2015/05/31

diha sa iyang pag-usob sa iyang hukom

dili ko katoo
sa iyang baroganan

kalit lang niyang
giusob ang tanan

human kunuhay sa
makuting pagtoon

ang kutoon iyang
gisilotan

mibaga ang kuto
misulod sa iyang lawak

ang kahadlok banggiitan
giusob dayon niya ang
iyang baroganan

morag linti
walay sala ang hingtungdan

nalisang ko
ngano? ngano kaha?

kwartahan kaha ang
ang sa kuto tag-iyahan?

sa iyang pagdapit diha sa kapait.

sa imong pagsulat sa matag adlaw
wala nimo lantawa ang kalay-on
(ang kalaay lamang ang ania
naghay-ad sa katre dili papiri)

naunsa na kaha ang toreng garing?
nadakpan na kaha ang unggoy ni Basing?
alingogngog pa gihapon si Tarsing
palaiyak gihapon ang anak ni Koring
kini ang linya sa mga naturiring
nga siging gusto ang pakariling.....

gisilhig na usab ang mga layang dahon sa
kagahapon
gitapok sa dakong buho gisunog og ang
aso niini kampante ka sa pagtoo nga
gidawat na kini sa ganghaan sa langit

miabot ang panahon sa pagpanudya
gipalapos lang nimo sa pikas dalunggan
ang nahibilin nga adunay katam-is
wa nimo gikalis, imong giipis aron 
unya itistis sa kopang hamis.

usahay makaingon ko nga gamhanan 
baya ang kamingaw nga sa iyang pagsalimuang
makamao kining maghimo ug sakit
isip pagdapit nga ikaw makapang-it 
og makadaklit sa iyang pagdapit diha sa kapait.

ang gibati sa batang gipangga ni nanay

giduyan mo
ang bata

gibati niya kon
unsa ang pako nga
hiniktan og
pisi

gisapnay mo siya
pagkahuman
gibati niya ang
kamot nga duyan

wala ang kahadlok
nahikatulog ang bata
takyop ang pako sa
anghel sa dughan
ni nanay


ang tapolan sa pasay

buntag sayo
walay kisaw ang
kusina

usa ka 
blankong papel
ang lamesa

nakatulog pa ang
mantika sa 
baboy

ang kalaha gasinaw
sa kahayag sa adlaw
nga misutoy gikan
sa buho sa bintana

wa ko kaantos
gibuak ko ang itlog
giprito sa init nga
mantika
didto sa kahang
akong gipahaluna
sa bag-ong
gadilaab nga
kalayo

akong kanta akong
sayaw karon dinhing
dapita

sa dihang mibangon
ang babayeng nagpuyo
dinhi
nga wala pay panghilam-os
o panghimuta

sa dihang mitak-ang
siya sa lamesa
miinom sa kape
mikaon sa pandesal
nga gisuksukan sa
piniritong sunny-side up
nga itlong
maoy iyang giingon kini:

"kuya, napanaginipan
ko pa rin siya,
mahal pa kaya niya
ako?"

sud sa akong dughan
naay pulong nga dili 
nako malitok: " shit shit
shit!"

2015/05/30

lahi sab

ganahan sab ko
aning akong amigo

estorya estorya lang
pakatawa gamay
sumpay sumpay sa
tinae sa hisgotanan

wa may kape
wa say pan

naglawig ang buntag
sa kagutom

2015/05/29

balos lang

ingon ka Nay
mas maayo unta kon nagminyo
kog sama lamang sa akong 
kahimtang,

wa ko mitoo, kay lagi sa akong
pagbati
gugma man ang gipalabi,

human sa pipila ka tuig
nakaingon ko Nay
sakto ka,

kay ang bahandianon bisan
unsaon
mosabod gihapon diha sa lit-ag
sa ilang bahandi

apil na ang mga mabaw nga
sapa 
nga utok sa mga himantayon,
kay sa kanunay ako lang gihapon
ang naulawan

bisan pa og ang akong palad
napahak na
bisan pag ang akong bulsa
nasunog na

ako lang gihapon ang kabus
alang kanila
ako lang gihapon ang gihisgotan
gikan sa kabuntagon hangtod na
kana sa kaadlawon

dili diay makita ang bulak sa gugma
sa lasang
sa tungatunga sa tunukon nga 
dalan
sa baga nga kakugnan

karon Nay, napul-an na ako sa
pagsagang
mibaga ang akong kubal
nalig-on sab ang akong kabukugan
makamao na akong mosakay
ug mosipa sa mga nanghilabot
kanako

aduna na akoy akong baroto
og sa matag adlaw ako ang nagbuot sa 
kadak-on sa akong layag
sa kalig-on sa akong katig
unya kining akong panaw 
akong panaw kini

