2020/04/28

nabasa

gitago nato kining
gamayng panghitabo

makamao ka usab
mohipos sa akong opos

human kog panigarilyo
sa sulod sa kwarto

migawas ko nanibsib
sa bugnaw nga hangin

misunod ka mipasilong
sa akong anino

nabasa tang duha
sa wa pa miulan nga langit.

lama

gabii, gawas sa balay,
sa may hardin, bugnaw,
gilantaw ko ang gugma
diha sa panganod, diha sa
bulan,
nakita ko kini,
lahi na ang iyang nawong
masulub-on,
nadungog ko kini,
nagbakho,

gipiyong ko ang akong
mga mata,
gibalik ko ang kagahapon,

dunay lama,
nagbasa.

himas sa kamingaw

ang iyang paborito mao 
ang iro nga itom,
ah, itoy.

gabii na, anaa ang itoy sa iyang bilbil
naghayang
mangiulawon 
dili pa kamaong masuko
ug mamaak
nahikatulog sa iyang mga himas 
sa
pagmahal

ang iyang mga kamot morag
mamon, 
morag buhok sa mais
sa kahumok.

dugay na,
 pila na kaha ka bulan
ang milabay?

ang iyang bana atua sa halayong
dapit
nangita  intawon  ug
panginabuhian...

ikaw lang

pahiyom
kay ang tanang ngabil ning
kalibotan
mopahiyom usab duyog
kanimo

mopahiyom ang mga bato
mobahakhak ug katawa ang
mga bungtod

ayaw pagmug-ot
biyai ang kaguol kay kon magsigi
kini
dili layog semana, basin mamatay ka.

kon mamatay ka,
hibaw-i, ikaw lang.
ang mga bungtod mopahiyom
lang gihapon
ang mga bato mangidhat
ang mga balod sa dagat
mag-unot sa kakiat
ang patag magsigi lang gihapon ug
hangad
sa gahubo nga mga panganod.

2020/04/27

pangagho sa kasingkasing.

pagkadagahan sa dili na angay litokon.
gidawat, gihambin, gikatulgan, gimat-an
apan dili na gayod litokon.

kay niini, walay pulos ang mga pulong.
ang dunay gahom mao lamang ang kahilom.

kay dinhi, anaa pa ang panaad nga unungan
mo ako, nga unungan sab tika. 
mag-inunungay tang duha hangtod nga bulagon
kita sa kamatayon.

mao kini ang atong pagpakahilom, ang pagsud-ong lamang, ang pagdawat sa dili madawat sa
pulong.

ania ako, dili na makalitok nga nahigugma kanimo. Litokon ang pagmahal, apan kulang kini
sa kabug-aton sa buhat.

Litokon ang giluto nga bag-ong putahe sa sud-an
sa kabuntagon, apan dili na nato malitok ang 
gisaluan sa milabayng pagtakdol sa bulan.

Nangagho na usab ang akong kasingkasing. Di
malitok ang iyang kasubo. Nagyamayama ang baba, sa pulong nga walay pulos aron lamang mabati ang tingog sa adlaw.

molabay ang mga adlaw diin atong gipatik ang mas labaw pa kanatong duha. Dili putlon ang sanga. Dili siakon ang kawayan. Mangatagak man ang mga dahon, apan dili gayod nato putlon ang maong kahoy.

2020/04/26

ang akong sayop....

ang akong sayop ang akong dakong
sayop
gikaguol mo
nagkunsumisyon ka

nakapangutana ka ba
kon unsa ang akong gidangatan kon
wala kining akong sayop
ang akong dakong sayop?

kon wala kini
dili ko tawo dili sab ko buhi
hagbay ra akong patay
lata, dugta, kaging

sama sa bagtok nga 
naligsan, napisat, nikaging
nga morag
panit na lamang
sa gihulaw nga dalan.

dili bulawan

milingi siya
sa wala
giwahing ang 
buhok

gipagawas ang dila
gitilaan ang
iyang abaga dayog
piyong sa iyang
mga mata

akong gipalong
ang iyang biga
mora mag tingga.

tigmo alang kang (kabawo na ka)

daghan
kog gisulti
sakto lang
kay wala
koy gibuhat.

niining
parteha, 
dunay nahimugso
duna say namatay.
didto sa utlanan
gibalik ang
tanan

kon unsa ang
imong gibiyaan
mao lang gihapon
ang imong abtan

ang garapon ug
ang timbangan
ang pitaka ug ang
bulsa

wala na ako
didto
wala na usab
ako diha

sayod ko nga
gikalipay mo
kini
gikalipay mo
kana.

