alang sa kalaw nga imong gipriso diha sa hawla nga puthaw

dili nimo mahimong imoha
ang kalaw nga gihawla 

matag buntag nanawag kini
ug panabang nga unta imo siyang
buhian

matag oras gisugid niya ang 
kasakit sa iyang mga pako nga
dili makalupad

pila pa ba ka adlaw ayha siya mamatay
diha sa imong pag-angkon kaniya?

ikaw nga walay pako, mabati mo ba
ang kalaylay sa pako nga kanunayng
gipiko?

kining kalaw, kon aduna pa siya kamot
kon ang iyang tuka usa ka baba

dugay ka ra unta gayod nga iyang gilud-an
sa makadaghan
dugangan pas sagpa nga walay undang!