2011/02/28

alang sa iyang matood nga kaaway

sa kadugay nailhan ra gayod niya ang
tinood niyang kaaway

nauwat siya
nagtoo siya nga ang iyang kaaway atua
sa ilalom sa yuta
didto sa kinailawman sa dagat nga
og manghimaraot kaniya ipaagi sa kusog
nga unos
og sa mga barkong nangalunod
og sa mga baybayon nga nangakibhang

ang iyang mga mata dili kamaong motutok
sa duol

lisod gyod diay makita ang kamatooran sa
mga kiliran og sa mga kakuyog og kaagbay
sa matag adlaw

apan dili pa ulahi
karon nasakpan na niya ang tinood niyang
kaatbang

apan aron dili kaayo maatikan
dili kini niya ipanabi

sa sayong kagabhion magpatulogtulog siya
magpakaaron ingnon nga walay nadungog

piyong ang mga mata
gahagok
apan sa kanunay ang iyang mga kamot andam
ang iyang kasingkasing
nagpamati

balak alang sa kalami sa bulad nga palotpot

kon nganong lami
ang bulad nga palotpot?

kana kay tungod
naghay-ad kining
miatubang sa adlaw

gihaploy ang tiyan
nga gigigkan
sa mga kuyamoy sa
adlaw

Pasas

dihang nahakop na ang kalipay
nga daw  karnerong
masunuron

sa pipila ka subli
 mokiyos, mokulo.
nahimong  pasas
ang galamhan

sama lang sa inadlawng
kasakit  makakubal.
kabahin atong tawong wala ganahi sa imong mga mugna
nga mikuyos og mikulo nga morag pasas sa ibabaw sa pan nga
burikatsh
(mao ba kaha tong pana?)
ayaw kabalaka

dili nato hiloan atong tintalon og himongaan

atong lamogan og iti ilang
burger
pritohan natog earth
worms
butangan natog daghang
mayon
naise og chezzes
aron matabonan atong
lapses

dayon magtagay tang tana
tuba laloy
kinilaw nga nokos
walay betsin betsin
butangag gamay suka og
pipila ka slices
sa biasong

dayon maghisgot ta bahing
khadaffi i-link natong
imelda
papin

dili nato isalikway si piolo pascual
nga kuno uyab ni Knigts of Columbine

pero kon mahubog na gani ta sa pipila ka
red whores human sa pila ka bol nga tuba

balik hisgot ta
seriously kabahin sa
death of poetry
hisgotan nato ang novena
kinsay mopalit sa snacks
sponsor sa drinks
unsay color sa coffin
delete ba the flowers
kinsay mag report sa LCR
og mag book sa
Catholic cemetery

pilay pakyaw sa manalabtanan
kinsay maghimo sa
eulogy

then basin og magpaabot ta
sa resureccion
ni napigquit

basin puhon, basin puhon
ugma kaha? basta ikaw.
sakit akong liog
gangutngot akong tiil
loyloy akong
abaga

way pamahaw
kusina walay kisaw

way tawo ning balaya
amang ang radyo
halap ang TV

gas

ulat og mga balak ang
gigutom.

kritiko...

kaanindot sa liog
kadako sa pisi

pahugti! pahugti !

misyagit ang
galisngag nga ilong sa
kritiko nga morag dagom
kagamya ang mata

patay na kaha?
nangutana ang ulod.

2011/02/26

sa dihang mipahawa ako sa arvisu house

nagsulat si Tony
ikaw ang nakakita sa kahayag

kami dinhi nagpabilin pa
gihapon sa kangitngit

sayod si Tony nga dili
ako angayan nga malipay

lisod sabton ang iyang gisulti
Jesuit na siya karon

sayod ako nga ang among
gibiyaan og giabtan usa ka

dakong lingin
dili makita ang sinugdanan

dili sab makita ang
kataposan

sa dihang nagkita mi pag-usab
wala na ako maghisgot

wala na hisgoti ang kahayag
"nanambok ka" maoy iyang

nasulti, wa nay lain
ang kahayag akong gikumkom.
sa among tugkaran milabay
si Nong Sagario
79 years old, nagsakay og sikadsikad
nakaporontong og itom
saliko nga puti (guitar ang brand)
puti na kaayo og buhok
gagmay'g mga bukton
nagtsinelas

durong hawid sa kilid sa
sikadsikad og dayog
panghuyab!
Kinahanglan nato usahay nga kita na usab
ang mailad
nga kining atong kaayo atong ihatag sa walay
pagpangutana
nga bisan og kabalo na kita nga giilad kita
pauyunan lang nato gihapon ang ilang
kadaotan diri kanato hangtod nga
ang atong kaayo maoy makausob sa ilang
kaugalingon
nga pinaagi sa atong salapi og panahon
mapalit nato og balik ang ilang mga kalag
kabig
balik sa atong Ginoo nga mao ra usab
ang naghatag kanato sa maong
katigayonan, sapi, kalabtik sa hunahuna
kaligdong,
pailob....

tambag sa mga inot...

humag panihapon
ayaw panotpik og
labi na ayaw og
panotbras

pasagdi ang mga
kiki nga napiit
sa hilang mong mga
ngipon

i-reserve sa gahawhaw
mong tiyan
sa kaadlawon...
Paglantaw sa kalibotan diha sa usa ka Lugas sa Balas
Og ang Langit diha sa Ihalas nga Buwak
Paghawid sa Katunghayan sa imong Palad sa imong kamot
Ang eternidad diha sa usa ka Oras




William Blake:

To see a World in a Grain of Sand
And a Heaven in a Wild Flower,
Hold Infinity in the palm of your hand
And Eternity in an hour.

alang kang Merlita (2)

mag-unsa ba ang tinood nga kaputi
sa gumamela?
para unsa ba ang kapula sa iyang
tungatunga?

para lang ba kini sa pagkalaya?
ang kaanyag ba alang lang ba sa kamatayon?

dili magamos ang kaanyag
walay tinabal nga kaputli
ang pulahon nga tunga
molagom moitom sa paglabay
sa panahon

alang kang merlita

mahurot na lang kita sa
ulod diha sa kataposang hapla
sa atong kinabuhi

apan ang mga pulong di gyod,
ang hunahuna
ambot og ngano nga
wala man untay baye og laki
apan
nganong haskang kusuga man
gyod nga
managhan

lahi ang mga pulong og mga
hunahuna
pagkasirok
pagkaigat
bisan gani sa tumang kahilom
naa rag
yabayaba.
adunay mga buluhaton
nga atong naandan og dili
na gani hunahunaon

dili kini kabahin sa
sayop ba o sakto

sama anang pagpanghingugmo

sa dihang imong gikuot og
gikulitog ang imong ilong
naghunahuna ka pa ba kon

sala ba kini o dili?
kon maka-impyerno ba ang
maong paglikit mo niini?

kon mahalangit ka ba
sa dihang imo kining gitilawan
niadtong wala nay
naglantaw kanimo?
ang kinabuhi
nahisama usahay sa
pagpanghinguko

usahay makalimtan...
sa gabii ang
magduladula diha
sa sala mao
lang gayod ang
mga bagtok
nga bisan unsaon
natog butang og
hilo
ambot
nanaghan man
hinoon

ambot og nganong
kining mga iring dinhi
nangausob na man

nagpaabot ra man
nga tagaan og
pamahaw og
panihapon

wala na ang
kaniadtong
mga iring nga
sirokan
nga pati puya
sa bagtok
ila jud nga
gitilok...

wa mag-abot

miuna ko
og gawas
wa mapugngi
mikakilid ko
og mihagok

galagot ka
diha sa kahilom
wa gani ka
kasabot kon
unsay buhaton

naglutok imong
mga mata
gikwadro
sa kisame nga
hagbay rang
gianay....

