tubaga, tubaga kining mga pangutana panuway, pasaway kolera ka

aron ka dili mawala
dinhi
o kaha ba mawala sa
imong kaugalingong
mismo

kinahanglan naa kay
uyab nga kakaw-itan sa
imong kamingaw

makawala ang kamingaw
makabuang ang kasakit

aron dili ka masakit
kinahanglan mo ang usa ka
kabit
nga maayo kaayong molikitlikit
sa imong mga kasakit

kay ang likitlikit og sikitsikit
nga pilitpilit
mas molami man gyod
ang mga pasiplit

aron ka dili mawala sa
pasing
maghimo ka og daghang
mga anak
aron ang imong balay
mapuno sa kirigkig og
mga patikig

aron dili ka maguol kinahanglang
daghan kag sapi
aron imong mabubo sa hardin
sa kawad-on

apan makalibog baya
nganong sa kabuhong mos tanan
ikaw nawala man gihapon

wala ka didto wala ka diri
nagkadto ko to way ka to
nagkadto ko di way ka di

di man unta wakwak apan
nganong ikaw wa man gihapon
miabot sa mga kagabhion
nganong ikaw nawala man gihapon
sa kaadlawon

di ka man unta tagolilong
apan nganong nawala ka man
bisan pa sa imong kaugalingon?

tubaga, tubaga kining mga
pangutana
panuway, pasaway
kolera ka

di ka man kamaong
mobayad og utang.