9/30/2014

a theory about death

 1

gikan kos
atom
nahimong tawo
dayon
balik pod kos
pagkaatom?

mao ra ba
ni?


2

maong ang akong
atimanon mao
lamang ang pagkamaayo

ang paglabay sa daotan
kay ako mamatay
madugta

unya wala na?

og aron ako mahimong
dili malimtan
magpabilin ako sa akong
maayong binuhatan
diha sa kanunayng mahinumdom
unya kanako


unya kay sila
puros man sab mga atom
nga sama kanako


mao ba?
maora ba gayod kini?

kini ang gasa

gihatag lamang

ang imong buhaton

mao lamang ang pagdawat

wala nay lain

kini ang gasa

wala nay lain

ang imong buhaton

mao usab ang paghatag

mao lamang

kay kini ang gasa

ug ang atong gibuhat

mao lamang ang pagdawat

tinapulan

pamub-anay
sa saya



pahamisay sa
panit


pakitaay sa
bulog

pagtulon sa
kaulaw

alang lang unta kanako ang akong gihimo kagahapon.
gitago ko kini sa usa ka sirado kaayo nga garapon kay dili kini makaon

usa ka adlaw niini, adunay miukab, giingkiban, apan sayod ako sa kawalay lami niini,
gani kon ayohon pagpensar, lood gayod bisag usa lamang ka ingkit ang imong buhaton.

gibiyaan kini sa tokador, ug misunod ang bagtok sa pagtangag niini, ug sa mao gihapong rason,
gibiyaan kini nga nahulog sa salog, miligid, migawas sa pultahan, ug nahulog sa hagdon,
hangtod nga nakit-an kini sa iro nga nagpaabot sa iyang pamahaw didto sa gawas sa balay

giduol kini sa iro, gisimhot, gitilaan, gipaak, ug sa maong rason gihapon,
gibati ug bidli ang maong iro, gibiyaan kini, ug sa dihang miabot ako
miduol kini kanako, mikiwil ang ikog, nag-ambak-ambak sa iyang kamingaw kanako

gitilaan ang akong tiil, ug ang akong kamot, ug ako kining gihapohap, kay lagi
pinangga ko man usab kini

sayod ko nga kon makasulti pa lang unta siya kabahin sa akong gihimo seguro moingon siya
"agalon, ang imong gihimo kagahapon maayo segurong atong ibalik sa garapon
kay bisan gani ako nga iron, dili man gayod niini mokaon"

apan sa among pagkasuod, wala siya mihisgot niini
ug ako nga nasayod, wala na usab magpakabana niini
kay sa giingon sa akong higala nga nanghambog nga dili
na kuno siya masakitan sa mga panghitabo sa iyang kinabuhi
miingon siya

" migo, anad na ako niana"
ang kahayag gikan sa adlaw
mipahiluna na sa lapad nga dahon sa
saging
nga karong adlawa nagpakita na
sa iyang kasingkasing

(ang puso sa saging nga morag
dughan ni Lumen
nagpatihulog paingon sa
tiilan sa
yutang tabonon)

ang palmera mitusoy sa langit
wala papiri
sa pagbabag sa mga dahon sa
bulahan

walay kisaw kining dapita hangtod
nga miabot ang tamsi nga mitugdong
sa sanga sa bayabas
nga walay buwak o bunga

miawit sa taas kaayong tingog
nga morag katalinis sa dagom nga
nakatusok sa akong
tudlo nga singsingan

ingna ko nga sayop ako apan
ang akong nadungog mao gayod ang
usa ka tamsi nga nangayo ug
pakitabang
giunsa mo ba pag-ila-ila ang
kaulag?

ah, miabot lang kini sa kaadlawon
wa kaayo nako kini maaninag kay
dili kaayo hayag
sirado ang bintana ug unya
atua ako sulod sa moskitero

gihikap, gihapuhap, dayon namugna
ang sugilanon

dugay nga gikuyog ko ang kaulag
usa lamang ang among tugkaron
ang kalami lamang

ang kaulag sama kanato matigulang
usab
dayon moabot ang iyang maguwang
ang kahilas

nga kon imong hikapon
mang-yam-id, ug gani magpakita man
sa kasuko
wala kaniya ang hapuhap, anaa lamang
ang pagpalayo
ang paggamit sa dakong grado sa
antipara aron mabasa ug tarong ang
lakat sa kinabuhi

moingon siya, limpyo ako, wala ako'y
sala
wala akoy gilapasan nga balaod

ug iya kang biaybiayon dayon iya kang
kabigon paingon sa iyang
pinuy-anan

didto mingaw, walay saktong lawak,
walay lingkoranan,
sa silong sa kahoy makita mo ang
kalinaw sa kalibotan
unya madumduman mo pag-usab ang
kaulag
diha sa dinaginot na usab nga
kahayag

wala man gani nanirado ang mga
bintana
unya ang mga pultahan kanunay'ng
andam sa pagdawat
sa bag-ong umaabot

