kaniadto diha sa salosalo
dili mo maantos ang kulang nga lingkoranan
gusto mo nga makalingkod ang tanan
busa gihakot mo ang mga kulang
aron hulipan ang kakulangon
sa mga badlongon
kulang nga plato, andam na ang giandam
kulang ang kutsara, naa na dayon
kulang ang luto, hukaron dayon
kulang ang sud-an, naa na ang gipaluto pa
kagahapon
kulang ang maobi-abi sa inyong mga bisita
naa ka, andam na sa imong panultion
moabot pod diay ang panahon sa kapuol
dili ka na ganahan mohulip sa kakulangon
gusto mo na lang pasagdan ang tanan
sa pangutana mong , " nganong ako man?
kinsa ba sila nga akong atimanan?"
busa niadtong gabhiona, kulang ang kutsara ug tinidor
kulang ang lingkoranan, kulang ang kan-on,
kulang ang kandila, kulang ang sinugbang isda,
kulang ang tingog, kulang ang kisaw, kulang ang musika,
ahh, gipasagdan mo lang
wala mo ambata, ahh, anaa ka naghawid sa baso
nga puno pa sa imong bino,
gusto mo nga motagay pa, gusto mong maghubog
sa mga damgo mo nga wala matuman
sa gusto mo nga wala makuha
ahh, panahon na usab sa pagpasagad
moabot na ang mopuli kanimo
ang bag-ong karagan, ang bag-ong serbedor,
ang bag-ong abridor, ang bag-ong ulipon,
ang mataha, ang gusto nga molipay sa mga dinapit
gitubag mo ang imong mga pangutana,
"kinsa ba sila nga akong abiabihon?
ako ang tinood, sila ang mga bakak,
ako ang hawod karon, ug sila na usab ang akong mga ulipon.
ahh, kuhaa ang laing botelya sa bino,
tagayi ako, Serbidor! hubga ako, Ulipon!
sayawi ako, Sulugoon! kantahi ako, Uyamot!
unya dapit, magsuka na ako sa akong gahom,
andama ang palanggana, salora ang tanan,
andama ang trapo, ang ininit nga tubig,
ipagawas ko na ang tanang baho gikan sa akong kinailawman,
ang tanan nga dili ninyo gusto,
mogawas na ang tinood, maluya ako,
mahikatulog, sa tumang kakapoy,
unya pagkabuntag, momata ako,
baho man ugaling, apan malinawon.
