7/31/2019

ang panahon nga dili na mausab

dunay panahon
nga dili nato mausab
busa dawaton kini
sa maayong pag-abi-abi
walay hisgot walay supak
sumala sa maayong
kabubut-on

nianang panahona
bisag dili na kita ganahan
magpadayon lang gihapon
sa naandan

mopahiyom, mosayaw,
mokanta, makigsandurot
nga morag wala lay
nahitabo sumala sa maayong
pamatasan
ambaton gayod ang tanang
moabot bisan ganig
dili nimo kaila
bisan ganig wala kay
gana

nianang panahona kuno
hingpit na ang imong pagkatawo
dili man gani ikaw ang
tinood apan ikaw kana nga buhi
maalamon, abtik, kalma
unya dili na mahadlok 
mamatay.

itom nga awom

gitangtang ang
puti nga putong

gibahig ang buhok
nga kulongon

dyamanteng aretes
nagkadako nga alom

sa kilid sa dunggan
dangas nga agtang

tagboanan

sa kilid lang sa aparador
gisandig ang
tagboanan

usa lamang ka halok
kadyot nga hawid sa
kamot

dayon magbulag nga
walay tingog tingog.

hinagboan

ang iyang hinagboan
anaa sa iyang mga kamot

alang kanako

wala kini nila makita
kaming mitagbo kaniya.

tinagoan

misulay unta og
litok ang dila bahin
sa tinagoan diha
sulod sa dughan

apan ang ngipon 
namaak
unya ang baba
miungot

ang ilong nga
nakasimhot
gibahaan sa
lasaw nga sip-on

halas

biyaan, ko, na, ikaw
halas, nga
maninintal, ayaw, ako
hatagi, nianang, imong
pula, nga,
mansanas, kay, makalanag,
kana, kanako,

mogawas, na, ako, sa, lawak,
sa, imong,
kalibotan

kanus-a, ka, ba, nahimong,
babaye, sa, akong, kinabuhi,

bitin, sawa, halas, ka.
dupong, halas, halas, ka.

kanus-a, ka, ba, nahimong
mansanas, alang, kanako?

kabahin ni lola dorang nga hagbay rang namatay

si lola
Dorang nahulog
sa hagdan
apan maayo gani
kay nasalo ra
sa nabyaan nga
bukag nga hakotanan
ni tatay ug
lubi para makopra

si nanay nagluto
ug pamahaw
nagprito ug isda
nagpanit sa itlog
nagbahin sa budbod
nagsukad sa kan-on

alang sa iyang
lima ka anak

si lola nakuratan
misyagit apan
walay nakadungog.

ang bata nga nalisang

sa ilalom sa
lamesa mitago ang
maong bata nga
sa kalisang wala na
gani tagad nakaiyak
samtang ang mga
plato ug mga baso
nanglupad sa ibabaw
tungod kay ang iyang
tatay ug nanay anaa
nagpunay ug away.

sa akong bula
nga kristal nakita
nako ang maong
bata.

ako kadto unya
gusto unta
nakong malimtan.

babaye nga bitin

yanong giangkon
ni eba ang iyang sala
diha sa pag-ingkib
ug pagtulon sa tam-is
kaayong pulang
mansanas

apan si adan anaa pa
gihapon sa pagbasol

makita kini sa bukog
nga mitubo diha
sa kilid sa iyang liog

gani sa tunga man kini
nga mora
bag siging syagit nga-

"ako natintal lamang
sa babaye nga bitin"

alang kang ninang bering

si ninang bering
nga adunay cancer
sa new york
naghisgot nga ako
kuno wala kaayo
magsulat ug mga
balak mahitungod 
sa gugma nga unta
gusto niyang 
basahon diha sa
kasakit sa iyang mga
balatian

hapit na kuno
siya mamatay ug
unta gusto niya 
nga ako 
moampo na sa gugma
nga kuno kanunay
nakong gilikayan.

daghan na akog
nasulat maoy tubag
nako sa iyang
pangutana

kabahin kini sa gugma
nga nagtakuban diha
sa hangin

nga wala kaayo niya
maaninag
nga gani mihalok pa
man kini sa iyang 
aping
sa dihang duro niyang
lantaw sa gawas sa
bentana diin ang mga
snow flakes
hinay kaayong nahulog
sa mga sanga sa mansanas
nga gihukasan sa
ilang mga dahon.