 

9/26/2014

managlahi
man ang kalipay sa bao
ug sa
alimango

apan sama silang duha nga
anaa diha sa
suba
nagpakabuhi

diha sa hinay kaayong
paglawig sa mga oras
sa pagtampisaw sa
kinabuhi

managlahi usab ang
makagusto kanila
managlahi gayod ang
kuhaon ug mokuha

ako nga namingwit dinhi
nagpaabot sa
akong pasol kon kanus-a
makabitik
sa akong wala pa makita
diha sa kisaw
sa akong mga panaghap


ang pagpaabot baya usa usab
ka matang sa
paglantaw
kon unsa kita og kon unsa
ang dangatan
puhon
nagkuyog sa sulog ang duha ka anod
nga kahoy
sa kusog nga sulog
nga sa kakusog wala na nila
gihunahuna pa kon kanus-a sila
idagsa kon kanus-a
kaha ang paghunong sa tanan

ah, kining paghisgot kabahin sa
kalipay usahay
gipasagdan lang niya
ang pagdagan sa
panghitabo

ang panaw sa kamot
ang pagpadayag sa dughan
ang pagluhod
ang pagpangamuyo
ang luha sa  kalipay nga
miagas human nanirado ang
mga mata

ang higwaos sa baba ug sa
dila ang
kakiat sa mga paa og tiil

wala nay gamit ang mga pulong
ang mga pasalig

gipasagdan na lang nila ang
panghitabo
ang pagdagayday sa mga oras
og dayon paghinanok niini
sa mga damgo nga
nangatuman

kay sa tinood lang
gikalipay nilang duha ang
tanan

9/25/2014

sa likod lang ako
naglantaw

gitabonan ko ang
unsang kakulangon

diha sa unahan ikaw.

usahay human sa kwentada
gansi ka

apan human sa pagbati
ginansya ka

adunay pagansi nga sa
kataposan ginansya

sama sa paghatag sa
pagsilbi sa pagpaubos

kini ang gansi nga ginansya

9/24/2014

sa dihang gihimo mo ang daotan

wala ka ba kadungog
sa bakho sa
imong likoran?

mao kana ang imong
anghel nga
magbalantay

kalihokan sa kalag

ana man gayod ang
bata
ganahang
magdula

kinsa ba'y wala
makadungog sa
ilang mga katawa
sa ilang mga syagit
sa kalipay
nga milanog sa
kakahoyan ug
kapatagan?

kon madako na sila
ug sakto na ug
panimuot
dili mo na makita
ang hugaw sa ilang
mga tiil
og dili mo na masimhot
ang kabaho sa ilang
mga nangauga nga singot
sa ilang lawas

makamao na silang
manglimpyo sa ilang
kaugalingon

kay lagi paingon na
man sila
sa usa ka
malipayon nga
kamatayon

ang atong pagpadulong ngadto sa langit

nanagdula ug dakapanay ang
mga bata sa tugkaran
nagkalapok ang ilang mga tiil
ug basa kaayo sa singot ang ilang
likod ug agtang

pagkahuman tawgon sila sa ilang
inahan
madungog mo ang ginagmayng
kasaba kuyog usab sa maymay
nga unta dili palabian ang pagdula

hugasan sa inahan ang mga tiil
ug unya trapohan ang mga singot
og pagailisan sila sa ilang mga sapot
andam na sa pagpangadye paingon
sa pagkatulog human sa usa ka
lamian nga panihapon

9/23/2014

dugay pa
nimo maamgohan
ang kabahin sa imong
kalipay kabahin sa duha mo ka anak

ang lalaki ikaw ug ang babaye sa imong asawa
sa dugay nga panahon kamo kamo lamang og walay lamog
busa lisod langkaton ang mga gamot nga mikatay sa punoan sa kahoy sama sa usa ka pangadlaw

ah, miabot na ang pahanon sa pagpamulak apan kadali lamang kini kay ang orasan sa iyang pagdagan
modagit man sa mga maanindot kay lagi dili baya kini alang kanimo bisan unsaon mo pa ug dupadupa diha
sa usa ka utlanan kuhaon gayod ang tanan gikan kanimo

sa una, moingon ka, duha na lang kami sa akong asawa dinhi niining balaya apan ayaw ka kay ang mga kamot sa orasan dili manggihatagon, kuhaon gihapon niya ang dili para imo hangtod nga ikaw na lamang usa ang magtikawtikaw sa imong payag, sa imong hardin, sa imong lawak kay pati ang imong iro og iring kuhaon man kini gihapon, kay lagi dili kini angay kanimo

dayon ikaw na. mawala ka usab. og gikan dinhi dili ko na masulti pa kanimo ang sunod nga atong makita, wala na ang manugilon. kay ako usab, gikuptan man gihapon.

