9/26/2017

NIAGARA

Gipangita
lang nato ang
bangaw sa
Niagara

ug sa dihang 
nakita na nato kini
gipangandoy
nako nga kini
 mahimong
tulay
sa atong
kalay-on

mokaon ra ang galot mong silingan


cream pie
Cheers
clam chowder
Fenway franks
baked beans
lobster

nangutana man
god ka kon
 mag-unsa
kos Boston.

borloloy

karong adlawa
pa New York mi
ako ug ang akong
asawa

nahuman na siyag
pamutos
sa duha ka sapatos
duha ka jacket
ug uban pang mga
borloloys

apan ako ania
nagtimbangtimbang pas
mga pangagpas

unya na lang
dali ra akong mamutos
usa ka paresan sa gaan
nga sapatos
duha ka polo shirts
nga itom
usa ka medyas
tulo ka briefs
usa ka jacket

tambal sa highblood
sa blood sugar
sa cholesterol
sa labad sa ulo ug
sa kalibanga

hapit na ang kahaponon
sakit na gamay ang mga tuhod
busa pahimuslan gayod ang
tanan
samtang di pa kaayo bugnaw
ang kagabhion

medyo

dili lisod
hunahunaon nga
ako lang

ako lang ang 
nagpahawid sa imong
bukton sa
akong abaga

ako lang ang 
mihalok nimo
samtang milapos ang
imong panglantaw
gawas sa bongbong
paingon sa
plaza

(layo ra kaayo ang
imong tinan-awan
habog ra kaayo ang
imong pangandoy)

oo, ako lang.
wala gyod ka didto
samtang
nagawsan ko.

hinumdomi

kon unsa ang imong apohan
kon wala ka mahinumdom 
lantawa ang apapangig sa 
imong anak, lantawa kon 
giunsa niya pagpanit ang 
manggang bisaya, giunsa kini 
niya pagtam-os, giunsa niya 
paghipos ang wala mahurot 

hinumdumi ang mga mantsa
sa kamisin, ang nagkamuritsing
nga aping, ang nangalata nga
mangga sulod sa iyang bag diin
gitago niya ang iyang bulingon.

9/25/2017

alang sa namatay

gilamigas ang aparador
sa namatay
kon nasayod ka lang nga
ang polvoron nga nawala
sa wala pa siya mamatay
iyang gitagoan sa ilalom sa
iyang wala maplantsa nga 
barong

adunay panahon

tungod sa mga balak
nasayang ang akong panahon
wala na gani nako mabuhat
ang angayang buhaton

sa laing bahin
tungod niini nausab ang
akong panglantaw

adunay panahon nga kita
mag-undang
magyamayama sa dalan
makigsandurot sa bulan
ug sa kangitngit
makighawid sa atong
kaugalingong kamot
nga mora bag dili kini
apil sa atong lawas.

sa galawod nga kadagatan

ang mga nakaila ko kaniadto
lisod ko na nga mahinumduman
kadtong akong nahibalag
unya nahibalag pag-usab
motawag usahay kanako sahay
kon magkatagbo ang among
dalan, apan aron walay mahiubos
moyango ako dayon mangutana kon
asa na sila nagpuyo karon nga mora
bag ang tanang tawo anaa morag
mga barko nga siging nanagsibog
balhin balhin sa mga pantalan
haw-as sa mga pasahero ug kargo
dayon ang ibilin mao na lamang
ang kahaw-ang nga unya dapit
pun-on na usab sa tanang mosakay
aron ihatod dayon bayaan 
hikalimtan kay silang tanan walay
labot kon unsay imong dangatan
sa galawod nga kadagatan

bugnaw na

ang balak sa akong
kabuntagon
morag kape nga
nabugnaw na
kay nalimtan ug
inom....

ug samtang wala na ang mga iring ug iro anaa ang tanang balagtok nanayaw, nanahudyaka

sa matag adlaw nga adunay
buwak nga nalaya
dahon nga nangahulog
sanga nga nangaputol
alibangbang nga nabalian ug pako
iro nga naligsan sa karsada
baboy nga natikig
tawong gipatay
kining tanan nahimong
naandan unya ang tanang
naanad na niini
wala nay ikasulti.

