sa dihang misulpot ang mga pangutana

ang mga unggoy sa
lasang
nanagdula sa mga bagon
sa kahoy

malipayong namupo
sa mga hinog nga bunga
sa lasang

ang usa ka mag-uuma
nagdaro sa iyang luna
nananom ug mais 
ug mga salag-on

milabay ang mga bulan
nanagko ang mga mais
namunga
unya panahon na sa
pag-ani niini

ang mga unggoy
nanganaog sa kahoy
aron manguha usab sa
mais
nga ganahan nilang
kan-on

nga karon miingon nga
kining tanang dinhi
iyaha man sa Kinaiyahan
busa pagasaloan gayod
sa tanan

naglagot ang mag-uuma
nga mikuha sa iyang sundang
nga mitakbas
sa mga unggoy nga
nagsurangsurang kaniya

dinhing dapita misulpot
sugod ang daghang pangutana

unsa ba ang hustisya?
unsa ba ang mais?
unsa ba ang panagsalo/
makatarunganon ba ang
pagtikbas sa mga unggoy
nga sa kagutom 
mangayo lang ug bahin sa
mais nga dili nila tinanom?
alang asa ba ang kahago?
kinsa ba ang tag-iya?
kinsa ba ang gidaog-daog?
kinsa ba ang tapulan?
para asa ba diay ang kakugi?
kinsa ba ang angayang 
mokaon sa mais?
sakto ba ang mga unggoy?

bomba

karong adlawa
gibombahan ang 
katedral didto sa
jolo

daghang mga patay
ug angol

apil sa patay ang
akong classmate kaniadto
sa high school
nga si Moloy

apil sab ang iyang
asawa nga si 
Leah

karong adlawa walay
magpakaon sa tulo nila
ka mga poodles.

karong adlawa ang
bato nga kasingkasing sa
jolo
magdugo 

mahimong pula ang
suba ug dagat

langto, baho
nga mosurop sa
kaunoran sa atong
kalibotan

mt.Fuji and the Suicide Forest

wa damha
nakaabot ko ning lugara

nakagakos ko
nakapahalok sa imong
dughan
napahulay sa imong
tiilan

wa damha
nga nabati ko ikaw
sa imong
kabugnaw

gikalipay ko kadto
gawas lamang
adtong akong
nalabyan
nga kakahoyan
diin ang kasagaran
mosulod
aron dili na mobalik
pag-usab

sa kan-anan sa shanghai

Add caption

dili na nato
awayan kon papuno
na ang baso
o pahurot na kini

kon ang kutsara aduna
bay mantsa
kon ang tissue gamay ra
ba kaayo

kon nganong dugay ang
sabaw ug ang
kan-on nganong halhag
ra

di sab ko mamugos kon
dili ka
kamaong mogamit sa
chopstick

ang kalinaw mao na ang
pagbuhat lamang sa angayang
buhaton

di na ko mangutana
di na sab ko modapit

ang dato nga nagkalisod

kon mopalit og
kamatis, usa lang
nganong duhaon man?
kon mopalit og isda.
igo na ang usa
nganong daghanon
man?

siya lang ang mokaon
dili ang kwarta
sayangon.

siya ang dato nga
nagkalisod.

inahan inahan

 inahan para kang kinsa
ba ang imong awit sa kaadlawon
para kang kinsa ba ang
imong mga pangamuyo matag
gabii

human mo kami gibaylo sa 
maong diyos
wala na kami gibating kainit
bisag gamay diha kanimo

layo na kaayo ang atong matag
kilid
nagbulag na ang atong mga damgo
ang among gibalon sa among
lakaw
mao ang kapungot sagol sa dakong
kahiubos

ayaw pangitaa ang among mga tunob
gipapas na kini sa dakong baha
sa among mga luha
ayaw na pamatia ang among mga tingog
nga misubay na sa lasang
nga walay lutsanan

inahan, inahan ka ba gayod namo?
nganong wala na man kami nasabtan sa imong
mga pulong?
nganong wala naman namo madungog ang
among mga ngalan
nga kaniadto kanunayng gitawag sa pag-abot
sa kahaponon?

bisan kulilo

gihatag lang namog balik
ang imong gihatag
karon wala nay sulod ang
among mga kamot
wala nay gihambin ang
among mga dughan
gihatag lang namog balik
ang imong gihatag
busa ayaw pangita sa wala
na karon kanamo
hagbay ra namong gihatag
ug balik ang imong
gihatag kanamo
wala na kami ikahatag 
kanimo bisag kulilo.