ang akong alingogngog

wala nako
sagopa ang iring
nga ilang
gibiyaan didto
sa dalan

ang iyang iyak
nalumos ra gayod
sa kalay-on

wala na ang
kahasol nga kasagaran
mogitib sa akong
kasingkasing

naanad na ako nianang
mga nilabay sa
katilingban og ang ilang
mga iyak
dili na makasulod sa akong
dunggan

lahi sab kining akong panaw
ako ra gihapon
mora sad kog iring nga gibiyaan
nag-iyak apan ako
ray nakadungog

9/21/2014

nindot ang silingan
nga talagsa lang magkita

habog ang pader sa
utlanan
labong ang mga tanom
isig pikas

malinawon ang palibot
gawas lamang sa mga
pasiplat

kon naunsa na diha sa
pamantay usahay
ang tatay ni annie
naghikot sa pisi didtos
sud sa iyang kwarto

patay,

maong sa dihan siya
na usab ang nanirado

human sa tulo ka bulan
gikan adto

mipahawa na lang jud ko

kapoy nang naay siging
patay.

phuket turismo

hisgotan ta ang
raya,

unang antog,
1,200 baht
sakay sa speedboat
inom og tsa

pag-abot sa lapyahan
haray-haray makadyot
sa kahoy nga
lingkoranan ug
gamayng payong nga
misala sa kainit sa adlaw
silong sa punoan sa lubi
50 baht kada ulo

asa ba ang kan-anan
dinhi? ang ihianan?
bayad ka 100 baht
sakay sa
motorela

dayon siyag ingon
nindot ang patok
puti ang balas ug
asul kaayo ang dagat

gitaral ka
palingkoron ka
lain na usab nga
50 baht matag
ulo nga masilongan
sa usa ka
puti nga payong

uhaw na ug gutom
pa gayod
order : usa ka hamburger
duha ka cafe latte
usa ka spinach pene
pasta
bayad ka: 1,270 baht


da! wingig lagi ang
imong credit card.

labaw na dagway ug
tugkaron mo pa ang
kalalom sa phuke(t).

taral

gikamingawan ko ikaw
nga mas gigustuhan nako
nga wala na sa nataran sa
akong kinabuhi,
nga sa tantotanto nakong
pamalandong, ako, nakahukom
nga mas ganahan ko ning akong
kasubo karon kaysa kalipay nga
gisaad mo kanako
kaniadto, kadtong milabay na
unya midahili sa mubong
panahon sa akong
bukton nga nagpunay kanako
ug panintal apan salamat na
lang sa akong paminsar
kapoy baya usab kining ako
ang gitaral-taral unya
pag-abot didto sa unahan
sa tumang kamingaw
ako na lang man diay
ug wala nay lain.

9/13/2014

diha sa akong isog nga kumo.

ah, ayaw na ug hadloka ang sinugdanan
dugay na kini siya sa kalibotan
nagsugod na siya kaniadto pa busa
mas nahibalo na kini siya kaysa kanato

ayaw na ug ibungat ang pulong nga kataposan
sayod na kini siya bahin niini
hagbay ra: matapos ang adlaw, moabot ang kagabhion,
matapos ang taob, moabot ang hunasan,
matapos ang panaw, moabot ka sa utlanan

gipangita mo ba ang karaang balay dinhing dapita?
kadtong gitukod ta? nakahinumdom ka pa ba niini?

maayo. maayo kay anaa pa ang mga sinulat sa
mga kamot sa usa ka kagahapon

ah, ayaw na sultihi pa ako nianang kataposan
gikan usab ako sa sinugdanan
kuyog kami kaniadto, gahawiray pa man gani
ang among mga kamot
ug ang among mga tikang nanagdungan man

sayog ako nga aduna gayo'y kataposan ang tanan
apan wala na ako mahadlok pa niini

sa dihang gibiyaan ako sa sinugdanan
gihunghong na niya kanako ang iyang tinagoan
ug ako kining gitipig sa akong dughan

nindot. pagkaanindot gayod. wala na ako'y
kabalaka, unya ang kahadlok ania na sulod sa
akong kamot. Ako na kining gikumkom
diha sa akong isog nga kumo.

ayaw na ako ug pukawa.