gisugdan ko paglitok ang pulong
sa mga mabiaybiayon
gitugpo ko kanila ang ilang
ngil-ad nga mga larawan

abi mo Nay, sa kadugay sa panahon
makat-on ra pod diay ang tawo


makamao na sab kong mobiaybiay
mohatag na usab ako sa listahan
sa mga dili angayan

ang mga matapobre Nay
ako sang giluba sa akong hait
nga salabotan

2015/05/28

ang mga kalipay usab atong ginakamang

sama sa puting bugas og
mga tipasing humay
pilion gayod nato ang
nindot dayog labay sa
mga ngil-ad,

ingon ana ang arte sa
pagsulat,
ang akong ipakita kanimo
kadtong makalipay
lamang

sa laing bahin ang mga
makasakit gihinayhinayag
lubong sa likod sa balay
sa dakong buho nga akong
gihimo

wad-on ang baho og 
maot
gakson ang mga humot
og nindot

kay wala kita mabuhi
diha sa pag-antos lamang
ang mga kalipay usab
atong ginakamang

paghinumdom

kagahapon
didto sa baybayon
nakita nako ang babayeng
puti na ug buhok
nagkalo ug binulakan
nagputi og sinina
dayon ang iyang pahiyom
hilaw
unya hinay kini kaayong
milakaw gikan sa 
payag paingon sa
punoan sa 
talisay

mipasilong dayog
pamaypay

sa dihang nag-atubang na
ming duha
nakita nako ang nawong
ni nanay

sud sa akong dughan
adunay karaang sapa
atoa ang puti nga isda
og ang asul nga tikarol
nga milupa
dayog dagit sa isda

kalit ang panghitabo
nawa ang tikarol og isda
nahanaw sab ang sapa
apan ang haganas sa tubig
sa dihang natangag na ang
puting isda sa sungo sa
asul nga tikarol
nagpabilin lang gihapon
sa akong 
lapoy nga kasingkasing

BITOON BEACH, SIBUTAD

kadtong usa ka plato nga
bakasing paksiw og usa ka 
tarong saang

sa kanunay mobalik kanako
ang Bitoon

daplin sa dagat nga lunhaw
ang akong mga tiil mobati sa
kahamis sa gagmayng bato sa
ilalom tupad ang mga 
pulang koral ang asul usab
nga mga isda sa
bato nga mibag-id sa ilang
ikog sa akong paa og
bitiis....

larawan

gihawiran ni
eduard roditi ang iyang
nawong
nga medyo kunot na

gibati nako 
ako nga nagtan-aw ang
laya nga dahon 
sa banaba

ang aping mibati
sa kamot
ni eduard og sa
tanang
gahom gisulat niya
pagbalik ang
kalahian sa walang
kamot.....

panaw sa kasubo

nindot subayon ang panaw
sa imong kahiubos gikan sa imong
ngabil
paingon sa imong aping nga 
mikandiis sa 
pahiyom hangtod nga kini miabot
sa isla sa katawa
sa galaray mong mga ngipon
hangtod sa utlanan sa
imong alingagngag nga
pula sama sa usa ka gumamela

wala lang....

di ko ikaw
kaaway
apan di sab
ko nimo
matawag nga
higala

dili ka
makapakatawa
kanako
dili usab ikaw
ang akong
kasubo

usa ka sa mga
tawong akong
malabyan
sa dalan paingon
sa simbahan
og sa taboan

ikaw ang akong
gitawag nga
wala lang.....

lugod

kon maghisgot kag
lugod
mahibalik akos
akong mga
dalikdik

apil na kadtong dili
nako makab-ot sa akong
likod

kon moabot na gani kos
hisgotanan kabahin sa
akong likod

mahibalik akos usa ka
pahiyom
kaniadto

sa usa ka kalami
nga dili nako ikapanangpit

og dili na usab nako
ikapanugilon

oslob, mayo 25, 2012

ang luwag
malipayon diha
sa iyang sab-itanan
sa banggera
ang iyang suruyanan
ang kalaha
nga gilutoan sa
halaya
sa laing bahin
wala magdahom ang
kasili nga taas og
ikog
og dunay tinagoan
nga lala
nga silang duha
magkita diha
sa lamesa sa usa
ka baratohon nga
carinderia didto sa
oslob

sa panas nga yuta tig-a na usab

gidapit ko ang
tabian
sa usa ka salusalo
sa usa ka
kahaponon

ang akong papel
mao lamang ang
pagpamati sagol ang
pagtunol kaniya sa
laing mga pangutana
aron magpadayon ang
iyang pagsugid
sa wala pa nako
mahibaw-i

