giunsa man diay nimo ang mga binhi?
ako gilabay

asa man nimo gilabay?
nakalimot na ko

wala ka bay nakita nga nanubo
sa nataran sa imong balay?

wala. Ang akong nataran
puros kabatoan

nganong wala na lang kini nimo
gisabod sa mga maya?

dili sila gutom.

gutom sila, kita mo ang ilang
niwang nga sungo ang ilang
nipis nga dughan ang ilang
pako nga niwang

dili ko ganahan ug maya
pak-an sila

pak-an ang tanang langgam
dili ko ganahan nilang tanan

human nilag tuktok sa akong
gisabod
dayon lamang nilag biya kanako

ug ako nga nag-inosara
mao na lamang ang tighambin
sa tanang kaguol nga ilang
gitunol diri kanako.