daan pa kaniadto
managlahi na sila: gusto niya ang langit
apan siya gusto ang bato

gugma ang nagtagbo nila
wala giambat ang mga kalainan
ang lami lamang

maayong mohatag og pangutana ang
mga umaabot
kining pagsulay kon unsa ang
tubag nila sa matag pangutana:

bugnaw ba ang kagabhion?
ang iyang tubag baga kaayo nga habol
ang iyang pagtalikod ug paguk-ok sa pikas
nga bahin sa higdaanan

lahi sab ang tubag sa usa: oo, bugnaw ang
kagabhion apan higala ko pa gihapon ang
alugnan unya ang katre
dako pa gihapon ug luna alang kanako
unya ang mga damgo
sama pa gihapon sa usa ka hardin nga puno
sa buwak
unya pagkadaghan pa gihapon sa
mga alibangbang

ingon siya: pagsulti sa tinood
gikapoy na ako sa mga pulong mo

nganong magpakaaron-ingnon ka pa man?

ang iyang tubag sa maong pangutana
pangutana usab:

kanus-a ka lang ba nagsulti kanako sa tinood?

managlahi sila, wala mausab apan wala na
man god ang gugma nga magbug-os kanila

manan-aw kitag opera sa Noli Mi Tangere
ingon siya: ayaw kog hikapa, bugnaw na kaayo ang
imong mga kamot

ang akong gusto, mangompra ako ug bulad sa taboan
mga nokos, isda sa bato nga wala nay kaasgad
dili ko ikaw dapiton, dili na ako ganahan sa imong
mga bakak nga ikaw ganahan sa baho
sa akong mga kaila didto sa
maong dapit

managlahi na gayod sila, wala na ang bug-os sa
gugma

ug miingon siya: dili ko na gamiton ang pulong
usa lang ang akong tubag sa pangutana sa kinabuhi kanato

paaboton ko  na lang kon kanus-a moabot ang tumang kangitngit
kanang patay na ang bulan

unya mosulod ako sa pultahan sa damgo
ayaw na ako ug tawga, ayaw na ako ug pukawa.

9/12/2014

ang iyang inahan
mibiya sa sundalong
sugarol

mikapyot sa usa
ka minyo usab nga
dakong negosyante
og kopra

ang iyang anak
gitina ang itom nga
buhok ug gihimong
chestnut brown

duha ka lalaki ang
nagbuhi kaniya
usa ang tinood ug
ang usa bakak.

ang uyab ug ang inahan

walay sayop ang
dangag nga uyab

buak nga baso
sa imong tiilan

ang inahan
nakasab-an sa

karsones nga maong
nga wala malabhi

usa ka talan-awon

batang walay karsones
milabang sa karsada

inahan nangutlo og
dahon sa kamunggay

kusog kaayo ang rural
transit gukod sa oras
pasayloa
apan dili sa tanang higayon
maatiman ko ang
imong iring

kagahapon miabot ang
usa ka iro nga gakiang
pasayloa
wala nako kini pasudla
sa among nataran

adunay tiguwang nga
babaye nga nanuktok sa
pultahan
nga luspad na kaayo

pasayloa wala ako kahunahuna
ug tubig alang kaniya

gisirad-an ko na ang pultahan
gikapoy na ako
kabahin sa imong iring
sa iro, sa tigulang nga luspad

pasayloa
dili mo ako sulogoon
pasayloa

dili sa tanang higayon
ako maayong tawo
bisan gani ang kalibotan
mituyok man
nagpadayag man sa iyang
kagabhion og
adlawan

pasayloa
duha ang akong kamot
ug akong tiil

dili  ko na maatiman ang
akong likod
wala nay kasingkasing
ang akong
bagolbagol
giunsa man diay nimo ang mga binhi?
ako gilabay

asa man nimo gilabay?
nakalimot na ko

wala ka bay nakita nga nanubo
sa nataran sa imong balay?

wala. Ang akong nataran
puros kabatoan

nganong wala na lang kini nimo
gisabod sa mga maya?

dili sila gutom.

gutom sila, kita mo ang ilang
niwang nga sungo ang ilang
nipis nga dughan ang ilang
pako nga niwang

dili ko ganahan ug maya
pak-an sila

pak-an ang tanang langgam
dili ko ganahan nilang tanan

human nilag tuktok sa akong
gisabod
dayon lamang nilag biya kanako

ug ako nga nag-inosara
mao na lamang ang tighambin
sa tanang kaguol nga ilang
gitunol diri kanako.