kining balaka

ah kining balaka
human nako masulat
unya imong
mabasa actually dili
na lang kini akoa
kondili 
atua o gani mamahimong
imoha na 

human nimo mabasa
imo na usab kini

gisulat ko kini
apan dili kini ako
gikan kini sa nagsulti
kanako

kon motoo ka
basin kon gikan kini
ni Bathala
o kaha ba kadtong 
gitawag natog
Makagagahom

o kon dili ka motoo
basin og gikan kini ni
Psyche o dili ba
kaha kanang atong
gitohoan nga kalag
o kaha ba konsyensa
nga sa matag kaadlawon
mopokaw kanato
dunay gisulti unya
kita namati
dayon natog sulat
bisan gani usahay
wala kita kasabot kon
unsa ang kahulugan
niini

adunay mga tanghaga
nga nanglutaw sa suba
sa hunahuna
adunay mga imahe nga
moabot, milabay
mibabay

usahay kon anaa ka
sa tungatunga sa
katulugon makita
mo pa ang iyang
taplak nga pahiyom
nga mihalok sa
aping sa kaadlawon.

ang isda nga tambasakan nga napasol ni felimon sa kadagatan

ang isda
wala biyay gisulti
kay atua baya
kini sa ilalom
sa tubig

nakaabre lang
siya sa iyang baba
tungod sa iyang
pagtoo nga kadtong
iyang nakita
lamiang pagkaon

apan kadto diay
paon
maong instead nga
siya ang mokaon
siya na man hinoon
ang nakaon

ang iyang natulon
taga
nga gihiktan sa
nylon nga
wala niya makita.

7/30/2019

nagpahipi

misulod kita
aron mamati sa
bag-ong musika
sagol sa
mga batan-on

nagpahipi sa
ngitngit 
nagpamati 
basin kaha 
makasabot

dili na kining
lugara para 
kanato

mora kitag mat monroe
nga nakigsandurot
kang juan karlos
sa iyang kaugalingong
buwan nga dili 
na kaayo nato
masabtan

gisulayan nato ang
pag-awit
aron moblend aron
dili mailhan
nga kitang upat
lahi na ang gipuy-an
nga kalibotan

por vida

kon wala ka miabot
og setenta
ayha ka pa giganahan
sa kinabuhi

wa nay katam-is
bisan gani ang kaasgad
wa na ang kaaslom
di na ka usab buhong

kapeng tab-ang
isdang til-ugon
otan nangka
nga dili tinonuan

kamoteng kahoy
itlog sa manok bisaya
saging sab-a
baboyng sinugba

batan-ong gwapa
por dios por vida.

japanese arrangement in Dahilayan

ikaw si kenneth

kini ang buwak sa
espada
tungod sa imong
hawak

kadto ang langit
walay bulingit

kini ang bato 
ayaw
ipukpok sa imong 
ulo.

ang ulan, ang tiguwang ug ang kalsada paingon sa sindangan




kusog ang ulan
mipasilong ang 
tiguwang sa
punoan sa talisay

ang iyang katugnaw
mihunob sa
iyang bukog
ang iyang kamingaw
mikatay sa
basa nga sementadong
kalsada paingon
sa Sindangan.

ang mga buak nga botelya sa tanduay

ang mga buak
nga botelya sa tanduay
nga imong gilabay
sa kilid sa pader
nakatunok sa kawatan
nga misaka sa
balay ni Manay.

ang dugo sa kawatan
nagtulo
mihatag ug giya paingion
sa iyang 
gipuy-an

atong nahinumduman
ang kalipay nga
gihatag kanato sa tanduay
didto sa kilid sa pader
nga atong gitamastamasan
sa atong walay
hunong nga katawa.