ang gibaligya nga gaba

kanunay mong
madamgohan ang
nawala nga
sakayan

sulod sa damgo
wala mo gayod kini
masulbad kon asa o kinsa
ang mikuha niini

makamata ka nga
panington
unya ang kahadlok
kabahin sa nawala
mipaak sa imong
tingkoy

nasayran mo na ang
hubad niini
giinom mo ang pait
sa gaba nga napalit

PONGPONG

usa lang ang malipayon
sa imong pag-abot nga 
nagtagad sa kilid sa
pultahan
sa imong balay sa
miputak,

nag-ambak ambak samtang
giablihan mo ang pultahan
nga bugnaw kaayog 
trangkahanan

ang iyang kalipay
namahit sa imong tiil
kon unta makapanugid
kini sa iyang kamingaw
pinaagi sa pulong apan
sa iyang sitwasyon 
karon
kutob lang kini sa
pagpamaghot

sa bukid sa marupay

nagtalikod ka
palayo sa 
camera samtang
giklik kini sa imong
gihigugma

naglaray ang mga
pine trees
ang wala nakuha
sa maong hulagway
mao ang tinood mong
luha
nga abi nilag
laing drama mo
na usab.

kinsa bay ganahan
mopakita ug
kasubo?
kinsa bay manghambog
sa panagbulag?

dili na katuhoan ang
mga kasakit
ang mga kalipay 
kanunayng nanghambog
didto sa mga abog
sa ilalom sa adlaw
sa bukid sa marupay

antigone

ang kagahi sa ulo ni
Antigone
gikalipay sa mga
gamhanan sa
langit didto sa
Delphi

kon unsa ang ginadili
maoy iyang gibuhat
sa ngalan sa balaod sa
Dios og dili sa tawo,

ang imong kapildihon

nasayod kami sa imong
mga kahigwaos
sa layo nga dapit diin
ang mga estatwa
maoy mga saksi sa
imong kapildihon

ang mga rosas sa aberdeen
wala na mamulak
ang mga lingkoranan
nga puthaw bugnaw pas
ice.

kabahin sa mga butang nga wala nay kausaban

sa kilid sa bungtod
taas na ang mga kalubihan
sa tunga sa mga kakahoyan
anaa ang kawayan ug nipa
nga balay
sa palibot niini 
namuwak ang mga azucenas

sayong buntag 
bugnaw ang hangin
nagkahilis na ang mga
gabon

sa taas nanglabay ang
mga tulabong
hilom kaayo ang ilang
paglalin

tulog ka pa sa duyan
nga gitagkos ni nena
sa duha ka punoan sa
marang

nahinanok sa mga butang
nga wala nay kausaban
nga nahisgotan sa duha ka
kagabhion

sophocles

ingon si sophocles
didtos pamaba ni oedipus
nga kon unta makamao lang
mosilot ang tawo sa iyang
kaugalingong mga kalapasan
nan wala na untay pulos ang
mga bilanggoan
ang mga hukom ug ang
mga kapolisan.

apan kinsang tawo man ang
buang nga moposas sa iyang
kaugalingong mga kamot?

kinsang tawo ang mas buang pa
sa mopapriso sa iyang kaugalingon?
nga mokumpisal sa iyang salaod
aron motagbo sa iyang kamatayon?

gawas lang sa mga nanggihikog nga
wa kaantos sa mga Furies nga sa
matag adlaw naglutos kaniya?

sila, sila ang gidungog nga mga
wala na sa ilang kaugalingon, ang mga
buang, ang mga nawad-an sa pangisip.

kitang nga matinud-anon sa atong
mga kaugalingon
ang mga nag-amping sa atong mga
panglantaw
dili kaawat ni oedipus nga 
milugit sa iyang mga mata aron kini
makakita sa iyang
mga sala.

naglakaw

gipatik mo sa bato
gipahiluna mo pa man
gani sa imong
mga libro
ang imong pagkaikaw
nga abi nimo
ug ikaw lang

mao nay giingon nga
mao kini ang imong tinagoan
nga abi mo
ikaw lang
apan nasayod na diay ang
tibook katilingban

mao kini ikaw
wala nay ulo nga naglakaw.

isda

kanang ma in love kag isda
dili sayon
lisod hunahunaon ang iyang
himbis
apan unsaon ta man nga
anaa na in love ka man

kabalo ka nga dili gyod ka mabuhi
sa lawod
dili ka kaginhawa sa ilalom
niini

apan anaa naningkamot ka bisag
mamatay ka pa kuyog niya

karong tuiga unta mag-usab ka na
sa imong panglantaw
kabahin sa gugma

ukba ang imong kasingkasing
wala baya kini hasang wala say kapay
basin mausab ka ra kabahin niini

pangamuyo kang Neptune nga unta
mawala na ang gugma mo sa isda
nga kon imong gipangga ug gihigugma 
gikilaw man lang o dili ba kaha
gisugba man lamang  sa mga 
mga palahubog ug mga sungkaban.