di ko kaapas, maong di na lang sab ko makig-gukod

nindot ang ilang
balay
samin ang bentana
apil ang pultahan
walay abog

ang mga mwebles
wala na sa ato gipalit
wala na dinhing
lugara

bugnaw ang lawak
humot ang palibot
carpet ang tumbanan
morag bulawan sa
kagilak ang agianan

mora kog naibog
sagol ang kasina
pero nadawat ko na
di ko makigukod
di ko kaapas
mas layo ra sila
diri kanako

ang akong balay
walay bentana walay
pultahan
ang dingding puros
kakahoyan
ang atop langit nga
naglagiting sa mga
bitoon

kasagbotan ang
mga salog
mga bato ang hagdan

di ko kini angayang
ipanghambog
dili ko kini angkonon
dili sab nako kini puy-an

unsa pa ba kadugay
ang akong pagpuyo dinhi?
na, ug buot kwentahon
pila na lang ba ang
nabilin sa panahon?

usa na lang ka pamilok
dugay pa ang panghayhay