pasensya na apan dili man god kita pareha.

sa tinood
gipahinungtan ko lang ang akong gibati

sama kini sa kanal nga imong
gisirad-an
dayon imong gibiyaan samtang
mikusog og agas ang ulan
sa kalangitan

karon mibuswak ang tubig
milanab sa kasagbotan
mianib sa mga kalapokan

ang mga moagi dinhi makaingon
nganong wala man ninyo kini
grabahe
tan-awa nangalapok
nangahugaw na hinoon ang among
mga tiil

dili mapugngan ang mga pinugngan
kon makagawas kini
wagas kon makaeskapo kini
dili na gayod kini ganahan nga
magpadakop
magpabilin kining gawasnon
bisan pag
inyong patyon

apan dili kini dayag sama sa mga
love birds gikan sa hawla nga
bulawan
kay dili pa kini madawat sa mga
mata sa katawhan

magpabilin kining gawasnong mga
anino silong sa bulan
og mga bitoon

usa ka sakayan nga dahon nga
mag-utaw-utaw sa paglayas sa tubig
gikan sa kabukiran

usa ka taghoy nga imong madungog
sa kagwangan unya moingon ang bata
nga atua na usab ang dili ingon nato nangagho sa iyang kamingaw

hangtod dili ka mapandol sa bato
hangtod dili ka malumos sa suba
hangod dili ka masungagan sa kabaw

dili mo gayod kini masabtan
pasensya na apan dili man god kita
pareha.