LUTAW PANGANOD LUTAW

Lutaw panganod lutaw
Padayon sa pag-utaw-utaw
Sakay panganod sakay
Sigeha ang pag-ubay-ubay


Subay subay subay
Lagbas ning kawanangan
Bulahang mugna sa kahitas-an
Walay pagtukol walay paglihay


Walay pagtu-aw
Luwas sa tanang pagbugtaw
Huyop ug bul-og sa hangin
Buot lag dad-on mosugot lag ibilin


Maguba man ang imong bayhon
Gun-ubon ka man o bungkagon
Masinugtanon ikawng motipon
Sa ubang panganod nga sama mo gihapon


Lutaw panganod Lutaw
Padayon sa pag-utaw-utaw

ako kana

ayaw tumpaga
kanang pinundok nga balas
daplin sa baybayon
kay ako kanang palasyo

ayaw papasa
ang mga kinuriskuris nga lapis
sa nawong sa bulsita
kay ako kanang palasyo

ayaw gub-a
ang payag-payag nga ginama
sa mga kagingking ug langkay
kay ako kanang palasyo

pasagdi ako nga maglukdo
ug dakong panganod ning gamay kong ulo
nia dinhi ang suga nga mag-iwag kanako
paingon sa akong palasyo

Suga
panganod
palasyo
dugtong sa akong pagkaako.

Busa tahura
ug ayaw pasipad-i.

Panaw sa Kaamgohan

Kalag nahisalaag
Mibulag sa iyang salag
Mipas-an ug balabag
Kay ni Bathala moalagad

Iyang gikahibalag
Usa ka binuhat nagbaragbarag
Sa dalan kini mibabag
Nagpakiluoy nangitag abag

Unya
Gisugdan nila pagbadbad
Kahulogan ilang gihubad
Sa ilang saput sila naghubo
Aron matino matuod nga baho

Ug
Sa ilang pagpadayon
Misanag ang kahimatngon
Makab-ot lang ang himaya
Kung sa kaugalingon sila mobiya

Karon
Sa Ilang pag-uban-uban
Subay sa mangiub nga dalan
Ilang nasabtan ug nasinati
Pagkahiusa dili gayod malugti.