3/28/2014

mga kisaw sa lipat-lipat nga kamingaw



mitabon sa bungtod 

ang mga gabon ug


nahanaw ang panon 

sa mga kanaway

gipaabot nato 

ang paghupas sa gabon


apan wala na usab 

ang mga kanaway


gihandom nato ang dagat

apan wala didto ang gabon


sa patag nga wala ang gabon

gihandom ta ang bukid


sa bukid gihandom ta

ang dagat ug ang mga isda


ug sa pag-abot sa mga tulabong

gihandom nato ang mga kabaw

ang imong mga kamot

sa tibuok niyang kinabuhi
nakakupo siya
walay pagkulang diha
sa kalo
kanus-a pa kaha malimtan
ang karsones og
sanina

mas grabe ang sa bata pa
siya
kaniadto hipos kaayo siya
sa lampin ug sa duyan
walay lamok walay langaw
nga makatugpa

apan miabot ang higayon nga
siya maghubo
atubangan nimo

kon sa isda pa siya gihimbisan
niya ang iyang kaugalingon
gibiyaan niya ang tubig ug ang
lawod

gusto niyang magpaila na kanimo
ikaw nga iyang gimahal
gusto niyang tutukan mo siya
unya moingon ka kaniya
gimahal ko usab ikaw

ikaw nga naghigda sa iyang
katre
ikaw nga nagpaabot kaniya
tupad kanimo

gibalewala niya ang pagduda
gibungat mo pag-usab ang
paglitok sa "gimahal ko ikaw"
nga gilitok sa imong ngabil

mitutok siya kanimo
gisuroy ang imong lawas
unya sa kataposan nakita niya
ang imong duha ka kamot

puros bakakon.


3/17/2014

wakwak

ang iyang sugilanon kabahin
sa wakwak
gikawat sa mga wakwak

gisumbong kini niya sa wakwak
nga pulis
nga nagduso sa maong sumbong
ngadto sa maghuhukom nga wakwak

siya lang ang dili wakwak nga nagsulat
sa sugilanon sa mga wakwak

gisugdan paghusay ang sumbong
kabahin sa mga wakwak
sud sa korte diin ang mga abogado
usab puros mga wakwak

ikaw kay wakwak man usab,
kinsa ba ang modaog sa maong husay?

estranghero

sulayi ang paglakaw
palayo
unya sayod ka nga
wala kay saktong
adtoan
o katuyoan diha
sa imong pag
abot,

sulayi kanang
sa imong pag-abot
walay motagbo
wala kay nailhan
og silang tanan
wala sab kaila kanimo

ang mga balay
una mo lang kining nakita
ang mga dalan
wa mo mailhan ang mga ngalan


motuktok ka sa pultahan
ablihan gamay ang giwang sa bintana
dayon sirad-an

gipahinayan ang TV
dayon ilang gipakusgan

gusto nimong taposon
apan wa sab ka kahibalo kon
asa sugdan

3/16/2014

ayawg hangad
sa iyang suwang
mahimong mohangad
kas buwan

ayawg katulog sa
iyang tupad
kon mahimo katug
sud sa imong
kasingkasing

di ba templo ang
imong lawas?
di ba ikaw lang
ug wa nay lain?

ikaw ang miabot
ug ikaw ang mopahawa
kinsa ba pa diay
ang lain?
ikaw man lang
seguro ang tatay nga
nakalimot sa imong
nangagi?

kadtong nahigugma ka
unya
wala pay gahom ang imong
mga kamot
kadtong gianod ka sa baha sa
gugma sud sa imong
dughan
unya nagkapakapa ka
nga bisag mogunit sa hait
nga punyal
bahalag masamdan
gunit lang gayod gihapon

kadtong nanglaba ka sa lampin
sa una mong anak nga lalaki
kadtong nabilar kas pagtimpla
sa gatas

sultihi daw siya kon unsa ang
mahigugma?
kon unsa ang mahulog unya
mobangon lang gihapon?

basaha unya ang tanang nangagi
diha sa mata sa imong una nga apo.