9/11/2014

alang kang E.

sama sa lam-aw nga
napuno na sa tubig
moawas ang tubig
mokawas sa utlanan
sa tumang pagpaubos

hinambog kini kon
hisgotan ko ang
nag-awas nga
hinatag

dili kana mao
unsaon ko kaha kini
pagsulti kanimo?

hinanali


dali rang tabonan 
ang kamatayon

igo ra ang pila ka pala 
nga yuta pananglitan
aron papason sa baga nga yuta 
ug sa nakatag nga sagbot 
ang lungon  

ug dayon paresan kini 
sa usa ka dakong bakak 
nga motubo unya sa kilid 
sa lubnganan

usa ka puting bulak

pangandam


samtang gatagbaw ang langaw
duol sa patay nga baki
laing baki usab ang nangandam
sa kalit nga pagsigpaw 
sa iyang dila

samtang ang usa ka isda 
nanamin sa adlaw 
ang tikarol sa sanga sa patay 
nga kahoy kurat ang pagtugsaw 
sa iyang sungo

tambag sa amahan sa iyang anak nga nagkaulitawo na


Anak, kon buot kang mahimong true gentleman
likayi ang duha ka pangutana alang 
sa imong gustong uyabon:

1. Pila na diay imong edad?
2. Imong timbang, pila pod?

Apan kon gahi gyod ka'g ulo, na hala, pagbantay!
Kay kuyaw kon dili ka makalikay 
sa iyang sagpa ug sipa.

P.S.: Ayaw tawon pangutan-a 
kon virgin pa ba siya.

9/10/2014

patay

miambak ang babayeng
nahigugma
sa ika 15th floor sa
building

kalooy sa Dyos
maayong pagkapisat
sa iyang bagol
bagol didto sa
asphaltadong
kalsada
sa dakong syudad
sa manila

32 years old,
insik ang mata,
graduado sa AB
masters sa creative writing
tigsulat ug balak
ug mga sugilanon
premyado

nakadesisyon nga
mas nindot ang kinabuhi
kon kini wala na.

pulo ka libro

naglistahay na sila sa mga libro nga
ilang nabasa

(tinood pod kaha nga nabasa ba gayod?)

pulo ka libor sa usa ka kinabuhi

(mahimo ba kaha?)

nagtugkaray sa sila sa pulo ka libro kon
kinsa gayod ang mas lalom pa kanila

(nalumos na ang usa, ug ang usa
mikawa)

nag-indigay na sila kon kinsa kanila ang
mas taas og kilay
mas baho ug utot
mas dako ug baba mas gubot ug utok

(sagdi lang kay mao kini akong namugna
ayaw na ug saba)

pulo ka libro, wa gyod nila kini kalimti

nanamin sab ko
gipangita sab nako ang pulo ka libro
sa akong kinabuhi

nawala ko. di ko na gayod mahihumduman
ang pulo ka libro sa pila ka libo nga libro
nga mipakog sa akong ulo

(gahi nga ulo, istil wall nga buhok
lapad nga agtang, baga nga kilay
kwadradong apapangig, liki nga ngabil,
kunot nga aping, alingagngag nga
hesus, pagkahaw-ang!)

dili kini balak, pahimangno lamang

na, mag-unsa man ang pila ka libong
balak
kon ikaw nga magbabalak
patay na

nagtoo ka ba nga kadtong pila ka libo
nimong balak
ilang gibasa?

uwata. ayaw kalipay sa imong kamatayon
ayaw og ingon nga ang imong mga balak
mao ang imong kabilin

uwata. wala gani ka molungtad unsa
pa kaha ang imong balak nga imo lang
hinimo diha sa imong kahadlok nga
ikaw dili na unya nila mahinumduman
inig abot sa tapos.

dili makamaong mabuhi

didto sa lasang
daghang orang otang

didto sa syudad
daghang morag orang otang

makamaong mobalak
apan dili makamaong mabuhi.

social climber

SA DUGAY
nakong pamalandong
sa silong sa punoan
sa santol

nakaabot ako sa paghusga
nga kadtong babaye nga
taas og mga tiil
ug suwang nga taas usab
kaayog buhok unya kusog
kaayong mokatawa nga ang
lanog abot sa pikas pa
gani nga bungtod....

usa gayod ka bantogang
social climber.

kana kon ikaw nahigugma pa kanako.

miabot na ang
higayon nga dili ko
na isugid kanimo kon
unsa ang
kamatooran

diha sa kataposan
ang kamatooran dili
na masugid
ug ang pulong dili na
mensahero

panamin sa akong
mata
pamatia ang gisugid
sa akong paghawid
kanimo
mahimong lantawon
mo ang akong
tunob
ug pamation mo ang
kasikas sa
akong mga pangandoy
didto sa unahan

kana kon ikaw
nahigugma pa kanako.

amen

dili tanan isulti
mahimong sugdan
ang usa ka panagtakdo
sa usa ka pulong
apan dili kini
molahutay

kay lagi dili man
tanan masugid
og sa dihang puntoha
mata na lang ang
palihokon
ang senyas sa tudlo
mao na lamang
ang magtultol
kon asa og kon ngano

dili tanan isulti
wala nay papel ang
pulong sa kataposang
hugna ug kadtong
gusto gayod nga
makahibalo sa
hinungdan og katuyoan
kinahanglang motupad
diha sa higdaanan sa
usa ka himalatyon

abtik ang mata sa
lihok sa ngabil
sa senyas sa kamot
lantawon kon unsa
gayod ang
kamatooran diha
sa kataposang hunat
sa iyang kinabuhi.