ang akong kamingaw diha nimo

dawaton kong
gimingaw gihapon ko nimo

dali ko rang natudloan ang
akong utok

apan galisod kos akong
kasingkasing

sagdi lang, masugakod ko
gihapon kini

dili ko mogasto ug luha
dili ko magyamayama
sa kagabhion
dili ko magsapotsapot
dili ko magmug-ot
dili ko maghatag ug tigmo
sa akong mga kauban
ikaligo ko kini
manabon kog ayo
manglugod
dugay ko mangwaswas
sa akong lawas
sa tanang bag-ong
moabot
ako magpahumot

sa matag adlaw 
ipakita ko ang akong
daghang pahiyom
sa mga panganod
nga molabay sa atong
gibiyaan nga mga 
bungtod

mobalak ako isip
agila
sa kawanangan
dili usa ka tamsi
nga magkiaykiay
diha sa mga lukay.



ang akong ulipon

gitawag ko nimo sa usa
ka panihapon

nagpatigkong ko
nahinawaing ka 

unsaon ko kaha pag-ingon
nimo nga nahuman na ako

sa akong panihapon kuyog
ang akong ulipon.

sa imong kiliran

kahinumdom kong
gikawat mo ang akong libro

mas sakit ang pagkuha mo
sa akong antipara

gikalipay ko hinoon ang
imong pagkamatinud-anon

ang imong pagmahal mao
na lang diay ang kapungot

unya ako buta bungol nga
nagpalimos sa imong kiliran.

ang akong kabaw

ang akong kabaw
upat na man gani ang tiil
apan nganong
ingon mo tanga lang
gihapon
sa mga kantil
gani gahapon napandol
pa man gani
sa silong sa ipil-pil

siyamsiyam

ang akong balak
kutob ras siyam, 
wala napu,
ingon ka nga
morag wala 
ma onse, apan
sa tinood lang
sige ng gakatorse.

2020/04/25

hangtod galisod paggawas

usa ka utitod 
nikamang nisaka 
diha sa imong tingkoy
gikan sa galanoglanog
nga kabalaka ug kaguol
misuksok sa dunggan 
dasdas sa mga langob 
ilawom sa bagulbagol 
hangtod galisod
paggawas

sa kahilom sa sapa

dili mingaw sud-ongon
ang posteng gainusara 
sa kilid sa taytayan
tabok sa sitio

bibo man gud
ang iyang kahayag nga
dayag nanamin diha 
sa kahilom sa sapa

matapos ang kalibotan

kanunay gyod nako sila giaghat
nga dili intawon magpadala 
sa gisagubang nga kabug-at 

ihukad ang mga sinugbang baboy
ilamog ang tulo ka itlog sa tuba 
nga gikutawan og init nga sikwate

itagay nato ang kinutil taman
sa atong kalipay bisan ugma na 
matapos ang kalibotan

ang akong ngalan

dili unta angayan
apan ambot ikaw ma'y makamao
mopukaw nako
bisan gikahadlokan ko 
ang sunod unya nga mahitabo 
ug kulbaan ko nga mapukan

gumikan sa imong pagkatubag
sa akong tigmo 
o gamhanang oedipus

mahimong mabuak
ang tanang ania kanako
ang akong kasingkasing
ang akong mga pako
nga karon lunlon mga bildo 
sa imong atubangan

apan kalooy ba intawon
kay sayod ka nga sumala
sa gisugilon nga tagna 

ikaw lang gihapon 
ang maalaot kay 
lugiton nimo 
ang imong mga mata
ug maglatagaw ka
nga mag-inusara 

apan labaw nga sakit nga bisan 
kanus-a dili mo lang gihapon 
litokon ang akong ngalan

ang gilaylay sa dagat

igihan ang batang lalaki
sa iyang inahan nga momasahe unta
sa akong asawa didto daplin 
sa baybayon samtang gipalabay namo 
ang mga takna gikan 
sa usa ka semana nga kahago

domingo karon ug madanihon 
ang duyan nga gitabyog sa hangin
samtang ang sabaw sa butong  
gapasamot sa katam-is sa malantaw 
nga kalunhaw sa kalubihan

humot ang sinugbang pula og ikog
init ang kan-on nga gilatag diha 
sa lapad nga dahon sa saging 

pasagdi na lang ang bata 
kay bisan pa og hait sa dunggan
ang igihan nga hunat sa iyang tyabaw 
labihan gihapon katin-aw
ang gilaylay sa dagat

ang kabugnaw

gikan sa tumoy 
sa bungtod tadlas 
sa pipila ka oras
nga pag-aginod sa kilid 
sa punoan sa mangga 
diha sa liki sa dakong
bato mibuhagay 
ang kabugnaw

"Kanus-a pa kaha motuwak kining langita?"

