2016/06/30

tungod lagi...

tungod
lagi kay hugaw man
ang imong nawong,
baho ang imong
sapot
kalkag ang imong
buhok
unya ang imong
mga mata
galutok,

maong silang
tanan
walay labot
kanimo,

kadtong milabay
wala gani
mipasiplat
kon ikaw buhi
pa ba....

tutok

ang iring
nga napahak
milingkod dapit
sa akong
bentana, mitutok
kini kanako
nga mora bag
gusto niyang
itug-an kon kinsa
kadtong
walay batikolon
nga milaphaw 
ug ininit sa iyang
likod
nga unta dili man
kuno siya
ang nanungkab
sa tinagoang
piniritong
pirit
didto sa kusina

alimokon

puhon
mausab ang tanan
apil ko
sa sulog sa kausaban
kana kon
dili na ako ganahan
nga magpatubo
ug lumot
sa akong pagkabato,

puhon mausab
ra ang plastada
dili na ikaw ang
mahadlok
nga basin masayop
sila na 
usab ang magkintokinto
kon sakto
ba ang ilang gihimo

puhon
moabot ra puhon
ang imong
gipanamkon
matawo na usab
tupad
sa mga alimokon

iring

gipamati ko ang imong
awit
unya ako nabihag

pulos pareho ang
mga tono
ning awit sa tungang
gabii

malinawon man ugaling
makapangagho 
man gihapon kining
buling sa atong 
mga kiting nga nakawrasan
sa dili makitang
iring....

swerte nimo

ang balak usa ka
nindot nga tamsi nga
miagi sa imong
ulohan unya sa kalit
ikaw giithan

swerte, ikaw pa.

diha sa kasakit

matun-an mo ra
ang sa ilalom nga
musika
sa kadugay nimong
pagpakabuhi
makita mo na
ang kalahi


nimo sa uban
nga sama kanimo
sa kasakit
gisag-uban

atabay nga walay
pagkamala
suba nga walay
uga-uga....

awit sa gakit

litoka ang mga
pung
sama sa orasyon
sa kadugay
sa panahon
sa pakighinabi
nimo sa
imong kaugalingon
matag buntag
apil ang kaadlawon
anaa ra ang
musika sa imong
pagyamyam
matag pulong matag
hunghong
miawit ang
kalag
diha sa tumang
kalipay

bisan ug anaa ka
pa sa tungatunga sa
lawod
sa imong mga
kasakit sakay sa
gakit
moawit gihapon
ang pipila ka
mga kasakit

minugbo

Mub-a na lang
pagtoon
unsaon pagputol
kay ang
oras naglupad
morag
agila.

2016/06/24

ang baga ug nawong nga siging pamutos ug bringhaws sa party

hangtod kanus-a
kaha ka sabton sa
refrigerator sa imong
kalaog?

hapit na mahurot ang
galiraw-liraw nga
mga mata og tuyok-tuyok
sa ilang mga kalimutaw
sa pagpanaway nimo

apan ikaw, hesus, hesus,
nagpabilin diha sa kabaga
sa imong nawong
nalupig ang gahi nga panit
sa kabaw

ang limbongan

walay saktong
katarungan nganong ang
kabug-at sa bato nga
unta imong pas-anon 
imo mang gipasa sa uban
nga unta daghan man
usab silag gipas-an

dayon nimong lingkod
sa kilid sa dalan
mipahulay
mikatawa 

inig kagabii 
lantawa ang bulan ug
mga bitoon
bisan gani sila wala
ganahi sa imong
kalimbongan

didto sa simbahan
nanghambog ka sa ulat
sa imong abaga
sa gipanghimakak mo
nga kasakit unya
mitoo sab ang pari
ug ang mga manang

2016/06/23

bahaw

kon ang kan-on bugnaw
na unya ato na kining nganlan
og bahaw
mahimong ikaw nga arte
kaayo sa imong pagkaon
dili na mangambat niini

bisag ako kang ingnon nga
kini lami pa nga daginoton
magmug-ot ka, molingiw
nga morag gilood anang
kadugayon sa kabugnaw

(ikaw nga bahaw na alang
kanako, kon nasayod ka lang
bisag di sab ko ganahan ako
ka lang gihapon gihangop 
tupad sa kinilaw....)

