ang akong mahinumduman
daghan: hugaw nga lamesa
gilangaw nga banggera
dapog nga gikagubtan sa mga
sugnod ug agiw
kisame nga gitaptan sa agipo
buak nga petromax
samdan nga pultahan
gatampun-og nga bulingon sa
bakat, sudlay nga napuno sa kaspa
galuno nga halas sa ilalom sa katre
guba nga hagdan
buslot nga atop
mantsa nga polo shirt
kasilyas nga walay flush flush
lago nga panty nga gisang-at
sa sab-itanan sa moskitero
daghan pa, ngil-ad dili ba?
hugaw dili ba?
makaulaw dili ba?
maong ayaw kog basola kon nganong
nangawala na kanako ang
gana sa pagbakho sa mga bag-ong nangamatay
o kaha ba ang pagsadya kon dunay bag-ong
nahimugso dinhing dapita
dinhing balaya
dinhing lawaka.
kon ngano ba kaha nga wala man nako nahimo ang
pagbiya?
pagkatalawan ko, pagkabugo ko,
pagkatig-a ba gayod usab diay sa akong
kasingkasing
bato sa lapok, bitin sa sagbot,
kwaknit sa kagabhion.
