quickie

sulat kag
balak
in five minutes

faster than
hunghong,
stronger morag
thunder.

ana ra god,
unsa may hago
ana?
kapoy pa
ang pagkagod

ug lubi
budlay pa ang
pagtawag
sige
sa ngalan ni jerry

balak ra bitaw
na.
ra. balak ra
dili bala

walay mamatay
ani
kusikusi ra
god ni

kaw pod,
why be serious
unsa ka
anoos?

balak ra
god,
pa inspire
sa logod.

pakigbungol

kadtong misaka ka sa
bungtod
mitindong atubang sa dagat
kita tanang patag sa ubos
mga balayan sa posporo
mga hulmigas nga itom
seda ang asul nga baybayon
putig bungot sa kilid 
sulong atras, misyagit 

ka, "mingawwwwwww!
human, mibalit ang imong tingog
lahi na, mialingawngaw ang
kamingaw, nahimong bibo,
nanaghan, balik, balik, ang 
alingawngaw,  gusto 

nimong ilailahon pag-usab ang
imong kalag, nga sa dugay nga
panahon, nakigbungol 

nimo, hangtod nga nagduda ka
nga basin wala na siya sulod sa
imong lawas.

ang iyang gibati karong adlawa

naglatay sa alambre
mikaon sa kalayo

mora pog bibingka
gabaga bisag asa

ganggang nga saging
lubi nga lahing.

gugma mo

gugma mong wala
kagawas
wa mo mabantayi
namintana sa
abre mong purol...

ang nakakita morag
naulaw
apan dili kabuyag

gugma mong wala
kagawas
wala baya pod 
miawas

gamay nga kasingkasing
kum-ot nga dughan
unya dapit tan-awa
mawad-an nas kaulaw

hapit na manira ang
kahaponon
gugma mong wala
kagawas
wala pay hugas

mingitngit na ang
kalibotan
gugma mo migawas
mikawas

sa ilalom sa mga balas
nga bitoon
ug sa bulawan nga buwan
sa kainit ug kahayag
napawngan

kaibog

nagtulo baya ang
laway sa iro 
naghalhal ang dila
sa nag-inosarang
piso...

ang imong katahom

nakita ko ang dili nimo
angay makita
gibati ko ang dili mo
angayan nga mahibaw-an
duha lang ang makaguba 
ning akong kalibotan
ang akong kabuang ug ang
imong katahom....

pamahala

sa pag-abot sa pamahala
dasdas,dasdas katawhan
macovid man o wala
ok lang, ok lang,
tubag sa kadaghanan.

kalay-on

dugay natong nadungog
ang pag-abot sa bato didto sa
suba gikan ning 
pangpang nga atong gitungtungan


moingon kita nga habog ang
atong gipuy-an
unya makamatay ang atong
paingnan.

bisan wala nato kining tanan
makita
tungod sa tumang kangitngit
sa atong kagabhion....

ang pagpatay

ang tagkos sa pisi
sa imong liog mao ang
tiunay nga saksi
sa pangutana kon ikaw
nagpakamatay ba.

o kon ikaw gipatay ba
sa tawong nangumpisal
nga kanimo 
nahigugma.....

dag-om

wa ka na makigdungan
kanako
sa panihapon.

ako sab, seguro, di
na sab makigdungay kanimo
sa bisan unsa
pang panagtigom.

managlahi na ang atong
kagutom,
dili na managsama ang
atong kauhaw.

dili na nato litokon pa
ang kamatooran,
kinsa bay maghisgot
sa nagpadulong nga ulan
diha sa makita tang
lagom na kaayong 
dag-om?

patay na

hapit na manira ang 
kasingkasing
ang pultahan niini
lahi,

mahimong ablihan
ug kadaghan
apan kon masirad-an
na kini
kausa ra
inig kahuman niini
dili na kini maablihan
bisag ikaw
bisan pag anaa kanimo
ang yabe

sa laing bahin
kon maablihan pa man 
ugaling nimo
usa lang ang imong
maabtan

wala na ang tigkatulugan
didto
kon simhoton mo ang
ponda sa ugnan
manimaho na kining
patay nga iro....