2011/02/25

sa kadugay sa panahon
daghang naagian nga pagdumbol

makatulog usahay sa kahago
mahinanuk sa tumang kalipay

dili matukib ang kalalom
sa nangagi dili maugkat

gitagoan sa mga gamot
og wala usab kini kaayo gipakita

sa mga dahon og bunga
pagkamapailubon ba

sa mga gitan-ogan nga mga
tinagoan pagkahinog na

unta apan dili kini mautnga
dili kini masuka magpabilin kining

suwag sa sundang
sa tubig nga tin-aw

pakighinabi sa kaugalingon

gikan ako sa halayong dapit
og miabot ako dinhi
gisubay ko ang dalan
pasulod sa usa ka pultahan
sa balay nga karaan

milingkod ko og
gidalitan mo ako og usa ka
mainiton nga tagay
sagol ang kasakit og
kalipay

ginagmayng mga sugilanon
gibalik ta
nangutana ka
mitubag ko
nangataw og miiyak
tang duha

makita sa gawas
ang panghitabo og
silang nanan-aw
silang nanglabay
naglibog

ako lang kini
nga nag-inosara....

awit alang sa kalipay

pagkaswerte gayod ning kalipay
nga bisag sa iyang pagkamalimapayon nang daan
diha sa mga katawa og hudyaka
gihalaran pa man og
giawitan sa laing
kalipay

anaa ang mga humot nga bulak
sa kalachuchi nagpasad ubos sa iyang tiil
ang mga rosas sa iyang
mga buhok og mga bukton

ang mga alibangbang mibatog sa iyang
mga kamot
og ang kahayag misuot sa iyang dughan
ang kagaan sa pagbati
mga pako sa sayaw-sayaw nga
nagdakpanay og hangin sa
kalangitan

nagpahuyuhoy ang bugnaw nga hangin
gikan sa kabukiran
nagpasiatab ang mga tamsi
nga morag mga kitikiti
sa tin-aw nga lam-aw

pagkaswerte gayod sa kalipay
nanaghan, namukol, mingbukhad
namula, namus-ok

ingon sila, ingon ana gayod kuno ang malipayon
nga sama sa pahiyom
mananakod.
sulayi kuno og sulat kanang
giputlan ka og ulo...

mao nay tinood nga
magbabalak.

2011/02/24

kapoy na....

kaganihang buntag
naglakaw ko nga nag-inosara
namalandong sa akong
matag tunob sa dihang kalit

nga miulan og busa mipasilong
ako sa ilalom sa dako kaayong kahoy

sa unahan nakita nako ang
mga naglaray og baga nga kakahoyan
og mga basakan
adunay gagmayng mga balay nga
nagkatag sa daplin niini

sa kakusog sa ulan
ang maong talan-awon morag
usa ka pintura sa usa ka debuho
nga milama
nahulog ubos sa iyang kwadro

daghan kog nahinumduman

hinay hinay nga nabasa ang akong
lawas sa ulan

ayaw kog suraha
kay wa ko nagpatulo bisag usa na lang ka
lusok sa luha

paghandom kanimo...

hain ka man?
nganong wala ka naman
mibalik didto
wala na man gani
magpakita bisan na lang
og ang ilong sa
imong anino

nagmingaw na sila kanimo
kanunayng naghandom
kanunayng nangadye Ginoo
nga unta sa moabot nga
panahon
mobalik ka na unta

gipangita ka nila
sila nga imong
gipang-utangan nga hangtod
karon
nagsige pag hangad
sa imong
bayad...
ang hunahuna
pagkalaagan
di papugong kanunay kining
magdamgo nga moadto sa lugar nga wa pa niya malakat
adlaw og gabii
gipangita ang layo og ang wala dinha
usahay gipatumanan siya sa mga pako sa kaikag
og busa miabot siya sa lugar nga iyang ginadamgo
adlaw og gabii
og sa didto na siya
gihubog niya ang iyang mga mata sa iyang gustong makita
og gani nakigsayaw pa kini sa iyang ginadamgo
apan sa dihang giaghat na siya nga iyang hikapon ang mga bukton og dughan
miatras kini
og naghinuktok, dayon og lingulingo
"dili na kini kaya" miingon siya sa iyang kaugalingon
og dayog balik sa iyang agi
mihapit siya sa usa ka dakong kahoy nga namulak
mikutlo og usa og iyang gidalit sa iyang kaugalingon
gikorona sa iyang ulo
og dayog hawid sa iyang kaugalingong kamot
og miingon
"salamat, ikaw lang gihapon ang akong
matood nga hari"

miabot siya
balik sa iyang balay
nawala na ang kahubog
og nahinanok na usab
sa usa ka katulogon.

2011/02/23

kon nahurot na ang imong kape
magpabilin pa kaha gihapon ang kahumot sa kape?

kung mahurot na ang imong pailob
magpabilin pa kaha ang kahumot sa imong kapungot?

Nahurot Na


Pagtungab sa baso
Kahumot na lang sa kape
Ang nahanggab.


Akoy
2011.2.23

2011/02/22

sa sayong kabuntagon
gibaktas ko ang patag

kalit nga mibutho ang
kusog kaayo nga ulan

mipasilong ko sa landong
sa dakong kahoy sa kilid sa dalan

sa mga panganod nakita ko
ang mga sayaw-sayaw nga nanglupad

nga daw dili madutlan sa tubig
nga daw nagsadya sa tunga sa subo nga kalibotan?

dili kaha sila kamaong mobati sa kasakit?
dili kaha sila kamaong moduyog sa bakho sa langit?

nganong dili ko man sila maawat?
nganong madutlan pa man ako sa kasakit?
sa makanunay gisunog ako
sa dakong kalayo
sa makanunay nahimo akong
abo diha sa mga tumbanan
og sa makanunay sama sa
Phoenix
mibangon ako isip baga kaayong
aso nga mobalik sa kalangitan

mabilin ang kahaw-ang og
kamingaw

ayaw kabalaka
sa sunod nga dag-om
sa ikaduhang unos sa imong kalibotan
mobalik na usab ako
sama sa usa ka kusog kaayong ulan
nga molanab na usab
diha sa imong lasang sa imong suba
sa imong mga patag
og mga kasagbotan

ako...