ang mga nakakita ug
nakadungog
usa lamang ang pangandoy
nga unta dili kini
mahitabo kanako

matag adlaw atua
ang sulugoon sayong nagprito
sa bulad ug itlog
sayong nakalung-ag sa kan-on
sayong nagtimpla sa kape
sayong milantaw sa TV
dayon pagkaoran-oran ang
tanan wala na dinhi

ug samtang wala na ang
mga iring ug iro
anaa ang tanang balagtok
nanayaw, nanahudyaka

9/24/2017

dila na lang ang walay labod

kahinumdom ka ba
kon unsay labaw nga
bililhon sa atong inahan?

ang iyang mga african daisies
nga akong gihurot ug ibot
dayon akong gipaligsan
sa daghang trak nga nangagi
didto sa lapok nga dalan

kahinumdom ka ba sa 
akong gidangatan nga matod
pa sa atong inahan
dila na lang ang walay
labod sa batang kanahan

unsaon ba paghikalimot
ang natun-an nga sa dugo
gipatuloan?

si chelu ug si tekla

sa usa ka comedy show
gisagpa ni chelu si tekla

mikatawa ang bayot nga
morag wala lang bisag
sakit ang iyang apapangig

ako nga naglantaw nakaingon
dili na to comedy, kondili cruelty.

trabaho lang ang kang tekla
nga kon mawad-an siya wala 
nay ipalit ug druga.

sa laing bahin, sabta lang
nga si chelu hagbay ra sang
gibyaan ug bana

ayka,  mikuyog sa bayot.

Bakante

Mas angayan ang bata sa sanina
nga tinahi sa iyang mama
ikumpara sa human-daan
nga gibaligya sa ukay-ukay

Inig kahapon samtang ang inahan
nag sikad sa makina, mag-ampungad
ang bata nga maghulat sa sanina
nga gipasingutan sa pagmahal

Namatay og sayo ang iyang inahan,
ang dalan nga iyang nasundan
dan-ag diay sa kaparutan ...

Walay kahago, walay singot
kon tan-awon mo sa kinatibuk-an.
Galanog ang utok, sa gikutoy nga dughan
sama sa nipis nga hangin, bakak ang
mga hunghong nga nihapuhap
sa bakanteng kagab-hion





ang iro nga nag-atong sa pultahan

ang imong pag-abot nahisama
sa nawalang kasag nga nakasulod sa
balay nga gibugaw sa katabang sa
tinuhuang adunay mamatay

ang gibilin nimong tsinelas hagbay rang
gilabay sa nabyudo didtong balaya human
gipasinaw ang salog sa tumang 
pagpanglampaso

giguba na ang pultahan sa imong lawak
wala na ang katre kay gihipos na kini sa
kamalig

hawan na ang balay nga imong giabtan
nahisama sa kasag nga wala kahibalo kon unsa
ang iyang gisudlan

wala nay mamatay dinhi. kadtong imong nailhan
hagbay rang gilubong.

wala nay mangutana bahin kanimo.
ang nagpuyo dinhi dili na nimo kaila.

kon dili ka motoo, tawga ang iro nga nag-atong
sa pultahan, wala ka ba kabantay ang ang ikog niini wala na mokiwil para nimo?




Sa Akong Paghikalimot



Nipahilit na sa kalimot
ang mga dahon sa sunanoy
tungod sa iyang pagkamasundanon
sa agas sa kapalaran.

Pait ang likido nga gipainom
sa mananambal aron mahikatulog.

Apan  mas pait ang pagkaamgo
sa dihang pagmata mo sa buntag,
ang butang nga dili imo
dili gayod di-ay nimo maangkon

ang dili kanako

dili ako dahon nga nahulog sa nawong
sa suba nga gianod anod lamang sa sulog unya
walay klarong paingnan

dili ako alibangbang nga naglutaw lutaw sa hangin
nga hadlok sa unos

wala akoy sama. di sab ko nimo mahimamat.
magpabilin ang atong kalay-on

anaa ang bitoon, anaa ang bato.
pilion mo lang kon asa ka.

hagbay ko rang gipili ang wala diha
ang wala didto ang wala sukad.