7/29/2019

ang gibati sa nakasala

bisag unsaon natog
dotdot
bisan ganig
napiit na pag-ayo
ang imong dughan
sa akong dughan
ambot, nganong nia
pa man gihapon kining
kahaw-ang
nga dili maispiling
apan bisan pa niini
ania 
ako sa imong ibabaw
giwakli ang mga pangagho
gihangad gihapon sa
langit kining atong
gihalad nga
kahigwaos.

daghan ra kaayo kana basin ug dili nato mahuman.

dili nato
confrontahon ang
mga lisod

kadtong makabali
sa usa ka relasyon

dili nato hisgotan kadtong
makapabuang kanato

gamay lang ang mga oras
alang sa kalipay

mubo ang panahon unya
nahimong 
habol ang mga kasakit para
niini

hisgotan nato kadtong
wa diri ug wa didto
kadtong nasayran na nato
apan hisgotan lang gihapon

tibogol sa kamay
tiki sa kisame
bitoon sa langit
balas sa dagat
napaso nga tudlo
natunok nga kumagko

ice drop nga nahilis
sa kainit sa kaudtohon
kasag nga nadakpan
sa usa ka unggoy

daghan kitag hisgotan
ayaw lang kanang makabali sa
atong relasyon
dili kanang makapaaslom niini

maggang hilaw
halang nga suka
mawos nga ginamos
siling kulikot
humot nga uyap

hisgotan ta ang bulan
ang kahayag
ang tawong dili gusto
maguol
ang babayeng nagpalayo
sa kasamok
ang batang nagdula sa
lapok
ang lalaking mibuga
ug kalayo

ang asukar nga hapit 
na mahurot
ang kape nga mikaging
ang tae sa iro didto sa
sala
ang iring nga wala nato
pakan-a
ang tubig nga alisdan
aron dili magdaot ang
mga iro

ang kurtina nga giabog
ang kahoy nga basa
ang bag-o tang sakyanan
ang pagpatuli sa bata
ang bag-ong aretes ni
An-an
ang blonde nga buhok
ni Tibor
ang suhi nga kilay
ni Milay
ang love letter in
Valentin
ang patay nga kuko
ni Isko

daghan kitag hisgotanan
ayaw anang kasakit
ayaw anang makabuang
ayaw anang makaguol

daghan ra kaayo kana
basin ug dili nato mahuman.
basin gani ug kulang ra
ang atong mga pulong
basin gani ug kulang ra
ang atong kinabuhi para
niana.

busa palihog hisgotan
na lang nato ang tanod ug
ang dagom
ang lapis og ang papel
ang ininit tubig ug ang
takuri
ang mata sa tiki sa hubag
mong sampot
ang pako sa kwaknit
ang singsing ang lana
ang lambo
ang giilogan nga
trabungko
ang hangin ang tingog
sa tanang nanglupad
sa atong kagabhion nga
karon nagpalayo na
kanato

TOURISTS

NAGPAhulagway kita
sa MV jOCELYN kadtong barko
ba nga gianod ni Yolanda
didto sa kabalayan sa mga
squatters didto sa tACLOBAN.

KADtong barkoha diay nagdala
ug daghang sako sa bugas unya
sa kakusog sa surge
milapos sa ibabaw sa mga balay
diha sa kangitngit ug katugnaw.

daghan diay ang naligsan nga mga
tawo didto sa ilalom unya aron
makuha ang mga patay nga lawas
gigabas ang maong barko.

nagpasad ang mga patay
baho kaayo ang maong lugar
mabati ang daghang nag-iniyakay.

karon nagpahulagway kita
sa maong kagahapon.
kita nga wala kaayo mibati
o nakalabay sa maong kasakit
ania mipahiyom samtang
gipress ang camera sa mga
cellphones nga samsung.

mga tourists kita dinhi.
moingon ta nga looy sila
apan unsa bay atong labot?

KALIBOG

naglibog ko nganong
dako kaayo ang imong gipatad
nga kahulugan sa usa ka berde nga
botelya nga kaniadto puno sa
bino gikan sa amerika
dayon gipulihan sa suka nga bisaya
nga sa dihang nahurot na kini
human sa pipila ka kinilaw
gilabay ngadto sa silong sa balay
tupad sa haligi nga semento
nga nasiak tungod sa kabug-at
sa mga puthaw nga gipondo
sa salog nga tugas
nga gikasilagan sa mga 
nangapangag intawon nga
mga anay
nga makapahugno sa bongbong
nga lubi nga gipuli ni tatay
sa dihang gilangkat kini
sa mga rebelde niadtong
mil nwebe sientos setentay
sais.

ang sanga sa tugas

lisod gayod tul-iron ang sanga sa tugas
nga sa pipila ka tuig misubay lamang sa kahayag
diha sa daghan kaayong mga labong nga kahoy
sa kalasangan

kon imo kining sulayan pagtul-id mahimong 
mabali lamang kini unya kadtong agila nga kasagaran
moagi sa maong punoan nga nagsigig tugpa pahulay
didto magkabuang usab ug pangutana ngano ....

