2018/08/29

buhi kaayo nga kalag sa lawas nga kamatyonon.

gisulat ko kini
sa panahon nga busog ko
unya katulgon

gusto nakong matulog
mohay-ay sa sofa dayon
mohagok unta

apan wala kini mahitabo
kanako
ania nagsulat ako nga
katulgon

abtik ang mga tudlo
luya nga mga mata
buhi kaayo nga kalag
sa lawas nga
kamatyonon.

2018/08/28

Bakak nga pagtu-o


I
Pagkahuman niya'g kaon sa letson
gihasol siya sa iyang kunsinsya
kay dili tanang lami makaayo
sa lawas ug espiritu

II
Bakakon ang adlaw
nga nalunod sa dagat
dili  maka-uga sa luha
sa kagabhion

III
Padayon og sulat
gamit sa bolpen mong walay tinta
para subayon ko ang imong tunob
nga gibanlas na sa baybayon












kon unsa

kon unsa ang gihatag
mao usab ang akong iuli
kon unsa ang giuli
mao usab ang akong hiposon
kon unsa ang akong hiposon
mao ang akong bililhon
kon unsa ang bililhon
maoy akong hangpon
kon unsa ang akong hangpon
mao ang akong dag-on
kon unsa ang akong dag-on
mao ang akong gibug-aton
kon unsa ang akong kabug-at
mao ang akong kalangay
kon unsa ang akong kalangay
mao gayod ang akong kalaay
kon unsa ang akong kalaay
mao ang akong hunahunaon
hangtod na kini
sa akong kamatayon

2018/08/27

sa kanunay gayod nagmabinantayon

misiplat kos imong
mga mata
nga milantaw kanako
nga nangutana kon
anaa pa ang gugma

mipahiyom ko
kuyog sa dili nako 
masulti nga
dili na

milahutay kita
pinaagi sa pagpasensya
mipanaw kita
diha sa pag-agwanta
hinoon dunay gamayng
mga katig sa
pag-amuma sa pagpangutana
kon asa ka
ug kanus-a ka moabot
ug nag-unsa ka karon
o unsa ba ang imong
dalhon sa
pagpauli sa atong
balay

nalig-on ako 
sa usa ka pagtoo
nga dili ang gugma
ang akong gikinahanglan
kondili 
mao lamang ang
pagsabot 
nga ikaw mao ikaw
ug ako mao ako
ug sama sa mga sanga
nga lig-on na kaayo
dili na kini 
kinahanglang bawogon pa
kon kon imo
kining buhaton
mabali na lang kini
hinoon

ganahan ko niining
atong kabutang karon
dinhi sa isla
sa atong ibabaw ang adlaw
ug mga panganod
sa atong palibot ang 
dagat nga tin-aw
ang pagkaasul
unya anaa ang mga
isda 
naglangoylangoy
nga morag walay
padulngan

ang atong gitumban
mga dugmok nga koral
mga batong karaan

samdan ang akong tiil
hait ang mga bato dinhi
sa unahan naglagitik ang
kaitom sa mga tuyom
unya kita sa atong nakita
hadlok kaayong matunok
busa sa kanunay gayod
nagmabinantayon

ang target

sa sulod sa sakyanan
dili nato mahibaw-an ang
kakusog sa
atong dagan

sirado man god ang
mga bentana
unya mas kusog ang
atong mga katawa
kaysa tingog sa
makina

laming tam-oson ang
rambotan
unya ang mangosteen
tam-is nga dunay gamayng
pagkaaslom

makita ang mga mata
sa dalaga
ang mga mata sa
ulitawo diri
kanato
bisag ania nagkamang
nag sugod ang
atong mga pangidaron

kitang tanan dinhi
puros nangitag kalipay
kon aduna may gihuptan
sayod kita nga kini
dili magdugay
sama sa mga buwak
nga atong gipamalit sa
dalan
nga nalaya ug atong
gipanglabay

sa tinood lang
unsa ba gayod ang kalipay?
dili ba kana
hunahuna man lang 
nato?

ganahon ko sa atong
giagian
mas suheto si fritz niini
kining laktod
nga walay mga kaatbang
sirit hanoy
unya wala gani nato
damha
nga diay miabot na kita

sa usa ka gamayng pantalan
diin ang usa ka barato
nagpaabot na kanato
aron ihatod kita paingon
sa atong
gitarget nga isla.....