kon pagbati lang ang tanan

kabahin ang tanan
sa pagbati ug kinsa kadtong
wala pa masumhi niini
anaa naglangoy sa wanang
nangita og buwak sa
otot-otot

kon pagbati lang ang tanan
wala ang dalan
wala ang balay
wala ang dagat
wala ang langit

mahimong balihon ang
pangagho
usbon ang ighim
aron walay matangtang

unsa ba ang imong gidangatan
ikaw nga nabulibod sa imong
pagbati

kon makita mo lang unta kini
sa samin
anaa gituok mo ang imong kaugalingon
nalubong ang imong mga kuko
diha sa ugat sa imong liog


9/23/2017

tigmo sa tan-aw

abi mo og sayon
abi mo lami
abi mo og dali lang kini
nga mora lag
walay nahitabo

sayop ka
pagkasayop mo
sayop ko
pagkasayop ko gayod

sa dihang nagtagbo
ang atong mga tinan-awan
gibati tag kalooy

dili diay lalim ang
panghitabo
pareho tang nasakitan

ang atong mga pangagho
nagakos

nawala na ang gabon hayag na ang kaadlawon

nalimtan na nako

kadtong kanaas sa hangin
nga imong giingon

kadtong bisag pagwalis sa
saya madungog mo pa

nalimtan na nako kadto

kadtong pagtangtang sa trangka
sa pultahan

kadtong agiik sa karaang katre
sa lawak

nalimtan na nako kadtong tanan

di na maambat ang kagahapon
bisag maayo pa kinig pahiyom

daghang mga saad ang akong 
umaabot

unya ang karon sa kasingkasing
wala nay kasudlan sa kalipay

gikalimtan na nako ang kanhiay
kadtong hinay

kadtong gikulit mo sa panit sa
kahoy

nauwat nga kasingkasing sa 
kahoy

ang luha mao ang tagok sa aping
sa kasingkasing

nawala na ang gabon 
hayag na ang kaadlawon
new york, washington dc,
lancaster, niagara falls,
toronto, ottawa, quebec,
montreal, dayon boston.

kay lig-on pang tuhod
sakay sa panganod

9/22/2017

Pasundayag Lang



Ang kasakit usa lamang
ka abi-abi sa kala-ay:

kala-ay sa paghulat,
kala-ay sa hagit nga
walay katumanan

Wala lang gud
kalipay nag-aginod
kalipay nga gamay
kalipay nga dako

Unsay kalainan?
sila lumalabay lang
pantawan sa damgo
walay katino-uran

Kay gani nga gitawag
nga damgo lang,
tungod kay sukwahi

ang pasundayag  sa tinood nga kinabuhi



lantawa ang mga panganod

samtang sayo pa
tun-an mo na ang arte
sa paghikalimot

kinahanglan nga makamao
kang molabay sa mga 
mahinungdanon

kon maanad ka na niini
ang paglabay, ang paghikalimot
wala na diha sa paghinumdom

sayon na dayon ang panaw
sa gaan na kaayo nga kasingkasing

lantawa ra god ang mga panganod
dili ba sila malipayon?

lantawa ang pato nga naglutaw sa tubig
dungga ang iyang awit 
diha sa kagaan
hinumdumi wala kini gitangag
bisag gamayng siwil sa usa ka isda

lantawa ang alibangbang nga naglutaw lutaw
sa hangin
nga nagbalhin balhin sa mga kabulakan
unsa bay iyang dala?

ang sabot

nindot ang adlaw karon.
lab-as ang hangin.
bugnaw ang mga kakahoyan.
walay abog ang dalan.
dili lubog ang suba.
anaa ang mga alibangbang
sa hardin nga durong pamuwak
sa bulan sa setyembre.

bisag wala ka miabot
bisag wala ka misanong sa atong sabot.
lami lang gihapon ang kape
sa Bo's bisag bugnaw na kini
nga akong giinom.

Dugay rang nahuman

Kadtong akong gipangyamyam
dili alang kanimo
dugay ra akong napaso
sa kainit sa tubig sa pagsalikway

Wala na ang kasakit,
ni-agi lang ang buhawi
usa ka higala nga unta dili kalimtan
apan ang tanan lumalabay lamang

Dili baga sa kubal ang dagway
sa mansanas nga kaniadto
duol ng mahurot og it-it sa mga ulod,
apan anaa siyay liso nga himsog

Nakigharong sa kinabuhi -
nitubo, naisog
nga walay sungkod:

sungkod sa kaparutan
sungkod sa pagkadagma
sungkon sa panghimaraot

Wala na, human na
dugay ra ...