daotan

sakit baya pamation nga ug magkita ta
usab, sa sulod sa lawak nga gipuy-an na
sa daghang kaka,
ug sa kisame sa gamayng buho diin migitib
ang bitoon,
sa atop nga guba nga gituloan sa ulan, ug
sa palanggana nga misalod 
sa sobrasobra, og unsa pa didto ug unsa pa
diha, 
nya kitang duha, nagtinan-awan unya morag
wala lang, 
nag-ila kaniadto, karon wala na, dili na uyab,
dili sab amiga, sakit gayod baya, apan unsa
pa ba ang atong mahimo, unsaon ba pagpapas
ang lamian? ingnon mo kini nga daotan, nga 
kini gidili lang gayod sa kapalaran, o akong 
hunahunaon, nga kini wala gayod mahitabo,
nga wala ka, nga wala ko, nga ang kalibotan
usa lamang ka damgo, nga kining akong 
kasingkasing, usa lamang ka daotang hangin,
misulod migawas sa bukog sa akong dughan.

ikaduhang atay....

sa pagtipig mo sa imong
tingog
nahimo kining tunok sa
imong 
tutunlan,

samdan ka, nagdugo ang
ilalom,
apan, nindot gihapon 
lantawon ang imong nawong,

masanagon, malipayon,
sa imong dalunggan, dili 
malilong,
ang baho sa usa ka patay
nga dugo, 
nga nahimong laing atay
sa gugma mong
giatay....

tinipigang hinog ....

gimingaw baya upod ako
kanimo,
apan sukad sukad sa akong
pagkahamugso
hangtod na basin  sa akong
lubong puhon
di gyod ko maghisgot bahin
nimo.

hinog ka man, tam-is gani,
hangtod nga ikaw malata,
kutob ka lang gayod sa 
akong hunahuna......

malipayon

miabot ang talithi
musika sa imong kahilom
bugnaw nga
hunahuna malipayon nga
kasingkasing.

yano....

miabot na ang panahon
sa pag-gakos nato sa yano
usa lamang ka lawak
usa ka lingkoranan ug
abre nga bentana
abre nga pultahan dapit
sa amihanan
sa hambin nga kahilom
pasudlon  ang hangin
nga gipangga sa kilomkilom. 

pagkadaghan sa mga maalamon

pagkadaghan gayod
sa mga maalamon
daghan sab ang matootoohon
miabot ang kahadlok og ang
kalibog
nagsalimuang ang taas kaayong
hilanat sa katawhan
nagsuka, nagkurogkurog
pagkadaghan gayod sa mga
maalamon
apang unsang hitaboa,
daghan man gihapon ang 
nangamatay
wala pa gihapon ang
gihandom nga tambal
sa lawas apil na
ang kalag.... 

racial discrimination?

aduna bayay saktong

luna ang mga itom

sa amerika

angayan kaayo sila

sa kalibotan sa

mga istatuwa.

kutis porselana

ang higanting baki sa

arizona

bisan sa tumang kainit

kutis porselana.

tig-a

kaniadto pa
wala ka na gayoy
salig kaniya

hangtod karon
wala pa gihapon 
kini

unya nganong
matingala ka pa man

pagkabuang bas
imong kasingkasing
nga unta
tin-aw man unta ang
sapa sa imong
hunahuna?

ang larawan sa
imong kamot nga 
mihawid sa iyang
kamot
tig-a.....

kalahian

kana bang
makaingon kag

kilawon nga
walay sukasuka

lahi ras

magpatuli kag
kaduha...

ang puti nga kalapati

ang puting
salampati
gihigugma
ang iyang
hawla nga 
bulawan

mao kini 
ang kasakit
sa mibati diha
sa bulawan nga
puthaw.

natintal sa
sinugdanan
nga kasinaw
hangtod na
sa kataya
sa kamatayon

ulan

wala na
milulan ang kalibotan
naghandom 
ang mga kahoy

kon mabasa mo pa
unta ang gisulat sa mga
gamot
diha sa ilalom sa yuta

makapamalandong ka
pa unta
sa ilang mga damgo
kabahin sa 
mga tiil sa kabaw
og kabahin sa mga pako
sa ngiwngiw

gidamgo nila ang mga
kayamoy sa mga kampay
ang mga kapay sa
mga siwil

ulan! ulan!
nganong nihit ka man!

usahay

usahay
mao kini ang masulti
ko kanunay

nganong bisag di
na unta ka ganahan
nganong sigehon pa
man

usahay mao kini
ang akong mapangutana
nganong sigehon pa man
nga dili na man
unta ta ganahan?

usahay mao kini ang 
akong siging mabinuangan
nganong ania pa man
nga ang kasingkasing wala
naman
diri sa dughan?