magpabilin akong aso
nga dili mo makumkom
mihatag ako og kainit
sa kalayo ko
nga dili mo makita

Hangin Lang

nagpadayon akong
nagkumkom sa hangin
sama sa akong panumduman
kanimo nga di ko mahikap

badbaron ko na lang kaha
ang hiniktan  mong pako
sa akong huna-huna
aron ako mahimong
gawasnon

2011/02/21

mao kini usahay ang imong mabasa
kon nawala na ang gana sa pagsulat

kon agi sa kadaghan sa buluhaton
wala na nimo matagad ang mga metapor

nga nangitag kabatogan sama sa mga
tamsi nga nanglabay na lang tungod

kay ang imong mga kamot wala man
manggawas sa bintana wala mangamay

didto sa kusina gihaon nila ang init kaayong
tinola sa manok bisaya

nanghumot ang sabaw mitintal sa imong ilong
apan igo ra man kining nanip-on...
sa imong gisulat nga nobela
pipila na ka tuig gikan kaniadto
sa dihang imong gisugdan kini
nagbasol ka
sa imong gihimo sa imong
bida,

karon gusto nimo kining usbon
duna'y imong gusto nga iyang himoon
sama sa pag-usob sa iyang
panglantaw
aduna kay hangyo nga unta iyang buhaton
nga sukwahi sa iyang naandan
og kon unsa siya nga nailhan
sa iyang mga kauban

dili siya mosugot
bisan og unsaon pa nimog hangyo
ikaw nga maoy nagsulat
og nagmugna bahin kaniya
naunsa bang hitaboa nga
nawad-an naman sa gahom?

ingon siya
ulahi na ang tanan
kon usbon nimo siya
mas maayo pag imo na lang
siyang papason

mahimo mo kaha kini?

2011/02/20

daghan ang mahinumduman
mo niining dapita
ang dahon sa kalachuchi
nga gihimo mong paypay
ang bermuda nga walay
pahak
ang kanal nga napuno sa
tubig nga gilangoylangoyan
sa mga isdang dili makaon
gibalikan mo
nagtindog ka didto
mitutok
namalandong

wa ka na lang mangutana
sayod ka
nga sa ilang kalisod
unsaon pa ba ang paghinumdom?
ang nawa nga imong
nakaplagan

sa pipila ka adlaw mong
hinangop

og wala'y ikatubag sa
imong kauhaw

nakaingon ka usahay
mas maayo pang ilabay...

2011/02/19

Abi kog kami lang dinhi
nagtikawtikaw sa wala,
naghandom sa mga umaabot nga lami nga wala sab mangabot

Abi namog wala ka
Naghandom mi sa imong pagbalik apan karon nga
Miabot ka
Kadyot lang gayod, igo ka lang misimhot sa mga bulak sa hardin
Mitutok sa bato sa kilid sa pultahan

Dayog lakaw
Wa gani ka nagpabilin og panamilit
Og kami nga naulahi
nga wa gani makakita kanimo

Nabitin.
panaghap,

nga kadtong nagdagan-dagan
sa ibabaw sa kisame
nga wa mo makita apan
imo lang nadungog,

basin mga dwende,
kadtong mga maayo nga
motultol kanimo kon asa
ang mga kolon sa
tiilan sa bangaw nga
puno sa
mga bulawan

ayaw kakurat
ayaw kasuko

akong nakita ang mga bagtok
nga morag kadak-ag mga
iring....
kon unsa ka sa
pagkatawo,

ilong nga palwa sa
lubi, agtang nga morag
bungtod ka lapad,
apapangig nga
morag usa ka kahon
nga basakan
baga nga pilok nga
morag kakugnan,
lagom nga ngabil
nga morag
panganod nga
kaulanon

morag wa ka nay
mahimo niana gawas
lang og tagaan gayod
nimog panahon
og gastohan

apan kon maunsa ka
damlag
mahimong abogado de
campanilla
o superintendent sa
inyong probinsya
o kaha mahimong
dato kaayo nga
negosyante

naa ra kana sa imong
diskarte
kay lagi
gawasnon ka
og walay mga kamot
sa kapobrehon
kawad-on og
kaulawon nga
makapugong kanimo
nga maghimo sa imong
kaugalingong dalan
magtukod sa imong
balayan
magkulit sa mga linya
sa imong palad...
patay na ang tawo...

dili na nato hisgotan nga kaniadto
gikawat niya ang imong uyab.

mipahulay na siya
atong hisgotan kadtong mga maayo lang unta

kadtong gidalhan ka niya og
usa ka pungpong nga hinog nga bayabas
samtang gihilantan ka
og ikaw rang usa
sa inyoha

og daghan pa....
lubong ni langging karon
didto ko kagabii og akong nakita nga
ang mga bulak sa kilid sa iyang
lungon puros puti,

nakaingon si emma nga wala kaayo
maayog make-up ang patay kay luspad lang gihapon
lahi ang picture sa tunga
nga haskang inosenteha gayod sa namatay

kini si fredelita nagpasopaso samtang
nagsige ang pangadye
close friend ni langging
love-hate sad ni silang duha
ambot og nagkomedya ba pero
miingon siya nga dili baya pod tanang
daotang sagbot
dugay mamatay....
ang sobrang pagmahal kuno
makamatay

ambot, pero wa pa sugod
nga ang usa kanila namatay sa gugma

dunay nagdilaab sa kasilag
nasunog, naabo og wa na katindog.
sobra ang gugma sa iyang asawa
kay bisan og nalibang siya
gihapit og ang iyang aping
gihalokan

ang tubol ang balikog.

kabahin sa baybayon

dili mangamatay ang balas
sa baybayon

nanaghan pa man gani hinoon
milapad ang baba sa bukana

milalom ang dagat
milagom ang langit.

2011/02/17

pagsulod mo sa kusina
unsa ba ang imong nakita?

kalderong nagkulob.

gikan ka sa bukid, mitungas ka,
naabtan mo ang agtang sa pangpang
giaggian mo ang pito ka suba
og gikatkat mo ang danlog nga
bungtod

miabot ka sa kinatas-an og
imong gilantaw ang lapad nga
kalibotan, unsa ba ang imong
nakita?

kalderong nagkulob lang
gihapon.
ang tanan kanimo
ania kanako gawas lamang
sa puntik-puntik mong
panit....

busa sa atong pag-ila-ila
wa na kaayoy daghang istorya.

abstract...black and while nga surroundings...

pula nga payong
kamot sa sampot
ngabil sa ngabil
kinto nga tiil.

kaanyag


ang mubo nga panahon
diha sa yamog ubos og ibabaw
diha sa ilusyon nga kalunhaw sa
dahon....
nasulayan mo na ba ang pagtunob
sa humok kaayo nga yuta sa silong sa
kakahoyan sud sa dakong lasang
diin ang imong kabug-aton imong
gihipos sud sa imong utok aron
dili ka maunlod sa lapok?
nakita mo na ba ang tawong
nahulog sa pangpang nga nasalo sa mga kamot
dagat og unya milangoy
paingon sa kahoy nga sakayan
mihawid gisalig ang iyang kinabuhi
sa laing galutaw
diha sa lapad og lalom nga tubig?

bao

ang bato nga gilomutan
og ang kahilom sa bao
usa ra,

nagduyog ang ilang katahom

gihanyag ang kaanindot
sa kahinay...

pasingot

lakat sa kabuntagon
ginhawa og
dako,
isabwag ang hangin
sud sa tiyan
isa sa mga kamot
tungas sa
mga tiil,
hangad sa langit
ihalad ang
mga lab-as nga
buwak sa hunahuna
yukbo sa
Bathala
silong sa adlaw
tawong layaw.