nagpadayon ang
iyang pagbuga
samtang ako nahimong
usa ka mangingisda
nga miladlad sa akong
pukot
aron makakuha sa 
kinalamiang isda sa
dagat nga asgad

pagkadaghan diay 
sa akong kangitngit
pagkadako diay sa
kahayag

pagkalayo diay nako
sa kalibotan
ako ang nalisang
nganong ako nagpakabitoon

magpatihulog ako
masunog sa maong panaw
mag-aso
ug inig abot sa yuta
mahimong usa sa mga bato
sa panas nga yuta
tig-a na usab

ang balak nga wala nako mahuman gahapon

nagbalik balik ang pangutana
wala sab usba ang tubag
asa ka karon? diin ka gikan?
unsay imong gihimo?

dia ko dinhi. gikan kos
kaniadto. gisuginlan mo ako.

naglunos siya, daling makalimot.
nagkawala ang unod. nagpatim-aw
na ang bukog

tagai kog singkwenta pesos
ininit tubig
dulse

pauli kos balay
sakit akong kutokuto
pait ang akong baba

nawa na ang kahayag nga
kaniadto mao ang manulunda
sa among kangitngit

misalop na ang adlaw
ang bagag nawong nga pulis
mitutok

sa akong kabahin
gisud-ong ko usab ang akong umaabot
milantaw kos pulis
sa usa ka kapungot

nga dili nako ikasulti kaniya
mosalop na usab ang iyang adlaw
aron dili siya mahadlok
nagpalit siyag yuta
iya kining balayan
ang iyang katarungan
mao na usab ang iyang mga apo
sa tuhod

napalong ang kahayag
nangawala ming tanan

2015/05/26

tiguwang

puti nga babaye
bigot og lubot
pagkapook sa 
short
pagkabundo sa
bahandi

pasagdi lang
lantaw lang

ayaw panaway
ikaw, tiguwang
ayaw pagmahay
sa mitulo kong laway

kalainan

pagkaaslom 
sa imong pahiyom
pagkapait
sa imong kinabuhi
pagkamabaw
sa among kalipay
pagkagaan
busa kami milutaw

2015/05/25

si linda og samuel, mga katabang

si linda
usa ka katabang
si samuel
laing katabang
sa among
panimalay

mubo lang ang
ilang langit

mabaw lang
ang ilang kalipay

ang ilang paraiso
gimugna nila

didto sa kamalig
likod sa

gikamadang 
binakid nga
humay

giingkib ni linda
ang hinog nga 
bayabas

nga gitunol ni
samuel

sa pako sa kagawasan

ang kapait
dili lamang anaa sa kapait

sa tam-is mo kunuhayng 
pahiyom
sud sa imong alingagngag
anaa ang
kapait sa imong
kinabuhi

ang kabug-aton dili diha
sa dagkong mga bato
anaa usab kini sa 
kapakyas

mas bug-at ang dili makita
ang dili mataral

kon maglakaw kita paingon
sa plaza
kinsa bay magdahom nga 
wala kitay tinood nga
direksyon?

pagkaanindot sa imong buhok
pagkagubot diay sa imong utok

pagkaputi sa imong pamanit
pagkaitom ba diay sa imong tanlag

pagkakusog sa imong buhakhak
dungog kaayo ang imong layo nga katawa
dili nako makita ang luha nga nahulog
sa tugas nga salog

gidawat sa kasing-kasing ang tanan
sa iyang kamot nga balaan
pagkagaan, pagkagaan
diay kining maglupad kita
sa pako sa kagawasan

matapos na ang kalibotan

sa bisan kinsang
gasubo nga akong ikahinagbo

kanunay kong gipanghambog
ayaw padala niana
pilia pilia gayod ang kalipay

maglipay ta maoy akong ingon
itagay ang tuba
ihukad ang mga sinugbang
baboy
ilamog na ang tulo ka itlog
sa tuba nga gikutawan sa
init nga sikwate

imnon na nato ang kinutil
magtagay ta
ikaw ug ako kitang tanan
mga silingan

adunay gitagong kasubo ang
dughan
nga sa mata 
nagtukawtukaw

maglipay tang tanan
kay ugma, kanang ugma
matapos na ang kalibotan

sa bisan kinsang gasubo
usa lang ang paglaum
ugma, ugma matapos na
ang kalibotan

kon nasayod ka lamang

ang buyog kanunay
nga misimsim sa nektar
sa kabulakan

wa kini miundang kay
ang iyang pagkauhaw
walay pagkatagbaw

ang iyang kauhaw kauhaw
sa tanan
way pagkahuman
kay ang iyang nektar
nektar man sa tanan