2016/06/22

diha na unya sa pagpiyong sa imong mga mata....

igo ka lang sa lantaw
kay kon moduol ka unya
mohikap
mosangko pa kini
sa laing pangandoy
diha sa pagakos diha
sa paghalok

layo na kaayo ang
abton sa imong panaw
diha sa pagkamabudhion,

kutob ka lang sa lantaw
anaay laing panaw diha 
sulod sa lawak sa imo
unyang pagpiyong

walay makakita kondi
ikaw lamang
walay laing makahikap
makagakos makahalok
kondi ikaw lamang

ikaw ang mabasa sa
imong kaugalingong ulan
ikaw ang mauga sa imong
kaugalingong
kainit ikaw ug ikaw lamang
ang malamdagan sa 
imong kaugalingong kahayag

drama sa tuko ug ok-ok

gilantaw nako ang
pagtukob sa tuko sa
usa ka ok-ok sa kilid
sa bongbong sa balay
tupad sa kahayag sa
usa ka bombilya,

gikalipay ko ang
kaabtik sa maong tuko
apan sa laing bahin
gibati kog kalooy sa
ok-ok nga kalit nga
nawala sa iyang
gamayng kalibotan

daghang pangutana
ang angayan nga tubagon
bahin niini, 

gihatagan na usab ako
ug orasan sa maong tuko.
human niini nahibalik
kanako ang kahilom sa
maong ok-ok....

"tuk-o, tuk-o, tuk-o"

o......

ang gatakuban

nagtagotago
ka bisan diha
sa tungatunga
sa kahayag

walay mabasol
niini kondi ikaw
lamang

 ania ang
kape sa ting-init
ice-drop sa
 ting-ulan...

mao kini ang
idalit nila nimo
sa imong
pagtakuban....


ang ulohan

kon sakto ka ug barog
unya dili ka kaayo motingog

nga kon motingog ka man
dunay kabug-aton ang imong
matag pulong

nga kon makagawas na kini sa
imong baba mora kinig mga punyal
nga moihaw sa mga daotan

bisan sa usa ka tinan-awan lamang
da! manglupad silang tanan!

ingon ana ang tiunay nga ulohan
sa saktong lawas sa usa ka baroganan.....

ang maayong balita ug ang laing maot...

kadtong batang
lalom ug kandiis sa
iyang aping
nga nindot nga mokiaykiay
nga lami kaayog
pahiyom kanimo
samtang milabay ka
sa ilang balay
matag hapon gikan sa
imong opisina


patay na.

girapido sa usa ka terorista ug
mga bala ang ilang balay kaganiha.

sa imong pagmata sa sayong buntag

gusto ko ikaw nga
lipayon sa usa ka maanindot nga
balak

kadtong morag bata nga kandiison
nga mipahiyom nimo sa imong sayong
kabuntagon....

limpyo nga konsensya

mikatawa ang mga
bakakon
nag-inom sa ilang
dalang ilimnon
karon nakab-ot na
usab nila ang 
ilang gipangandoy
midaog ang ilang
mga lingla
busa silang tanan
nagpista

sa pikas balay 
nadungog mo kini
sulod sa imong lawak
diin napalong na
ang suga unya
nanirado na ang
pultahan ug bentana

bisan og kusog kaayo
ang ilang mga hudyaka
sa tumang kasaba
nga nakatukaw sa kalinaw
sa imong kagabhion

oran-oran ikaw giduyan
na sa mihangop kanimo
nga mga bukton diha sa
kahumot sa katulogon....

ang pagpanira

nindot ang pagpanira
sa pultahan kon kabalo
ka sa imong gisirad-an
nga sa imong panimpla
pinakalamian....