9/21/2017

wala,

ang pagsulat kabahin
niani
usa lamang ka 
diversion, nga sa ato
pa dili gayod tinuyoan,
nga nasulat lang
tungod kay nasumhan kos
akong ganahang
buhaton, (sumo ba ang
gana? wa kaha ko
maturning  sa kadaghan
sa wala pa 
mabuhat?)

nakigharong lang ako
sa akong kaugalingon
aber kon asa gayod
kutob ang kurog o ang
kutob ang kutod, busa ania
mitipas kadyot human sa
pagdugay didto sa

bread and butter thing
sa real makoy, 
kadtong giingon mo nga
boring kaayo basahon 
dili parehos medical books
nga complete and
illustrations, 

kaysa kabahin aning mga
balaod nga black and white lang
sa baga nga 
volumes for reading
labi na ang mga cases
nga walay kahumanan

sa pagsulat nako ini
wala koy tumong gawas lamang
sa pagpatay sa oras
sa dili pa ko matulog oran oran

o kaha ba,
pagpatay sa akong kaugalingon
sama sa kasagaran nakong
ginabuhat samtang nagbasa
sa mga libro

ug mga libretta kabahin sa
mga orasyon
sa mga tulumanon sa usa
ka sulugoon sa simbahan
sa diyos ug sa mga santos...

asa ko padulong? ah dinhi,
niini, unya pag-abot sa dead end,
moingon ko nimo,

wala lang god.
wala lang ba.
wala, wala. wala.

wala koy tumong
gipatay ko lang ang
panahon.
walay koy tuyo.
nakighinabi lang
samtang ang mga
oras naglatos kanako
halayo sa
hapwag sa katulugon.

sa imong gikumpisal

sa tanan nimng 
gikumpisal
mas nindot kadtong
kabahin sa 
inasal

crispy kaayo ang
panit
unya dili kaayo
asgad ang unod.

(kadtong kabahin
sa namilit mong
gugma

di ko magsaba
apan kasukaon ko)

hearsay

mituko ang tuko sa
alas 10:50 karong gabhiona

gihagpat na usab nako
ang tuko tuko tuko tuko

unya ang ending
maayo untag di lang matinood,

lain na sang kapalpakan kuno
sa akong kinabuhi.

grammar nazi

nakanganga ang mga abogado didto
apil na ang malditang fiscal sa dihang nagsugod na og iningles ang banggiitang quehante nga nagtrabaho isip usa ka call center agent sa cebu city.

mitestigo kini kabahin sa illegal nga pagputol sa mga gemilinang mga kahoy sa ilang yuta didto sa barcelina sa walay pagtugot sa iyang inahan nga maoy tag-iya sa maong yuta 
nga sukad nakigbulag na sa iyang amahan nga
milalin na sa laing panimalay
atua intawon sa chicago nangamaw aron
makatigom ug daghang kwarta aron makatukod ug mas nindot pa nga balay para nila

sugod sa iyang testigo,sa dihang gipangutana na siya sa iyang abogado kabahin sa maong mga kahoy, " Well when i went to Barceona, it was not dark yet as the boat from cebu arrived earlier that morning ...." 

nga haskang pagkalamai mo pronounce, kay ang iyang "was" , "wuz" unya ang "cebu" , zebuuu baya, unya ang tingog nasal kaayo ang arrive.

haskang biliba sa fiscal, apil na ang mga lain pang mga abogado hangtod nga miabot sa puntong, 

" and i saw with my two eyes that it was saranilo who really cutted the trees", 

wala kapugong ang fiscal, mokatawa untag kusog, apan gipocket your smile lang, dayog gawas, aron sa siradong pultahan, mobohakhak og katawa.

"until now i cannot forget who cutted those trees, and those who cutted them must be accounted for the value of the cutted trees".

sayang, unta cut na lang.

