2016/05/31

kaniadto

gipamalantsa niya
ang tanan

ang akong pantalon
polo shirt
barong 
panyo
shorts, briefs,

hangtod na kini
sa tungang gabii

nalooy sab ko apan
unsa bay
akong mahimo?

gibuhat lang niya
ang angay buhaton isip

rayna sa among
balay, 

ang raynang dili makatulog
kay unsa pod kaha ang
iyang gihunahuna?

niining among pangidaron
akong balikan ang
among kabatan-on niadtong
dili siya usab makatulog

walay bisag usang nilabhan
bisan unsa ka kusnot
iyang plantsahon,

nausab na ang panahon
dili na sama sa kabatan-on

wala kaniadto ang mga
plantsahonon
apan mihapla man siya
dayon

wala na mangilabot sa
kalibotan
kon kinsa ang mauna
maoy moasoy sa
kakusog sa hagok

ang banga

ang banga
gitindogan niya
ang gipili 
nga kahilom

apan hangtod
kanus-a?

adunay bato
nga mahisalaag
unya
madagma diha
kaniya

mabungkag
man ugaling
molanog man
ugaling ang
tingog sa
pagkabuak

apan bisan pa
kon mahugyang
man ugaling

diha sa mga tipak
magpabilin gihapon
ang gipili nga
kahilom

nasabtan ko kaha?

gikamingawan 
ko ang 
iyang kilid, niadtong
gikan siya
naligo sa dagat,
walay
sapot, gamay lang
ang tabon
dapit sa iyang
kilid,
dunay mikamang
sa akong
pus-on
gigilokan ko
pag-ayo
apan akong 
gipugngan

gikamingawan ko
apan dili ko
na gusto pa kining
mahinumduman

basin maoy akong
kapalaran
ug nganong ako
mang
gibalibaran ang

kagilok ang
kakatol
ang kasakit nga
sagol 
sa lami

didto sa iyang
kilid
samtang gitangtang
niya ang
tanan
nahubad nako
ang hikot sa akong
kaugalingon

ang dakong tigmo
sa akong
kagabhion
akong natubag
sa tumang pagkatulibagbag...

magtiayon

ang tinud-anay nga
pagtipon,

bisag dili na gani
mo kaila, anaa

nagtupad gihapon sa
katre sa kagabhion, bugnaw

ang hangin, hait na ang
kahilom nga

misamad sa atong mga
dughan, apan tiunay lang

kita gihapon,
nagkuyog ning kagabhion,

sa kaadlawon
nga mas mamingaw gitapakan

ta ang mga buho sa atop
diin natagak ang ulan sa

atong mga sugilanon, sama
sa bisan unsa na lang, 

wala na gani kini tinguha
nga makadunggo,

lawod ang kasakit busa
ania kita

mihabol sa mga balod
sa atong mga pulong

hangtod nga nabati nato
ang kainit sa atong


mga ngabil.

sa dihang

sa dihang
wala ko
katingog.................................................................................................................................................................................................................................................mas daghan ko hinoon  ug nahibal-an.

2016/05/30

bato

miabot ang panahon
nga wala nay
atrasay,,,,

kana bang puros
nga lang padulong
didto
bisag wa ka kasabot
bisag wa ka kabalo kon
unsa gayod ang
tua sa tumoy, basin
mahulog
tang duha, apan

kining panahona sama
ra sa pagkapalong sa
kataposang hunat sa
kandila

wa nay atrasay
total hapit na man sab
mahuman

bisan god og kabalo ka
ang ang gisugdan
puros bakak, miabot na

gayod ang panahon
sa pamahala, di na
kinahanglan pang mosulti
ka nga
wala ka nay gibati human
sa tumang kasakit

sa usa ka bukid nga
pag-antos
sa pito ka sulog nga
luha....

hait kaayo nga sanggot

ang dili nako
mahikap akong
gidamgo

akong gikulamos
hangtod nga
ang migawas dugo

unya nahigmata ko
nga nahigmata gayong
tinooray

kuyog sa saad nga
dili na gayod nako
buhaton kadto pag-usab

kay sa dihang
tua pa ko sa sulod
durong katawa
ang  hait ug taas
kaayo
nga sanggot

kagaw

kabalo kos akong
gipangita
kabalo ko kon asa
nako kini
makuha

kabalo kos akong
gihandom
sa akong gikahinaman
sa akong
gidamgo

kabalo kong matulog
aron makalimot
momata aron magsugod
na usab

kabalo kong motago sa
akong duha ka
palad
kon asa usab ang pultahan
sa akong mga tudlo
aron ko makagawas
nga mora lag
walay nahitabo sulod
kanako