2016/06/21

ang balak sa kagabhion

taas ra kaayo
nagmug-ot ka
mubo ra sab
kuno kaayo
maong wala
nimo panum-
balinga.

patas-anay sa ihi

nagpatas-anay baya sa ilang
mga ihi ang mga tiguwang nga
gipangloyloy na sa panahon....

tanghaga sa usa ka gugma

sa kanunay gikahadlokan
niya ang pagpakita sa nawong
sa kamatooran

"makamatay kini kanimo"
maoy iyang hulga
"busa unta ipabilin lang
ang tabon" 

mahimong makita ang
pilok apan ayaw lang una
ang mata
mahimong ipagimaw ang
ilong apan ayaw lang
iapil ang ngabil

"makamatay kini kanimo"
kon mahitabo kini makita
ko ang imong pagdagan
sa gawas sa balay dayon
nimog ambak sa pangpang
unya ang magpabilin na
lamang mao ang hingpit
nga kahilom

og dinhi aning tungura
mahimo na nga tangtangon
ang tabil, ang tabon, ang
sapot, aron ipakita na ang
nawong sa kamatooran
gawas sa putong

ang iyang mga mata 
nahutdan na sa mga luha
ang iyang ngabil wala 
nay malitok nga pulong

hinoon kadyot lamang
kini kay ang usa ka langgam
sa kataposan mobukhad
sa iyang mga pako aron
luparon na usab ang
gipanghimakak sa naangkon
niyang kawanangan....

sa laing kinabuhi

ayaw ako ug
hagita nianang kasubo
unya kabahin sa
ginadamgo mo nga
kamatayon

ako, kamaong
magpakabuhi 
kon molantaw ka
pag-usab daklit sa
atong balay
adunay bag-ong
matahom ang 
manambo sa maong
bentana

balak sa kalipay

nagbalhin balhin
ang pinakamalipayong
buyog
sa daghan kaayong mga
buwak
didto sa hardin sa gugma
sulod sa imong 
kasingkasing

gibati mo ang matag 
tusik
nahikatulog ka sa duyan
sa iyang mga hunghong
pagkadaghan sa mga
pahiyom

miulan ang katam-is
sa mga nektar gikan
sa langit

gubat

adunay mga gubat
nga hangtod karon
nagpabilin sa imong
hunahuna

mga kabayo nga
gadagan
sakay sa ilang
likod ang mga
manggugubat nga
magtagbo karong
gabhiona aron
magtinikbasay

sa dili pa ka 
momata mahibaw-an
mo ra nga ang 
midaug mao ang 
mga kaaway sa 
inyong kaliwat

nagpasad ang mga
patay nga mga bata
nga mga anak sa
imong mga igsoon

nagtindog ka sa
ilalom sa dakong
dag-om unya walay
mabati nga tingog
gikan sa imong 
tutunlan....

laing damgo nga ngil-ad

nakamata ka
sa laing damgo
nga ngil-ad,

mibalik ka sa
balay sa imong
pagkabata unya
imong naabtan 
ang imong amahan
nga lain na ug
asawa

ang imong inahan
atua sa gawas
nanilhig sa mga
laya na nga mga
dahon sa ipil-ipil

damgo ni dodong

sulod sa lawak
nga giabog-abogan
didto nagpaabot
si papa ug mama
nimo dodong.

2016/06/20

wa baya namaot ang langit sa pagkadaghan sa mga bitoon

ingon ka
daghan ra kaayo
morag
basurahan
sa krono

ayka
katabang na
nimo

wa baya namaot
ang langit
sa pagkadaghan
sa mga bitoon

dili ra pod kaayo ka sensitive da

dili mahitabo nga
mabut-an nimo ang laing
sama nimo kon
unsaon niya paglitok
ang mga pulong
kon unsay gamiton sa
unsang panagtigom

sa imong pagsugod lamang
ug hatag sa mga reglamento
gilood na sila nimo apan 
tungod sa gamayng respeto
sa imong pagkawalay-angay
nagpakahilom na lang sila
samtang sa tuba nagtagay.

kadtong nasuko, pildi

makalolooy ang
nangisog
nga walay miambat
pagkasayang
sa iyang kasuko
nga walay misukol
pagkasayang sa iyang
kumo
nga walay naigo.

