ang kaldereta, ang papait, ug uban pa

tungod sa kahidlaw sa
karneng kanding

ang papait ug ubang
mga putahe niini 

nakahimong bungol
kanato sa sakit unta

kaayong paminawon
nga syagit sa kanding

sa dihang gibitad kini
paingon sa ihawanan

gipainom kinig suka
 aron kunuhay mas

molami ang karne  apil
na ang paglubag


sa liog, sa pagsunog sa 
iyang panit, 

sa paghilhil
sa kilid sa pagtadtad 

sa unod sa pagbali sa
mga bukog, hangtod

nga nabutang na kini
sa kalaha, natimplahan

sa mga panakot, dayon
nanghumot didto sa

kusina samtang giandam
na ang mga plato tupad

sa bag-ong nilung-ag nga
kan-on ug isog nga ilimnon.