didto sa cappadocia

sadya kaayo ba
ag didto tang duha
sa cappadocia
wa ta mangutana
kon asa na ta
wa sab ta mangutana
kon naunsa na

sadya kaayo tang duha,
wa na gani pakabana
nga kaadlawon na
og kon mamahaw pa ba ta
sa sunod natong sikma.

litse

human mo
natsikinini

sa dihang
nahog ang iyang
bikini

human ka
nagawsi
gihugawan
kas
tsikinini

dayon nimog
batsi
litok sa litse!

ang iyang nanay sa tungatunga sa pakigbisog sa mga rebelde ug sundalo didto sa bukid sa liyang...

ang iyang nanay
naglikit sa dahon sa lumboy
gipaabot si tatay

kusog ang ulan
midalugdog kadaghan
miduyog ang ulan
dayon 
dunay dakong butoboto sa
unahan
nga nadungog sa
tanan

tulo pa ka bungtod
upat pa ka suba ang
agianan

pagkaugma miabot ang
patay
ang iyang tatay

ang iyang nanay
naglikit sa dahon sa lumboy
nga gilup-itan sa 
pinakaisog nga dahon sa
tabako 
didto sa ilang halayo na
kaayong lugar.....

pagbudhi

sa iyang pagbudhi
kanimo
tungod kanako
usa lamang ang
importante, 
walay nasayod 
niini,
walay nasakitan
diha sa ilalom
ang tanan malipayon.

tabanog

sa dihang 
midagan ka
guyod ang
tabanog
sa dihang 
mitugsoy na
kini ug
mikuyog sa
hangin

gilantaw mo
kini
sa taas
hawid ang
hikot sa iyang
dughan

nindot ang
pamati
nga ikaw karon
mihawid
sa langit.

kahayag

kon pila ka
mata,
mao usab ang
atong pagkabuta.

diha sa duha,
wala nay makita.
kon dugangan
ug usa, o lain
pang duha,
wala gihapon
nakita.

ang akong sayop
ang akong dakong sayop
nga akong gitugtan
nga akong gikuptan.

lisod gayod
pukawon ang
gamata,
lisod badlongon
ang badlongon.

palupara ang
salampati
buhii ang halas
ayaw sirad-i
ang pultahan
palunga na ang
lampara
sa hayag mong
kusina.

ngano

gipili ang
pagpahilayo aron
ka malimtan

apan ang kalayo
wala maghisgot
nga atua gihapon
ang pareho mog
nawong
susama sa imong
kahumot
nga sa akong panit
misuot
misuroy sa kasingkasing
balik balik
milapos sa akong
unod 
miluklok sa akong
bukog.

pesteng yawaa ka
ngano bang 
ikaw man ang akong
gihigugma?

kaasgad sa tinaguan

kanya kanyag 
hipos sa sekrito
morag gaiyahag
likit sa tagsa
tagsa ka kugmo.

kon wala na
gani nagtan-aw
dayog butang
sa baba
diha sa dila
kaasgad nanipa.

uyab nga igat

kon duna kay uyab
nga gwapa
unya naay pagkaigat

kapoy man sigig bantay
magsakit lang ang imong
dughan
molalom samot ang imong
kalimutaw
molapad ang imong opaw

maypag pasagdan
dayon biyaan
naa pa dihay daghan
nga buotan ug
kasaligan

kamingaw

gibutangan kog bulak
ang veranda
gipalupad pa gani nako
ang alibangbang
nagtindog ko atubangan
sa karsada
paingon sa plaza

walay nangutana 
walay nangambat.

bahin sa kang , kabalo na ka

natingala ka pa
nganong ang iyang average
83
nga unta 100 man ang iyang
criminal law
90 ang taxation, 
90 pod ang civil law,

basin sa legal ethics kaha?

bisag bato....

kon namati ka pa unta
ug maayo
dili diha sa dunggan

mabati mo unta ang
pag-shagit sa bato sa
wala pa nimo kini
gilabay didto sa pangpang
nga habog kaayo

ang nabati mo lang mao
man lang god ang 
pangagho sa hangin....

being

ang naa sa paglangoy
dili sa langoy dili ang
langoy

ang naa sa paghunahuna
dili sa hunahuna, dili
ang hunahuna

mao kana ang diha
sa pagtugpo mo sa lawod
sa dihang milangoy ka
aron mabuhi....

selos

dili ko na mabitbit ang
imong kabug-aton
gikapoy na ang akong
hunahuna
nagkurog na ang akong
mga kamot
mipalag na ang akong
mga tiil

hangtod kanus-a ba ang
akong pag-antos?
dili gugma ang imong ngalan
ikaw si Selos.

