2010/09/30

unsaon ba ang pangpanghayhay?

sarado ang baba
pasulod og hangin sa duha ka buho sa ilong
hunat
dayong pagawas sa hangin
diha sa abli
nga kasingkasing

mao kini ang pagpanghupaw
sa tungang bahin
sa akong kagabhion
paghuman og saka sa bungtod
molingkod ta
lantaw sa ubos
mahingangha sa baga nga gabon
nga mihapnig
sa mga ulo sa kahoy

gisubay ang panaw sa mga
antulihaw
nga nawala
nahilis sa kalay-on

mohangad sa panganod
dili na mangadye kon unsa pa ang
pangayoon
dili na interesado kon unsay
dangatan

palabay na lang sa panahon
palagaylay
unsaon pa ba ang utok
kon guba na ang kasingkasing?

kapoy na, wa na koy labot

nabalintong ang kalderong dako
sa banggera
kay nanungkab ang iring

ang mga iro nag-unot sa
nataran
nahagba ang lingkoranan

ang mga baboy nanawag kay
wa pay kaon

ang mga manok nangambak
sa labat
nanumbalay sa silingan

kapoy na
wa ko'y labot bisag maunsa pa
kamong tanan

lahi ang ilang kalibotan

sila nga himsog og
hapsay og hingpit
nagkahiusa diha sa
ilang balay
sa ilang lahi usab nga
kalibotan

kita rang duha
walay madungog nga kanaas
sa mga tunob
wala'y agik-ik
sa mga bongbong og sa mga
hagdan
wala'y panghupaw diha sa
bintana

mao sab kini atong kalibotan
manirado
hilom
hinay ang mga lakang
wala'y tinindogan
wala'y liningkoran
walay gipaabot
wala poy padulngan.

ikaw

ang taytayan
gikan dinhi paingon ngadto
mao'y imong
papel nga ikaw
ilang tumban

paglig-on.

walay gana

kaming duha
pareha baya'g padulngan
og mga tuyo
sud ning sakyanan
sa gawas kusog kaayo ang
ulan og hangin
dagkong lusok sa ulan
nagdala og mga dahon
sa tambis sa daplin sa
lapokon nga dalan

mitan-aw siya dapit sa wala
ako dapit sa too
walay tingog
tingog

laing uwat

taas ang iyang sulat
wa na gani nako basaha
pagtiwas

morag nabalaka siya nako
apan ako wala baya.

2010/09/25

Amgo

way silbi ang akong mga mata
niining handuraw
bugti sa akong damgo
gikan sa lawom nga pagkatulog

buta, apan abli alang
sa mga bito-on...

apan gibutyag sa kabuntagon
nga ang ugong sa pagkakaron
maoy katunhayan
nga way pumamilok

2010/09/20

ang mga butang tuod man
naningog tungod sa imong hangyo
lalom ang sa salog
taas ra usab kaayo ang sa kisame
og wala pabanban ang
mga bintana
apan sama sa naandan
og suma sa imong panaghap
walay puangod ang pultahan
nanira kini
og wala kay mabati
bisan na lang gani og gamay

dili usab kini nimo mabasol
kay niadtong adlaw sa tingpahulay
imo man sab god siyang
gisipa.

2010/09/19

panaglalis

pagsulod sa imong katarungan
wala na nako kini tagda
migawas sab ang akong mga
pamaagi aron dili kini nimo kaayo
masabtan

sa panagbangga sa mga rason
nangapungig gayod ang atong mga pagbati

ingon ana na
paabot lang kon maabo na ang mga baga
ayaw wisliki og tubig
kay basin mapuling ka sa mga hinungaw
pagtalikod lang una kay
sulayan nakog ayo ang nahiwi nakong
apapangig

alang kang G.E.

ang nakaparat sa imong kinabuhi
mao nga kini tam-is ra kaayo
nga og sa ngipon pa
dulse kini nga nakaungkat og
daghang lungag.

mao nga ingnon ta ka nga ayaw
pagpaabot nga ako masina niini.

kon sa nobela pa kana
wala kaayo ang kulbahinam busa
dili kaayo lami nga basahon.

mas nindot man god usahay nga
ang bida namatay.
magsakit jud ang imong hunahuna
di ka katulog
di nimo malimtan.

