tumang kalipay ang pagmata
gikan sa usa ka damag, nahitabo
nga giduslak na ang sundang sa
imong dughan, nakamata ka,
abi nimog patay ka na, buhi ka.
nagpasalamat ka sa usa ka damag.
nagpasalamat ka sa usa ka dili tinood.
abi mog, ang kamatooran lamang ang
angay pasalamatan? dili. pasalamati
usab ang mga dili tinood, kay kon dili,
hagbay ka na unta nga gihaya diha
sa imong balay, patay ka nga nagbuy-od
sa imong higdaanan, wala ang sundang,
walay samad, walay dugo, wala ka.
