gusok

nasabtan mo na ugaling ang
sugilanon sa mga gusok nga
gikuha sa kilid sa tawo aron 
kini himoang sumbanan sa 
balak, sa laing mga sugilanon
diin dili na angayang angkonon.

matag gusok, matag sakit sa
paglangkat, matag tinga sa 
pagbali ug pagtisok sa laing
kiliran, ang gusok mosyagit
sa usa ka kapait nga nahiaguman
human kini mawala sa iyang
gigikanan, ang lawas nga 
nagpabiling buhi, ang mga 
mata nga anaa naglantaw sa
kalapad sa dagat, ang mga
dalunggan nga anaa nagpamati
pa gihapon sa mga sugilanon 
usab sa mga balod sa kinabuhi
gikan sa mga nasaag ug napadpad
sa mga bag-ong baybayon.