9/20/2017

kay ngano si Tufo ray Tulfo?

ug nganong nadugangan
ang nanglakaw sa 
kagabhion sa kilid sa bungtod?

aykog ingna nga korniko,
nadugang diay ang akong anino.

naa pay lain nga nag-amag,
aykog ingna nga drama ning akoa,

naa pa diay ang bulan.
angkonon ko, dili ko orig.

kay ngano si Tufo ray Tulfo?

usa ka nila ang gamhanan

miagik-ik ang tambok nga
babaye nga maoy gikasuko usab
sa laing tambok nga babaye.

usa kanila ang gamhanan.
dali ra kining mailhan.

ganahan ko nimo

ganahan ko nimo
dili ka usa ka hunahuna
nga mora bag kon hunahuna
ka lamang dili ka tinood,

usa ka ka panyo alang sa akong
luwa.
lugod sa akong dalikdik.
hiposanan sa pinutlan sa akong
kuko.
ang tanan nga makapaubos sa
tawo, ako kang gihimo.
maong ganahan ko nimo.

sa laing bahin, ang wala nako
gisulti maoy man nakapagana
nako kanimo.

ayaw ko pangutan-a bahin niini.
sayod ka. oo, sayod ka.

gusto unta nakong isulti ang 
kabahin sa gugma, apan sayod ka
nga kini dili katohuan kay bisan man
gani ang bentana

nanirado man, miduyog ang pultahan,
miduyog ang gangis, samtang ang tanan
nahisama sa mga bitoon nga
nanggimaw kalit sa kagabhion.

sa usa ka panahon

ang talawan mamatay
sa makadaghan

ang isog mamatay kausa
lang, 

walay mas labaw o dalaygon
nilang duha

pareho lang ang kamatayon
makausa o makadaghan

mao rang pataya, kay ngano
lahi lahi ba ang kamatayon?

daghang gustong mamatay
apan sayran ta ka, mitalaw man god sila sa kinabuhi.

daghan sab ang gustong mabuhi, nga kon imong sutaon
mitalaw sab sila sa kamatayon,

apan, kon kwentahon, mao ra gihapon silang duha
walay labaw, walay ubos, mao ra kini silang mga tawhana

ang naglirawliraw ning kalibotana, talawan o isog,
mao rang utoka, tawhanon lang gihapon, wala masayod

kon unsa ang atua, nag-atang, kon unsa ang naa sa unahan,
ang kahaponon, ang kamatayon o pagkabuhi sa usa ka panahon.

tubagon ko ikaw,ugma, sa sunod natong panagkita

ang sakto nga pangutana
dili nganong gilabay ko kadto

kon dili, unsang katakos ang ania
kanako nganong ako kadtong gilabay

nganong wala ko magdikidiki paglabay
sa plato nga wala nimo masalo maong
maayong pagkabuak

nganong nabuak man?
igo ko lang kadton gilabay, ikaw ang
wala kasalo busa ikaw ang sad-an

wala koy gikawilihan
wala koy gipakabili

nahimo ko na paglabay ang tanan
ang gugma, ang paglaum, ang pagtoo

gisugdan ko  kini sa porselanang plato
apil na ang puti kaayong itlog sa manok
nga maayong pagkapusa diha sa sementadong
salog

gipauyunan ko ang akong kaugalingon
kay lagi lami man usab diay ang bation sa dihang
gilabay mo na, unya wala nimo masalo, unya
anaa nagpasad ang buak sa atong tiilan

gusto pa gani nakong yatakan ang tanan
aron ako masamdan sa mga bildo
kay lagi laming yatakan ang atong gipanglabay
lami ang bation kon kini atong sagulan sa atong
unod ug dugo
kanang mokagis sa atong kabukugan

makamao akong molabay sa bisan unsa
balika unya ang pangutana kon nganong duna akoy
katakos kabahin niini

tubagon ko ikaw,ugma, sa sunod natong
panagkita

9/18/2017

ang lakat sa kinabuhi

paghuman sa ani
ang mga kwadrado nga
basakan
nangliki tungod sa 
hulaw

miabot ang ulan

mikokak ang mga
baki
namalik ang mga
tulabong
adunay nasaag nga
pato nga ihalas

nabibo na usab
ang mga darohan
milabong ang 
kakahoyan

didto sulod sa payag
nagsalo ang bag-ong
magtiayon
nangandam na usab
sa laing kagabhion

makit-an ang himaya mahikap, mahagkan, unya molungtad.