9/09/2014

ikaw

kon mawala na
asa pa man pangitaon?

kon mosulod kas lawak
ang makita mo
higdaanan na lamang
bisan gani ang mga bulingon
nga habol
wala naman didto

kon hagkan mo ang akong
ngabil
mabati mo na lamang ang
kabugnaw

sama adtong atong gikatulgan
didto sa habog nga bungtod

bugnaw na ang tanan
gani patay na man

kadtong kalayong gadilaab
sa akong dughan

dili ako ang sad-an, ikaw.

duha duha

ingon ka
dili maayo ang duha-duha

kay ngano
nindot bang lantawon ang
alibangbang nga
usa ray pako?

madungog mo ba ang
pakpak sa
usa rang kamot?

wa ka masayod
nga duha ang akong nawong
unya
ganahan ko kaayo sa
akong kaugalingon?

nindot ang duha-duha
apil na ang imong pagduha-duha
kanako
ug ang akong pagduha-duha
kanimo

duha ka kasingkasing
duha ka lawas
duha ka balay
duha ka kinabuhi

damgo lang lamang

sahay
wala na koy gana
mag-ayo sa gahirig nga
haligi sa kusina

agni kagahapon
nakabuhi ang hiniktang
himongaan
nawad-an na sab kog
gana sa pagdakop niini
sa paghandom nga
kini mangitlog pa
sa iyang pugaran

sahay moabot ang
kawalay gana
sa bisan unsa

daghang ang mosaway
nganong gipahinungtan
na lang man usab
ang kawalay gana

tawgon kag
juan tapolan
tawong nawad-ag
paglaum
tawong
wala nay pulos
nga mas
maayo pang
mamatay na lang

tawong walay mawili
kon wala na siya
nga og kon molayas
morag wala lay
nahitabo sa
usa ka panimalay

sahay ako na
unya akong gipahinungtan
kay sayod ko
nga ang tanan dunay
kataposan

apil ang tanan
kalipay ug kasakit
kapuol og
kagana

sahay gani di na ko
madutlan anang mga
sahay

sa bisan unsang pangagho
o mga pangagpas

miabot lang ang panahon
nga mas ikalipay ko ang
pagyampungad sa bintana
lantaw sa pag-agi sa
hangin
sa pagbunok sa ulan
og kon matapos na
ang tanan
sama kanimo mas lami
na gayod ang
ikatulog

damgo, ug damgo
lang lamang.

mao kini ang tinood

kon maglakaw ka
anad ka na nianang kabalo ka
unsa ang paingnan

sama sa dalan nga kasagaran
moabot gayod sa tugkaran sa
imong balay unya
tagboan kas imong iro
nga kiwil og ikog

dayon ablihan ang
pultahan unya sugaton kag
halot sa imong anak nga babaye
unya laing halok sa imong
asawa nga nagluto sa
inyong panihapon

morag sine, di ba?

apan dunay laing lakaw
diin wa ka kabalo ug asay
padulngan
wa gani ka kabalo kon
kanus-a ka moabot

morag sine gihapon

dunay laing lakaw
nga kabalo ka nga ang
padulngan
wala yamo

wala'y balay
wala'y batang babaye
wala'y asawa

nga bisan unsaon
nimog hunahuna
bisan unsaon nimog
palapad sa imong
imahinasyon

wala ka gayoy makita
nga imahe

unya di na nimo maantos
gibuka mo pag-usab ang
imong mata
kay basin ug nahikatulog
ka lamang

apan dili kini damgo
wala ka nahikatulog

hawan lamang
unya walay utlanan

miabot ang dakong
kakulba
gihakop ang tanan
kanimo
diha kaniya

dili na kini morag sine
apan di sab gihapon ka
kadawat nga mao kini
ang tinood.

