ang walay kataposan

samtang gimaneho mo ang
akong sakyanan
pauli sa balay gikan sa
baybayon nabungat mo ang
naa sa imong hunahuna kabahin
ni Philita ug ang iyang bana nga
pari kaniadto nga sa pipila ka katuigan
na sa ilang panagtipon wala gihapon
silay anak

nakaingon ka kon unsaon na lang
ang ilang tanang paningkamot nga
sa kaulahian ang emperyo nga ilang
gitukod pagatumpagon man lamang
sa pagkawalay manununod

nakalimot ka tingali bahin kanako og
kaha ba bahin kanimo
dinhi sa atong mga kalainan anaa lang
gihapon ang mga emperyo nga atong
gitukod nga sa kaulahian mao ra gihapon
ang dangatan, ang pagkatumpag niini

basin nakalimot ka sa balaod sa kinabuhi
ang kataposang kamatayon ang
walay sipyat sa paghikalimot
ang gibantog mong hangtod sa kahangtoran
wala kana dinhi, dili ka na tinood.