si inday dimalas daw
sa iyang bana,  nga palahubog
nga modapat
nga gastador, nga magsigig
panghulga diha sa iyang
gitagoan nga pusil

apan si inday swerte sa iyang
duha ka anak, 
bugti sa iyang kasakit, sa iyang
mga bun-og
sa tanang kalibog

unta swerte na usab si inday
sa iyang kasingkasing

makit-an ang himaya
mahikap, mahagkan, 
unya molungtad.

wala ang kalibog wala ang kahadlok

sulod lamang
sa lingin

sulod lamang sa
upat ka
bongbong

ayaw ug ambak
sa bentana

gamita lang ang
hagdanan

abrihi ang mga bentana
ayoha og tantiya ang orasan
sa pultahan

tungod niini
sayon na lamang ang
mga buluhaton

wala ang kalibog
wala ang kahadlok

alang sa akong pag-umangkon nga bakakon

ang imong mga
bakak
wala na nako giambat
ang imong mga 
gibatbat ako na lang
gilabat

kadtong miingon ka
nga wala ka na lang midayon
bisag wa ko mibalibad

kadtong wala nimo bayri
ang akong gihatag

kadtong tanan binotbot
bisag ako napungot
wala ko miungot

tungaw ka lang
sa akong itlog
nga kon akong pislaton
masakitan sab kog
apil

gipasagdan ka lang
kon asa ka kutob
gipaabot ko ang imong
pag-usob

basin diay kon ugma
o sa sunod ugma
mabati mo na ang katam-is
sa mga matood

unya sa kalit lamang
sa usa ka milagro
motug-an ka na sa
kon unsa lang ang tinood

9/16/2017

dili na kinahanglan

mas nindot ang
panagdait diha sa 
usa ka hamubong 
panahon lamang

milingkod kita
sa bangko sulod
sa usa kan-anan

kadyot lang
dayon ug biya
dili na kinahanglan
ang ngalan
wa na sab kadtong
asa ka
ug kadtong kanus-a

ang mga nahawiran
dili na dalhon
ang mga pangutana
dili na tubagon


The fleeting beauty of sunset ... ( kaanyag nga nasakmit sa akong celfon ganinang mga alas siete sa gabii)




By Tan O Monique

Ngano man gyud nga mas nindot man
ang mga butang nga moagi sa daklit lang?
ayaw pasagdi ang adlaw nga sakmiton sa kangingit,
sa kahilom ayaw, sa hangin na lang isinggit

Unsay pulos sa kinaadman nga inalaran
kon kini wala matahopi sa kamatuoran
pugaa ang hangin nga mituhop sa imong kabalaka
ang kasakit sa dalanon usa lang ka mapa

Didto sa unahan sa tumoy sa bungtod,
dad-a ang imong mga ti-il bisan nag-aginod
gukda! kay lapad ang wanang sa pagla-om
Kita nga gianod sa dilubyo sa katapusan mopahiyom

pagsalig sa kaugalingon

nahinumdom na ako
niadtong gusto nimong 
mahibaw-an  kon unsa ako

gusto nimong abrihan ang
tanan kanako
labi na ang akong dughan
sa pamasin nga basin anaa
didto ang wala kanimo

o kaha, namasin ka nga kon
unsa kaha ang diha nimo
basin anaa ra usab diri sulod
kanako

nagdumili ako, saksi ang mga
mga isda nga wala mapasol didto
sa lubog nga sapa, ug gikan didto
naamang ka sa kinabuhi

wala na ako masayod kon asa
ka na karon kon naunsa ka kon
nganong wala ka na nahibalik
sa atong balangay

sa tinood lang, gikan kaniadto
nawad-an na ako ug pagsalig sa
uban. Anaa na ang pagduda sa
mga pagbati. Gilitok ko ang
mga pulong: ako lang. ako lang.
dili na kini nako ipanugilon.

buslot nga atop

moinsert gayod ang
pagpamalak
nga mora bag diha
sa galaray mong mga
hunahuna
nga nahisama sa
mga petsas sa mahjong
anaa ang buwak
sa otot-otot
gikan wa mo mabaw-i
kalit lang 
natagak gikan kaha sa
langit
aron mahimong putol
sa kadena sa mga
panganti

ang mga kamot 
nagliraw-liraw
para unsa ka ba 
ning mga tawong
nangitag lingaw sa
tumang kahaw-ang
ug kamingaw?