2011/02/15

kang Mely...

gabii na, nanuktok ka pa
sa akong pultahan kay lagi
si Mama nimo nahulog
sa iyang katre kay wala ka
diha nga nagbantay og
maayong pagkapiang sa
maong tigulang, kay lagi
si Polding nga imong bana
bag-o lang sab nga na-stroke
og wa na lang gani nimo
gipaospital kay gailaid ka sa
kalisod

ang imong pension nga
dos mil kada bulan dili gani
maigo sa bulad og bugas
sa matag adlaw
(wa pay labot kadtong bayad
sa interest sa imong mga utang)

nalata na ang imong tiil
morag hapit na moboto ang
imong mga barikos

wa ako'y mga pangutana
kanimo Mely
hatagan ko ikaw og tulo
ka gantang nga bugas
og pakapinan pa og usa
ka kilo nga isda og
pamilite nga kinse pesos
pauli sa inyong gipletihang
balay

dili ako mangutana kon ngano
og naunsa ka o basin og sila pa'y mohusga
basin kuno og gigabaan kamo tungod sa inyong
pagpapangilad kaniadto

ang ako
mohatag lang

wala nay lain kay abi nimo
Mely sayod ako nga kon ang
Ginoo na gani ang mobalos
sa akong gihatag diha kanimo
dili ka gayod makatoo:

sa tulo ka gantang nga bugas
gitagaan niya ako og basakan
og ang mga humay wala gani
pangan-a sa bagtok og ang
mga binakid nagpunsisok sa
akong mga kamalig,
sa usa ka kilo nga isda
iya akong gitagaan og fishpond
og
ang mga isda didto wala
malanag, wala maanod sa miaging
baha og

sa kinse pesos nga akong gihatag
kanimo isip pamilite, gibalosan
niya ako og kinse mil ka pesos
nga kalit lang nga miabot sa akong
hagdanan,

naglibog ako Mely sa kaayo sa
Ginoo og busa
ako magdayeg gayod kanunay
Kaniya
og busa ako
sa walay pangutana kon angayan
ka bang hatagan o dili
andam ang akong mga kamot sa
paghatag kaninyo kanunay
andam na ang gantangan sa bugas
og ang dakong putos niini
andam na ang akong mga sinsilyo
alang kanimo
gihimbisan ko na man usab gani
ang mga isda
nga inyong isud-an karong gabhiona

sama sa kahoy nga kanunayng mamuwak
og sa pagkahinog sa unya sa iyang mga bunga
andam kini'g tagana sa paghatag niini
sa bisan kinsang molabay sa iyang
gitindogan
sa bisan kinsang giuhaw
sa bisang kinsang

gigutom og

sama kanako

ang maong kahoy walay pangutana
kon ang mamupo sa iyang bunga
kon tagaan angayan ba.
usa lang ako ka agianan
walay magpabilin kanako dinhi
molabay ang tanan
og akong lantawon
tagaan ko og ngalan og sa akong nakita
maghimo ako og mga kahulugan
dili ako molakaw
maglingkod lamang ako sa bangko sa kilid
ning pultahan
agianan lamang ako
og sukad pa sa una wala akoy ngalan

alang kang Langging

nagpahibalo nang daan ang kamatayon
layo pa
gipahimangnoan ka na niya sa iyang pag-abot
mihangyo ka
sayod ka nga wala gayod siya mosugot
sulugoon lang usab siya
nagpaabot na ang sakayan og ang lanaw
puno sa kalinaw
gihalaran mo siya sa imong pinakamatahom nga pahiyom
gidawat niya ang imong mga kamot
gipahalona ka niya sa bangko
og miyango ka
gisundan ninyo ang kahayag
nahilis
mibanos ang kangitngit
samtang kami nga nahabilin dinhi
wala maningog
dili kasaligan ang mga pulong,
usahay ang mas mahinungdanon unta nakong isulti
dili man nila malitok

ang ilang mga baba natuk-an
napulos puti ang ilang mga kalimutaw
nangahagba

Chess



Ang takna miabot
Hugasan nako
Ang chess board.

Akoy
2011.2.15
ang mga kasakit anaa sab kana
sila'g kakapoy

abtan sab silang kapuol
makonsyensya baya pod usahay

nganong ikaw lang ang ilang
gibalikbalikan

busa ayaw palabi nianang imong
kahiubos

ugma kanang pipila ka bukag
nimong gikaabaga nga kabug-aton

aduna ra gihapoy mangutana og dayon mopalit niana
bisan og wala ka pa nagpahibalo nga mamaligya

kadtong mga gipanggabaan
og kadtong giingon mo nga sad-an

kanang tanan usab ilang hambinon
pagpailob lang basin ugma puhon
miulan,
kadali lang, nabasa gamay lang

kadyot lang ang katugnaw
nga gidala sa hungihong sa hangin

takulahaw kining mopanaw
mobanos ang kainit sa

imong mga ngabil nga midap-ig
sa akong aping

ning kagabhion nakita ko ang
tanan

naglamog ang mga bitoon
og mga adlaw

nahugyaw ang akong bukog
unod og panit

di makatoo sa hilabihang
kalipay

nga sud sa akong dughan
wa na gani kasudlan

pagpaabot

sa imong pag-abot nawala
ang kahulugan

sa pagpaabot, ang kabalaka
nakalupad,

mipuli ang mga utitod sa mga
pangutana

nga wala nimo tubaga, apan
sakto ka, ang katam-is sa asukal

magpabilin.

sa lawak ni giovanni

katorse, febrero,
2011
sa lawak ni giovanni
kuyog niya ang
duha niya ka mga
kamot....

2011/02/14

haiku

human sa pagpaugnat
ang akong singot
nakakaplag og agay-ay

Dili Kini Biaybiay

Bisan pa og pinaagi
sa pulong wa ka katungas
sa bungtod sa akong damgo

Bisan pa og ang imong
panagway dili tataw
sa akong panan-aw

Bisan pa og kapila
manaranka sa pultahan
ang akong tanlag

Ugaling kining tanan
bunga lang sa katulogon

wa gihapoy makatupong kanimo

2011/02/13

Bitoon


Sa langit mihangad
Bitoon ang gitan-aw
Kay ang kahayag sa dagitab
Di na katagbaw
Sa mga panghupaw.

