6/29/2020

adlaw sa panagbulag

ka cute sa imong anak,
bagay na gyod sa imo
nga mahimong inahan.

unta magmalipayon
ka sa bag-ong chapter
sa imong kinabuhi.

molakaw na ko, pasensya
na, ngita na sab kog
mga bitoon nga sarapon
ug bulan nga kab-oton.

balak sa labod nga englisero

surely, i will miss you,
pero para nako na lang na.
iloum ko na lang, kay dili
jud ka para ako, ako pod
dili para imo.

surely, i will miss you, pero
di sab ko moingon nga 
i love you, ah, oo, nakaingon
ko kadtong naanod ko sa
kalami nimo, pero, i regret
that, because i know, sa
ilalom sa akong dughan,
dili tinood. 

ganahan ko nimo, apan
sa panahon lamang nga sakit
ang akong pus-on, unya 
pagkahuman, when it is over,
yawg kahiubos ha,
morag looron baya ko nimo.

surely i will miss you, pero
diha ra kutob, human niining
gabhiona, alaws na tang duha.
mopalayo ka na, dayon, kadyot
ko rang lingawon ang akong
kaugalingon sa pagtungab sa
beer, o kaha ba tanduay,
smooth na pod ang tanan
sa akong lalamunan.

surely, i will miss you, pero 
i am not designed for your 
forever, neither are you designed
to be forever.

so mao na gyod ni, goodbye, have
a happy life, and asap, we must
forget each other. Imo na tong akong
gihatag nimo, kay ako na sang
kuhaon ang akong kagawasan.

safe at home?

buntag sayo
nag facebook, 
comment comment
hangtod nga
miabot ang
kabuntagon
sayang ang akong
adlaw
nga milabay
wa gani nako
mabati ang iyang
kainit
diri sulod sa
akong bugnaw
nga lawak
nagpaaron aron
nga kuno
safe.

ang walay puangod...

lisod gyod dawaton ang
kamatooran,
maong likaylikayan 
dili gani yubiton ang
ngalan
kon mahimo ipahaluna
na lang sa
kahilom
naa diha, siging naa
diha
apan morag wala.

dili ka katutok niya
kon imong atubangon
sagad na ang imong
pagduko, piyong sa
mata, 
moiyak unta apan
nahurot na
ang mga luha.

busa kon kini 
isulti diha kanimo gikan
sa mga 
himantayon ug walay
kalooy
diha na unya dayon
moabot ang imong
pagkamapasagaron

lain na usang patay nga
hunahuna ang sa menteryo
sa kasingkasing ang
ihaya.

balak alang kang Gigi

dakong kaplastikan ang imong
kunuhay pagkaconcerned sa mga poor and
the oppressed.

sultihi daw kog asa ka karon?
hmm naa ka lang sa sulod sa imong dakong
balay, natulog sa kutson mong katre with
matching tv, watching Netflex hurot tanan
korean telenovella.

kay sakit na ang mata, balik katulog na pod ka.
mata na pod, kuhag snack sa ref, dunken donuts
with matching coke.

tam-is kaayo ang imong kinabuhi, 
dayog sulat
na pod ug balak kabahin sa mga pobre, sa gipamatay
sa syudad nga kunuhay walay hustisya.

wala man ka didto di ba? nahagdaw mo lang kining
tanan sa basa-basa, sa peryodiko, sa fb, sa
news on tv,

dayog sulat na pod ug laing balak, nga kon
ipaduol sa dapog diin giluto ang imong nilat-ang karne sa baka,
 dali ra kaayong masunog,
naa ra man god sa papel ang imong concern
wala sa buhat

sa laing poy at,
kumusta pod diay ang imong
toring garing?

