mga letra og silaba

wala ta maghimo og
dahon nga atong gisumpay
sa sanga nga atong gidap-ig
ang buwak nga atong gisulayan
kuno og buhat ang mgamobukhad
karong buntaga

wala ta maghimo og mga
bitoon ato lamang gilantaw
ang kalay-on nga nakapahinuklog
nato sa atong kakulangon

wala nako gisubay kon unsaon
pagpanirado anang dahon nga
manggiulawon o dili ba kon
giunsa pagbukhad anang liog sa
bitin

dili ko kabawo ana maong
ania mibalak ra ko nagpunay
og lubag-inat sa mga pulong gisulayan
kon unsa ang mahitabo kon
magaray ang mga pulong diha
sa lawas sa ilang mga silaba og
mga letra sa papel nga puti
nga uga, limpyo, blanko kaayo.