kami ang mga wala mamunga ang wala manahon ang wala mananga tungod kay kami ang sukdon mo sa among mga gamot

duha ang sukdanan
sa kinabuhi sa usa ka kahoy

mahimong diha sa kalabong
sa iyang punoan
sa kadaghan sa iyang mga dahon
sa kalig-on sa iyang mga sanga
sa kadaghan sa iyang bunga

kita gayod kini kaayo
nga morag korona og kapa
sa iyang kahalangdon

apan dunay laing sukdanan
nga dili nimo makita
kay lagi dili man dayag sa adlaw
og sa mga nanglabay

gisukod usab ang kahoy sa
kalalom sa iyang mga gamot
sa kalig-on og kadaghan usab niini
nga kon ugaling moabot
ang bagyo sa kalibotan
dili kini maparog, dili kini
malukat

kami ang mga wala mamunga
ang wala manahon
ang wala mananga
tungod kay kami ang sukdon
mo sa among mga gamot

og mahimo mo lang kini kon
matun-an mo unsaon pagsulod
sa ganghaan sa yuta
paingon sa lalom
sa kangitngit og sa kabugnaw
diha sa tumang kahilom