2015/04/30

ang seksi(K)

kasagaran sa mga tambok nga
babaye nga akong nakaila og
nahimamat sa dugay nga panahon
makamaong moawit
sama sa usa ka tamsi
pagkatalinis sa iyang tingog
nga nakapaboto sa
kanipis sa akong pantog

salamat kaayo sa inyong kaayo

salamat sa tanan:

gamhanang paniudto
sinugbang isda sa bato
kinilaw nga balo
adobong manok bisaya
kan-ong puti kaayo
salad nga paleya


salamat sa tanan

gamhanang abi-abi
kaming nangabot
nanglingkod nga nanghinambid
nagpaabot sa inyong
kaayo

salamat sa tanang

kabugnaw sa tubig
sa putong kamoteng kahoy
sa puso sa saging
sa saging tundan

salamat kaayo

kami sa among katagbaw
nanambok nga morag kabaw.

ruby

sa namatay na si paciano
nawa na sab si ruby

sud sa lawak wala na
syay gawasgawas

mikuyanap ang mga puting
buhok

migaan siya sama sa usa
ka iring

kon imong estoryahon ang
iyang mga mata

wala na kaila kanimo ikaw
nga kaniadto

kuyog niyang midayeg
sa pagpamukhad sa mga

kabulakan didto sa Baguio
diin kamo sab namalit sa

nga salinsing nga bisan
nakahibalo kamo nga kini

mangamatay gihapon inig
abot sa inyo

nanimpalad pa gihapon kamo
basin og namakak lang ako

2015/04/29

dugay na unta nga ikaw nalimtan sa mga kiyot

karong hapona
nanimaho ka na usab
nga piot-piot

dugay na unta nga
ikaw 
nalimtan sa mga
kiyot

ikaw man god
abtik pa gihapon
og siging gahukom
nga sa imong
kapa nga itom
wala gayod gihapoy
usbon

kapalaran

ang mga batong imong
gipatongpatong nga morag 
tore sa nepal
mitindog

bisan gihangin
wala gayod matumba
o mapuklid

taas ang lantaw sa
kinatumyan
lahos sa atong mga
utlanan

gisulayan nato
pagsunod ang tutok 
sa mga bato ning
kaudtohon

nagmayhon kita
kanunayng uyon sa mga alayon
wala kitay
hubon sama sa usa ka
batang bag-o pa lamang
miabot
sa banig nga gikaligo
sa dugo sa bilahan sa usa
ka inahan

ang tanan suma sa mga basahon
miuyon niini: wala pa gihapoy
lutsanan ang kapalaran

kinsa kadtong idlas
madakpan
kinsa kadtyong milayas
di kaikyas

apan nganong nakuwangkuwang ka man?

makalibog kaayo ka.

ako nanghatag
pati bukton gikuha
human ang
palad

dili baya pod
lalim
ang paghatag
kuyog man pod god baya
ang samad
og kahapdos

lahi sila kon manguha
panitan ang gikwaan
ang uban
giupawan
naa pay laing gipiangan

makalibog ka

wala kay gihatag bisan
kiting
apan nagsigi kag shagit
didto sa langit
nga gisakitan ka

hangtod karon
galibog ko gihapon

walay kuwang diha 
kanimo
walay nawala
apan wala mipiyong ang
imong mga mata

nagsigig tutok sa 
mata sa unos
di gihapon katulog
ning tungang
kagabhion


makalibog ka
wala ka man untay kuwang
apan nganong
nakuwangkuwang ka man?

liwat


karon pa ko nasayod 
nganong si tatay  kaniadto 
kanunay hubog ug kon masukamod 
patindogon ra pagbalik padayon 
sa kusina aron pahigopon og sabaw 
sa kamunggay ug kon magsuka 
limpyohan ra pod dayon

ni nanay nga dili lang magtingog 
ug kon nganong kanunay siya 
walay imik ang tubag ania punting 
kanako kay ako sama ra baya
anang gamot sa dakong kahoy

karon pa pod ko nasayod nganong
nangatagak ang mga dahon ug nahanaw  
ang kabugnaw sa landong

2015/04/28

dakong tipaka ikaw ba kana, gugma?

isla nga kahayag
lawod nga wanang

buwak nga adlaw
kahil nga bulan

buhok nga sapa
bukton nga suba

dakong tipaka
ikaw ba kana, gugma?

