pultahan, kandado, kurtina, kahayag

ang nakaapan
kay bisag gusto nimong
makita ang 
kahayag anaa pa man
gihapon ang
kurtina nga gitaod sa
imong mama
nga hagbay na nga
mipanaw

hinoon
nagustuhan mo sa 
kadugayan
diha sa kamingaw ang
sinala nga
kahayag

dili kaayo sakit sa
imong mata
bugnaw kaayo sa
imong kalag

ang nakaapan kay
gusto mo na unta nga
mogawas
diha sa pultahan
aron ka usab mahimamat
sa kahayag

apan sa kadugayon sa
panahon
nga kining pultahana
nanirado sa balay nga
karaang hinimo sa
imong papa
sinunod pa gani sa imong
katigulangan
nabati mo naman hinoon
nga kini
nakahatag kanimog 
kalig-on diha sa 
pag-inosara

dugay ang pagkat-on
apan diha niini anaa ang
tumang kalig-on

sinala nga kahayag
naghapnig sa mga lubog
lig-on nga kandado
pultahan nga nanirado
ang gawas ning imong
kalibotan
nagdumot kanimo nga
kon mogawas ka
bisan sa kagabhion
gusto ka gihapon nilang
patilawon sa ilang
kamatayon