7/26/2019

H I M A B A Y E


HIMABAYE

pulong nga mabulokon,
sa mga asawa gukdonon,

pagdibuho kinis bana'ng maibogon,  
dili mahimutang,  daw kanunay’ng gutom,

kamanggihatagon sa kainit,
kini ang sinugdanan sa panginit,

nagkadaiyang suok masudlan,
pangulipas ug palusot huptan,

kuwarta, kusog, patuhoy ipamuhunan,
maningkamot sa kaguwatsi dili mapagngan,

kon pangutan-on sa kanunay'ng pagkawagtang,
pinakunot sa agtang mangatarungan,

kay kahimabaye kuno tabitabi lang,
kini usa ka talan-awön sa kakugihan

7/25/2019

salamat sa kahilom

salamat
sa kahilom

dalhon ko
ang imong kahilom
sa akong lubnganan

unta dalhon mo usab
kini
sa imong lubnganan

salamat sa tanang
kahilom
tungod niini
nabati nato ang
tiunay nga gugma

gugma nga walay
kasa
migabot sa kahilom
namulak sa kahilom
nalaya sa kahilom

nindot, maanyag
malinawon

7/24/2019

pagdaginot sa gugma

GIDAGINOT ko ang gugma
busa nagpaduol ako pag-ayo kanimo

sa pagduol dili ko makita ang ulat
sa imong nawong
ang hiwi mo nga kilay
ang halhag mong abaga.

ayaw pagpalayo kanako
kay sa maong paagi makita ko ang
tanan natong kabuang
basin sa kalayo 
magsuka na hinoon ako
sa tumang kalood.

ang karaang mananambal sa among balangay

kinsa kahay
makaingon karon
nga siya
nakalikay sa tutho
sa maong
banggiitan nga mananambal?

kinsa ba kahay
makaingon nga sa dihang
nanghubag ang iyang
nawong
wala kini maayo sa
tutho sa laway
ug sa pula nga mam-on
nga midagsa sa
bugasbugason nga
aping?

likay sa kasakit

pakusgan ko ang
akong paglakaw
ning kagabhion
aron dili kaha ako
maapsan sa 
migukod kanako nga
dakong kasubo

kon magkaduol na
siya kanako
modagan ako aron
dili gayod niya
ako madakpan

inig abot nako sa
among balay
ang pultahan ug mga
bentana akong
sirad-an

oo, wala niya ako
maapsi
oo, wala niya ako
mahawiri apan
ngano ba nga ania
ako
subo man hinoon
kaayo
namula ang mata
diha sa pag-iyak
nangurog ang mga
kamot sa tumang
kahadlok
busa sa usa ka lapad
nga tanduay
ania, miyarok

gusto nako

gusto nakong
makita ka nga walay
sapot sa akong lawak

gusto nako nga
palungon ang suga
aron ang imong
kaanindto ug kahumot
ipiyal ko na lamang
sa akong mga kamot

dili mo makita nga
ako miduko
miluhod diha kanimo
miiyak sa tumang
kalipay.

dili baya tanang balak, balak

dili baya tanang
balak mahimong balaknon
sama sa imong
kabalaknon

ang uban niini
tambal lamang sa 
labad sa kamingaw

ang uban syagit
sa kahigwaos sa 
kaulag nga wala
pa sukad
matagbaw

naay uban hinoon 
nga hinungaw sa
imong kamingaw
sa mga pagbati
nga maingon tang
si Bathala na lang
ang nasayod kon
unsa gayod ug
ngano.

sukod sa kamingaw

sukdon ko ang akong
kamingaw diha kanimo
sa akong halok nga 
isampak ko sa imong
halok kanang dugay
gayod kaayo hangtod nga
mahutdan kas imong
ginhawa unya magpatabang
ka sa imong kamot nga
anaa nahimong kutirol sulod
sa akong kum-ot nga  purol.

