12/26/2010

Kahoy ko, Kaugmaon mo

Kahoy ko, Kaugma-on mo
By Genamos_US of Washington, DC, USA

Sa akong pagdula-dula ning bukid kung gipuy-an
Dili halayo sa payag kung natawhan
Nga akong nalantawan ang tambok nga panganod
Giduyan sa sabakan sa lunhawng kabukiran

Samtang ang mga kalanggaman nag-iyahay og pagpasilong
Sa mga sanga sa abuhon nga kahoy nag-urong
Nga kansang mga kaba-kaba padayon nagasayaw
Ibabaw sa mga bulak nga ilang gipanipa-an

Pagka-anindot paminawon ang mga taghoy sa kalanggaman
Nga gawasnon naglupad-lupad ibabaw sa kakahuyan
Nga kansang bidlisiw sa haring adlaw
Nag-uhap-uhap sa uluhan sa mga kahoy
Nga gihabulan sa mga bagang dahon

Ug samtang ang mga dahong laya padayon sa pagkalagas
Inubanan sa pagtayhop sa huyohoy nga hangin
Ug gipadpad padulong sa nagduka nga sapa
Nga kansang mga awit sa mga kalanggaman
Ug tingog sa dinaga-as nga tubig maoy akong nadunggan

Ug sa akong kakapoy bunga sa akong paglingaw-lingaw
Nidalikyat ko sa paglingkod aron pag-inum sa balon kung tubig
Aron tambalan kining akong ka-uhaw
Samtang akong mga singot padayon nagtabisay

Inanay kining gitayhopan sa bugnawng ug lab-as nga hangin
Ako nakapanghupaw sa kamingaw sa palibot
Ilawom ning kahoy nga akong gipasilongan
Nga ang gakos sa kalinaw padayon naga-uban

Ug dili halayo sa akong nahimotangan
Ang hanay sa mga kahoy nga among gitamom ni Tatay
Aron kini makatabang sa pagpugong sa mga dinahili sa bukid
Ug panagang sa mga buswak sa uwan
Aron kadtong among umahan sa ti-ilan sa bukid
Dili kini matabunan nga mao ray among gisaligan

Sa akong pagyanghag ngadto sa bakilid
Akong nakita ang puno-an sa mangga
Nga gipurong-purongan sa mga bunga ug gagmayng mga putot
Pagkanindot kining talan-awon kadtong mga kahoy
Nga gitanom namo ni tatay midako og nahimo kining hingpit nga kahoy
Aron sa ugma damlag, amo kining mapuslan

Kung wala pa kining mga kahoy
Nga gitamon sa akong mga katigulangan
Wala nasay kalambuan moabot ning among kabukiran
Kay sa ting-usbawan kini gihikawan

Busa kining kahoy ato gyud kining ampingan
Ug taga-an dakong bili ning atong dughan
Kay sa kahoy ko kini gisalig
Ang akong bugtong kaugma-on ug natong tanan

3 comments :

  1. LAMI NI siya himoong declamation piece sweet genams.

    labi na sa Tree Conservation Week.

    ReplyDelete
  2. hehehe...mao gyud intawon undong rsb..ang pagpanalipod sa atong kalikupan aron ang tawo mabuhi sa umaabot nga mga katuigan undong..hehehe..!!! Mag tree planting ta ani..hehehe..aron ang atong mga opaw nga bukid tamnan ug mga dagkong kahoy..nga himoong sugnod kung dili himoon kini usa ka sagrado nga butang nga may kinabuhi..para ni intawon sa ugma sa atong mga liwat nga ilang mapuslan ang kaanindot sa palibot.Daghan salamat sa pagsunod.

    ReplyDelete

Lami ba?