Mibalik ang mga tingog sa pagbadlong:
"Ayaw pagpaulan, basin unya
hilantan kamo!"

Sa laing bahin, sa dakong nataran
nanagan ang mga batang nanggihubo,
nagdula'g dakpanay sa ilalom 
sa nahugno nga dag-om:
"Dakpa ko, dakpa ko, 
dili ka kaapas nako!"

Sa kilid sa bintana, igo rang nanambo 
ang babayeng tigulang nga nanampiling
sukad sa dugay nang pagpaabot 
sa wala motunga: "Kanus-a pa kaha 
motuwak kining langita?"

shatong.....

kon mosulti siya sa tinood
masuko ka

gusto nimong ang isulti
niya nimo makalipay nimo
bisag dili tinood

gihipos niya ang tinood 
gihambin sama sa usa ka bakak

sa tibuok niyang kinabuhi
gitipigan niya ang tinood nga dili
nimo gustong madungog

kamong duha nagduladula sa sungka
nga unta shatong man ang iyang hunahuna

kon kanus-a  mahurot ang iyang utong
ayha pa niya ilabay ang putong.....

sa atong pagkahanaw

kining luna
alang sa umaabot

tilawi ang tab-ang
batia ang kabugnaw 
lakat na latas sa nanglabay 

kining luna
alang sa taas nga panaw

lantawa ang kalay-on
abta pod ang kinatumyan 
sa atong pagkahanaw

sa dakbayan nga abo

lad-ang ang timpla sa atong panagtagik
daghang nangausik 

puti ang tinta nga nawitik sa akong papel 
adunay tipik nga dakong mata 
sa ungo nga misiplat sa gamayng buho 

wala panumbalinga sa atong kahinanok 
ang kasamok ug syagit kabahin 
sa sunog didto sa unahan

nagmantika kuno ang mga bombero 
sa dakbayan nga abo

giputlan og liog

dinhi sa gamay nga dakbayan sa Dipog
luag pa ang menteryo
lapad pa ang mga dalan

pwerting pamunga 
sa mga bulahan ug mga durian
ning adlaw sa mga kalag

wala ang kahadlok kun kaikag
magkaila kuno tanan dinhi
ang mga patay ug mga buhi
ang mga kalag ug dili ingon nato

saksak sinagol ang mga balita dinhi
dunay gibuhian niadtong myerkoles
ug niadtong hwebes pod
naa sab ang usa nga giputlan og liog

ginamos nga mawos

nausob na baya usab dugay na
ang panahon sa atong panaghagwa

dili na ako ang alibangbang
sa imong pagkabuwak
dili na ako ang kahoy
sa imong pagkaaninipot
dili na ako ang tikarol sa imong
sanga nga bakhaw
dili na ako ang isda nga nag-inusara
sa imong lam-aw
dili na ako ang buwan diha
sa imong abli nga bintana
dili na ako ang lab-as nga hangin
sa imong lawak
kay kon wala ka 
dili ko na mabati ang kamingaw
ang atong iro
dili na mopaghot
ang imong iring
dili na usab momiyaw
sa dakong bangkete kita nag-iyahay
akong kanta akong sayaw
imong bitbit imong bugkos

wala na ang kaaslom sa mangga
diha sa ginamos nga mawos

sa langit

sa mapa diha
sa imong likod
natultulan nako ang kinaham

sa dalan
sa imong dalunggan luyo
sa imong aping
sa imong agtang
sa gabon sa imong labong
nga buhok

