alang sa usa ka magbabalak nga naghandom sa mga ganti sa pagsulat

ang korona nga imong
gipangita
dili mo na makit-an

gikasakit mo kini

ngano ba nga ang imong
kinabuhi
gisukod mo man sa maong
korona

dili ka hari

adunay tingog sa wanang
sulod sa imong
kasingkasing

pamatia kini
dili ka hari

moduko ka sa pag-agi
sa adlaw
moiyak ka pag-abot sa
bulan
moluhod ka inig abot
sa panganod
mohangad ka gayod kanunay
sa mga bitoon

kanunay magaingon
ang tingog
dili ka hari

hubo ka nga mag-atubang
sa dagat
kan-on ka niini sa iyang
kaasgad