6/24/2020

balak alang sa dakong isda nga midagsa patay sa baybayon sa adlaw ni san juan....

pagkalami baya gayod unta sa
atong kaligo sa baybayon ni adlaw ni
san juan.

linaw ang dagat, asul ang mga panganod.

bugnaw ang tubig, kita ang isda,
puti ang balas, dili init ang adlaw
humot ang hangin gikan sa dahon
sa mga kakahoyan.

hangtod nga miabot ang dakong isda

nga patay nga dunay hikot sa pisi ang liog
putol na ang lawas unya ang iyang
tinae nagkawatakwatak sa daplin
sa dagat.

bata pa nga lumod, budlat na ang mata,

nanghubag sa kabaho,

pagkaputang-ina gayod sa nagpatay kaniya.

tawga si presidente, padugangi ang putang-ina
ipapatay unta ang nagpatay kaniya.

kwaknit

Sa paghalok ko kanimo
abre ang akong mga mata.
gisubay ko ang imong
gibati kanako ikaw nga
nagpiyong samtang nagdula
dula ang atong mga ngabil ug
dila.

nag-abot ang atong mga hunahuna
ugma wala nay damlag sa nipis
kaayo nakong panglantaw

ako ang madudahon kanimo niining
gibati kong kasumo

ikaw kaha ang misalig diha
 sa pagpiyong?
sa kangitngit didto sa imong langit
ako ra kaha kadtong kwaknit sa kiting
nga mikapyot sa tunukon mong
kasingkasing?

6/20/2020

ang atong kalainan

nindot ang dagat
niadtong sabado
busa naligo ko 
wa ka mikuyog

tin-aw ang dagat
dili kaayo init ang
adlaw nga gihapnigan
sa midag-om nga
panganod

naglingkod ka lamang
atubang sa lamesa nga
kawayan, 

mikaway ko aron
pagdani kanimo apan
wala ka nanumbaling
kanako

imong giduko ang imong
ulo, hangtod nga gihagkan
mo ang lamesa nga mora
bag gusto nimog matulog

sayod ko nga nag-iyak ka
na usab kabahin sa atong
kahimtang

didto sa lawom nga dagat
mangayo na ako kanimo
ug pasaylo daan.

wala na akoy mahimo sa
imong kasubo
gihukman mo na ang
imong kaugalingon.

sa akong pagtunga gikan
sa dagat nga karon 
nagsugod na ug balod
ug kalubog tungod sa
kusog nga ulan gikan sa
bukid nga mibaha paingon
sa baba sa dagat

gusto na nako nga putlon
ang tanan.
puslan man nga walay
kapaingnan ang atong
kalainan.

6/17/2020

social distancing

ang imong makita
ang layo lamang
unya mas nindot 
gayod kini kaysa
diha sa imong duol.

busa ayaw kaayo
pagpaduol kanako.
makita mo ang
akong alom, ang
akong ulat, ang 
akong karon ug
ang akong 
kagahapon.

masimhot mo ang
akong baho,
dayon dili ka na
motoo kon ako ba
gayod kini.

gugma

wala kay sulod
wala ka yamo
wala silay makita
nga talagsaon diha
kanimo

apan dunay
ganahan nimo
nga moingon
nga gihigugma
ka niya

wala kay sulod
wala ka yamo
wala silay makita
nga talagsaon diha
kanimo

apan dunay
walay paglubad nga
nahigugma nimo
ako, ug ang Ginoo.

ang kinabuhi sa tawo ug ang iyang kamatayon

sa dihang
namatay na siya
nahugyaw ang
katawhan

unsang kamatayon?
kanus-a? 
maayong tawo
kini siya

daghang mga bulak
ug amot ang 
nangabot

larawan sa nagbangutan
ang byuida
gialirongan sa lima
ka mga anak
ug tulo ka mga apo


daghang halad
ug mga pangadye
naa pay kaon-kaon

pakahuman niini
unsa ba ang sunod?


sundon na kini
sa dakong kalimot
kinsa siya? asa siya?
wala na ang
dugang pang 
pakabana.

nga mora bag
bisan kanus-a
wala ka miabot
niining kalibotana
human sa imong
pagpahawa.

ang kalag

sa kanunay
ang lawas magpaabot
sa lawas

nakita mo ba ang
akong kalag?

sa atong halok
bisag sa makausa lang
ang kalag

mabati nato 
sud sa kasingkasing

ang kalipay daw
bata nga nakasimhot

sa gatas sa totoy sa
iyang inahan.