sa maong kahibalo
magkahibalag na usab kita
kaila ka nako
kaila ko nimo

magtagbo ta apan mora
tag dili kaila
apan sa usa ka kihat lamang
o diha ba
sa pagpaak sa pikas ngabil

sayod ta nga kinahanglang
walay  mahitabo
tali kanato

gabii na
unya ang pultahan sirad-an
apil na ang mga
bentana

hadlok tang duha nga
dunay
mosaka nga walay labot
unya
ang iyang pagtugaw
alang kanato
kagaw.

dead sea

ang giingon nilang
asin nga
asawa ni Lot
anaa pa gihapon

sa pikas bahin anaa
ang saudi arabia 
tupad ang jordan unya
ang nag-agi sa tungang
bahin mao
ang patay nga dagat

sud sa kasingkasing

kapoy sab og sunod sunod sa linya
bisan dunay hunong kadyot
pahulay ang usa ka tiil
pulihan sa pikas tiil

kon mohalok sila sa bato 
nga mao kuno ang gihilakan ni
kristo
mohalok ka usab

ag didto sa iyang gikamatyan
mihapa ang tanan
misunod ka usab og hapa bisan
na gani og
nakita ang katunga sa imong lubot
kay lagi
hugot ra kaayo ang imong
karsones

gipangita nato ang tunob ni kristo
ni moses
ug uban pang mga karaang balaan
sa atong nanglabay

gipangita nato ang Ginoo sa bato
sa balas sa
langit, unya sa kataposan dihang
mibiya ka moingon ka

kasipyat ba nako 
bisag asa na man lang
unta akong balikon ang akong
gituhoan nga ang
Dios dia ra natulog sulod sa
lawak
sa akong kasingkasing
gikapoy sa kagubot sa daghang
panon
sa bagang agas sa
tubig nga katawhan

gidili man

sila ang daghan untang
isulti kanimo
apan walay gahum, o kon
duna man,
dili sab kasulti kay dili
angayan isulti
ang dayag nang daan nga
sayod kang
dili gayod kini nila madawat
bisan
kon ingnon ta nga masabtan
ra nila
apan dili gayod madawat
bisan pag
ingnon tang
nagustuhan usab sa uban

sa maong hinungdan
kon mabasa mo kini moingon
ka nga
nganong nagtuyok-tuyok man
ang unta higayon na
nga itul-id ang maong pagsugid
unya moingon ka
nga walay kay nasabtan apan

sa tinood lang sayod ka kon
unsa gayod kini
apan sama nila dili usab nimo
mayubit

kay lagi,
gidili man.

2016/05/16

sakto pod diay mas maayo na lang

sa laing bahin
kon imo kadtong gibuhat
andam ka na kaha
sa bugti sa kalipay?


dili tanang kalipay
bugtian og kalipay
dunay gamayng tipik
nga ang bayad
mas sakit ang hagtik


sa laing bahin
ngano ba nga ikaw 
wala mibuhat sa imong
mahimong buhaton?

tugkara pag-ayo
ang imong wala mabuhat
kon imong pangutan-on
ug tagsa-tagsa
pagkadaghan gayod sa
giandam nga mga
katarungan

nga bisag di ka ganahan
mamati
apan musurop kini diha
sa imong kaunuran unya
kon mabati mo na ang
kasakit sa gimartilyo nga
lansang
makaingon ka

sakto pod diay
mas maayo na lang....

nagpugong sa katawa....

ang wala makubit
nga isda sa
sapa

ang ginhawa sa hangin
nga gikan sa
dagat nga
wala mahanggab

ang usa ka hungit sa
kadaghang hungit nga
wa sugod mahungit

ang lawas nga wa sukad
mahikap sulod
sa usa ka hugna sa
tibuok nimong kinabuhi

ang wala mahagki nga
aping
ang dila sulod sa dila
ang mga tudlo nga natikig
sa mga paghandom
lamang

nganong wala mabuhat?
anaa ang panahon milabay na
giagian ka
nagpugong sa iyang katawa.

laing imahinasyon....

ang itlog nga imong
giprito
mat-an apan dili
sama sa pinya

ang cyclop sa kaha
dili maldito
dili kamaong mobuno
ug bato
sa bunguton mong
dagway....