Akoy
2011.2.13
sa dihang mihangyo ko og usa ka halok
sa imong aping
mibalibad ka,

sakit kuno ang imong ulo og
gabagotbot ang imong tiyan,

og busa kay miabot na man ko
sa akong kataposan,
mikanaog ko sa imong tugkaran
og nanamilit, og

miingon ka nga ako nagkulang sa kaisog
usa ka talawan nga
dili kabalong mogamit anang
pulong nga
pagpamugos, gusto man god nimong

dili kaayo mabantayan nga ikaw usab patay
sa gugma

diri kanako og ako nga nagpaubos na pag-ayo
kanimo, nagpabuangbuang usab nga dili
kamaong mogamit sa pulong anang
ikaduhang paghangyo, basin og sud sa akong

kaugalingon, aduna akoy mas labaw pa nga gihunahuna
labaw pa sa kainit sa imong mga ngabil
og busa wala kaayo ako
matintal sa pikas nimong
aping.

mga patay nga pato...

i

mga patay nga pato

naglutawlutaw sa suba
misalig sa sulog
mikuyogkuyog.

ii

mga galutawlutaw nga tulo
ka puti nga pato
patay na
gisulogsulog sa sulog sa
suba paingon sa
dagat

iii

patay na ang mga pato
sa dihang mikusog ang sulog
suko kaayo nga
mihatod sa nahitabo didto
sa baba sa dagat

ang atong mga palad..

sa ilalom sa yuta
nangatulog ang atong mga
diyos diyos,

kasagaran gipiyal nato
ang atong dangatan

og usahay ila kining gikalagot
og busa
mao nga mabati mo usahay
ang kusog nga
linog.
kining akong sunoy
taas na og tahod,

hait og bulang, og daghan
na og gipatay

ugma kon mabihag mo siya
dili ako mangayo og
tingog sa kalooy

maghambin ako sa
tumang kaguol ning akong
kapildihon
ang akong ginhawa
motagbo sa imong
ginhawa

ang akong laway
maligo sa imong laway

ang akong igham
mahimong usa ka balak

ang akong pag-unto
mao ang kataposang
awit nga maoy mohatod
kanimo sa

imong paghinanok
ang akong pagkatagbaw
diha sa ibabaw sa
usa ka pahiyom silong
ning atop sa
kaminyoon

karong
katorse sa pebrero.

dinhin ning lungsod nga karaan...



makalibog kining atong lungsod
sa gabii
nagpunay og hunghong
samtang gisuroy nato ang iyang
karaang karsada
nanawag kay wa ambata
gihikyad ang iyang mga samad
nga wala maalim

barado ang mga kanal
hilom kaayo ang mga tindahan
gibukbok ang mga bongbong
sa mga balay
nanirado ang mga bintana
og sud sa mga lawak anaa ang
mga patay
nga dili magpalubong...



pakapin

gisuki nako ang
kahilom,
gipalit nako ang
kamingaw,
gipakapinan ko
og pasaylo

busa nagpasalamat
ko.

palihog...

gusto nakong
sulaton unta and usa lang ka
pulong nga
makapatumpag
og dako kaayong bungtod,

gipangita pa nako
wa nako makita
og busa di pa nako
mabungat,

usa lang ka
pulong,

palihog.

Luwas Ang Atong Pagbati Ilawom Ning Gugma

Luwas Ang Atong Pagbati Ilawom Ning Gugma
By Genamos_US of Washington DC, USA

Unsang hitaboa nga naabot kining nimla
Nga gipaabot ko sa dugayng panahon nawala
Nga sa kalit naabot nga kitang duha nabulahan
Kay ang gugmang gituhoan midako ug giampoan

Atubangan ning mga kahoy nga atong gidauban
Nagpitipiti ang matag dilaab sa pagbati natilawan
Sa sikit nagtupad ta nga natagbaw sa matag gutlo inuslan
Samtang ang gawas gihabulan sa katugnaw nga nag-uwan

Wala ko damha kining talagsaong higayon moabot
Nga akong igugol kining panahon kanimo sa hurot
Kay espiyal ikaw kanako nga kining pagbati duawa
Sa imong kasingkasing intawon kini pagatan-awa

Nakita ko ang tumang kalipay sa imong mga mata
Nga ang matag pahiyum mo dughan ko paminawa
Daghan kung nakat-onan dinha kanimo, pinangga
Tuhoi kining dughan ko nga kanimo lang nagtinguha

Nasabtan ko ang tinood nga kahulugan sa kinabuhi
Nga imong kung gitudloan sa tanan nga walay isukli
Nakat-on ko sa paghigugma, nasulayan ko ang panag-ambit
Kay mao ang bugtong katuoyan nga kita sa langit gisampit

Kung wala ka pa moabot sa akong kinabuhi
Ang kalibutan ko walay tumong nagkapuliki
Imong gitambalan ang dughan ko nga puno sa kabalaka
Kon man galing makigharong sa kinabuhi mag-inusara

Dakong kalipay nga ania ka permi sa akong kiliran
Aron sugaton ang kalipay ug kasub-anan matilawan
Nga kung unsa man ang naghulat nga ugma kanato
Aron unongan kining pagbati ta nga gituyo modako

Ikaw gayud ang tukma ug alang dinhi kanako
Sa katam-is ang gugma ko sa langit nisangko
Tagbawon ta kining kagabhion sa halok ug romansa
Kay luwas Ang Atong Pagbati Ilawom ning Gugma
pari nga giordinahan ka niadtong grade three pa lang ko
engrande ang kalihokan
sabaan ang mga kusinero nga nagluto sa mga adobo og nilat-an
tapad ang katawa og agik-ik sa nataran
ensakto ang pag-abot sa ubang mga bisita gikan sa plaridel og dipolog
nagakos, naghinangopay, nagsadya alang kanimo
garbo ka sa kaliwat sa mga Evardone og mga Alfeche


yano lang ang pagpanglabay sa mga katuigan
akong nahibaw-an ang imong pagtagotago sa bukid
wa madugay nadakpan ka, napriso sa pito ka tuig, og nausob
ang kataposan, mao nga ikaw nahisama usab kanila: mamalikas disin motakbas!