naghimoay sa ingon

sa mga nagkahigugmaay
ang tanan madala lamang
sa kihat, sa ando, sa yango,

walay pulong magamit sa
sabot nga "magkita ta unya
sa kilid sa bungtod, didto
dapit sa balilihan"

ug tuod man, nagkita sila,
naghalok, naggakos, 
naghimoay sa ingon, nga
walay gamit bisag usa na
lamang ka pulong.

ang tunglo nga tagna sa lala nga dila

mohigda ka na sa imong
katre nga kutson
ipahiluna mo ang imong
ulo sa humok mong ugnan
ihabol mo ang humot mong
habol sa lawas mong limpyo
bugnaw ang hangin
sa lawak mong nag aircon,
paglipay, kanang hugot gayod
nga kalipay,
ayaw na hunahunaa ang ugma
mao rang kutsona, mao rang
habola, mao rang ugnana,
mao rang lawasa,
ang di na kamata dinhing
lugara.

ang karon na lamang

abi mo
ning panghitabo karon
nahimong wala nay
kaseguroan ang tanan

ang tanang napundar
natigom, gihipos, gialimahan
mahimong mahanaw na
lamang

nagtukod ka pag balay?
mipalit ka pag luna sa yuta?
nananom ka pa sa basakan?
nagpahimo ka pag sakayan
nagbaid ka pas sa sundang?
giaayo pa ang agianan?

sa panahon karon nga wala
nay kaseguroan, kon mabuhi pa
ba kita, o basin ugma mamatay na,
unsa pa bay pulos ning tanan?

busa, ayaw na ug pangandam
kon unsa ang naa diha, sagdi na lang,
paglipay, pagsadya, ayaw na
pangandoy sa ugma
bililhon ang karon, ang karon na lang
ning panahon karon....

puhon puhon

mubo ra kaayo ang imong
punoan
maong wala na nako gamita
ang kuhit
wala na gani ko mikatkat
sa dihang gipupo ko ang imong
mga hilaw pa nga
mangga....

puhon kon mohabog ug motaas
ka na
kon dili pa ako kaayo matigulang
katkaton ko ang imong
sanga
bahalag ingnon ko nila nga
unggoy nga kiwa

puhon kon dili na ako makakatkat
gamiton ko ang akong kuhit
aron makuha ko pa gihapon ang
imong mga bunga

kana kon mamunga ka pa
kana kon ako buhi pa 

conyo

conyo conana
mao nay binastos sa
zamboanga

bastardized daw
sama natong tanan

bastardized sa
mga bangus ug mga kasag

bastardized sa espanol
sa kano ug sa hapon
bastardized gani gihapon
sa mga bastardized na
daang mga noypi ni yorme
og ni askal.

walay orig nato
puro peke.

namputcha, yotz, shunga,
etech.

que barbaridad!!

di ko kalimot sa
imong giingon nga kon laayan
na kuno kos akong kinabuhi kay
wala nay kaasgad o
baya kaaslom, mao kuno kini ang
akong buhaton:

1. i slide akong lubot sa hait
og taas
nga kawayan

2. magkuha kog bag-o nga blade
dayon akong i-ad-ad sa akong
alingagngag

que barbaridad!

apan mao lang kini ang akong
di gayod makalimtan nimo sa dihang
gisulod ka sa imong balay
samtang gaduladula ka sa imong
puti nga anak nga lalaki nga
gaedad pa dagway tog
tulo ka tuig

dayon in close range gipusil kas
maong killer nga nakamaskara
dako ug lawas 
taas unya simag kaayog mata
nga morag hait kaayong
kutsilyo 

maayong pagkagusbat ang imong
ulo
misiplit ang dugo
unya ang nawong sa imong anak
nga na shock
nagkamuritsing niini.

que barbaridad!

pila ka adlaw
ug gabii  kaha kadto
nga wala ko katulog
sa akong kwarto....

que horror!!

kanang
mikanta ka unya
walay
bisag usa nga audience
sa imong atubangan,

ah, dunay usa
unya imo ra man tong
mama

nga patay na,
hagbay ra....