ako unyang lantawon ang imong
pahiyom nga maoy
makahinumdom...
SAAD SA SAMDANG MASA

silang naay mga ngalan
apan walay nawong
silang naay mga kwarta
apan walay kamot
silang gitawag ug mga
halangdon
nga dili mo matagaan og
mga numero
sila nga dili mahimong
magtagad
sila nga siging mag-una
sila nga tag-iya sa tanang
mga pagdayeg
sila nga maoy tag-iya sa
tanan nga imong malantaw
gikan dinhi paingon didto
didto,didto sa layo pa gayod,

ilista lang, kay ato unang
pautangon.
kadtong babayeng
kulongon ug buhok nga
bag-ong nagmata sa
sayong kabuntagon
palihog ayaw gayod ug
hagita

kadtong nanglabay kaniya
kagabii
gibuhian man galing niya
apan

bugnaw na.
usahay abrihon mo
ang bintana
sa paagi nga ikaw lamang
ang makakita sa nanglabay
apan sila
dili makakita kanimo

mora bag kon ikaw makit-an
maguba gayod ang plastada sa imong kalibotan

asin ka bang mahilis sa ilang
nagbasa nga mga tutok?

kusog kaayong ulan sa
ilang mga tutok
alang
sa asgad mong kagahapon?

3/14/2014

ang balhiboon nga
kamot
ugma damlag
makahimamat sa
iyang posas

ang sampot nga
ugdo
kon magdinangag
mawad-ag
pitaka
mabuslot ang bulsa
mobudlat
ang mata

ang suba mamad-an
ang kahoy mahutdag
dahon

apan ang dagat
kanunay asgad
ang langit kanunayng
walay utlanan
ug ang kahilom dili
mahimong
molitok sa mga pulong
nga imong
gitan-ugan
kon ang kuto
imong irokon
kon ang buwak
imong putlon
kon ang pulgas
imong pusaon

kon buot kwentahon
kini pagpatay lang
gihapon

apan unsang
kalipaya ang kalipay
diha sa pag-irok
sa kuto diha sa ulo
sa imong amigo?

sa pagputol sa
buwak
sa pagtan-aw niini
diha sud sa
basong gibutangan
mo ug tubig?

unsang kalipay ang
mibayaw kanimo
didto sa langit
sa dihang hapit
mo na mahurot ug
pusa ang mga pulgas
sa irong ginganlan
mog Diego?
adunay isda nga
walay unod

kay puros na
lang bukog

adunay prutas nga
ang nabilin
patay na lang nga
kubal

adunay tawo usab
nga wala nay kalag

patay ang konsyensya
morag buslot nga bulsa

balak sa impontu alas dose sa kagabhion


matug o
di matug?

mao kana
ang pangutana

nga unta
tubagon sa duha
ka mata

apan ang kamot
morag isdang
nahubsan ug tubig
diha sa sapa

karon
nagkapakapa
nagdamgo
nga unta
ang kalibotan
sama kadako
sa dagat
sama sa kalalom
sa wanang
sa kahilom...
misaad ako ang
undangan na unta kining
pagsulat
ug balak

gibilaran ko ang mga
dili bililhon

milalom ang kalimutaw
sa mga dili mapalit
ug mahalin

misaad ako nga
unta ako
magmalinawon

subay sa tul-id nga
dalan
sa yano ug mga
sarang

apan dakong sala kining
akong nabuhat
sa akong kaugalingon
ang mga saad
puros mga basong
buak

mga bildong hait
nagpasad sa akong dalan
ug ako misayaw
bisan ug samdan
sama sa tiyan nga
napuno sa hangin

ang ulo usab nga
walay sulod

anad kining magpagawas
sa pusot pusot nga mga utot...

3/11/2014

ang lapok
kamaong mogakos hugot sa
lawas nga bato
nga ug kon mauga
makat-onan gayod niya
ang pagkatawa
diha sa tumang pag-angkon
nga siya
ang nagmadaogon

apan ang bato
makat-on usab sa pag-iyak
sa pagpaulan sa mga
lusok sa luha

ug ang lapok mahilis
mawala
ug ang bato malimpyo
mosinaw
tungod kay nasuko ka man
gitutukan mo pag-ayo ang adlaw

wa kang kadulot
busa gipiyong mo ang imong mga mata

sud sa imong kalimutaw
puros pula nga morag kalayo

ang imong nalantaw
ug karon gibati mo na ang kakuyaw
sa pagsulay mo ug
pangluwa
sa langit
tan-awa nalud-an
mo man hinoon
ang imong nawong....
kon lud-an mo man ang langit
dili matandog ang bulan ug mga bitoon

di ka man god
maambat sa imong kagamay.