ang cylop nga kausa
ra nimong gihungit
sa pangag mong ngipon
ra giangkon.

puros gadungo...

kon ikaw na gani
ang mosulti
mamati ang tanan
walay mangutana
sa kahadlok

sa kalibotan nga
dungo-dungo
ang tanan puros
pareho nimo
kadto siya ikaw 
kadto silang tanan
puros ikaw

ang sud-an hakang  asgara
apan walay motingog
walay mobara

ang mga anino nangabot
dungan sab silang kawala
walay naningkamot
nga mahimong siya 
walay nagdali aron mabuhi
puros misunod
puros nagpaabot lamang
kon unsa ang sunod
kon kanus-a ang tapos.

didto sa pikas tampi sa akong samin

wala ko nalipay
niining panghitabo nganong
sa kanunay ang
tinood kong ginadamgo
atua man
sa pikas tampi sa akong
samin....

sa ilalom sa katulugon
didto kami magkita
maghalok 
maghambin sa among
mga pangandoy
giwala na dayon ang
mga paghandom

sa usa ka kihat 
mawala ang tanan
sa usa ka pagmata
mobalik ang mga balaod
gihiktan ang akong mga
kamot
dakop sa lawas
guwang og
huyang.

2016/05/14

ang mga sunugon puhon

makapangutana baya kita
usahay, nganong ang mga badlongon
maayo man hinoon ug mga
nadawat sa kinabuhi? 

kadtong palahubog mao man

hinoon ang nahimong pari sa
inyong lungsod, 

kadtong igat, mao may giminyoan

sa mayor
unya kadtong kurakot sa salapi
sa gobyerno maayo mang
pagkaasenso

daghang sakyanan ang mga kawatan

pagkadagko sa ilang mga balay
ang mga kidnappers , ayay, napuno
ang ilang mga katribu sa kadaghan
sa natigum nga dolyares

aw hinoon, dili ta angay nga masina,

kitang nagpakabut-an dili man maghandom
nga diring kalibotana ta molungtad, 
kay lagi, sa walay kasumo, nagtoo man
kita nga dunay langit, unya silang 
nagpakadaotan, didto man sa ilang
impyerno pagasunugon sa kalayo 
nga hangtod sa kahangtoran wala
gayod kunoy pagkapalong...

madungog mo ang tingog sa kahilom.

sabta nga kining
mga balak
yawyaw sa kalag.

ikaw nakigsandurot

sa imong kaugalingon
nga mora bag ikaw duha
ka buok diha sa imong
lawas, o kaha ba sa
lawak sa imong
 kasingkasing.

nianing bahina dili

ka kadungog nga dunay
mosungog unya ingnon
ka lang nga ikaw naunsa
ba nga mora mag
gidungoy o giatay.

kini man gong 

pakisulti sa atong
kaugalingon wala diha
sa binuang. 
ang-ang naman og 
ang imong kaugalingon
imong yagayagaan.


makaingon ta nga kini

tinood. Walay komedya.

sa lugar nga ikaw 
makiglamano sa imong
kaugalingon, nakighinabi,
madungog mo ang 
tinood nga tingog 
sa kahilom.

wala daw tay buot pa. kon maghisgot ug gugma.

naulaw ko kaniadtong
misayaw kog lambada
diha nimo. Pasko kadto
unya ang imong gisuot
binurdahan nga blouse.
Itom akong karsones 
unya puti ang polo.
Gisura ko nga murag
si jose rizal. Unya ikaw
kuno ang akong josephine
bracken. Abi mo dunay
kagilok ang gibati sa 
akong ilok, labi na adtong
gihapohap sa akong mga
kamot ang imong bukton.

duna tay larawan nga 
akong gitagoan. Black
and White. glossy, unya
ang kilid gikitkitan na
sa ok-ok nga seguro
wala nahilo sa camphor
nga akong gibutang didto
sa aparador ni Tatay.

wala pa daw tay buot 
kon maghisgot ug gugma.

paghawan...

gisulayan na nako ang
paghangop sa mga yano lamang
wala na ang bulak nga atua
sa florera
gani ang tubig didto natunga
naman
seguro tungod sa kainit sa
panahon karon

gipatangtang na nako ang kurtina
nga seda nga puti
nga morag putong ni mama ang
panapton kaniadto

gusto nako nga hawanan una ang
tanan pati na gani ang lamisa nga
gikan sa kahoy nga nangka nga
tinanom ni tatay sa bata pa siya
apil na usab ang
mga bangko didto sa tungatunga
sa balay

ang akong lawak nahimong usa 
ka panigahan nga walay sulod
ang gitakos karon mao ang hangin
nga tumbas sa kahaw-ang nga
gibati sa dughan, 

ang mga yano ang mga paghaw-as
ang ubang gipanglabay nga wala 
na alisdi, sama nianing tanan mao
ang sinugdanan aron sa ikaduhang
hugna dawaton ko ang kinabuhi.