6/16/2020

ang karon

ang miagi
dili maningil sa karon

ang kaniadto hilom
na lamang
sa paglantaw sa ugma

ang karon
sayang, nganong wala

na gihawiran ang 
bulak, nganong ang

iyang kamot
wala nay pagsalig

sa pahiyom kaniadto
sa kaisog.

sa dihang miingon siya sa kataposan nga "paghilum na diha"

sa sayong kaadlawon
samtang wala pa mawala ang yamog
sa mga kabulakan
miingon ka. " kon ang kinabuhi
moabot na sa punto nga puros
kasakit na lamang,
maayo pag mamatay na lang"

galisod ka paglitok sa pulong nga
"mamatay" tungod kay hadlok ka pa
gihapon niini,

ako kang giingnan, kon ang bulawan
pagasukdon sa kalayo, mao usab
kana ang tawo,

ang agianan paingon sa langit
mosabod gayod sa kasakit
nga kon dili ka makaagi niini
nan, dili makaingon ang Ginoo
nga ikaw na gayod kini

walay pulos ang imong mga 
pangadye, ang imong mga halad,
ang imong mga pangamuyo
kon ikaw anaa lamang naglutaw
sa imong kalipay, 

ang kalipay mga panganod
wala kini mga gamot
sa mga kahoy sa kasakit

kay kon ikaw mahadlok sa
kasakit ug paglutos
ang imong pagkakristyano
wala gayoy pulos.

6/15/2020

ang covid nga balak

lima pa ka tuig
ang paaboton aron kita
makalabang
sa pikas tampi

karon dinhi
gitabonan nako ang atong
mga nawong

nanghugas kita sa
atong mga kamot nga
mora kitag si
poncio pilato sa
bag-ong panahon

gipapili na kita kon
kinsa: si kristo ba o si barabas
kinsa ba ang
imong gipili?

kadtong gaduda 
ug molingi sa mga walay
hinungdan
mamahimong asin
sa hunasan
dayon ang kusog nga
bunok sa ulan
moabot aron kitang tanan
sama sa nilung-ag
pagakislan 
apil na kita
pagahukman

6/13/2020

sanga ug dahon

panahon na sa
pag-bag-o
maoy sulti sa
sanga sa dahon.

dahon nga
wala gayoy pagtagad
sa sanga,
sanga nga siya ray
nahigugma sa
dahon.

busa nangahulog ang
mga dahon
sa sanga nga nagpabilin
sa kahoy.

gipalid sa hangin
paingon sa layo.

ang uban nauga,
nalaya, sa silong sa
sanga,
nga karon
nangudlot na
sa laing panahon...

6/12/2020

paglubong

Sa dagat kadtong hapona
bugnaw na ang panahon,
naghinayhinay na ug tago
ang adlaw sa unahan,
naligo ko, milangoy, 
mipundo sa lalom, mihangad
sa langit, nangita ug bitoon,
miginhawa ug lalom,
gipukaw pagbalik ang 
nagtinapol nga paglaum.
lapad ang dagat, lalom ang
dagat,
diri ko masabwag ang akong
kasakit, diri ko malubong
ang akong kangitngit.

alang kang M.

sa sayong buntag
nanimaho kang abhong
walay hugas ang imong
nawong, pilit pilit pa ang
imong mga pilok,
uga ang imong ngabil,
kalkag pa gani ang imong
buhok nga gukdunon ug
sudlay,
bahong aso nga gikan sa
sugnod nga pakaw ang
imong aping, 
gidalikdik ang imong liog,
katulgon ang imong mga
mata, 
sa tinood lang baho sab
ang imong ginhawa,
apan, ambot, basin mao
na kini ang akong silot,
gusto teka, gihigugma 
ka, nako, 
puno sa kalibog,
kining hunahuna, 
ngano.

6/11/2020

balay gamay sa kalipay

gisulat mo ang mga
walay hinungdan
nagsulat ka nga walay
klarong padulngan
sulat, sulat sulat lang
wala na gani ang kahalang.

wa nimo damha, niining
kalaay, ug kadugay kalit
lang miabot ang kalipay
naghimo ug balay gamay.

alibangbang nga mitugpa sa akong palad

alibangbang nga
mitugpa sa akong palad

wala nako hikapa ang
polbos mong pako

pagkanipis sa imong
mga tiil nga midapat

sa akong panit, kadyot
lang, milupad na usab

palayo kanako, samtang
ako, galipay sa kahilum.

ang imong kamatooran

gikuha ko ang imong
hulagway sa ngitnit nga
lawak nga atong
gikatulgan

init ang maong kagabhion

nabasa sa singot ang atong
lawas

bugnaw gihapon ang imong

mga kamot
kalkag ang imong buhok

gibalikan ko ang maong 

hulagway gipangita ang imong
pahiyom

gi-edit, gani gi filter pa to,

apan wala gayod kini didto.