9/08/2014

hinay hinay lang basta tininood lang god

gibasa ko
ug balik ang
inyong
kaniadto

dugay,
kuti,
balik
balik

human
gisirad-an nako

abi mo
gibati kog
kaulaw gamay

sa tinood lang
mas nindot
kamo kaniadto

mas lalom
ang inyong mga
sapa
mas hilom
mas mabulukon

apan sagdi lang
ang amo
amo sab
ang ako
ako sab ni

hinay hinay lang
basta tininood lang god

9/07/2014

yellow nga headband

sa simbahang
gigusbat sa linog
tupad sa
baliti nga mokaon
ug bato
milingkod ang
babayeng itomon
nga taas ug
tiil nga
kunuhay nagbasa
sa mga linya sa
iyang palad
subay usab sa
talinis niyang kuko
diha sa
kinampay nga
tudlo

taas ang iyang
buhok
ang iyang pamanit
tabonon
morag bonbon
sa borbon

dako siyag pagmahay
nganong
sa tanan nakong
nakita

usa lamang siya
ka

yellow nga
headband.

lahi sab

Domingo.
daghan ang dagway sa
akong Domingo.

dinhi sa amo
Tabo matag Domingo.
sama sa inyo
Tingsimba pod
matag Domingo

ayka, lahi sab ko.
wa ko misimba
wa sab ko manabo.
pondo lang ko
morag barkong
gibaradero

apan ayka. lahi kos
barkong nabaradero.
kay bisan og
patay ang akong
makina
mas layo baya ang
akong panaw

giadto ko ang
dili mo maadto.
gibuhat ko ang
dili nimo mabuhat.

ayka, kining akong
kisaw
kisaw kini
sa usa ka
maanyag nga sala
sa usa ka
lamian nga
gidili

gipaabot ko kanunay
ang kagabhion

di mo na ako makita
kay dili ako
bitoon
di mo na ako madungog
kay dili ako
iro nga mouwang
di mo na ako mahikap
kay dili mo ako
tupad

saag ako.
anino ako nga
nawala sa kangitngit

tingog ako
nga talagsaon.
di ko ganahang madungog
nimo.

tagolilong. sigbin.
wakwak.

kikik. kahadlok.
ako ang tanan diha
kanimo
sa imong kahadlok.

kon mosunod ka pa
ayka, kay barawon ta ka.

Domingo karon.
pasagdi sila.

kataposang hukom

ang unang panagkita
napuno sa
kakiwa

pinili pa ang mga pulong
ug inihap pa gayod ang
mga tikang

kon mahimo lang
dili usa ihay-ad ang kamot
diha sa paghipos sa
mga tudlo

ang unang panagkita usa
lamang ka
paniid dayon sundan kini
sa ikaduha
hangtod sa ikatulo

inig abot sa ikaupat
sugdan na ang paghukom kon
angayan ba
nga hagkan ang agtang
yukboan ang tuhod
og tilaan ang kumagko

mahitabo lang kini kon adunay
mabati nga kagilok diha sulod sa
ilok
kon ang hunghong sa dalunggan
mosamot kakusog hangtod nga dili
na kini maluom
sama sa usa ka bikog sa bitiis diin
sa tumang kasakit
makaingon kag: tabang! tabang!

og busa gilamba-lamba mo ang
imong lapa-lapa diha sa katre
nga uway

hangtod nga mawala ang kasakit
ug ang mapuli
mao ang kahayahay

diha sa usa ka hukom nga mas
maayo ra diay
nga ikaw rang usa diha sa kam
kay mas makamao ka pa
kaysa iyaha.....

kahaw-ang

ang katre
mao ang nataran sa
atong
gubat

ang atong gubat
lahi baya


ang pultahan maoy
atong dungguanan

duha kita ka sakayan
nga walay timon

ang atong mga sapatos
mga irong nagyampungad
kanato

ang atong mga armas
ngabil
ug ang atong mga bala
luwa

ang bintana usa ka mata
nga nagpiyong
namati sa tingog sa tuko
nga gibatig
kaulag sa kisame nga
mibukhad

silong sa atop nga wa
mag-alingasa samtang kini

kanunayng makalantaw
sa dili unta angayan nga
buhaton

kabahin sa mga sakayan
nga walay timon
ug sa mga sapatos nga
gibudhian sa mga tiil
nga kanunayng nagyampungad
sa tuko
sa tumang kahaw-ang

kalood

pasayloa
apan sa dihang ang imong mga tudlo
mikamang sa akong
abaga

wa gyod nako
matuyo nga ang akong
balahibo nanindog

unya giingnan ta ka
nga

una pa
mogawas ko

dili tungod kay molantaw
kos mga bitoon

o mohangad kos buwan nga
tibook niadtong gabhiona

sa tinood lang
(maoy wa nako gisulti kanimo)

nagsuka kos pantawan
(pasayloa)

gilood ko nimo.

ang irong buang

unsa ba
ang imong damhon sa usa ka irong imong gigaid sa poste sa inyong balay pipila na ka tuig?
ang iyang pag-abot dungan sa pagtanom mo sa lubi didto sa kilid sa kusina nga karon
nagpanghulog nas iyang bunga nga nakaguba sa atop diin ang ulan makalusot na ug maoy tigbasa sa imong dapogan

unsa ba ang imong nakita sa dihang gibuhian na ang irong buang?

mikaratil kini siya ug dagan paingon sa nataran, gawas sa labat, paingon sa karsada nga
daghang libaong ug kada tawo nga iyang matagboan, sayri ko,

iya gayod nga napaakan.

