sukwahi diha sa imong kahuyang

kon molalin ka man
sayang

sa kadaghan sa makaon
nganong wala ka man mikaon?

sa sulod sa imong kamalig
anaa pa ang wala mahuman sa
pagbulad
mga binakid nga humay

anaa pa ang lima ka tambok
nga baboy didto sa ilalom sa
payag

kusog kaayong nanaghan ang
imong mga inaan
bibo ang mga sunoy
daghang itlog sa pugaran

daghang nakigpatay aron
mabuhi
lahi ka
gipauyonan mo man lamang
ang imong gibati
naglisod intawon ug sulod
ang lamiang sabaw sa baka
diha sa imong ngabil

natulog na ang mantika sa humba
wala matandog sa imong tinidor

ambot nimo, kon magpalabi ka
niana
ambot kon maantos mo ba ang
kasakit kon lain na ang manambo
diha sa inyong bentana

dako kaayo ug nagasto sa pagpatukod
sa nindot ug lig-on nimong balay
sukwahi kaayo diha sa imong
kahuyang....