mga kamatooran sa atong kinabuhi

ang halok
nga naghuhuna nga kining
imong mga ngabil puhon
mahmong gabok nga kahoy,

gakos nga sa kanunay
napatik ang lawas nga
mahimong abo

panaad sa gugmang 
tiunay nga dili kabarog anang
haligi sa kahangtoran

pag-abi-abi sa pag-abot nga
sa dili madugay
mohawa ra usab sa walay
pagpanghid

kitang tanan, hangin ug yamog
kadyot lang, ug lumalabay lamang.


6/08/2020

ang importante buhi...

balikbalikan ko gayod kining
panghitabo,
kabahin sa giap-ap na nga kabo.

daghang mga kahibalo ang akong
mapupo
kabahin sa naughan nga sapa 
sa naputol nga tubig
sa kataposang tulo sa ulan
sa lapokon nga salog sa banyo
nga atong gitindogan

sa akong kabahin, gidawat ko ang
gitay-an na nga mga pagbati
nga dili na madala ug tiltil sa 
tigib sa salapi,

supak na kini sa kabubut-on sa mga
bitoon 
apan ako lang gayod siyang pagabuhaton.

gipukot ko lang ang mahimo kong 
kaagi niini,
kabahin sa pancit nga nanimahong aso
sa dili pa kaayo uga nga gisugnod mong
palwa.

puhon  inig kahinog sa labana nga
gabitay sa sanga
kon hapit na kini mahulog sa yuta
basin masabtan mo ra ang maot kong
gimasa.

karong adlawa wala ko gihandom ang
gugma,
wala na kini kanako, ug wala na usab
kini kanimo.

matod pa sa akong gihigugma kaniadto
ang importante, bisag magkinaunsa pa
mao lang kini: nga buhi pa kita unya
nagkita nga morag wala ra.

karon sa atong panahon
balwala na ang nawala nga tsinelas.
ang nabilin, pasagdan ra
nga nagnganga diha sa hagdan
nga gabok
sa balay nga gianay
sa gibukbok tang mga kasingkasing.

panginahanglan lamang.....

gikan sa bukid
nanimahong abhong ang iyang
aping

morag gikan sa hulaw ang
kauga sa iyang ngabil
nga akong gibisibisan sa 
akong halok

dili gugma ang iyang gipakita
kanako
usa lamang ka bahin kini sa
panginahanglan aron mabuhi

sa kalami unsaon pa ba nako 
pag-ambat ang iyang pag-antos?
ako ang nagpaingon sa langit
siya ang gustong mohawa sa 
iyang impyerno.

6/03/2020

ang igat

lupig sa igat
ang maanyag

pati na gani
ang maalamon

lupig sa igat
ang asawa

nakuha man
niya ang iyang
bana.

wa damha

wa damha nga
ang igat ug ang bayot
nagkaminyoay

ug sila namuyo nga
hamogaway
piskay, sa tanang butang
ug panghitabo
silang duha baya 
nagkasinabot.

pisot

gahapon
sayo sa hapon


dunay duha ka
manunulat nga

nagpataasay
sa ilang ihi 

gustong
abton ang
langit


mugbog mga
oten 
pisot ga gyod.

katulog na lang....

ang pagpamalak
man god
usa ka pagsalom sa
suba
dayon pauyonuyon
ka lamang
sa iyang sulog
nga wala kay gihawiran
bisan gani ang
imong dunggan

mamati ka lamang
mobati ka lamang
mahimo ganing imo
sang tilawan
diha sa kagawasan

ang akong sayop
mao nga ako misangyaw
na man hinoon
sa mga isda ug mga bato
sa lumot ug sa
mga nanglutaw didto

ayaw pamilosopiya
ayaw pagsangyaw
kon dili mo mapugngan
kawas diha sa suba
pag-ilis sa imong sinina

bulad sa adlaw
diha sa ibabaw sa bato
higda, 

katulog.