ang nagpabilin

nangunot na baya ang 
imong agtang
dili na ikapamakak ang
imong pagkatingowang
nga wala sab 
mamakak sa batan-on
nimo kaayong uyab nga
matod mo
nalibog ka hangtod karon
nga iya ka bang
gihigugma

matod sa iyang nanay
panahon lay alagdon
kabahin sa inyong
relasyon

daghang nanaway bahin
niini
58 ka na unya ang lalaki
18 pa
nangyam-id ang imong
mga higala
apan kabahin nako
maoy akong ingon kanimo
hangpa samtang init pa
tam-osa ang kalipay
samtang anaa pa ang
kabuntagon

kon magtalikod ka
pwera buyag 
nindot ka gihapon lantawon
puti pa gihapon ang imong
mga paa
itom pa gihapon ang itom
mo nga buhok

ingon sila 
mag-unsa ka na usab kaha
sa sunod nga panagbulag?
matod ko
unya na inig abot niana
tagamtama ang karon
kay mao lamang 
kana ang nagpabiling
matood. 

2018/08/24

Ulahi na ang tanan

Inanay nga mitusak sa kagabhion
sa akong utok ang gatulo nga tubig
gikan sa guba nga gripo

Giapangita ko ang tubag
sa badlis sa langit
nga gibiyaan sa kahayag

Dili na mahulma sa akong baba
nga puno sa mga pulong
nga dili ko malitok














2018/08/22

ikaw

misulod ka sa lawak
diin ang higdaanan
nabali tungod kay ang
upat ka mga tiil
niini mihangad man sa
nawong sa kisame

diin ang imong sapatos
mitungtong sa tokador
nangitag kasayaw
ug kuyog sa lakaw

diin ang tasa nga puno sa
kape namugnaw
kay walay ngabil ug dila
nga misulay pag-inom niini

diin daghan ang mga dili
angayan
diin daghan ang sa imong
panglantaw 
sayop ug angayan gayod
nga ayohon
o dili ba kaha paphaon

ania ikaw ang bantogang
manunulat
nga usa ka adlaw niana
miayo sa tanang nabalintong
sa tanang nangabali
sa tanang nangabuak
sa tanang nangabugnaw

ikaw kana. ikaw ang bantogan.
magbubuhat sa balak
magbalantay sa nangawala.

kagawasan

dili maot ang
reyalidad
tungod kay kini
ang kamatooran

dili maot ang kamatooran
sama kini sa tanang
reyalidad nga ania
kanunay naghagwa
kanato

kanus-a lang ba nahimong
maot ang naghagwa
kanato?

kanus-a lang ba nahimong
bakak ang kamatooran?

kanus-a lang ba nahimong
maot ang kamatooran
ang mga kamot nga midakop
kanato
mihawid 
mikupo sa atong mga pako
dayog tugyan kanato
sa hawanan sa kahanginan
diin didto
gitagaan kitag kagawasan

duaw

matag tungang gabii
giduaw mo ako
unya ako mahigmata sa
usa ka damgo
dayon anaa ako nakigharong
kanimo
nangamuyo
nakighinabi pag-usab
samtang ang kangiob ning
lawak
nagpunay ug pamati 
kanato.

pasalamat

giampo nako nga
unta ako dili na mahigugma kanimo
ug kini karong adlawa gihatag
sa Ginoo

wala nay nakitang bulan
sa kagabhion ang akong mga
mata

wala nay adlaw nga mabati nga
midap-ig sa akong bukton
sa akong dughan

giampo ko ang kalipay nga
hilabihan
nga karon gihatag na kanako
sa Ginoo

ug busa ania ako
nagpasalamat sa mata nga
nakakita
sa dughan nga mibati
sa kamot nga mitago na sa
akong bulsa
kay dili na ganahan
mohikap sa kaanyag nga
sukad sukad dili gayod alang
kanako

2018/08/11

ang dili nako malitok

gibati ko ang pulong
nga anaa 
gitandayan sa akong dila
sa akong
alingagngag

gustong mogawas
aron akong litokon
apan hangtod karon
tibugol lang
gihapon

morag it-it nga nag-ung-ong
sa buho diha sa kilid sa 
lubi nga katumbahon
tungod sa iyang
 pagkagabokon

2018/08/10

gikapoy nga mga mata

ang gikapoy  nga mga mata
morag mga nilabhan nga iyang
gisablay sa sanga sa
bayabas

unya ang mantika sa baboy
mikaging sa kabugnaw sa hangin
nga miabot sa kaadlawon
diha sa sulod sa garapon
diha sa gitay-an na nga 
tabon

b a l a k

nabati ko ang balak
sa kahumot sa mansanas
sa kapuwa niini sa iyang
kasinaw

nabati ko usab kini sa 
mga maleta nga anaa
andam na diha sa kilid
sa kalsada
nagpaabot sa taxi 

nabati ko ang balak sa
suwang sa mangga nga
hinog nga natagak didto
sa lapokon nga balilihan

gibati ko ang balak ning
atong pagpakahilom samtang
ang mga piniriso
naghinamhinam sa ilang
gidamgo nga kagawasan