labing lamian
ang akong nakit-an

sa dihang mibalit-ad ka
sa dihang nabali usab
ang akong kalibotan

wala nako damha ang dan-ag
sa langit

naglahoslahos

gahangad ta’g pangita
sa mga tubag tadlas

sa atong kagabhion
dinhi sa kamingaw diin

dayag ang mga bitoon
ug dili nato matugkad

ang tumang gilay-on
sa kangitngit dihang

nabati nato ang tubag 
diri sa atong kagamay

mga abog nga napalid
hanging naglahoslahos

kuting

kining puti
nga iring sa akong kiliran
sa kanunay manguhit
kuting nga
kulit

kahait sa mga kuko
gilok 
sama sa iyang dila nga
 dubok

2020/04/23

sa pagkadugta

kusog ang ulan
himamaton ko na usab
ang mga dili na
madungog

ganahan ko
nga mahanaw pag-usab
sa tungatunga sa kasikas
sa atop nga gidagandaganan
sa mga lusok sa ulan kuyog
sa sayaw sa nanghagit  
nga hangin

ania na ang orkestra
sa tubig ug hangin
ug gilantaw nako
ang mga panganod
nga nagpakahilom lang
duyog sa mga dahon
nga nangahulog aron 
dakpon na usab kini
sa pagkadugta

natunok sa tuyom

kristal ang kabugnaw sa tubig
dayag ang asul nga mga isda
ug lunhaw pa ang mga lato

kahapsay sa baybayon ilawom
sa lutaw nga mga panganod apan

kalit lang ko natunok sa tuyom

ginagmayng kalipay

didto sa nataran
gikulinitan sa mga pulang hulmigas
ang patay nga tiki
nga sa matag hapon
mohalok sa yuta

naglingkod ko sa bato
naghinuktok kabahin ning butanga

ang moampo diay
sa kadugayan mamatay ug dayon  
ang patay nga lawas niini
saw-an sa kadaghanan

ambot unsay akong nakaon
nga ako mang gisalbar ang patay
nga lawas sa tiki

ug ang mga hulmigas tingali
mihangad nako sa tumang kahibulong
nganong  giinitan pa gyod nako
ang ilang ginagmayng kalipay

ako wala pa

nagpalami ko
nagpalami ka

wala na gani kita
makalung-ag

nia buntag na
nagawsan ka

ug ako wala pa

dalit nga kasilag ug kalisang

unsa kaha kon atong himoong 
wala lang ang mga panghitabo

pananglitan 
kon gibombahan 
ang merkado unya kabalo ta nga
14 ang patay 67 ang angol

unya duna pa’y laing nagtinga
naningkamot nga dili maapil sa
ihap sa nangawala

unsa kaha kon ato kining
itandi sa gabon sa kaadlawon
mawala mobalik mawala pag-usab
matingala kaha ang terorista 
nganong morag wala lang ni nato
mausab ba kaha siya kon 

dili ta magtagad sa iyang kinumo 
nga paningkamot kay wala ta
mokurog samtang dili nato

dawaton ang iyang dalit 
nga kasilag ug kalisang

kon mobalik ka pa

nangudlot ra gyod
ang mga sanga sa akong kahoy

usa na lang kagabii
mamulak na kini

hangtod mamunga
sa laing semana nga antoson

dugang pang mga adlaw ug gabii
idugang ko pa niini

tukma kong gipangandaman
aron ang hinog ihatag kanimo

kon mobalik ka pa

sa mga balikanan

nabiyaan na nako
ang dapit natong duha

didto kita kaniadto
naglumbay naglukot
sa dahon sa lumboy
nagpaaso lahos
sa mga panganod

gibalikan ko kini
gahapon ug gitay-an na
ang mga labat nga alambre
mituyhakaw ug labong na
ang mga sagbot lakip
sa mga cogon mga amorseko
ug ang mga balili

nangambak na sa pikas
nga bahin samtang daghang
mga idlas nga manatad
ang nagsalag sa punoan sa lumboy
nakita ko ang mga itlog
duna nay napusa unya
ang mga pispis wala na didto
mahimong nakalupad
na kini sa ilang tagsa
tagsa ka mga adtoanan
nga wala ko’y kasayoran

suginlan ko ikaw
kabahin lang sa mga salag
ug dili tungod
sa laing pang hinungdan

maghilom na lang unta ko
aron ingnong wala maghandom
sa mga balikanan

2020/04/22

pagtanom og mga rosas

nagkutkot ko og dakong buho
alang sa akong mga basura hangtod kini

malata ug malakip na sa gitabon nga yuta
diin nitubo pag-usab ang mga salibutbot

ug nag-agni pod sa wala pa makalimot
ug walay kutas nga nagmahal nako

sa pagtanom og mga rosas

Panginhas dire