paningkamot sa usa ka byudo

dili baya nindot ang sampot
bisan pa kini og nindot pas nindot
kon anaa pa ang gugmang
mikaw-it diha sa taga sa imong
kasingkasing

kanang naa pa siya nga
sa kanunay naghapuhap kanimo
nag-amoma

dili nindot nga mga mata
dili lami ang mga bukton
dili ka ganahan motanday
dili ka ganahan moambilay

kon anaa pa ang imong
tinood nga hinigugma

apan kon wala na siya
bisan dili pa nindot ang sampot
ang bukton ang mga mata
ang mga paa og mga kamot

mahimong nindoton mo ang
tanan aron ka lang makatabok
didtos laing isla nga gibabagan
sa daghang mga sulog og buaya

karon magpakabuhi ka
bisan wala na ang gugma
diha sa kasingkasing nga dili na
imoha

saloma ni maria

mata sa  usa dalaga
mikurapkurap sa 

usa ka piniriso
nga nagtingkagol 

diha sa gugmang
hagbay rang nalaya

ang kauhaw nahugyaw
sa rehas nga puthaw

sa akong bugtong nga hardin

sa kalipay nakatulog
ang hubo

wa matuyo sa
kabuntagon nga iyang

nahalokan ang
bilahan sa balilihan

pagkamalipayon sa
kahayag

morag alibangbang
nga nagpatong

sa gumamelang puti
sa akong bugtong nga
pinuti

kabahin sa abog

mitabang ang hangin
sa pagbulhot sa mga abog

pagkabaga sa abog gikan
sa hagdan

nganong hilom man gayod 
kining mga abog bisan sa ilang
kabaga og kadaghan?

gisulayan sa hangin pagtingog
alang kanila

adunay dili masulti sa abog
nga sa kanunay imong nasabtan

lumalabay, gaan, mainitan man
o maulanan
kanunayng walay utlanan

pagkatinood gayod sa wala 
gipanulti
pagkasakit, apan maoy
nakaabri sa bentana og mga
pultahan nga 
wala pa masusi...

MEURTO FARMACEUTICO

ang tambal sa sakit sa kutokuto
miabot na
og imong gitumar, nakapahimo kining
hapdos sa imong atay, mipait ang imong
dila og dili ka na ganahan mokaon,

ang tambal sa atay mao kini, busa imong
gitumar, apan mihubag ang imong bato,
og miabot ang dakong ubo, busa gitambalan
na usab ang imong bato,
 apan ang tambal 
niadto, nakapahumok sa imong bukog, 
og
napiit ang mga ugat, 
nga nakahatag og sakit
sa tanan nimong bukog og unod,
 og karon
ikaw mikurog, ang tambal sa kurog miabot,
apan ang imong mga buhok nangahulog,
ang imong mga ngipon nangatipak,
ang tambal sa ngipon og buhok miabot,
imong gitumar, apan ikaw nahimong limtanon,
og nawala na sa imong kaugalingon,
ang tawag nila nimo karon, buang,
ug dinhi na lang kita kutob, kay dili ka
naman motumar sa bisan unsang tambal,
bisan og gigaid ka pa nila sa punoan sa
doldol o didto ba sa sanga sa santol.

sa kataposan ang tambal nga miabot gisulod sa usa
ka lungon. Og dinhing dapita, mipahiyom ka.
Nawala ang sakit sa bukog og unod. 
Nauli ang mga ugat. Wa na mangahulog ang
mga buhok, Wa na natipak ang mga ngipon
hapsay na ang kutokuto,unya nalimpyo na ang
bato.
mora kag gapugong sa ihi kay maulaw kang pahunungon ang bus nga imong gisakyan nga puno kaayog pasahero gikan sa pista sa Loon
 unya karon
nahaw-as ang tanan gikan sa imong
pantog

Kamatayon lang man diay ang 
tambal sa
tanan. 
Og nganong gidugaydugay
 pa man.

Buanga oi!Haskang buanga gyod!

paglabay

dili na ko ganahang motingog
wa na ang awit
dili na ko ganahang mangilabot sa
pagsalop
nawala na kanako ang pag-asdang
sa tanang kaanyag o
pagsumpo sa tanang kangil-ad
wala na kanako ang gahom sa 
paglupig sa mga kusog modaog-daog

kay karong adlawa miabot ang sulat
nga nagpahibalo kanako nga ugma 
mobalhin na ako sa akong pagapuy-an

kay ugma molabay lang ako dinhi
og sa hangtod dili mo na ako makita
kay wala na kanako ang gahom sa
pagbalik