2011/02/12

kumusta ka na?

kadtong mipauli ka sa balay

udto kadto,

mihapa ang wala mailhing tawo nga mahadlokon

ugmad sa basakan ang gikalingawan sa mga malinawon

samtang ang mga adunay armas nagwarawara

tutok lang panalagsa ang mabalos sa mga gidaog-daog

ambot og unsay gidangatan sa kabaw og mga manok og baboy nga ilang gidala



kapait sa mga wala mosukol og wala magpakabana

agwantahon ang pila ka martilyo sa lansang sa matag kamatayon



nawagtang ang pagsalig

asa na kaha ang tinood nga dalan nga atong subayon?

balak alang kaninyo...

makalipay
kong nanay
bilib si tatay
abtik ko

kamao kong
moihap
mamaligya og
balut gikan sa
alas 9 sa gabii
hangtod sa
alas 3 sa
kaadlawon

momata kog
sayo
maglalog sa
baboy og
manok nga
panabong
ni tatay

magkuso-kuso
sab ko sa bulingon
nga gihumulan ni
nanay
waswasan
ihayhay aron
mauga pagkahapon
og isuot na usab
sa akong duha ka
mga manghod

kamao na sab
kong maglung-ag
og bugas
mag-prito og
bulad

magsag-ob
og tubig ilimnon
manghugas og
plato og mga
baso nga
mawala ang
sabon

ako si
Klokoy
akong tinood
nga ngan
Piolo

miundang na
ko
sa Grade I.

kalipay kong
tatay
og Nanay

hago kaayo
ang akong lawas

apan way sapayan
kalipay ko
ang kalipay ni
nanay og
tatay

Ang Mitalaw Nga Gugma Sa Heneral

Ang Mitalaw Nga Gugma Sa Heneral
By Genamos_US of Washington DC, USA

Nakaila ba mo ni Heneral Angelo Reyes
Mga militar kaniadto nga walay makiglalis
Nagtakuban nga murag buotan
Kay adunay gitagoan nga dautan

Sa niaging administrasyon
Siya ang paboritong tawgon
Kang inday Gloria siya pasayawon
Bisag unsang sonata ang patukaron

Daghang nanggawas nga tabi-tabi ug mga sugilanon
Nga iyang kunong gikawkaw ang pundo nga sulondon
Gisugo siya kuno sa iyang ikaduhang bathala
Nga iyang tilawan ang kuwarta sa pagpasipala

Ang kapaet kay adunay nipiyait
Nga "foul" kuno nga iyang gisiyagit
Kay ang Heneral ug uban pa nalambigit
Sa mga huhungihong sila gipanghagit

Gisukit-sukit siya sa mga senador
Nga ang uban pod utrong mga traydor
Gihimong murag karnero nga bitayonon
Sa mga nanggawas nga wala sila makauyon

Nibahad sa senado nga dili nga mobalik
Kay ang mga senador perming nanohik
Kung unsa man ang iyang kapuslanan
Nga iya naman gipas-an ang kalibutan

Sa tumang kabug-at ang tuhod nagkurog
Sa matag publisidad kanunayng nahulog
Ang iyang ngalan maoy sigeg giinitan
Kay siya mismo aktibo sa kagamhanan

Gitagaan og taas nga katungdanan
Sa departamento sa Enerhiya gisudlan
Nagtuo ang pobreng mga katawhan
Nga siya gipili sa kamot sa kahitas-an

Tuod man nilingkod nga matarong
Sa mga hiwi siya ang nakabarong
Mga problema sa enerhiya siya wala makapugong
Kay daghan diay ang nagbagotbot nga nisumbong

Kung unsay mahimo ning atong nasod nga naulipon
Sa mga walay batasan ug kawatan nga mga sulugoon
Kung unsaon pagpakgang ning kurapsyon
Kung si Noynoy ba gyud ang bugtong sulosyon

Karon hain naman siya gibutang
Nga nilakaw nga murag walay utang
Ang mga dughan sa katawhan nasagmoyo
Nga iyang gikutlo ang kinabuhi sa pagtuyo

Aron kumkumon ang nahabilin nga pagbasol
Sa iyang tanlag siya nga kanunayng gihasol
Kung iya pa lang mabalik ang kagahapon
Nga balibaran ang kahakog siya naulipon

Kung sayop man ang iyang nabuhat
Sa buhi pa siya sa kasaysayan nahisulat
Nga ang iyang ngalan adunay mansa
Gihugasan niyag dugo aron may tsansa

Kung aduna pa unta siyay gugmang gibilin
Mga pilipinhong katawhan unta dili mabitin
Kung ang panghigugma sa nasod tiunay
Ang iyang kalag ug pamilya makapahulay

Dili nga mabakwi ang kasaysayan sa nasod
Kung sa mga panghitabo abunansiya gayod
Ang ato nalang ani ang pagpadayon sa pag-ampo
Aron sa kalinaw ug ting-usbawan kita moyango

Busa tambag ning atong kinabuhi
Bisag unsa kalisod ang panahon nagbudhi
Nga dili kita mawagtangan sa paglaum
Bisag sa pagsulay ang gugma ta molagom

Padayon kita sa pagbuhat sa maayong panag-ingnan
Aron sa ugma damlag ang langit kita pagabaslan
Sa pagsunod sa mga langitnong lagda ug pulong inspirational
Aron malikayan mahitabo ang Mitalaw Nga Gugma Sa Heneral

2011/02/11

dili interesado...

gihisgotan niya ang pagbuto sa ligid
ang pagkahulog sa kilid sa kanal sa kalsada sa
awto nga morag sakang nga hapon nga wa na kasabot kon asa paingon
maygani kuno kay lig-on ra ang chasis sa maong sakyanan nga bisan og nawingig na
ang mga kamot nga gahawid sa mga suga sa kilid
wa gihapon malata nga morag latang nalumping ang pultahan
sa hamubong pagkasulti igo rang nagarasan si Junjun og wala mamatay

hapit na mahurot ang thai ice cream
ang kataposang kan-on
nagtan-aw ko sa relo kon kanus-a pa kaha mahumanang kataposang sugilon

mas nindot man god ang tingog sa pag-abri sa pultahan
og dayog gawas sa balayan sa iyang kalibotan

menos kinse minutos na
pwera bisita.

pagbasol...

gitutokan niya ang iyang
nawong sa samin,

ang buhok
nga nahahalhag, ang apapangig nga
mikibra, ang mga ngipon nga
nangalarag, ang mga uban
nga morag baha sa suba
mimakamang sa dagat,
ang nanipis nga kilay ang
nanghubag nga mata ang
nangaluyloy nga mga pilok,
ang ngabil nga lagomdaw mga dag-om sa panganod,
ang dunggan nga tangkag,ang suwang nga mihait tagbo sa panahon

nakapangutana siya nganong
nabuhat ba kadto niya?

