1/30/2020

bato

ang mga buwak 
sa gugma ania sa imong dughan
gihambin

bug-at pas puthaw ang
iyang kahumot
gusto nimong iyagyag
apan bato man 
ang imong
gihalaran

ang mas lisod

sa tinood lang
mas ganahan kang mosayaw
nga ikaw lang usa

o mokanta nga ikaw lang ang
nakadungog

sayon pod gani ang
mobalak nga ikaw lang
mamati sa imong
kaugalingong tingog

apan diri ko naglisod:
kanang ako lang ang
nahigugma
unya ang akong gihigugma
walay gibati diri nako
wala kabantay
wala kahibalo bisag
ania ra ako sa iyang
atubangan
nagpahiyom.

1/25/2020

pagpalabay lamang sa usa ka panahon

human sa nahitabo
gisulat mo ang dili
mo kunuhay
makalimtan

midangop ka sa balak
gihangop mo kini
ikaw diha sa kalipay
nga wala milungtad

gisulat mo: bisan gamay
lamang nga
kalipay basta kalipay
dili gyod makahupay
sa kauhaw sa kagutom nga
magpabilin

kadtong imong gihangop
nga balak
kadtong imong gigakos
nga kalipay
atua nakigtabi sa iyang
mga katropa

wala ka sa iyang hunahuna
labi nga wala ka sa iyang
kasingkasing

gihangop ang bag-ong
putahe, ang bag-ong imnonon
giwaldas ang iyang
kaugalingon

kay kini ug kadto 
o bisan ikaw wala sa damgo.
wala sa ugma
ug labi na nga wala sa
iyang pagkakaron....

sa parke ni rizal

ingon ka
didto sa imnanan
nga mas
lami ang
kinawatkawat

kanang gadali
dali kanunay
aron dili 
masakpan.

mahimong
sa pipila lamang
ka panahon
lami ang kawat
kawat
nga dili 
masakpan

o bisan dili
gayod masakpan
apan nasina
ka gihapon
sa mga dayag

sa mga miabot
nga nagpahiyom
naglantaway
sa ilang duha ka
nawong
nga naghawiray
sa ilang mga
kamot
nga naghalok
sa atong
atubangan

didto dapit
 sa parke
ni Rizal.

maanyag

ikaw
atubangan
sa samin,
galingkod
nanghinambid.
mitutuk
natuok sa
kahapdos.
nanigarilyo
nagpabulhot
sa imong 
nawong nga
wala 
bisan gamay
kunot sa usa
ka disturbo.

mas lig-on
ang atua sa
samin
kaysa nanamin.

maanyag ang
tua sa likod
nga nagpunit
sa iyang
gihulog didto
sa salog
kaganiha lamang.

pagbati

ikaw ug ako, mao ra
mihatag sa gugma
nabuhi sa gugma apan
ikaw ug ako mao ra
usab ang gisakit sa
gugma, nga wala na
magpakita kon gisakit 
ba. Dili moiyak kon 
biyaan. Dili na usab
mokatawa kon hatagan.
mangutana siya kon
nakalipay ba siya 
karon kanimo? ikaw nga
nagpaabot ug dugay.
Siya nga miabot 
apan sayod ka nga
pipila lang ka oras 
ang siging mabilin.
sa iyang halok 
nakatubag ka sulod
sa imong hunahuna,
sa usa ka patay nga
iro, unsa bay mabati
sa tugpa sa daghang
mga langaw?

1/21/2020

kamatooran

nindot ang sulod sa imong dughan
morag buwak nga maoy pay pagkabuswak
sa ilalom sa adlaw sa kabuntagon

gibati ko kini pila na ka adlaw ang milabay
gidamgo ko pa kini sa akong kagabhion

daghang gidili kining kalibotana, daghan ang
ilang gihimong kataw-anan, busa mitago ka
sa halayong lugar, sa ilalom sa kakahoyan
kuyog sa mga libgos ug mga alindanaw

kon mobalik ka diri kanako, palihog ayaw
ako ug pasakiti, kay basin ug dili na nako
maantos pa ang imong kaanindot....