dili na ko mangutana
kon makalakaw ka pa
kon naunsang hitaboa
nga ikaw ugma damlag
mamatay

sa ibabaw sa kamay
sa ilalom sa katre
samtang ang mga iring
nga nangulag
nagshagitshagit 
sa nabuslot nga atop

alang kang Rima

sa anaa na diha
wala ka motingog
kadtong wala
sige mong gipangita

ang mga unta
kanunay mong gihadla
ang mga sayang
imong gipahayang

ang kataposang takna
kanunayng nagpanakla
ang mga pagbasol
nanagluhod sa paghinulsol

dili na ako magpaabot

ayaw na ako
sultihi
kay nahibaw-an
ko na kini

anaa ang mga dayag
kuyog sa mga harag
anaa ang mga larag 
ug mga talagtag

gitanom ko lang ang
mga liso
ug ang kalibotan mao na
ang mopatubo 


dili ako ang ulan
dili ako ang init
ang ako mao lamang
ang pagbiya
dili na ako magpaabot

han-ay

puol na ang kabag-ohan
gikan na kita didto
sa atong paningkamot
dunay napulihan nga
abi tag mao na kadto
ang angayan
apan sa hamubong 
panahon lamang
nakita na usab ang tinood
nga bulok
ang laing hawod 
ang labing badlongon
unya anaa na usab
nag-ung-ong ang bag-ong
umaabot
lain na usab nga kagubot
mag-ulan na usab ug dugo
magbaha na usab ang
mga patay
aron lang mabutang ang
laing daotan
hangtod na kini sa
kahangtoran

mas malinawon na
ang kinabuhi diha sa walay
pagpangilabot

lingkod sa bato sa silong
sa mga dahon sa kahoy
magpahayahay

kamong magbugno kamo lang
kinsa ang mamatay mao ang
ilubong
kinsa ang modaog
magpaabot na usab sa laing
modaog

ako maglantaw lamang
mangagho, magpamati
dili na hunahunaon kon
unsa pa ang ugma

ang ugma magsulat lang
sa iyang palad
han-ay na ang tanan
aron basahon

buhaton ko na lang

milantaw ko
wala akoy nakitang
maanindot
gipangita nako pag-usab
ang kadto ug
kini
apan wala gihapon ako
nahingawa
busa usa ka adlaw niana
giingnan nako ang
akong kaugalingon nga
morag nahilayo na usab
kanako
ako na lang
buhaton ko na lang
ang wala mo
nabuhat

pagpalayo

magpabiling
walay pulong ang
atua 

sa atong 
tunga

atong gilantaw
samtang kita sa
hinay hinay
nagpalayo

9/15/2017

deskripsyon

pula ang saya sa
babayeng bukidnon nga
naglukdo ug usa ka basket
nga okra ug talong gikan
sa umahan

gihawiran ang gamay nga
kamot sa
batang bulingiton nga 
nahilom tungod sa lollipop
nga iyang gikaon

nagubot ang taboan sa dihang
naghurementado ang hubog nga
napildi sa hantakan

giluba, patay ang hilomong
batan-ong lalake nga nagpaabot
sa iyang uyab nga nangihi sa
kilid sa payag


sa dihang nanirado na ang mall

tuod no?
nganong bahin
lang kini 
kanako?
mao lang
ba kini ang
kamatooran?
nganong wala
ka man
nangilabot sa
naglutaw nga
patay didto sa
suba nga gianod
sa baha
paingon sa
dagat/

tuod no?
unsang orasaha na
ba?

nanirado na
ang mall.
#EJK haiku 07
patay naglutaw
panatikong gigutom,
tambok ang isda
#EJK haiku 10
menteryo'ng lu-ag,
matod sa panatiko,
hu-ot ang tanlag
#EJK haiku 15
tam-is ang dugo
sa gusto og kalinaw ~
tulog ba ang Dios?

adunay gamit ang tanan

kon wala na ang mga papeles
ang mga libro
kon wala na ang mga kasikas
sa kinabuhi
kon wala na ang mga dahon nga
nangahulog
kon moundang na ang ulan
kon wala na ang madungog mo
nga away sa mga silingan
ang mahibilin mao na lamang ang
hawan nga salog sa imong balay
ang gilatag niini nga kahaw-ang
nga mas bug-at pa kanilang tanan.

adunay gamit ang tanan busa
unta wala ka nay kabalak-an.