Rason Kung Ngano

Rason Kung Ngano
By Genamos_US of Washington DC, USA

Ang gugma ta lahi sa uban
Nga kanato atong natilawan
Sa dugay nga kita nanag-uban
Nasinati ko ang imong batasan

Gihigugma ko ikaw sa mga daghan nga rason
Sa matag gutlo ning kinabuhi nga mabulokon
Sa imong tingog, daw kini makalanay
Nga nitayhop sa kabugnaw nga mahinay

Sa imong hikap, daw nagdala og kainit
Nga nituhop sa dughan ko kini nipilit
Sa imong halok daw tam-is pa sa macopa
Ang kahumot makabugto sa ginhawa

Sa imong pahiyom daw ako imong tukoyon sa pagpaduol
Aron kining gugma ko sa kanimo kanunayng mapandol
Gaan ang akong dughan sa pagtugot kanako
Sa pagdala ning akong pagka-ako mosangko

Imo kung gidawat ang akong pagkatawo
Sa mga kagahapon wala ko nimo gibaylo
Gitugotan mo ang akong kaugalingon
Kung asa ang dughan ko mopaingon

Adunay higayon ang manerismo ko mogawas
Sa katawa imo kining gipasagdan nga mahukas
Nagustohan mo ang akong pagka-ako
Gumikan sa gugma tang duha gipakatawo

Pinangga, rason kung ngano ikaw akong gipili
Gipadala ka sa langit nga ako wala magdumili
Kung unsa man gani ang naghulat kanato nga agianan
Sa mga saad ug gugma ta gipanumpaan aron unongan

2011/02/10

Ikaw gayud Ginoo

Ikaw gayud Ginoo
By Genamos_US of Washington DC, USA

Kung madungog ko ang mga awit sa kalanggaman
Nga ang kalinaw nituhop sa akong panumduman
Mga kananoy sa melodiya ug nota sa usa ka awit
Murag gilukmay ang akong kahiladman sa gidalit

Daw usa kini ka matahom nga mga pulong
Nga nihunghung kanako nagpasilong
Akong gipiyong ang mga mata aron modoko
Nga Ikaw gayud Ginoo ang nakigsulti kanako

Kung hikapon ko ang pinakagamay nga dahon
Nga napadpad sa naulipon nga mga panahon
Niagi sa akong mga tudlo nga gikan sa dakong kahoy
Gitayop sa nagdali nga hangin nilabay nagpanaghoy

Daw ang imong tingog walay paglubad
Nga ang kasingkasing ko murag naglupad
Dili masabot ang gibati ko sa Imong presensiya
Nga Ikaw gayud Ginoo ang akong konsesinsya

Kung ang bidlisiw sa haring adlaw
Midudhik sa panganod nga naglakaw
Migilak ang mga bituon ug ang dan-ag sa nagduka nga buwan
Nga Ikaw gayud Ginoo ang tinubdan sa kahayag ug tamdanan

2011/02/09

ang nahitabo...

ang pasol nga gibilin nga
nagtaroy sa daplin sa suba
walay kuha nga
isda.... og ang

kan-on og adobong baboy
nga imong gilamogan og hilo
nga gibutang nimo sa ibabaw
sa kisame
walay bagtok nga nauwat....

ingon usab ana ang kinabuhi
walay kuha bisan
unsaon og paningkamot

ang gusto mong mawala
nagtindog sa imong atubangan
atbang sa imong balay
nagpatunga sa karsada nga
gilikayan sa mga
sakyanan

ang gusto nimong mahilis
nagbabag man hinoon sa imong
tilaok nga morag tunok sa
isda nga bisan og pakawrasan
nimog iring
tapot lang gihapon

ang gusto nimong mapapas
morag mantsa sa dugo nga nauga
diha sa imong panyo....
ang pagkabalaan
milamog sa
kaulagan og gusto untang
sabton kini
sa nag-amping nga hunahuna
nga nagsamparay
bisan og wala pa gani
nakainom og
tuba

nalamog ang nabuak nga
itlog
sa tableyang gipulpog
gilamog gikutaw
sa init kaayong tubig
sa ibabaw sa haling
gilamog ang tuba og
dugos,

natawo ang koter
ug ang panultiong tulustansya

ang kabuang lang gyod sa gugma
diha sa kahubog sa mamingaw kaayong kagabhion....

nangambot ang tigulang.

og ang kang inday...

gahapdos baya pod ang
kang inday
agi sa way hunong nga pagbagnos sa
kang ondoy
ang kabaga sa iyang
kubal
wala kaabaga sa iyang
mga kusog kaayo nga
paghalhal.

ang kang dodong..

ning sayong kabuntagon
nangita og mayanang pula
si dodong
kay naghapdos ang iyang
tumoy
nga sa ngabil og sa dila
sa basa nga alingagngag
og hapit mapaaki sa
ngipon nga
wa kapugong lapos
sa tilaok ni inday

kagabii gitam-osan og
gilamoy.
nahinumduman ko ang
pagpanglaktod

bisan og lapad og sementado
na ang dalan
pauli sa atong mga panimalay

mihukom ta pangpanglaktod
sa likod sa bukid
agi sa sapa og mga
kabatoan

gikamingawan nato ang lapok
sa atong mga lapalapa

gusto natong makita pag-usab
ang kaisog sa mga mata sa bitin
sa dalan nga kaniadto
atong giagian og
ang kahadlok nga nakapahimo
natong lig-on

nanglaktod kita aron kita
magdugay.

ang intriga sa inyong kagahapon ni Vincent Marcojos...

nindot ang adlaw sa
kabukiran...linaw ang sapa...
tin-aw
nanamin ang bulan

si Vincent Marcojos naligo
sa suba
naandan na ang
paghubo,

miawit ang kawayanan
si Luis Maligro og si
Vincent Marcojos


naligo sa sapa nga tin-aw
mas labaw pa sa higala

nabasa ang ilang mga lawas
nagpauga sa ibabaw sa dakong bato
sa habog nga pangpang

nadungog ang agik-ik
tam-is ang mga panganod
diha sa ilang mga
ilok.

ang lungsod nag-ugot niining
ilang pagdakpanay
ang mga baki nga angay lang
tukbon sa mga
sawa didto sa kagulangan

ang mga Laura og Adriana nga
nagsubo
kay ang ilang mga abri nga bukton
wala masira
kay gihapyod lang sa lumalabay
nga hangin

ang mga lawak nga giabogan lamang
ang mga hagdan nga walay tunob.

ang tubag....

ang tubag
anaa sa inyong
kagahapon,

sa iyang mga
tipaka sa
kagahapon,

ang kagahapon
nga walay ugma

kay si Vincent
Marcojos, 48, lalaki,
mangkoy,
gitarista sa simbahang
katoliko,
walay klarong trabaho,
gidungog nga
kini og kana,
gusto untang mahuman
sa iyang
pagkamaestro apan
lagi naundang
kay walay ikagasto,
kaniadto newsboy
sa Dipolog,
gikapoyo ni Dr. A. K.
nagdaot og
tipos,
naayo, giakatar sa
Dicayas,
nawad-an og paglaom
nahugno ang kalibotan,
nalup-og ang
mga damgo

nag-Angelo
Reyes.

ang pangutana?

karon,
unsa ba ang
imong kalibotan
sa kinabuhi
ni Vincent
Marcojos nga
nasayod ka
man kabahin
niining ginagmay
nga butang
sa iyang
kinabuhi?

ang gipanaad ni Vincent Marcojos sa iyang kaugalingon..

