tungod kay dili ka man ako...

yano ra baya gayod unta
 ang kinabuhi,
gani usa lang man ka lawak
nga gamay
usa ka higdaanan nga bisag
usa lang ka lawas
ang makahigda, kana kon
ikaw ako.

apan dili yano ang kinabuhi.
mas daghan ka kaayog
kinahanglan, dili lang usa
ka lawak, dili lang usa ka balay
gani, bisag lapad ang kalibotan
kulang pa gihapon kini
bisag galawod ang dagat
kulang pa gihapon kini,
kulang ang kwarta , kulang ang
suroy, kulang ang panapot,
kulang ang pagkaon,
kulang ang pako aron makalupad
ka sa kinatumyang dapit
didto sa kabugnaw, sa kainit
didto sa kahabog, sa kaubos
sa kalandong sa kainit,
kulang gayod gihapon, unta
kabalo ka ngano,

kabalo ko, dili ka man god
ako.