kahil

pagkaanindot sa kahil
diha sa sanga
lingin, sinaw, 
nagpangaghat kanimo sa
pagpupo kaniya

tuod man 
gisaka mo, gipupo ug
gisapupo sa imong mga
tudlo

gipiyong mo ang imong mga
mata
mibanos ang daghang mga
kaniadto balik kanimo

gipanitan mo kini
ug tuod man 
nasimhot mo ang mibalik
na usab nga laing
palibot diha kanimo

hingpit ang kalipay ning
kalami sa kahil
sa dihang gikuha mo ang iyang
unod dayog
kaon mo niini unya sa sulod sa
imong baba
samtang gidulaan mo sa imong
dila
misumbalik ang labyog sa pako
sa buyog nga nahimong banog
sa sa usa ka dakong lanog

kalipay kasakit kasuko kalinaw
kapait katam-is mao ang sahog sa
tanang lamog....

maanyag nga kahilom

naigo ako sa
imong punyal nga
ginganlan kog
gugma

sakit baya usab
apan 
wala ko kini
gipakita
ni gipanugilon
kang bisan 
kinsa

walay dugo 
walay luha nga
miagas

walay nakita ang
kalibotan 
kanako
walay nadungog
ang mga bongbong

sa hardin sa gugma
akong gidayeg ang
mga kabulakan
akong gisimhot ang
ilang kahumot
akong gihimamat ang
mga buyog
akong gikuha ang
mga laya nga 
dahon ug akong
gisunog

ang aso sa sunog
nga mga dahon akong
gihalad sa langit

unya ako 
ania sa silong sa adlaw
naglingkod
gustong matulog sa
maanyag nga kahilom....

kamingaw, kapapas

karong wala ka
na dinhi
hinay hinay nga
napapas ang akong
kahaponon

ania na ang
kagabhion nga
sa bugnaw kong alugnan
ug init kong higdaanan
 akong
palabyon.....

sa giwang sa atong mga tudlo

masulat nato ang 
mga wala diha
ang mga bunga sa
hunahuna lamang
ang mga bula sa
hangin ug ang
mga hinungaw sa
mga tagimtim apan
dili kaayo kini 
sapo, lasaw ra kaayo
ang sabaw, tigmi ra
kaayo sa atong 
pagpamati.

busa sulayan gayod
natog sulat ang mga
ania  dinhi, kadtong
mahikap sa atong
mga tudlo, kadtong
matuthoan sa atong
mga laway, kadtong
atong magakos ug
mahagkan, kadtong
atong mapiit ug
malugwayan, kadtong
atong masudlan ug
magawsan, mga 
pultahan ug bentana,
kadtong matawag ta
sa ngalang tinood,

ayaw usa diha sa
yabe ug pultahan sa
langit, o kaha ba diha
sa ganghaan sa 
impyerno, kay layo
pa kana, unya dili
pa kaayo mabati sa
atong kasingkasing,
dili pa mahambin sa
atong dughan, dili 
pa masalod sa atong
mga palad, nga morag
mga balas nga milapos
sa lat-ang sa atong mga
kamot sa giwang sa
atong mga tudlo.

gilak sa mga bitoon

ang kawanangan nahimong

sab-itanan sa mga bituon

ang papel nga wala pa masulati

duhikan ko sa mga pulong

aron unya mahimo na usab kini

nga usa ka laing wanang

ug dayon anaa na usab dayag

ang gagilak nga mga bituon

ang kasayoran sa langit ug ang pagdawat sa yuta

sayod gayod ang langit
nga ikaw 
wala gayod mahigugma
sa bato nga nagbabag sa
dalan
sayod ang yuta niini
apan wala kini niya tagai
ug dakong bili
ang iya lamang mao lang
gayod ang pagsalud sa
ulan nga gihulog sa mga
panganod
aron mabuhi ang mga nalayang
mga buwak
aron dalhon ug ipahomot sa
ilang gianay nga lawak....

ang kabugnaw sa landong

karon pa ko nasayod 

nganong si tatay  kaniadto 

kanunay hubog ug kon masukamod 

patindogon ra pagbalik padayon 

sa kusina aron pahigopon og sabaw 

sa kamunggay ug kon magsuka 

limpyohan ra pod dayon

ni nanay nga dili lang magtingog 

ug kon nganong kanunay siya 

walay imik ang tubag ania punting 

kanako kay ako sama ra baya

anang gamot sa dakong kahoy

karon pa pod ko nasayod nganong

nangatagak ang mga dahon ug nahanaw  

ang kabugnaw sa landong

syagit

Ang gidalidalig 
sirado nga zipper
sa levi's nga short
mao ang nagpakaaron-ingnon
nga walay nahitabo
niadtong milabay nga mga
gutlo

apan ang kalangto sa lama sa sulod
sa brief sa kilid sa paa ug
ubos sa itlog
sa tumoy sa sinaw nga karon
nalawlaw
maoy dakong syagit sa usa ka
pagbudhi....