1/14/2020

malipayon ka man kaha?

abi mo
gibati ko baya opod ang imong
kalisod

sa imong edad nga bente
bisag dili ta ka ganahang magminyo
apan unsaon ta man nga
naburos na man nang imong
uyab ug tulo ka bulan

di ba giingnan ta ka
nga unta makamao kang moamping
anang imong kaulag?

karon mopahawa ka na
moundang isip katabang ning among
panimalay

hadlok kag takbason sa amahan
sa imong naburosan nga
taga Femagas, diin gidungog nga
hideout sa mga dili ingon nato

wa na mi mahimo sa
imong mga damgo
nga mohuman sa imong pagtoon

bisag pabalonan ka pa
namo ug daghang kwarta igo igo
sa imong pamalaye, kasal, 
panganak puhon sa imong
asawa, apil na gani ang
bunyag puhon
na, makita ko ra gihapon sa akong
bulang kristal nga didto sa
layo ug baga nga lasang
mora gyod kag si tarzan
nga wala nay bagon nga
kapyotan

lisod ang kinabuhi sa bukid
labi na ang sa lasang
gikan ka na didto
karon mobalik ka didto
pag-usab

apan sagdi lang,
matod mo, malipayon ka man kaha,
maong, ok lang,
karon wala ka na sa among poder,
bahala ka na sa imong kinabuhi,

malipayon ka man kaha?

bisdak

kon dunay ma-slide sa panit sa saging
unya maayo kaayong pagkapandol dayon
nabusdak ang sampot sa lapokon nga dalan
mokatawa ang nakakita apil sab katawa 
ang hingtundan

sisteng bisdak gyod ba, sama ra sab sa pagbuto
sa Taal dayon tanan naulanan sa abo gikan sa
bulkan nga nag-alburoto

kitang mga bisdak nagsigig pasiaw kay lagi nasuko ang taal kay sigig sayaw sa tala si inday gamay

samtang atua ang mga taga-taal nagubot intawon
durong pamakwit sa kalisang hangtod nga nabyaan ang mga kabtangan, ang ilang balay ug ang kahayopan, sama sa duha ka iro nga namentana intawon sa labat naglibog kon unsay buhaton

bisdak man ugaling ko, makakita sigig unsay kataw-anan sa atong kalisod, apan karon sa hulagway sa mga iro, sa mga bata, sa mga kalubian, na, morag di sa gyod ko mokatawa karong higayona.

karong gabhiona, dili gyod ko makatulog
nabalaka sa duha ka iro, duna kahay mipunit nila didto sa daghang abo ug sa tumang kangitngit?

bahin kaniya

sa dihang nahatag mo na ang
tanan
lahi na ang iyang tinagdan

sa wala pa kadto
ang iyang pahiyom tam-is pa
kaayo

apan sa dihang nakuha na
niya ang iyang gusto
mora na siyag nawong sa
tunukon nga tuyom....

atikan

kana bang nakaatik ka
nga ang hinog ra nga mangga
ang giapas niya nimo unya
paingon ingon pa siyag 
kumusta ka?

patipas gamay ang siplat
sa hinog nga mangga dayon 
padayon ug ingon nga ganahan
kaayo siya sa imong
pinahapay karon....

1/12/2020

anayon

nakita ko ang
baboy nga nag-ungad sa
yuta libot sa punoan sa
makopa nga daghan ug
mga hinog nga bunga,

nakita ko ang iyang
kalipay nga milunang
sa lapok dayon niyag
hapnig sa iyang walo
ka totoy tupad sa iyang
mga baktin....

sa kasingkasing......

sa imong kalibotan
papason mo ako

sa akong kalibotan
gisulat ko ikaw

adunay mopahawa
apan sa kanunay adunay

magpabilin, adunay
papaon apan sa kanunay

adunay mapatik, sa 
panit  ba kini

o sa tubig, o kaha ba
sa balas, o kaha ba sa 

kahoy, o kaha ba sa
akong kasingkasing.....

1/11/2020

walay duha duha

way duhaduha
gilood ka apan 
gidawat mo ang
kinabuhi

kasukaon ka apan
gihilothilot mo aron
walay mausik

magsuka ka man
kabuhion man
apan padayon ang
ginhawa

ang kinabuhi
ang kinabuhi
unsaon ba ang
pagputol niini?

sakto ka
padayon padayon ang
pagpakabuhi

magsuka ka man
karon
ugma imo kining
tunlon


ms chin chan cheng

nangandam na si miss
chin chan cheng alang sa 
umaabot nga chinese new year

gipikot ang mga mata
gibangs ang buhok
gilinyahan ang kilay aron
maalaan siya nga 
usa ka insik

dako ang mata gamay kita
mao kana ang
kanunay nga nahitabo kaniya

makalooy baya gayod kining
siging kapusoy....