2010/09/15

ang karaang iring
dili na mokiring

ang tinood nga iring
kasabot sa kuting

ang bag-ong iring
gustong mobagting

moawat sa kabaw
motambling og mosayaw

ang tigulang nga iring
nanglimpyo sa kiting

dili na gustong ukbon
ang ikasiyam nga kahon

introvert

kon mogawas ka
hait ang mga kuko sa kahayag

gikawras ka
maong midagan ka

samdan
apan sa pag-abot sa unahan

gamhanan kang
mipaayo sa imong mga samad

mora lag mga abog
nga mitapot sa imong bukton

kon nasayod lang sila
nga mas gamhanan ka kon

mag-inosara
kay sud sa imong lawak

amigo mo ang adlaw
og ang Ginoo misalig sa

imong kahilom sa imong
kaligdong

gani wala'y hikap nila
nga makamantsa

sa imong kaputli
sa imong dungog

2010/09/10

ang iyang langgam nga itom

dunay langgam
itom

taas ang mga kuko
hait
nga morag mga
sanggot


talinis ang sungo
nga morag
ice pick

gaan og lapad
ang iyang mga pako

nagtikuko lamang
sa ilalom sa lasang
di molupad
di mokakha
di mangutkot

hadlokan.

2010/09/05

sa away
dili segurado ang kadaugan
apan
basin puhon og
magmadaugon ta
kay miaway
ta.

sa pakigbisog
daghan ang naparot
apan bisan og wala
na'y makahinumdom
kay nalubong na
silang tanan
sa kapildihon

ang ilang
gidaugan

mao
ang wala pagkaparog sa
ilang diwa

og ang pagkahuman sa
ilang matag adlaw
nga pag-antos

ang dili kampante

misukol mi.

imong tawag namo
mga anay
nga misulay og kutkot
sa dakong
haligi nga yakal.

misukol mi.

nahilom ka
sa dihang bisag
ang mga ngipon
sa anay nangapudpod
apan sige lang
gihapon og kutkot
sa dakong haligi nga
yakal.

misukol lang
gihapon mi.

wala ka modapig
kanamo
nga usa ka man usab
unta sama kanamo
mga anay.

2010/09/03

tughok



ang mantsa sa imong bukobuko
itom
diha nagsugod ang akong pagsabot
sa sayop

didto nako nasugdan
ang paghulma sa bulok sa kalooy
ang pagsagol sa gugma
og buhat

diri ning dapita sa huyang nga bukton
sa dahon
nasabtan ko ang kahulogan sa
kusog

sa ngitngit nga wanang
nasabtan ko ang kalangitan
sa imong pagkahulog gisabot ko
ang kapildihon
og sa dihang ikaw milupad
nasabtan nako
kon nganong nagpatay

silang tanan
aron lang mahimong gawasnon

kamatooran


kitang tanan
kadyot lang ning kalibotan
tayhupon sa hangin
walay mabilin

relasyon

gitagbo ko ang adlaw
gihangop ko niya
ingon ana ming duha
matag adlaw sa semana

usa ka tambag

puti
putli ka
pagpabilin
nga puti
bisan sa
mubong
higayon lang
pagpakaputli
bisan og silang
tanan
nagwanang
sa lapok
milagom
og sa kabaho
giilogan
sa mga lagong

2010/09/02

pangutana

kanus-a lang ba
nahimong tawo
ang iro?

wa sugod
apan paraygon kaayo kini
sa pagtagbo sa
imong pag-abot
mikitiw ang ikog
og mohalok sa
imong tiil
og moambak
aron paggakos kanimo
og molingkod sa
ilalom sa lamesa
diin ikaw nanihapon

kanus-a lang ba
nahimong tawo ang iro?

wala pa ba nimo
kini mabati?

pag-ampo atubangan sa adlaw

sa atubangan
sa adlaw mipiyong
ang mata
aron makita pagbalik
ang pula nga
kalayo diha sa agtang

pagkainit sa
kalayo apang
wala masunog ang
mga hunahuna
bugnaw kaayo ang
mga pulong
gikan sa Pulong
morag usa ka gakos
sa usa ka
pangaliyupo diha
sa usa ka lig-on
nga haligi
sa usa ka Pagtoo

gidayeg sa pag-ampo
ang tag-iya sa
Adlaw
ang tag-iya sa mga
panganod
ang tinubdan sa
kalayo sa
milungtad nga
Pagtoo

kalag ngadto sa lawas

karon nga
nagdaot na ang lawas
misayaw ang
kalag

panahon na alang
sa usa ka
pagkadalisay

karon nga nangalaya
na ang dahon
og nangahulog sa tiilan
sa mga gamot
panahon na sa pag-awit
sa mga pyuos

kalibog sa usa ka tadjao

ang tadjao
nangabre sa iyang
kasingkasing
gustong mapuno
sa hangin
og bisan unsa
aron lang gayod
kini mapuno og
mawala ang
kahaw-ang

misulod ang hangin
apil na ang honghong
og ang
pangaliya
apan nagpabilin gihapon
ang kahaw-ang

miabre sa iyang baba
aron mobungat
og pulong
apan wala'y migawas
bisan na lang gani og
usa ka letra
sa usa ka ngalan
sa iyang gikamingawan

Panginhas dire