kabag-ohan

wala na nanagan ang
mga humay
aron manago sa dako
mong kamalig

wala na usab tagad
mahinog ang bayabas
aron mahulog ug motugpa
sa imong baba

wala na misulod ang
inaan aron mangitlog
sa sulod sa kwarto nga
iyang mahimong
pugaran

nausob na ang tanan
panahon na sa pagdagan
pagtinarong na higala
basin ug wala nay imoha.

mga bitoon

ANG MGA bitoon sa langit
sa kagabhion
morag mga dyamante diha
sa imong buhok

ang imong buhok nahisama
sa ngitngit nga wanang nga
gidan-agan sa daghang
mga bitoon

didto sa baybayon samtang
nahikatulog ka sa ilalom
sa talisay
ang balas sa imong pus-on
migilak nga morag
mga bitoon sa kaudtohon

ang imong pusod
usa ka bulan nga malinawon
sa akong damgo nga
hilom.

7/22/2019

alang kang E. (Classmate nako sa elementary nga dugay na nakong wala mahimamat)

40 na katuig tang
wa magkita, karon nagkita na
gyod ta

mitaya kog paniudto sa 
hunahuna nga basin ug wa
na koy panahon sa
panihapon sama sab nimo
nga igo rang mihalok diri
kadyot dayon supot na
pod kag larga ugma dayon
sa kaadlawon

gihimo mo lang nga kusina
ang southampton ug ang
miputak

morag nabag-ohan kos
imong panultion ug porma
unya kaw sad morag nahadlok
kas akong kahimtang karon
nga mora bag naglatay kos
tanod nga hapit na
maputol


unsa to naalaan daw kang
babaye sa driver sa van gikan
sa cagayan de oro paingon
sa dipolog?
unya naglagot ka

samtang nag-inom tag san mig
pale pilses, dugay kong nakabantay
nga pareho na kag nawong ni
bhen cervantes apan wala nako
ni gisulti nimo

ang akong nasulti lain, nga mora
na kag nawong ni danny osmond kadtong
sikat nga singer kaniadto sa
atong kabatan-on


sa tinood lang
lahi na gyod ka apan kasabot ko
nakabantay sab ka 
nga mas lahi na pod ko

tan-awa giunsa kita pag-usob
sa panahon
sa kadugayon
nangausod tang duha
morag tubig nga mitulo
sa dakong bato
unya naghimo kinig
lalom nga atabay
nga napundohan sa tubig
nga wala nay
kagawsan


usa na lang ang akong
masaligan nga ikaw pa gihapon
ikaw, ug sama sa ilang gisulti
kanunay, mao gayod kining
imong mga mata
nga makaingon ko nga
mao gihapon ang timailhan
sa imong 
boutan nga kasingkasing.

7/21/2019

Sayop ba Diay

nganong sayop nga higugmaon ka
nganong ikaw langit ug ako yuta
samtang ako kagabhion ikaw adlaw
malisod litukon apan ingnon ko ikaw
ang akong gugma ug gibati
alang lang kanimo bisan
ang imo dili maako
kay giangkon na kini sa uban
sayop ba diay
dili ba pweding angay
ikaw, ako ug siya
bahin bisan dyutay
ako kining ikalipay


7/20/2019

pamilya

si nanay morag gansa
nga nagsigig bagotbot
sa kilid sa balay unya
si tatay morag baboy nga
gigaid sa silong sa punoan
sa sirguelas nga wala nay
mga dahon.

kami usab nga ilang
tulo ka mga anak morag
mga batang nanghakog
sa dula sa syatong unya
bisag miabot na ang 
dulom nagsigi lang gihapon
ug utong-utong

ganghaan

dili na kinahanglang
kabalo ka mosayaw
aron mosayaw ka
sama usab sa pagkanta
dili na kinahanglang
makamao kang mokanta
aron ka makakanta

kiaykiay lang diha
syaok lang ayaw 
pugngi ang kalipay 
nga sa sulod sa imong
dughan hagbay rang
gipriso ug nangitag
pamaypay

Joy

si Joy
nagminyo sa dihang
kwarenta na siya
unya ang iyang gipamana
bente dos pa lang

abi niyag molungtad ang
tanan
abi niya ug ang mga pasalig
matinud-anon

gitaban ang iyang batan-ong
katabang
gibiyaan siya sa iyang
kauga ug katab-ang.

