napugos ako sa pagpuyo
nga mag-inosara kay
unsaon ta man imo na
man akong gihinginlan
napugos ako sa pagamit
sa akong hunahuna ug
pagbuhat sa mga lit-ag
aron lamang ako mabuhi
usahay tawo ako, usahay
tawotawo, usahay anino
mo lang ako, apan bahala
na, ang mahinungdanon
kanako mao na lang gayod
ang akong kinabuhi
makita mo
kini sa akong agianan,
sa akong sinulatan
sa akong
borda nga laway
sa akong
badlis sa hangin,
sa akong
wiris wiris sa tubig
sa akong kuhitguhit
sa mga panganod
dili na kini kabahin nimo
o sa atong kagahapon
dili na
gani kini bahin kanako
ug sa
akong pagkakaron
patira-pasagad-pataka na lang
ang tanan,
kay ang mahinungdanon
nga ako buhi,
gapitik gihapon ang
kasingkasing,
miambak pa ang pulso,
hait ang panglantaw
makasamad sa langit
makabuho sa wanang
ingon ana na gayod ang
mahitabo kon ang tanan
wala nay buot sabton
wala na buot ipasabot,
wala na ang angay, wala
na ang bansagon,
wala na
ang baroganan,
wa na gani
kahibalo kon unsa ang
dangatan sa dihang
nawala na ang tanan.
