pagsulsi sa mga gisi

sayod ako nga ikaw anaa ra gihapon
nagpahipi sa
likod sa usa ka garapon nga kamay
nagpasalipod ka sa mga
tibugol
unya dili na kaayo nako maaninag
ang imong nawong

wala na ako sa atong panimalay
sa akong pagnaog giguba ko na ang
hagdanan
napalid na ang mga bentana sa hangin

apan bisan pa niini 
kon ugaling magtagbo kita sa usa ka dalan
o magkita man ugaling sa usa
ka barko nga midunggo sa pantalan
kalimtan ko ang mga nayubit bahin
kanato

dugay na kadto
natubuan ko na ang akong mga karsones
nagisi na man gani ang mga pondeyo niini

ang kaugalingon mausab sa dagan
sa kusog kaayong panahon
kadtong mga batan-on lamang ang 
nagpunay ug pangita sa 
pulos sa pagpakabuhi

miabot na kita sa tumoy sa tanod human
kini nakalusot sa mata sa dagom
andam na man unta ang saktong pagpanahi
apan wala na kitay paghunahuna bahin
sa mga nagisi

sa laing bahin gitay-an na usab ang dagom
unya nangalugti na usab ang mga tanod
ug sama ni nanay hampol na ang atong 
mga mata alang sa usa ka pagsusi
kurog na ang mga kamot sa paghawid
sa gusto nga panapton