7/19/2019

modagkot na usab sa menteryo karong biernes sa hapon

gidamgo nako
si papa 

giuhaw noon kos
tuba ni alma.

balak balak

hilig lang
gyod, wala nay
laing katarungan

dili ko moingon
nga gimahal ko ang
kamatooran

dili sab ko moingon
nga gikasilagan ko
ang bakak

dili kini kabahin
nilang duha
kabahin lang kini
sa ginagmayng
kalipay

gitupitupi nga
mga imahen
tinapakan nga mga
tanghaga


kinawat kawat nga
panahon
halad sa mga
halandomon.

habal

lami sab bation ang ako nga naa sa imong likod
unya sa akong duha ka kamot gihawiran ko ang imong dughan

galigid ligid ang kagahi sa imong humok nga sampot
unya ang akong ngabil nagduladula sa humot mong liog

hapit kong malumos sa kahumot sa imong taas nga buhok
mipalayo ko kadyot, mibalik sa paghalok, hangtod nga kitang
duha nahiagom sa gibantog na nga kalimot.

pondol kong hinagiban

wala ko nagdahom nga
ning higayon karon ganahan
sab diay kang lubaon nako
sa imong likoran

ning pondol kong hinagiban
sa giyamogan mong tugkaranan

sa gawas ning balay tang gisak-an
kusog kaayo ang ulan unya 
nagbasa na kaayo ang nataran.

kamot nga namugnaw

wala na kitay nabungat
nga pulang samtang gibati nato
pag-ayo ang pagsalop sa bulan

hinay hinay nga kahayag nga
gilamoy sa kangitngit nga misalom
sa habagatan

gihawiran nako ang imong kamot
nga namugnaw.

ako na sab...

ang bata nga nadagma sa
dalay, gikaloy-an,
gitabangan, ang walay
buot, gisabot,
gipangga

usahay ang tigulang
malimtan, ok lang, mosalop
na man god ang adlaw,
mongitngit na ang kalibotan,
angayan na nga hikalimtan,
mas makatarunganon ang
pagpahulay na 
lang gani hinoon

ako, nadagma, ingon ka
dili na bata, 
unya wala tabangi,
gipasagdan, gipakapinan
pa nga
gigabaan sa mga tigulang.

walay mabuhi sa kamatooran lamang

walay mabuhi
sa kamatooran lamang

nabuhi usab kita sa
atong mga bakak

kapila ba kita giluwas
sa kamatooran gikan
sa bakak?

maihap ra. apan kapila
ba kita namakak aron 
maluwas sa kamatayon
diha sa kamatooran?

wa ka pa nahuman.

lohico

kon unta
ang pagdagan mao ang
paagi sa paglikay
sa kasakit
nan, daghan unta
kitang maghaguros
palayo
aron dili masakpan
sa kasakit

apan daghang paspas
nga mas nasakitan pa
sa pagkadagma

unya daghan sang
sa laing bahin
namatay ug sayo
diha sa pagdukaduka.

kon atong
hunahunaon pag-ayo
wala sa pagdagan
o sa pagpahulay ang
paglikay sa
kasakit

tanan, naa niini
gawas lamang kaha
sa mga patay
nga wala sab
manulti.

7/18/2019

ikaw dili gayod masayod

WALA ka masayod
ug dili ka gayod masayod
kon unsa ang mahitabo
kanako
human nato salohi ang
atong nag-uros uros nga
mga pagbati diha sa
katre.

nakita ko ang Ginoo
sulod sa akong kasingkasing
nangabli ang mga bentana
sa akong hunahuna
miabot ang adlaw sa akong
kabuntagon

unsaon ko kaha pagsugilon
kining tanan diha kanimo
ikaw nga sa akong pagsabot
wala man lang gihapon 
nahigugma kanako.