sa kamatyonon nga kandila

ubos sa punoan diin ikaw

nagpalandong nagpabugnaw 

nagpabilin ka bisan nanilhig

ang orasan samtang padayon

nga gakatag ang hunahuna 

kabahin sa imong mga sala

batok sa kaugalingon

naghinuktok nakita nimo 

ang anino sa imong pilok

lakip sa kahayag gikan diha 

sa kamatyonon nga kandila

ang giambit kong kalipay

gibutang nako ang paya 

nga puno og tubig diha tupad  

sa punoan sa mahogany

sa kilid sa paya mao 

ang mga mumho sa bahaw 

nga salin sa mga iro

mahimong mosunod 

ang mga iring nga walay 

pinuy-anan

ug dayon mahimo pod 

mosunod ang mga langgam

nga walay nag-atiman

kahayahay dinhi sa veranda

samtang gilantaw nako

ang giambit kong kalipay

gihuktan pa sa dagom

ang kinamaayohan nga moburda

mao ang labing hilomon

pagkaanindot sa iyang mga buwak

nga gimugna sa iyang tanod

diha sa puting panapton

ang kinanindotan nga buwak 

sa panapton mao ang gabuswak

nga gaduhaduha pa 

sa kamatinud-anon sa adlaw

ang kinanindotan nga panapton 

mao ang nabordahan og buwak 

nga wala pa kaayo mobuswak 

ug nahawiran sa kamot nga kanunay

matuslokan sa dagom

ang labing maayo nga kahilom 

mao ang hapit na maburda diha 

sa puting panapton nga wala pa 

giluwa sa tilaok sa tanod 

nga gihuktan pa sa dagom

PRAGMATISMO

wa bayay kanaway 

nga molantugi sa dagat

kabahin sa makatagbaw

ug hilom ining bahandi

nga mga bulinaw 

bayabas ni samuel

mubo ra apan lisod 

labwan ang ilang langit

bisan ang ilang paraiso

diha ra sa kamalig

likod sa gikamada

nga binakid humay

natagbaw si linda

sa bayabas ni samuel

OEDIPUS , SPHINX

dili unta angayan

apan ambot ikaw ma'y makamao

mopukaw nako

bisan gikahadlokan ko 

ang sunod unya nga mahitabo 

ug kulbaan ko nga mapukan

gumikan sa imong pagkatubag

sa akong tigmo 

o gamhanang oedipus

mahimong mabuak

ang tanang ania kanako

ang akong kasingkasing

ang akong mga pako

nga karon lunlon mga bildo 

sa imong atubangan

apan kalooy ba intawon

kay sayod ka nga sumala

sa gisugilon nga tagna 

ikaw lang gihapon 

ang maalaot kay 

lugiton nimo 

ang imong mga mata

ug maglatagaw ka

nga mag-inusara 

apan labaw nga sakit nga bisan 

kanus-a dili mo lang gihapon 

litokon ang akong ngalan

duha ka nilalang humag palami sa tam-is nga kalamay

didto sa lawak sa naghigda nga
babayeng walay sapot humag dagkot
sa iyang Marlboro, nangutana :

kanus-a pa kaha kini mahuman?

mitindog ang lalaki nga nangita
sa iyang brief ug karsones dayog
tubag:

walay klaro, gani morag 
magsugod na man ganig balik.

sa atong pagkahanaw

kining luna

alang sa umaabot

tilawi ang tab-ang

batia ang kabugnaw 

lakat na latas sa nanglabay 

kining luna

alang sa taas nga panaw

lantawa ang kalay-on

abta pod ang kinatumyan 

sa atong pagkahanaw

sa dakbayan nga abo

lad-ang ang timpla sa atong panagtagik

daghang nangausik 

puti ang tinta nga nawitik sa akong papel 

adunay tipik nga dakong mata 

sa ungo nga misiplat sa gamayng buho 

wala panumbalinga sa atong kahinanok 

ang kasamok ug syagit kabahin 

sa sunog didto sa unahan

nagmantika kuno ang mga bombero 

sa dakbayan nga abo

ang dan-ag sa langit

sa mapa diha

sa imong likod

natultulan nako ang kinaham

sa dalan

sa imong dalunggan luyo

sa imong aping

sa imong agtang

sa gabon sa imong labong

nga buhok

labing lamian

ang akong nakit-an

sa dihang mibalit-ad ka

sa dihang nabali usab

ang akong kalibotan

wala nako damha ang dan-ag

sa langit