Usa na kagawasnon

Niabot ra gayud ang takna

nga wala na siya kinahanglana,

naibot, nga daw bukog
nga nag-ungot sa akong gusok

Pagkatawhay sa paminaw
klaro na ang panan-aw,
limpyo na ang samin sa banyo
makita ko na ang gulot sa akong nawong

Humok na ang akong mga bukog,
ang akong panit pwede ng pilo-piloon
og ipahiluna didto sa maleta
ibabaw sa naglumpong nga mga letra

Gisakmit ko man ang imong kalag
nga nipaak sa bulan nga abtik pa sa kahayag,
ayaw hunahunaa nga ako usa ka katalagman,
 hilom ako nga sapa sa ilalom sa kakahuyan