MIGAMOT

ang imong kamot
nga mihawid sa akong
kamot
ang imong halok nga
mihalok sa akong
halok
kanang imong lawas
nga midap-ig
sa akong lawas
kanang imong kalag
mga milingkis
sa akong kalag

kining tanan mao ang
mipagamot na usab 
kanako sa
kalibotan

uno, dos, tres

naghaling ta sa gawas
gidauban na usab nato ang mga
nangalaya nga dahon

adunay gamit ang atong gihimo
diha sa pagdaob 

una giayo natog hatod ang aso
paingon sa langit

ikaduha gibati na usab nato ang
kainit sa kasingkasing

ikatulo adunay lamdag na usab
ang gangitngit tang mga saad.

yuta, pagbati, kalaw, bulsa ug uban pa

nagtigsi ang imong nawong
sa dihang gisukad mo ang akong pamahaw

sa dihang gitimpla mo ang akong kape
mas tab-ang kaayo ang imong panglantaw

gihunahuna ko na usab ang akong luna didto
sa halayog bukid

nasandaw ang mga lubi, wala mamunga ang
mga mangga, gidungoy  ang mga manok

sulayan ko na usab ug susi didto kon ang mga
batol sa lubi anaa pa ba

kon ang yuta wala na bay abono, kon ang suba
nahubsan na ba sa tubig

balikan ko na usab ang awit sa mga gangis
ang unga sa gutom nga mga baka ang tawag
sa mga kalaw

gibalikan kog lantaw ang imong nawong
nakita ko ang yuta nga kulang sa ulan 

gihikap ko ang akong bulsa ug nabati ko nga
wala na kini kwarta.

matag adlaw

matag adlaw
gisugilon ko sa akong kasingkasing
nga tawo lang gihapon 
ako

ug bisan kanus-a wala akoy laraw
nga makigtigi sa kaayo, kamaloloy-on
kamapasinayloon ug pagkagamhanan
sa atong Ginoo.

7/17/2019

unsaon kaha nako pag-ingon nimo nga nagawsan ko

nakaulan ra gayod
ang bug-at nga dag-om

nakaihi na gayod ang
puno nga pus-on

nakasulod ra gayod
ang akong tanod sa
insik nga mata sa 
imong dagom

nakaiyak kos kalipay
sa dihang gisugdan na
ug tapak ang nagusbat 
nga gisi sa akong purol

kasaba

sa tungatunga sa
atong tumang 
kasaba
anaa ang bulan
nagpakahilom 
lamang

stage 4

gikan sa simbahan
gibalita mo kanako nga
si Delia diay
nag stage 4 na gayod
sa iyang
colon cancer

giluwa na siya sa
hospital
gibalibaran na sa
mga doctor

molupad siya sa
siquijor
sulayan ang laing
bapor

ingon ka 
wala nay paglaum nga
siya mabuhi pag
dugay

naguol ka
apan mibungat ko kanimo
panahon na
aron molaag na usab  kita
sa laing lugar
aron makalimtan una
ang kaasgad sa ugma.

e.

dili mo mabungat
ang 

eyot, nga mora bag
lud-on ang
kalibotan sa maong
pagdungog

apan pila ba ka buto
ang mabati mo matag
gabii
pila ba ka lagubo diha
sa mga kaadlawon

banhawa ang eyot diha
sa gugma
isaha siya sa pagkabalaanon

diha sa panag-ipon
diha sa pagsalo sa pagpangaon
diha sa siplat
kihat og paghangop sa
kahumot sa imong ilong.

"eyot ta" mihangyo ko pinaagi
sa paghunghong
diha sa imong kipot nga
dalunggan.

gigil-asan ka man sa pulong
apan magpabilin kining
lamian nga handumon.

liberal

wala na ang
pamalaod kanako
gipapas ko na
ang tradisyon

uyab lang kita
kon magkita
kon wala ka
dili ako mangita

kon maghalok 
kita
gibutang ko sa
akong hunahuna
nga sama kanako
ikaw mobiya
nga sama kanatong
tanan
aduna kitay
utlanan

gipahimangnoan
ko ikaw
sa atong panag-uban
awata ang akong
halok
ang akong tanday
ang akong gakos
kon mohapwag ka
na sa imong
matood nga gihigugma

wala na ako
mangutana og
dili na usab ako
mangutana
kon aduna pa bay
tinood natong
duha.

ako lang

ako lang
ang nagtikawtikaw
sa lawak
ako lang gihapon
ang nagtikawtikaw
sa kusina

adlaw man o
gabii
tungod kay wala
ka

ako lang ang
nawala apan
ako lang usab
ang motultol
kon asa ko
makaplagan ang
akong bathala.