walay depression

si tatay
anad na gayod anang
gitawag tag
kanunay

kanang kamaong
motultol sa
naandan

busa sayo sa
buntag
ilatag ang banag
ug buyot nga buslot
aron iyang hulipan

ibulad ang humay
kon init na ang
adlaw
didto sa gamayng
hawanan sa among
balay

inig ka hapon
hiposon ang tanan

manihapon kaming
tanan
dungan
bahin sa inun-onang
palotpot
sa hiwa sa adobong
baboy
sa sawsawan nga
una sa ginamos

dayon latag na usab
sa buslot nga banig
sa buslot nga buyot
aron pagahulipan

nahunahunaan ko
karon nganong sa ilang
panahon
wala ang hikog
wala ang praning
wala ang buang
wala ang punayg hisgot
anang depresyon

wala gani seguro 
kahibalo si tatay ug nanay
kon unsa ang depression

daghang buluhaton
lawog sa baboy
tugway sa kabaw
patuka sa manok
punit sa itlog sa mga
bebe didto sa kurungan
mananom ug saging
utanon, 
maglana ug lubi
magtiratira
tam-os ug tubo
manguhag buongon


magdaro sa uma
manglimas sa sapa
mamukot ug lambay
manakop pa gani
ug sawa
o halo ba kaha

asa ba ang depression
adtong panahona?

si duane sa among
panahon
naghisgot lagig 
depression

nadunggan ni uyoan
nga usa usab sa mga
karaan, gitubag:

"depresyon,depresyon,
adto kas bukid,
pagdaro didto,
lantawon tag 
madutlan ka ba
anang imong
depresyon depresyon"

nakapanglingo ko,
pagkasayon diay
sa kinaraan, ug sa ilang
nasunod ug sa ilang
naandan....

top secret

adunay
imong gitipigan
nga dalhon mo
sa lubnganan

bisan gani
ang mga ulod 
didto
dili mo tug-anan

mao usab
kana ang gitugon
nimo 
sa imong inahan

mao usab kana
ang pahimangno
sa imong amahan


ang imong lolo
nga giilad sa iyang
batan-on nga
uyab
mao usab ang iyang
kataposang
ukab.


pangutana sa asawa nga gamatag buntag sa iyang bana

nanagbo
ka sa baybayon
ning sayong
kaadlawon
pagkadaghan
diay kuno sa
mga isda karon
apan nganong
bisag usa na lang
ka isda sa mala
wala ka 
may dala?

6/02/2020

kanang imong gugmang giatay

dawata ang kamatooran
nga kon siya papilion sa kugmo
o ikaw,
kugmo iyang pilion.

dawata ang iyang sagpa nga
bisan sakit
sa imong aping, lamia lang
gihapon sa imong
kasingkasing.

magul-anon

ikaw nga siging
gahunahuna ug kaguol

wala na kabantay sa
pagbatog sa tamsi

diha sa kilid sa imong
bentana
wala kadungog sa iyang
awit sa kabuntagon

sa dihang gibasa namo ang imong clean and funny jokes

kon nalingaw man ugaling
si Anna
labaw sab kong nalingaw

sa nindot nga kagabhion samtang
gibasa namo ang imong
mga sugilon nga pakatawa....

kurikuri

miaw-aw daw ang iro sa
sayong nga kahoy

dili kaha ang sayop nga
iro ang miaw-aw sa sakto
nga kahoy?

o dila ba usab kaha sayop
ang nagsulat kabahin sa
tinood nga iro ug sakto
nga kahoy?

basin pod nga ang iro sakto
apan sayop lang ang iyang
aw-aw o dili ba kaha nga
tinood ang kahoy apan bakak
ang iro, o dili ba kaha nga
kining tanan puros dili tinood
apan dili usab bakak?

respeto lang gyod

mahimo man nga
ang iring ug iro 
magpuyo sa usa
ka balay nga
walay away....

nahimo usab kini
sa iring ngadto sa
bagtok....

daghang bana ug
asawa nga iring ug iro
bagtok ug iring, 
nagpuyo sa usa ka 
balay
nga walay away

kay lagi bisag wala
na ang gugma
ana pa gihapon ang
pagrespetohay.

kadenang bulak

nakahunahuna ko karon
kabahin ninyong duha
isip balak-kadena
karong adlawa nga gipakatawo ka
karong adlawa usab ang pagpanaw niya.
kon asa siya natapos maoy imong pagsugod
kon asa ka misiga siya usab napalong
kon kanus-a ka miabot mao usab ang
paghawa niya
 nindot ang maong kadena
dili puthaw kon dili puti nga bulak....