2016/06/19

si nong pedro nga nangawat ug bulad ug bugas sa kusina ni goryo

unsaon ko kaha paghikalimot
ni nong pedro nga higala ni tatay
nga sa matag ting-ani patabangon
niyag aswat sa mga binakid nga humay
aron ibulad didto sa daplin sa karsada
diin kusog ang init nga mouga sa
basa pa nga mga inani

unya palitan kini ni tatay ug tanduay
dapiton sa panihapon unya pagkahuman
manigarilyog Aurora silang duha didto sa 
pantawan hisgot hisgot bisan unsa na lang
aron saluhan ang ginagmayng kalipay
sa usa ka hingatulog nga balangay

unya samtang nahubog na silang duha
unya nakatulog na si tatay 
dayon  si nong pedro nagsamparay nga
misulod sa kusina aron pagkuha sa lima ka
bulad nga mangsi nga iyang gitago sa 
bulsa sa iyang lago nga karsones

apil pa gani ang upat ka litse nga bugas
nga iyang gidalidali ug sulod sa 
tinagoang bulsita

aron ipakaon sa iyang upat ka anak
didto sa iyang payag sa kilid sa bungtod

nagpanglingo ko apan wala na nako sultihi
si tatay kabahin niini

unya pagkaugma mibalik sa balay aron na usab
pagbulad sa mga binakid nga humay
 unya siya dihang mitabok siya sa karsada unsang hitaboa nga kalit man kining
naligsan sa gahaguros nga Lilian 


dayog kamatay.

pagsalop sa adlaw didto sa dipolog

ang pagsalop sa adlaw
didto sa boulevard
mao ang kataposang
pasalig niya nimo sa
malinawon ug mabulukong
hinapos sa usa ka dili
nimo makalimtang
panagbulag

elisa ang taga Tabon nga gihaw-as sa kalisod diha sa gihatag niyang kalipay diha kanimo

pagkadaghan na
sa imong mga nawong
diha sa nabuak
nga samin nga
nagpasad didto
sa salog
sa iyang kalimutaw


ingon ani gayod diay, unta nag-angay na lang, nagsinabtanay unta...

miabot ang adlaw
nakapamahaw ang
mga dahon

mibuswak ang
mga talutot sa mga
rosas

miabot ang hangin
misayaw ang mga sanga

nangahulog ang
mga hinog nga mangga

miabot ang mga bata
nga namulak

nag-ilog sa nahulog
dapit sa lapok

wala matagbaw
nagsumbagay

adunay nabun-og
adunay nag-iyak adunay
miuli sa ila ug
misumbong sa tatay

ang mga tatay nagtamparusay
samtang ang mga nanay 
nagsyinagitay naglayog
sa mga buhok nagbinirahay

ang adlaw misalop
ang mga dahon nanihapon
ang buwak nalaya
ang mga mangga nangalata

B batok K

di ko katoo
apan nahitabo na gayod
ang unta dili mahitabo
kabahin sa
mga lanhan diin ang
usa gihagit og
tsopa 

gipapili

o kon dili
sumbagay, gani ang
mas isog ug lana
miingon man nga
bisag usa ra ka kamot
ang iyang gamiton
unya misamot kasuko

kay wala man
siya ambata
sa pak-an.

2016/06/18

onli in da pilipins

milayat na ang
mikaon ug kugmo
misulod ang
mokaon ug tawo

balak ni oscar alang sa iyang tatay pedro

si tatay pedro
nga mag-uuma walay
anak nga dili katilaw
sa iyang bunal kon
dili mopatoo sa iyang
mga reglamento,

bisag babaye dili
kaikyas sa pagtanom
sa basakan
paghakot sa mga similya
kamlot, dampas,
pakaras,
tugway sa kabaw
ug uban pa

kon dunay masipyat
sa iyang mga kasaba
di ka kasibat
unya kon sa dula ka
mosabod
da! dili ra nimoy walay
labod