ang paglaum

ang paglaum
makabati sa tanan

sa mga buta tang
mga mata
sa kangitngit sa
dalan

anaa ang paglaom
nakatultol paingon
sa bag-o mong
puluy-anan.

didto sa akong panimalay

naabtan na nako
ang lugar diin ang pangutana
lahi na.

dili na kon sakto ang
kumpas sa akong mga tiil
sa sayaw sa kinabuhi

dili na gani kon malipayon
ba ako o dili

nangutana lang sila kon
nganong dugay akong miabot
sa maong panimalay

kini mao ang panimalay sa
akong kasingkasing
giandaman nila ako sa 
usa ka salosalo

7/16/2019

away sa hilom

gipalabay ko lang ang 
tanan sa kalinaw sa akong
dughan

ang mga sapa niini
walay mga isda ug baki

milabay ang dahon nga
gipalid sa hangin

misunod ang lubi nga
napulak sa punoan

milabay na usab ang bagtok
sa bantok

apil na ang gaaginod nga
gapnod

gipalabay ko kining tanan
tungod sa kalinaw

apan karong gabhiona ning
akong kahubog

dili ko na palabyon ang
tanan: sugdan ko na kini

sa kagot sa akong ngipon
sa kutod kong aping


gukdon ko ang imong kahilom
sa mas lagong kong kahilom.

kadtong naghikog pinaagi sa pag-ambak

nag-agila ka gikan sa 
habog kaayong building
imong mga pako gipandong
sa dakong haw-ang mong
kalibotan

sa dihang nahulog ka na
 diha sa buak mong ulo
sa makausa pa
gituldokan mo ang 
ang dili kaayo taas nga
sugilanon
sa balason nga yuta.

ALANG KANG F. nga naghandom ug bata....

sa pagkadaghan sa mga bata
ning kalibotan, anaa wa na
gani mabantayi sa kadalanan,
naligsan, 

anaa, wa na gani maatimani
sa inahan, nahulog sa hagdan,
patay,

anaa, gilabay na man gani
sa baha, gianod, nakit-an
nalata,

sa pagkadaghan, tuod man,
ikaw nga nagdamgo, naghandom
nga bisag usa na lang,
ug nganong wala man.

subo nga lantawon

ang akong lawas
gilantaw ko sa samin

subo lantawon ang
akong hubo nga 
kahimtang. 

(pasayloa nga putlon
ko kining balaka
tungod sa pag-abot
sa akong hinigugma)


dili baya kinahanglang ako, ang ako, mahimo pod nga ikaw ang ikaw

dili kinahanglang ako
mahimo man god nga ikaw
o siya ba kaha
ang gihisgotan dinhi

usahay ang adlaw dili
baya adlaw ug ang mga
bitoon bisag bitoon dili
kinahanglang mabitoon.

tanghaga ang mga tanghaga
usahay, apan usahay ang
mga tanghaga gisi na, unya
dili na mahimong tapakan.

ang mga imahen, mahimong
imahen gahapon apan karon,
o basin ugma dili na mga
imahen nga atong tagaag
kahingangha nga mora bag
maoy pay iyang pagkadalaga


ang kahilom, mao ra gihapon
kahilom sama sa kahilom,
naglingkod, gihulma sa bentana
kadtong atong mga kahaw-ang
nga puno na kaayo sa balay
tang gusto natong biyaan.

7/15/2019

alang sa akong bag-ong minahal

dili na
kinahanglan
nga mamati
ka

wala na akoy
ikasulti pa

ning atong mga
buluhaton
sunda lang ang
akong mga
bukton

salig sa akong mga
kamot
batia ang kainit
sa akong gugmang
uyamot

init ang akong
dughan
hanoy ang akong
mga tudlo


tam-is  ang atong
mga dila
sa atong gatak-om
 nga mga baba.

managlahi nga awit

dili dungan ang
awit sa kalag
ug ang awit sa lawas

lahi ang giawit
sa akong mga unod
lahi usab ang giawit
sa akong ispiritu

dili pa panahon sa
ilang panagdungan
nahisama sila 
sa kabayong puti og
itom nga lainlaing
og direksyon.

ang awit sa yuta ug
ang awit sa langit
anaa gilabat sa awit
sa hangin

ang mga walay 
buot nga panganod
anaa naghandom sa
mga dila sa dagat.