giadto ko ang ilang lugar
bibo, bibo gayod
namulak ang ilang nataran
apil na ang mga alibangbang
kadyot ra ang akong paghunong
dalikyat lang sa paglantaw
wala na ang pagbati ko kaniadto
wala na ang kahingawang
wa ko damha mas malipayon ako
sa akong pag-inosara
mamulak sab ang akong hardin
apan dili na nila kini makita
sirado na ang akong balay
nagduka na ang mga bentana
bisan gani ang akong pinanggang
iro dili naman makasulod sa pultahan
nga bulawan, sa kusina nga nag-aso
sa dapog nga gakayo, sa lamesa
nga puno sa pagkaon nga daghang
ilimnon, unya ako ania, hubog
sa kalipay, unya matulog na aron
sa damgo manikaysikay.