kon nag-eskwela ka man
didto ka lamang magbasa
kay sa balay ginadili na
kan
nagtinapolan ka lang diha
sa puyra gaba

kaming tanan natagbaw
sa kahadlok
napura sa pakaulaw
nasumhan sa mga bunal

ako lamang ang 
misulay sa pagsulat
bahin niining
among mga kaliwat
kay ang uban bisan sa 
paghinumdom
sa kalisang intawon
molagom

magpasalamat ka sa
imong amahan nga buotan
sa imong amahan nga
abogado o bisan na lang
og maestro
pagkahayahay ninyong tanan
kamo pagkapalaran


kami nga gidimalas sa
sa takbas sa kapalaran
naningkamot ug taman-taman
gisulayan ang tanan
aron lang gihapon molampos
sa kataposan

balak nga gibasa sa announcer sa radyo samtang nag-drive kos akong pick-up pauli sa katipunan

nakadawat siyag
usa ka libo ka pesos
sa iyang balak nga
maoy nakadaog karong
hapona
sa ENERGY radio, 
gikan sa bag-ong
nakadaog nga
bise-gobernador

gibasa kini sa announcer
nga nagpahimangno nang
daan nga dili niya basahon
ang nahibiling 150 ka mga
tampo nga puno sa kaguol,
nga mora bag puros paningil
sa mga utangan apil na
kadtong iyang gidanggaag
 maginoo pero medyo
mas bastos

basahon lang kini niya
human niya kini ayudihan
o malaygitan ba hinoon

ang maong balak
nahimong kataw-anan
diha sa iyang pagmahay
kabahin sa iyang pikoy nga
bisan unsaon kunog tukoytukoy
dili na man gayod kamaong
mangukoy


wala kuno siya kabawi
sa iyang pagpatuli

unya sa kataposang garay
 nagpabilin
siyag pangutana kon sa iyang
edad nga saysenta maminyo
pa ba kaha kuno siya?

mikatawa ang announcer
ug miingon nga depende ra
na nimo sir

kon duha ka bay kayutaan
dako bag abot ang imong kalubian
ug pila ka sako ang maani sa
imong mga basakan
kay daghan pa gayong mga
babaye ang kamaong mokapyot
sa imong katigayonan

kon ugaling mabuta siya...

kon gani kuno siya
mabuta
sama sa mga buta
nga mihawid sa 
elepante unya
gipangutana kon
unsa ang kamatooran,
matud pa niya
ang gusto niyang 
hawiran mao ang
ikog kay kini
bisan man gani
dili hingpit nga 
tinood apan duol
na duol na gayod
sa tinood nga
tinood.

ang mga nagduladula

pagkaayo nila
aning dulaa
samtang gilantaw
nato diha sa
pagtagotago

kadtong wala 
pa masayod moingon
nga sila nagmalipayon
gani ang usa 
mora man ug nakautnga
sa tumang kalami
unya ang usa mihangad
pa man gani sa langit
nakasangpit sa ngalan
sa ginoo

apan ikaw nga dugay
na dinhi sa dula sa
kinabuhi
kamaong motan-aw
sa likod sa ilang
mga panagway

nagpakaaron-ingnon
ang mga binayran
unya inig human dayog
suot sa ilang tinood nga
dagway dali silang
namutos ug mipauli
sa tagsatagsa sa ilang
mga panimalay aron
dimdimin didto ang
nahibiling kalipay.

ang pag-aninaw sa kagawasan sa mga kalanggaman

molakaw ka
nga walay pananghid
ako sab moabot
sa walay pagpahibalo

samtang nagkutaw kog
kape sa kusina
anaa ang kalagot nganong
dili kaayo init ang tubig
sulod sa termos

miadto ko sa gawas
milingkod sa silya 
misulay ug pahuraray
samtang gilantaw nako
ang mga tamsi nga
gawasnon sa ilang
paglupadlupad diha
sa lainlaing sanga sa
mga kahoy...

Panginhas dire