kon maandan ba kaha ang pagpatay?

wa ka sugod kapatay
bisag langaw
wa ka sugod ka luba
bisag kabaw

giunsa mo man pagsulat
ang giingon mong anad-anad
lang ang pagpatay

nga unya mokubol ang panit
sa konsyensa
mouk-ok hangtod nga mora
na lang kinig
awom
unya dili na kaayo makita
nga ug imong hikapon
wala ka nay mabati

wa ka sugod kadakop ug
alibangbang
ug ang iyang mga pako imong
gibira, giputol, ug giduladulaan
ug gitayhop
dala sa kusog nga sulog sa
hangin

giunsa mo kaha pagdakop
sa hunahuna nga kon maandan
ang pagpatay
morag wala na lang kini
sa utok sa tawong ningpatay
sa inahan ug bata?

wa ka sugod nakahikap sa sungay
sa kanding
gibalikog ang liog
gituis ang ulo
gisangsangan ug usa ka botelya
nga suka ang
alingagngag niini ug gitisok ang
punyal sa kilid
sa iyang dughan
samtang misyagit kini sa
pinulungan nga wa nimo hisabti
mitinga ug dayon namatay
gidauban
gihiwa-hiwa, giluto
gitimplahan ug gipistahan diha
sa usa ka sumsom
isip paklay

unta mahimamat nato ang mga
nagpatay
puy-an nato ang iyang balay
katulgan ta ang iyang katre
tupad kaniya
ug atong simhoton ang iyang
ginhawa
unta isul-ob ta ang iyang sapot
ang iyang sapatos
unta hikapon ta ang iyang pusil
kabliton ang gato
ug ipunting kini kang bisan kinsa
didto

kon mabuhat na kini nato
unya mokagiw kita ug dili madakpan
sulata ug sulay
kon mahimo ba nga ang pagpatay
maandan

kon mahimo ba nga ang
konsensya mamatay
kon sayon na lang ba ang sunod
kon sumala sa giingon mo
maandan ang tanan
unya morag wala lang

wala lang....
 
sa gamay nga balay
nga ang atop nipa
diin magtulo kon moabot
ang ulan

didto sab sa mga giwang
makita mo ang kagilak sa
mga bitoon

ug diha sa mga salog nga
lipak sa kawayan
diin maglapos-lapos ang
hangin

kita sab kaayo ang
kadayag sa
kalibotan
wala ko na
ginaihap ang akong mga lakang
ang akong gilantaw
mao na lamang ang akong
gitumban

wala ko na gilantaw ang
umaabot
wala ko na hinumdumi ang
mga nangagi
kon buhaton ko kini
mawala ako

ang karon lamang
mao ang naa sa akong palad
usa kini ka
tamsi

pispis, bugnaw
ang iyang mga mata
punyal
lisod tugkaron
ang taas mong sugilanon
lalom
nagkulang ang katas-on sa akong
pisi
unya ang akong timba
wala matuwang
ug kon matuwang man ug
motiglum
wala gihapon kini kuha
kay
buslot man god ang sampot niini

nangagho kog
makatulo sa akong gibuhat

gikumot ko kini
gilabay sa bintana

kon but-an ang adlaw ug hangin
mapahimudsan gihapon kini

ang hangin
ang tikbukhad
unya ang adlaw
maoy tigbasa
unya ang mga abog nga
mopalid sa mga putol putol nga sugilanon
mao ang
pilion kog
tig-asoy
ang mga sugilanon gitago ko
usa

dili pa andam ang kalibotan
sa iyang

pagkagun-ob

ugma, ugma puhon
isugid ko ang matoon ug matood lamang

mahingangha ka
mobudlat ang imong mga mata
mukorog ang imong mga tuhod
mabuhian mo ang baso sa imong
kamot
manindog ang imong mga buhok

isulti ko ang
ngalan
sa nagpatay kanimo....