9/14/2017

pagkabugnaw sa mga palad
pagkauga sa mga ngabil
apan ang mas subo mao nga
bisag wala kay gipamulong 
ang imong mga mata nagdilaab
sa kasuko nga mora bag 
nagbugaw sa langaw nga mibatog
sa ibabaw sa tinap-an nga
nasunog kay nalimtan sa 
dapogan ni anhing maria
miingon ka nga wala ikahatag
ang ugma
unya ang karon sab sa mga
kamot mo
wala say sulod
hinoon ang mga nangagi daghang
gidala
busa karon wala gihapoy nahibilin
diha kanimo
busa gidawat mo ang kamatooran
nga wala

kaniadto sa pag-abot mo ikaw lang
ang anaa
kinsa bay misupak nga ikaw walay
bisag usa ka mumho man lamang
gadala


9/11/2017

karon

karon nga anaa ka na sa sulod
naaninaw mo na ba ang dako mong
kakulangon sa mga panginahanglan
sa gawas?

niadtong didto ka sa gawas gihatagan
mo ba ang kagawasan sa iyang mga
gipangayo kanimo?

sa sulod makita mo ang gawas
dinha sa iyang kangitngit mas maaninaw
mo ang kabalaanon sa kahayag nga
sa mga mata sa rehas mo lamang makita

9/10/2017

pagyubit

gidawat sa ulan ang
kakulangan niya sa pulong
aron ibatbat ang iyang kasakit
ang yuta nga nakatilaw sa
iyang kaasgad
nabasa sa tumang pagsabot

ang tiguwang nga naglingkod
sa bangko sa kilid sa bentana
misulay pagyubit sa 
kon unsa ang kasakit

9/08/2017

uwag

na, di asa ka man gitangag
sa imong kaulag?

lupig pa nimoy kusahos nga
gitangagtangag sa iro nga gutom
dayon didto sa unahan kausa
rang gitulon

dayon mog kawagtang
wala na gani sila kadumdom sa imong
ngalan

9/04/2017

ang puti nga alibangbang

dili makamaong mosulat ang
alibangbang kabahin sa iyang
panaw sa kahilom

ang iyang paglupad paingon
sa pula nga santan daw sama sa
usa ka naglutaw nga dahon sa
hangin nga wala mahulog sa
yuta

mibatog kini sa imong palad
unya tungod sa kaanindot niini
wala mo na gayod nanira ang
imong mga tudlo sa imong kamot

dili makamaong mosulat ang
puti nga alibangbang sa pula nga
santan

busa ako ang nagsulay pagsulat
kabahin niini

ang mga diyosdiyos

ang mga diyosdiyos ang
naghukom nga ikaw ang
mananaog

ikaw, diri sa wala, dapit
sa poste nga ponder ang suga
nahiubos intawon

sa akong tan-aw ikaw gayod
ang unta mananaog apan
ang mga diyosdiyos mao man
ang maghukom kaninyo

ugma magbansay bansay ka
na usab sa paglupad lapaw pas
panganod hangtod nga makita
mo ang kamatooran

ang mga diyosdiyos upaw
unya ang ilang gihukman nga
mananaog walay totoy
walay bulog unya inig batog
nimo sa sanga sa langit
makita mo nga kadto siya
usa usab ka upaw sama nila

9/01/2017

nalingla mo ako
pagkalami mo diha
sa kagabhion

diha sa kahayag
makabasol nganong
wala man ako
nakabantay

oo, nindot ang
mga bitoon sa kagabhion

sa kabuntagon mas
nindot na ang lamesa
ang kape ang pan.
pagkataas bas
iyang gisulat kabahin sa
kaminyoon

wa kong mitiwas
gawas nga wala na koy
nasabtan

ako usab, ning kalapoy
sa lawas, 
wala nay interes

ang katulugon mikawhat
na kanako
gikan sa dakong pangutana
sa mga tubag nga
wala na usab naghatag kanakog
saktong katin-awan

ania, nanghuyab na ako
sa tumong katulugon