SA IMONG KATONTO

walay pakyas ang
pag-awit sa mga kalanggaman
matag buntag
bisag wala ka pa mimata
sa tumang kabilar
sa atong gugma

walay pakyas ang adlaw
sa paghatag sa iyang kahayag
bisag naglunang na silang duha
sa sala sa lapokon nilang
gugma

(o gugma ba kaha kining
klaseha sa pagpangga diha sa
pagtago-tago sa paglantaw kon
aduna bay miabot
unya mitulod sa pultahan nga
walay trangka?)

walay pakyas ang paghulog sa
ulan
sa dihang bug-at na kaayo ang
dag-om
nga gihambin sa mga bukton
sa mga panganod

walay panahon nga mosulti kanimo
nga silang tanan
puros gipangkapoy
sa imong katonto.