kaban nga dughan

Tungod nimo
gisulat ko ang ubay ubay na
usab nga balak

dili ako matingala nganong
ikaw ang ilang anaa sa ilang
mga pangutana

dili kabahin sa mga balak
sa sulod niini
sama sa kasingkasing nga
anaa nangitag ginhawa sa
kaban nga dughan

alang kang M.

moabot ra ang panahon
nga manampiling usab ako
diha sa bentana sa imong
balay

wala panumbalinga ang mga
bitoon nga masihag sa nasiak nga
kahoy diin gikan ang gipalid nga
nipa 

sa atop sa imong balay
nga wala na nimo panumbalinga
kay imo na man kining biyaan....

1/05/2020

spontaneity

gusto lang god nako
ang kini ug kana
ang karon dili unya.

kon unsa ang naa
sa hunahuna o
sa kasingkasing ba
kaha
sa karon ug dili unya
mao na kana.

way pasakitay

naay pakigsandurot
nga walay labot ang
kasingkasing

ania ang pagkatalawan
nga masakitan
ang paglikay sa husga
nga ikaw buang

magtalikdanay lang kita
managlahi ang tumong
og ang direksyon
ako sa too, ikaw sa wala
paingon ka sa dagat 
ako paingon sa bukid


anaa

anaa sa dughan
ang paglaom nga
moabot ang panahon
sa pagpanudya
anaa diha ang pagtoo
nga walay daotan
nga molungtan bisan
gani ang kaayo
anaa ang pagsalig
nga ang maayong
binuhatan
anaa ra gayod ang
bugtin sa mga bantang.

naay dugay na nga
nagpaabot
nga unta ikaw 
magabaan....

duha

duha lang
ang kapaingnan
niining tanan
diha sa paghunat
taman-taman

nagkadugay
nagkalami apan
sa laing bahin
nagkadugay
naa sab ang 
pagkalas-ay

1/04/2020

paghinumdom sa usa ka bata nga nawala didto sa simbahan

tungod lagi kay
naanad ka man
sa mga itoy

diha sa nagpalibot
nimong mga iro
sa balay nga gakiang

sa dihang nawala ang
maong bata nga bag-o
pang nakakat-on
sa paglakaw 

niadtong nagluhod ka
sa simbahan
nangaliya kang 
Santa Maria

naunsa bang nakalingi
ka man kaniya dayon
nimog tukoy tukoy 
nga mora kinig itoy aron
ka niya duolon ug unya
hagkan sama sa usa
ka inahan.....

sukad kaniadto

gikan kaniadto
dili na siya dali motoo sa
mga manulunda

o kadtong nagwali 
kunuhay sa pulong sa Dios
nga sa  matag kaadlawon
nag prusisyon nangadye
sa imahin ni Jesus

kay usa ka gabii niana
samtang nahubog siya
sa kakapoy
nahikatulog tupad
sa maong magwawale
mao na lamang ang iyang
nabantayan nga
nanimahong langto ang 
iyang pantalon
sa zipper nga nagnganga
sa ganghaan sa
langit.....

dinhing dapita

ang nakaanindot dinhing dapita
mao ang kahilom.
anaa ang mga sinabotan
nga kon unsa man ugaling
ang panghitabo dinhi

didto ba sa katre o sa pantawan
sa silong sa balay o sa ibabaw sa atop

dili gayod ipanugilon kang bisan kinsa
kay matod pa ang kalipay dili ikapanangpit
dili sab ikapanugid

busa ikaw ug ako gibugkos man ugaling
sa mga gakos sa kalipay
kon adunay mangutana ang tubag mao
lamang ang pahiyom

kon adunay mangutana ngano o kinsa
pilay edad o asang dapita o kon maayo ba
siya modala sa paghawid sa hawak
o paghaploy sa buhok ang mga tubag niini
anaa lang gihapon sa usa ka pahiyom

tan-aw nga tulikibon 
tutok nga sama sa laylay sa hunas sa dagat
o mata sa dalaga nga katulgon

sama sa kanunay ang mga tubag niini
mao lang gayod ang pahiyom
dayon kadtong nakatugkad niini 
mobalos usab dayon sa pahiyom dayog
hagit sa usa ka tagay, 
pingki sa baso, hisgot ug laing kalipay
sulod sa bugnaw nga balay....