kay ako dili na ako
og kinsa man ugaling ako didto
wala na ako masayod niana

kon ako lang unya ang mabilin

ang atong gahum
mao kini: ang orasan atong
maputlan sa iyang mga kamot
ug sulod sa lawak
atong gipaundang ang pagtuyok
sa kalibotan

ang bentana maoy maghipos
sa kangitngit
ang hangin maoy tigtug-an
kon angayan na bang 
buhion pag-usab ang
kahayag

kitang duha lang
sa usa ka halok wagtangon
nato ang kangil-ad sa palibot

ang mga patay nga kahoy sa
ting-init manahon
ang mga bato sa dalan mahimong
mga alibangbang

kitang duha lang
ang makahimo niini
kon ako lang
usa ang mabilin sa maong lawak
mahimo akong tubig ( o ihi)
nga mohunob diha sa habol
mauga
og sa akong dakong kasubo
mora akog patay nga
manimahong anso tupad sa gripo...

ang mga patay nga kahoy masunog sa usa
lamang ka duslit sa posporo
og ang tanang alibangbang mangahulog sa
yuta aron
mobalik sa ilang tinood nga pagkabato

ang kasikas sa alas 3:05 sa kaadlawon

bisag kusog na kaayo
ang aircon
sa atong lawak
gipatungod mo pa
ang imong lawas
sa electric fan,
nagbagutbot ka
og miingon

"init na gayod kaayo
ang panahon".

gikuha ko ang habol
akong gibukot sa akong
lawas
gitabonan ko ang akong
nawong
gisulayan nakog sap-ong
ang akong dunggan

kon motingog pa ko
sayod ako nga
dili gihapon mausob
ang kalainan sa
atong gipuy-an

kay samtang ang akong
lawas 
namugnaw nga morag
miingon
"dili man god 
ako taga-dinhi"

ang imong lawas diha sa
iyang kainit
mora mag namoyboy
sa mga wala kauyon
og sama sa  imong inahan
morag akong 
nadungog samtang
nangasaba siya sa
katabang,

"wa ko makauyon
sa imong nilabhan,
ugma mahimo ka
nang mamutos
og mopahawa".

2015/04/27

sumpay-sumpay

samtang kita nanihapon
bisag gaatbang
adunay dakong suba nga
miagi sa atong
atubangan

daghang nangagi
sama sa gianod nga patay
nga kahoy gikan sa bukid

dunay hapit na malumos
nga ato lang gilantaw
hangtod nga wala na makita
ang iyang kamot

dili kaayo hayag ang suga
daghan tang angay buhaton
apan wala nato buhata

ikaw nagpanglingo, ako sab.
aron mabalik tas naandan
gitusok sa tinidor ang humba
gikahig ang pipila ka mumho
sa luto, gikuha ang usa ka basong
tubig nga bugnaw
dayon atong gisugdag balik ang
pakighimamat.

"asa na gani kita?" nangutana ko.
"ah, kadtong 
kabahin sa sandalyas nga nawala"
mitubag ko

gusto natong dili maputol
ang atong gisumpaysumpay nga
sandurot

bisag lisod na kaayo,
 nagpabilin gihapon
ang kutay sa kwentas nga nagbitay
diha sa
imong liog. 
Ang akong relo
nga kaganiha miundang og 
tuyok, karon naayo na.
Madungog ko na
ang hinay nga pagdagan
sa akong
panahon.
ang upat ka panahon
upat ka kahoy nga
wala magtupong

ang pangidaron anaa
gihan-ay sa mga anino

inig kaway sa iyang 
kamot mahitabo ang
dakong kausaban


kita nga naglantaw
miyango unya paggawas
nato

wala na mag-ila ang
amahan og anak

pulong og buhat

ang mga pulong
kanunayng magtraydor sa buhat

kanunay kining mahitabo
og naandan na
hinoon

busa kon adunay pulong nga
bungaton
dili na kaayo motingkag ang
dalunggan

ang mga mata kanunayng 
mabinantayon kon unsa ang
gibuhat sa kamot

maoy iyang sukod ang kamot
sa pulong

 kon gibuhat man
ay! salamat
kon wala man
ay! salamat lang gihapon


usahay sa sukwahing binuhatan
magpakahilom na lamang
ang baba

wala kay tingog nga madungog
ang sunod nimong mahibaw-an
mao na lamang ang panimalay nga 
wala nay tawo

didto sa aparador 
dako na ang hawan unya didto sa kilid
sa pultahan
wala kay mabasa nga sulat


ang mga tunob gikan pa kaniadto
dili motug-an kon ngano
daghang mga misteryo nga sa
lakat sa panahon
magpabiling tulukibon

gisulayan nila pagtugkad diha sa
pagtagna
diha sa balak, sa awit, sa sayaw
dili moundang ang mga nota sa
pagpanghayhay sa mga sanga 
dili sab moundang sa pagtukar ang
mga gitara

ang mga magsusulat kon mamatay
managhay ang mga gamot
mamunga, manahon og ang sunod 

nimong makit-a mao ang pagpangahulog
sa mga dahon
ang kalayo magpabiling dila nga 
wa katilap sa mga sanga sa imong
kaugatan.