sa nag-edad
pa og tulo ka tuig
si Vincent
Marcojos
didto sa Mutia
kuyog ang iyang
duha ka magulang
nga mga babaye
og ang iyang inahan
nga mamaligyaay
og bulak sa
merkado
iyang gipasaligan ang
iyang kaugalingon
nga dili gayod siya
magmasulub-on...
ang mga kamot sa kurtina
akong gigapos

ang mga tudlo sa bintana
akong gilusi

wala kanako ang hukom
sa pagpagawas

ang gihatag kanako mao
lamang ang pagpasulod

sa kahayag nga gitunol
kanako sa kabuntagon

nagpaabot ang mga dunggan
sa dahon kon unsa na usab ang

akong ipanugid apan unsa
pa kaha ang akong ipagawas?

wala kanako ang gahom sa
pagpagawas
ang gihatag kanako mao lamang
ang pagpasulod

ug busa ako napuno
ug busa ako nahimong usa ka kahilom

ning bag-ong kabuntagon
diha sa lamok nga galisod og lupad

tungod sa tumang kabusog
sa dugo sa akong balatian.

sensual...

sa tin-aw nga
tubig
nagtampisaw
ang akong
atngal

sa imong tubig
ang akong atngal

naglutaw sa
panganod ang
akong
ilok

ang mga bulbol
sa akong ilok
gihangop sa imong
mga panganod

kon kanus-a ko
gipiyong ang akong mga
mata
mao na dayon ang
paglupad ko
sa imong langit

ang akong mga bukton
sa imong mga panganod

ang akong mga ngabil
diha sa langit

ang adlaw sa akong dughan
ang bulan sa akong likuran

langit ang tanan
langit ang kangitngit
ang kahayag ang
kilumkilom
ang kapait og ang
katam-is
langit, langit, langit.
wa siyay gitipigan
og ngano nga dili mo makita

masimhot mo ang
kahumot
mabati mo ang kainit
nga misayaw sa
kabugnaw

apan wa mo makita ang
bulak
og ang adlaw og ang
bulan

naaninag mo ang mga
kamot sa hangin

gipas-an mo ang mga
bukton sa kalibotan

apan wa mo makita ang
ulo ang mga tiil

wala kini gitago kanimo
apan imong nabati

sabta nga adunay mga
butang nga dili mo makita
apan naa sa sud
sa imong kasingkasing

gihambin.

Matud Mo

Matud Mo
By Genamos_US of Washington DC, USA

Matud mo, nga imo kung gihigugma
Kay imo naman taposon karong adlawa
Aron ipadaplin ang pagbati nga walay sama
Nga kining gugma ta giampingan ug giamoma

Sa dili pa matapos kining higayon
Akong pangayoon nga imong sagopon
Ang gugma ko sa pagkaanod sa dayon
Nga ang kamatuoran imong bakwion

Gusto ko lang kining mahibaw-an
Kung manggaling kini ang kataposan
Imo pa ba akong hunahunaon sa matag karon
Bisag sa mga tipak sa imong imahinasyon

Kon sa umaabot nga mga adlaw
Kung bation ko ang kamingaw
Ang tinguha ko nga wala ka nagpalayo
Aron duawon ko ikaw bisag ako nagsubo

Matud mo, nga ikaw alang kanako
Ang imahe mo nagpabilin sa kadako
Gisaad ta sa kataposan ning kalibutan
Ang gugma ta nga mao kini ang utlanan

Sa naglibog nga panahon karon
Ang imahe mo lisod pangitaon
Nga ang imong pagka-ikaw buotan
Sa pagpangita og lain daw ako gisilutan

Kung man galing madamguhan ko ikaw
Sa paglabay ning panahon ako nakatagpilaw
Timaan nga ako gayud nahigugma kanimo
Imo pa bang banhawon pagbalik ang karinyo

Tuho-i ako pinangga nga dili tiawtiaw kining ako
Gipanumpa ko kini sa langit ang gugma ko dako
Nga alang kanimo kini akong gitagana
Magpaabot kanimo bisag unsang tuiga

Matud mo, nga ang gugma buta ug way gipili
Kung moabot kini sa kinabuhi dili kita magdumili
Basin tinood sab, nga ang atong mga pagbati usa ra
Ang importante nga ang gugma ta wala mag-inusara

Unsaon man nako pinangga, nga ikaw mobalik ug maako
Buhaton ko ang tanan aron ang dughan ko dili magbakho
Hatagi ko sa imong tam-is nga tubag ug sa pagsanong
Aron kining dughan ko dili mapuno sa mga kahibulong

2011/02/08

pahayahay....

wala mitungha ang nilalang nga
gilaayan

way panghilam-os nagtimpla sa
kape nga walay asukar

milingkod sa puti nga lingkoranan
sa ilalom sa kamuning nga puno og bulak

sa hinay hinay gihigop ang kape
apil ang tanang kalaay

gihigop ang kalibotan apil na ang mga bitoon
og bulan

kon asa niya gipahiluna ang tanan
og nganong nalinaw ang mga balod sa dagat

kinsa ba kahay nasayod sa linog nga nawala
sud sa iyang dughan?

kalooy...

sa nakita nga kagahapon
haskang sukua ang karon
nagdilaab ang kalayo sud
sa kasingkasing
ang di mapalong nga
nagtubo pa gihapon nga
gugma...

kalooy ang haling
pagtoo ang sugnod.

cenon

naghimo kag
balay nga walay
mamuyo

walay kasikas
sa mga tunob
sa mga batang
badlongon

unsay is-is
sa buhok nga nahilis?

nanobrang ngipon
sa hilang nga pahiyom

malinawong sapa
batong gilumotan

damgo...

bunga lang
sa katulugon,

bungag singot
sa init kaayo nga
kagabhion

dili bakak
apan dili sab
tinood

dili ko
damgo.

Kas-a Aduna Koy Damgo

Kas-a Aduna Koy Damgo
By Genamos_US of Washington DC, USA

Kas-a aduna koy damgo
Nga gabon kaayo didto
Daw gituyo gilandungan
Sa Angel kung giubanan

Gitan-aw ko ang matag palibot
Kung aduna bay dalan makalusot
Sa yamog nga perting baga-a
Gikulbaan ko kung ako mag-inusara

Nalantawan ko ang lunhawng balili
Nakigduwa sa hangin nagpulipuli
Kay ang damgo ko dili masabot
Kung ngano didto ko nahilagpot

Gisubay ko ang usa ka dalan
Daw nasaag ko nga gikuyawan
Gisunod ko ang kahomot sa bulak
Daw ang kasingkasing ko nakahilak

Kay ang palibot puno sa kamingaw
Nga ang dughan ko nakapanghupaw
Ang kalinaw nagpasulabi sa palibot
Uban sa alimyon nga sigeg nunot

Sa tanto kung paglakaw
Yamog inanay pagkahanaw
Niluta ang bulak nga humot
Gikuha ko aron masimhot

Sa dihang akong gipupo
Nabukas ang langit gituyo
Nasiak ang bidlisiw sa haring adlaw
Uban sa nag-arko nga bangaw

Sa paghibulong ako nakamata
Kay gipukaw ko sa akong mama
Aron si Dodong makapamahaw
Uban sa damgo ko nga nahanaw

Panginhas dire