ang gibating kahadlok

mahimo baya nga moadto
kita dapit sa lalom
sakay sa sakayan unya
ako ang magbugsay

nagkalo ka nga milantaw

sa unahan
mora kag namasol gamit
sa imong pahiyom

wala nako hisgoti kanimo

ang akong gibating kahadlok
sa ilalom sa akong 
kasingkasing nga basin 

og ako ug ikaw matuwang
unya ako nga dili pa kaayo
kabawong molangoy dili 
kasalbar nimo.....

kabuntagong kalinaw

diha sa mabaw
miabot ang nipis nga
balod sa dagat

kadyot lang kini
kay mibiya man 
dayon

2016/05/13

bato, papel, gunting

kon nganong migawas ang
gunting
tungod usab sa papel
sama sa ang bato anaa
tungod usab sa 
gunting

modaog mapildi
maputos matabas
mapangag

anaa ang saktong panahon
ayoha og hunahuna ug
timbangtimbang ang tanan

atubangan sa gunting
kabalo ka nga unta bato ka
atubangan sa bato
kabalo ka kon unsa ang
imong papel

hunahunaa ang kadaogan
anaa lamang sa imong
kaandam kon unsa ka 
atubangan sa diha kanila.

sa tinood lang

sa sulog
magpaanod-anod
hayahay ang
pagsubay diha
sa abay-abay

wa kay ngalan

kuyog sa tanan
dili ka mahisgotan
ikaw ang tanan

mahimong hayahay

apan sa tinood lang
wa sab ka malipay.

2016/05/12

ang di makamao

naglingaw-lingaw 
ang di kamao
gipalimpyohan ang mga kuko
gipasinaw, 
nagpaputol sa buhok
nagpahumot
sayod ko kon unsay iyang
buot ipasabot
kay lagi di man makamao
basin bawion na lang 
sa iyang  pagkaasyoso...

suso sa sapa ang mga tanghaga

nangalap tag
mga tanghaga
nga morag
suso sa sapa

pag-abot sa balay
akong gihugasan
dayon gitunuan
gipanakotan giasinan
gitusok gituhog
aron makaon ang
unod.

kabahin sa akong manghod

ingon ka
naa kay bag-ong batan-on
karon
maayong moakatar nimo
kaysa imong
asawa, 

nangutana ka kon
pilay gasto sa annulment
sa kasal

ingon ko
" mo-out na ko
kay wa pa koy
hilam-os
wa pa koy ilis"

mamahaw pa sab
ko sa akong
giluto nga piniritong
pirit
ug nilung-ag nga
saging,

kay wa koy batan-on
bisag pod ganig wala poy
asawang nag-akatar nako

pagkabugoy jud nimong
manghora ka
bisan pa sa gagmay ta
bisag naay paa sa manok
sa imong tuong kamot
ang imong wala
nangita pa gihapog
balbacua

mas dako ang imong
mata kaysa sa imong tiyan
unya pirming guot nimo
ang imong purol

walay pulos nga uros-uros...

maayo nakong pagkalangan
dinhi
mitapot kos
lingkoranan nga kawayan
nawili kos
hagdan nga
sal-ang

wa na hinoon nako mahimo
ang angayan unta
nakong buhaton

apan sagdi lang
ingon ani man god kaha ang
kinabuhi

ang ganahan dili makatabang
ang makalangan 
saktong pagkalangan
walay nakuha nga kahangpan

apan sagdi lang
kay sa akong pagkalangan
ako nalipay man

bisag napandol kos hagdan nga
pangag
bisan og nasunog ang akong
sampot
sa init nga kawayan

salamat lang gihapon
salamat...walay pulos nga uros-uros...

kabahin ni D ug G....

ang abra siete
dili kasaligan

apil na ang agbay
agbay

kay abi kog
hapsay ang inyong
pagtubaytubay

dekorasyon ra man
diay
sa usa ka panimalay

halok ba diay to
ni Hudas
katawa sa unggoy
kihat sa
kawat sa silingan
man naliwat?

Panginhas dire