2015/05/24

wa ko masayod kon asa.

ang salog sa atong balay
kawayan.
nagsugod kining walay
pangag.
dili lang kay nindot lantawon.
nagpakita kinig kalig-on
busa ang atong mga tiil
kon motunob 
walay kahadlok.

usa ka adlaw niana
napangag kini unya gusto
nakong ayohon

miingon ka, ayaw.
pasagdi ang mga salog
nga mangapangag

miingon kag dugang
kining balaya kawayan lamang
pasagdi siya nga maguba
sa iyang kaugalingong panahon

kining balaya abtanan lamang
nato samtang ania pa kita
apan sayod ka, pagkaugma
biyaan na nato kini

busa gipasagdan nato ang 
pagkapangag sa salog
hangtod nga ang atong mga tiil
naanad na usab sa kahadlok

ug tuod man
ang salog nga kawayan
nahimong salog nga yuta

diin anaa ang gilubong
ang ugma, ang kagahapon
nga napuno sa kahaw-ang

karon mobiya na usab ako
wa ko masayod kon asa.

ang tiglawog sa ting-init



gibutang nako ang paya 
nga puno og tubig diha tupad  
sa punoan sa mahogany

sa kilid sa paya mao 
ang mga mumho sa bahaw 
nga salin sa mga iro

mahimong mosunod 
ang mga iring nga walay 
pinuy-anan

ug dayon mahimo pod 
mosunod ang mga langgam
nga walay nag-atiman

kahayahay dinhi sa veranda
samtang gilantaw nako
ang giambit kong kalipay

gani ang imong ngalan wala na usab sa among listahan sa pagkaugmang sukad sa laing pamahaw

gisulayan ka nako og tudlo kon unsay
angayng buhaton

sama sa akong giingon ikaw ang
mopanaw sulod sa imong dughan
ikaw ang maghimo og sakayan og layag
imong paminawon ang hunghong sa hangin
imong bation ang giyagyag sa mga balod
sa kinabuhi
alang kanimo

daghan ka na ug gikuha kanako pinaagi sa dayag nimong
mga bakak
gabalik-balik ang mga pasalig
nga sa akong pagpakahilom gipalapos lang usab nako
sa pikas dunggan

gikan na ako sa maong panaw
og ang kinabuhi mismo ang nagtudlo kanako
kay patay na man ang akong
mga ginikanan

karon kay di ka man motoo
ang kinabuhi na usab mismo ang magtudlo kanimo kon unsaon

pahimangnoan ko ikaw nga ang kinabuhi isip usa ka magtutudlo
dili sama kanako

masakitan ka apan dili kini panumbalingon sa kinabuhi
kon dimalason
(maayo unta og dili lang kini mahitabo)
ang kinabuhi na mismo ang mokuha sa kinabuhi nga gitugyan diha kanimo

ang among makita mao na lamang ang imong kataposan
manghilak kami
apan ang kinabuhi walay luha
human niyag kuha kanimo
dili gani kini motingog

kay ang iyaha iyaha gayod
dili kini para imo

wala ka man god gihapon makat-on
nagpabilin ka pa man gayod diha sa salag
sa imong pagkabakakon

dili gani moabot ang kwarenta dias
mosibog na usab kami
sakay sa among baroto
og inig abot sa among kagabhion
papason na usab dayon namo
ang imong ngalan

ang imong bitoon sa langit
mawala na usab
ang bulan magpadayon sa iyang paglawig
og dili ka namo mahisgotan
gani ang imong ngalan
wala na usab sa among listahan
sa pagkaugmang sukad sa laing
pamahaw

sa makausa pa

sa lima ka adlaw
nga panaw
ang mga letra nga nahibilin
nakaligo

sa daghang abog
nga midikit og dili na gustong
mobiya

ang mga hunahan
anaa gilawaan

makalolooy ang kahimtang
sa mga pulong nga nauga diha
sa hangin

usa ka adlaw sa akong 
pag-abot 
likiton ko ang hangin
iputos ko sa pulong

ang mga letra 
pagatrapohan aron nga sa sunod
nimong gamit niini
makita mo ang kaanyag sa mga
kasinaw

sa mga hunahuna nga atong
balingon pag-usab
aron sa makausa pa
magkisikisi nga morag mga isda
diha sa 
napiit nga dagat

2015/05/23

asa ka modagan?

Asa ka modagan? 
Ang kalibotan nagkagamay,
 liki,
 ugma mapulpog na.

Asa ka modagan
Kon ang eroplanong imong nasakyan

Mahagsa na
Oran
Oran.

Ikaw nga midagan,
Di ba god ka
Kataw-anan?


Panginhas dire