Tam-is Ang Gawasnon

Dihang gibuhian ko ang pamasin,
nasiplatan ko ang kagawasan

Dihang nakalingkawas ako sa kasakit,
nakita ko ang tinood nga kalipay

Dihang nakita ko ang tinood nga kalipay,
wala ko na siya gihandom

Giputol ko kaniadto ang akong pako,
apan mitubo diha sa pag-amgo

Siya ang bula nga akong minao-mao
sa gikuso-kuso kong mantsa

Giduholan ko og pagkaon sa tawong gutom,
dili to ako niadtong tunghora

Panday siya kaniadto nga walay martilyo,
naguba ako sa bakak nga pagtuo























2018/08/09

tambag niadtong nagdalidali

kon ang mag-una 
ipaulahi
unya ang naulahi
ipauna
nan ang tunga 
magpabilin sa tunga
nga mora lang ug
wala.

2018/08/08

maskara

ang akong 
maskara dili mo
makita

wa sab nimo
mabati ang kabaga
sa akong
nawong

ang akong palad
gikubalan na sa
dugay nga
panahon

ikaw nga maglantaw
nako
sayod ko 
kakan-onon

gibalewala lang nako
kini
wala mo pa natungkad
ang tanan

ugma puhon kon
masayod ka na
sabta na lang nga
kitang duha
wala gayod mag-ila

wa nay balikan

daghan pa  baya unta
kog balikan diha
apan 
dili na, kapoy na
sayang lang ang mga
adlaw

ang gitanom nimong
santan
wa maghimpos
ingon ka pula ra ba
gayod unta ang
buwak niini nga pungpong
nga nindot kaayong 
lantawon sa ting-init

kadtong punoan sa 
kalachuchi nga kusog
kaayo mamulak
nga kaniadto didto ta
mopasilong sa ting-ulan
nga ang bugnaw nga hangin
misurop sa kahumot usab
sa mga buwak

giputol na man diay sa
bag-ong nakapalit sa
maong luna

magsakit lang ang akong
dughan niining mga
butanga
busa diri na lang ko sa
lugar diin ang akong bag-ong
uyab
kon matulog wala gayoy
hagok.

ang butang nga anaa duol lamang sa imong mga kamot

ang butang nga
anaa lamang sa imong
duol nga gani makab-ot
mo man
karong higayona
nakahukom ka nga dili
mo kini
hawiran

dili tanan nimong 
gihigugma 
makaayo kanimo
dili tanan kon hinuktukan
gayod
nga imong makab-ot
sa tinooray, dili makalipay.

2018/08/07

dinhi sa kangitngit

dinhi sa kangitngit
wala na ang akong lawas.
usa lamang ako ka kahumot.
matagna mo ang usa ka 
buwak, o usa ka klase nga
prutas,
o ang usa ka tingog.

mas tinood man god
kon wala na ang unod, o
ang bukog

dinhi sa kangitngit
nagkahiusa kita sama sa
asukal ngadto sa tubig
sulod sa tasa
giayo ug kutaw.

ang imong mga mata nga isog

basin nasayop lang kaha
ako nga galantaw sa isong mong
mga mata
sa dihang gihawiran ko ang
imong paa.

wala ka man god motingog
bisag masuko man lang
bisag iwakli mo ang akong mga
kamot dapit sa imong
bilahan

mas maayo unta ug nasayop ako
diha sa isog mong mga mata nga daw
punyal nga mitolisok kanako
diha sa kahadlok,

nagsadya ang akong mga tudlo
sa tumang kalipay
wala kini mga mata sama sa imoha
misakay lamang kini sa sulod
sa mga pagbati
sa mga buyog nga hangtod kanus-a
dili gayod mapul-an sa tanang
mga petalya.

ang akong kape sa tungod

naay kape nga init
sa akong tungod

ang akong gikalipay
mao ang iyang kainit.

galantaw ko kanunay
sa akogn gisulat.

ang akong gikalipay
nalimtan.

bugnaw na, wala na
say lami .

kahadlok

gisulod mo ang
langub
aron ka mokulob

gihangyo ang kahilom
sa usa
ka paglaum

ang kalipay didto 
dili na masukod 
nimo

unsang hitaboa
palihog
suginli kami 
ngano

migawas ka man
dala ang 
usa ka dughan nga
kahadlok

Panginhas dire