili katoohan
apan ikaw akong himoon nga tinood
ugma damlag
sa pagsubang sa bulan
sa pagtaob sa dagat
kuhaon ko ikaw sa duyanan
sa akong paghikalimot

balak nga gisulat nga ang background music mao ang nocturne in G minor ni Chopin


usahay kulang ako
sa pagsabot
nganong ako
sapoton nga walay
bag-ong balak ang
akong higala
nga sama usab kanako
nangalap og pulong
aron himoong balak
sa usa ka kagabhion
diin ang bulan
napapas sa mga
itom nga panganod

lisod kaha ang
magtrabaho sa usa
ka call center
labi na nga ang
imong supervisor
dili nimo
igkasinabot

labi na nga imong
bation nga
mas daghan
ka pa og nahibaw-an
kaysa kaniya

labi na nga ang
imong utok
nauga sa usa ka
pangita nga dili
nimo trip

lisod mobalak
kon ang imong
tiyan hangin
na lang ang sud

lisod mobalak
kon ang imong
kasing-kasing
nahawla sa usa
ka kahaw-ang


walay kwarta
ang balakero
walay kita ang
balak
walay mopalit
og balak
walay bunga
ang mga balak

apan, sagdi lang
kay maoy
akong ganahan...

2009/08/03

puro paranoia

gustong tupngan
sa imong anino ang
imong lawas

gukod hangtod
sa pagsalop sa adlaw

latas sa utlanan
paingon didto sa kangitngit

milamog ang
tanan milamog ang
tanan og ang tanan gayod

hangtod nga wala
nay makita hangtod nga
wala na ang tanan

nawagtang nahilos
napalos naloslos.

ang gasa

sa ilang gisalohan nga gugma
gigasahan siya
og usa ka batang babaye

pagkamalipayon na
gayod unta nila

apan kalit lang
nga gikuha siya ni
kamatayon!

kontento


wala nay
labaw pa
sa hulagway
sa pagkakontento
ning irong sakto
og lawog,

ay! pagkabugnaw
ba sa iyang simod
samtang nahinanok
og katulog

shirley


pagkahuman nila og
lantaw sa
rose parade
nagpapicture ang
pamilya

dagko na ang
iyang tulo ka mga anak
mas taas pa niya

nursing ang usa
wala pa ko kabalo
sa laing duha
(maulaw sab
ko mangutana
kay basin
nursing lang usab
gihapon)

wala'y nausob
kang shirley
smiling lang gihapon
siaw, game,
walay bikil

kulong lang gihapon
ang iyang buhok
og puti
tsinita
gwapa lang gihapon
(pwera buyag
biernes ra ba ron)

pagkapaspas gayod
sa panahon
kahilakon ko nga
maghunahuna
kay morag ako
lang man seguro
ang nabiyaan sa
panon

si sol ang usa namo
ka classmate sa
chemistry department
duna nay duha ka
mga ulitawo
nga mga sipat kaayo

si tess
naa nay dalaga
(serious lang gihapon
kaayo sa
kinabuhi,

nangita pa kaha
og bana?)

si rene
wa na ka kahibalo kon
asa apan nag-ingon
si sol
naa na poy ulitawo
nagkuha og nursing
sa ateneo

si nuela
asa na kaha siya karon?
naminyo man
kuno og hapon
(gwapa lang seguro
gihapon)

usahay magmahay
ko, apan
i-justify sab nako

kinsa bay walay
pagmahay ning
atong lakat sa
atong kinabuhi?

kadtong patay na?
og kadtong buhi pa?

miingon akong
amiga nga mangkay
nga puno sab
og pagmahay

"sus dodoy
(iyang tawag nako
dodoy man)

kapoy na og
analyze aning
atong life,

you know naman
you talk ka pa
use ka na lang!"

gitan-aw nako
og balik ang
picture ni shirley
og akong
gi-zoom in
dapit sa iyang
nawong sa iyang
agtang,

hmm, daghan
na sab og kunot,

morag kunot jud
dili jud kay
kunot kunot lang...

makalingaw,
ang rose parade
bisan og wala ko
didto,

wa na koy
pagmahay

wa na koy plano
mo-enroll sa
nursing
(isip double courser)

og wa na sab
koy plano
molupad sa amerika,

kapoy na
diri na lang ko
magkali
sa akong
violet nga kamote.

lantaw sa unahan

sa kataposan
gibiyaan sa tawo ang
kahoy

sa hawan nga disyerto
gitanom niya
ang iyang mga tunob

nanubo didto
ang iyang mga anino

ang mga sagbot
sa tumang pagpanuko
nga matandog
ang kalinaw sa iyang
panaw

nagpakahilom na
lamang

naghandom nga
unta dili na
lang mahulog
ang mga luha
sa mga
panganod

2009/08/02

Ang mga matang sa ulan

ang huni
sa talithi mipahilom
sa kasikas sa
mga layang dahon
sa ting-init

bisan sa kangitngit,
misalingsing
ang sagbot
nga nataliwad-an
sa mga ligating

nabuhi ang kaugatan
sa uphag nga panit
sa anig-ig
nga miit-it
sa mga alikabo

mga kinaiya sa ulan
nga mihatod
sa akong panumduman
kanimo...


...

2009/08/01

sa pagsalop sa adlaw
mangiyak ang mga anghel

kay sila dili alang
sa kangitngit

kay ang kahayag sumala
sa sugo sa

pamalaod sa panahon
mobiya na usab

kay ang kangitngit mobanos
mokaylap

panahon sa usab
alang sa paglupad

sa mga pak-an og itom
sa mga sungayan

sa mga midapig sa
kamatayon


ayaw ako og pangitai
anang butang nga
sayod ka
dili nako ikahatag

sama nianang imong
pagpangita sa adlaw
diri sud sa akong kalimutaw

dili ba tataw na kaayo karon
ang akong kahaponon?
ukba ang akong dughan
pangitaa ang akong kasingkasing

ibalik dayon kon mapul-an ka na
sama sa usa ka

jigsaw puzzle

sa pagpahawa sa pagkapari


mobiya ka aron pagpangita sa imong kaugalingon
mao usab ka na ang imong rason
sa imong pag-abot sa imong pagsulod niining
dako kaayo nga ganghaan nga sa hamubong
higayon imong gitrangkahan
gihuktan sa usa ka lig-on unta kaayo nga
bakos diha sa imong hawak

wala sila mamati sa imong panamilit
og dili sila magpatulo sa ilang mga luha

nahisama ka sa usa ka babaye nga nag-ilis
sa iyang sayal og blouse
nahisama ka sa nagluno og dili makalihok
nga halas.
kapila na ba kahigayon
nga ako moyukbo sa usa

ka dako nga suba nga ang
sulog wala na nagdala kanako

paingon sa dako kaayong dagat
kapila na ba ang higayon nga

ako miduko og mipiyong na lamang
sa akong mga mata aron lang

unta kamong tanan malipay kanako
apan sahi sa sangpotanan sa

kasagaran ang akong pagpakahilom
inyo lang nga gipakasamang usa

ka angayan nga mahitabo sama sa
paghulog lamang sa dahon tungod

sa paglihok sa mga sanga tungod sa
hangin: karon lahi karon mao na

ang akong katapusan nga pagyukbo.
motindog ako og mapahawa og ang

akong hangyo: palihog ayaw na kamo
pangita pa kanako.

Panginhas dire