ang tawo, laog

ang ulan og ang
kahayag
puros sila nakasabot
sa tawo

ayaw kasuko 
tawo, ikaw hakog,
kanunay nimong gusto
ang tanan
bisag dili nimo
kinahanglan

gisalod sa tawo ang
ulan sa kabo
gisulayan niya og
angkon ang kahayag
diha sa sirado nga
bentana
gustong niyang hiposon

apan sa kanunay
kulang ang kabo
og ang bentana inig
sulod sa kahayag
kon iyang sirad-an
mobohakhak man og
katawa ang
kangitngit


2015/04/26

batang anghel

dili gayod kasaligan
ang imong mga pako nga

hinimo sa cardboard
og puti nga papel de hapon

mao gani nga ikaw
karon gihiktan sa 
abaca nga pisi

kon ikaw itantan na gikan sa
atop sa kapilya 
ug unya madungog mo
na ang kanta sa mga katekista

mopahiyom ka, 
iampo ang imong duha ka
kamot, 
itupad mo ang imong duha ka tiil,

og bisan sakit ang pisi
 diha sa imong abaga
kinahanglang gayod nga 
mopahiyom ka

sa maong higayon unta 
mabati sa mga
tawong ligoy ang pagtoo 
sa atong Ginoo.
ang kalipay nga imong
pinugngan
mangita gayod og lutsanan

ang sarado nga balay
diin gipapuyo mo ang bata
mangita gayod
sa pultahan

kon ikaw naglingkod
nga namati sa usa ka 
talagsaong awit sa imong
kalag

dili nimo mapugngan
ang imong wala nga tiil
nga mosayaw sa 
salog nga puthaw

mag-undak-undak gayod
kini sa bisag gamay kaayong
mga tinipik sa
tinadtad nga kalipay

bisan sa pagkamubo lang gayod sa panahon

kay dili kita lagi
langgam nga dunay
mga pako
kita nga nangandoy nga
molupad
paingon sa langit
nga ilang gitawag
walay laing kapaingnan
gawas lamang
diha sa pagkahulog

sa tungatunga niining
pag-ambak
ug paglutaw
bisan sa hamubong hugna
sa panahon
gibati mo ang
kaanindot sa mga pako
diha sa paglupad

bisan sa pagkamubo lang
gayod sa panahon
anaa ang pagpasalamat
sa mga butang nga mabati
sa wala pa
ang kataposan nga ihatag
sa kamatayon

sa tumoy sa kinatas-ang bukid

duna kay lahing
bation kon motungtong ka sa kinatumyan
sa bukid

ikaw ang hari
og silang tanan mga hulmigas
sa imong tiilan

bation mo ang gahom
sa kataas og kahalangdon

sud sa imong dughan
sa laing bahin
anaa ang hunghong sa kahadlok
kay basin unya ikaw
matakilpo
madakin-sa dayon sa danlog nga
bato og
dayon mahulog
og mamatay

malipayong adlaw

giablihan na gayod ang
usa ka latang sardinas

naluto na ang bag-ong
gilubok nga humay sa
bantok
pulapula nga ang kahumot
gikan sa yuta

gisukad na sa dahon sa
saging ang nilung-ag
nga kamote
og saging

init kaayo ang kapeng
giitos nga sinanlag nga
mais ni nanay
diha sa tasa nga puti

human sa usa ka pangadye
pasalamat
nagdungan silang tanan
sa usa ka pamahaw


silot

ang bayot nga si
ruding
og ang tomboy nga
si tuding
gisulod sa usa ka
lawak
nga walay
pultahan

( gikan sa NO EXIT
ni Jean Paul-Sartre)

apan kamaong
mo transcend ang duha
diha sa pagpiyong
sa ilang mga mata

imagination works

unya harder

sa mata ni tuding
nahimong babaye si ruding
og si tuding
nahimong lalaki sa
hunahuna ni ruding


and so
they live happily ever
after


Panginhas dire