9/05/2014

devotion

pagkalapok
sa iyang sapatos
apan miluhod ka
miduko
ug imo kining
gihagkan

gidapion niya
ang iyang usa ka
sapatos
sa imong liog

gipagawas mo ang
taas mong dila
ug imong gitilaan
gisulat ko lang ang akong
nadungog
og nakita apan kon tugtan
mo pa
mahimong masulat ko ang
akong nasimhot
ang akong natilawan ang
akong nahikapan

ingna ko nga dili ko bakakon
ang duha ka tiguwang
nag-away

gisaway sa usa ang balay
nga mora daw ug lungon

mibalos ang usa nga
ang iyang bana tawo tawo lamang sa
basakan

nangyawa ang usa ka tigulang
kay wala na pasudla

nameste ang usa kay nganong
mamugos

sila wala nay mga tumong
giango-ango, di na katunong
WALA'y gahi nga pan
sa init nga
kape

bugnaw kanunay ang
kape nga
akong maabtan
diha nimo

nganong ikaw manambok diha sa pagpaabot

gahapon
nagkaon kog spaghetti nga ako rang usa
sa isabel's cafe

gipili ko ang lingkoranan sa kilid
sa dingding nga samin

kon molabay ka
ang imong makita mao lamang ang akong kilid
usa lang ang akong mata
unya masundan mo ang padulngan sa akong ilong
ug suwang

kusog ang ulan sa gawas
unya ang lugar morag barko nga milarga nga
wala'y pasahero
tungod sa gihungihong nga bagyo

pait ang akong baba
unya ang akong dila gibati kanunay ang kaaslom
gikan sa akong tiyan
nga gahaw-ang

dili ako tawong gutom
busa ang spaghetti mahimong walay lami kanako

abi kog dili nako mahurot
wala ako sa akong hunahuna
mora akog tawong naglakaw sa plaza unya
wa masayod kon asa gayod
paingon

dugay kaayong midagan ang orasan
duna ako'y gipaabot apan sayod ako nga bisag dili siya motx
dili na gayod kini siya moabot

nabudlat ang akong mga mata
sa usa ka pagpaabot
naglaylay na ang akong tiil
bug-at ang akong mga kamot
sama sa kabug-at sa akong gihambin nga
pagbati

nahurot ko ang spaghetti
gitilok sa akong dila ang sauce niini

kay ang tanan kasubo
gipakog ko na man lamang
diha sa pagkaon

 

9/04/2014

ang akong mga mata

nagkagubot ang mga
ania sa akong
lamisa

tupad nilang tanan
ang akong iring nga
maayong
pagkahinanok sa iyang
kabusog

naniid ang mga bagtok
kon ang akong mga mata
sama ba sa ilaha

paghukom

kon ako kang
agakon
mas dako ang
akong kabalaka
nga kon wala na
ako
dili ka na gayod
makabakod

kon akong hulipan
ang imong
kakulangon
dili mo na makita
ang wala diha

kon ang akong mga
mata
kanunay ang imong
gamiton sa
paglantaw
nahadlok ako nga
ugma puhon
usa ka sa mga
mata nga nagmata
man ugaling
apan wala na gayoy
makita

busa, sakit man sa
akong kabubut-on
nakahukom ako nga
ikaw
ako na lang gayong
biyaan

9/03/2014

diha sa usa ka paghikatulog

wa ko dungga ang
tingog sa ulan isip iyak sa
akong inahan

matag gabii ning
ting-ulan

dungog ko ang awit
ni nanay

gibati ko ang iyang
dughan

gihinumduman ko balik
ang akong

pagkabata diha sa usa
ka paghikatulog

ang halok sa bato ngadto sa bato

lisod hagkan
sa bato ang laing bato

unsa'y tingog sa
halok?

bato ba nga
nabuak?

o pingki sa aping
sa bato ngadto sa
bato

nga makahimo og
kalayo?

sabta lang palihog

nangita lang og
tambal

bisan asa na lang
miabot

abi mog
giagawan ka na

og agianan o
kahayag

sabta lang
palihog nangita lang

gayod kinig tambal
sa nagkagamay nga

pabilo sa iyang
kandila

sabta na lang
palihog kon nasaghiran

niya ang imong agtang
kon namansahan niya ang

imong kamison
kon natumban niya ang

imong tiil sabta na lang
palihog

nga nangita lang gayod
siyag tambal

sa iyang kadangag
sa iyang kahangal.