disgrasya sa simbahan

psst
milingi ang akong
amigo
sud sa simbahan

miduol ko
og mihunghung
nga
abri ang iyang zipper

ang dakong disgrasya
kay adtong
higayona

wala siya'y brief

ang tabian

ang tabian
dinhing dapita ang ilang giila
nga mas daghan og nahibaw-an
kay sa kaniya nga
nagpakahilom na lamang

sa kadugayan ang iyang kahilom
mao man ang milanog
og ang tabian
nabungol sa iyang kaugalingong tingog.

mas dungganon

mas dungganon
ka
kay mas ganahan ka
man
lang god nga
mamati

mao nga
tan-awa
midako jud ang imong
mga dunggan!

Ambot sa uk-ok
pila'y bayad sa hapwag
kaligo dayon

bag-ong tubo

Miliking Yuta
Masundayagong Liso
Dahon Nga Bag-o

balak sa usa ka mediocre

wala gayod niya mahimo ang sugyot sa iyang
kinaiyahan
kadtong sugyot sa iyang mga tuhod nga siya
moluhod na
kadtong tambag sa iyang mga kamot nga siya
moampo na
kadtong sulti sa iyang mga hunahuna nga panahon
na aron iyagyag niya ang mga hinog nga bunga
sa iyang hinipos nga mga pugas
sa milabay na nga kwarentay nuwebe
ka tuig

daghan ang nagmahay kaniya
daghan ang nahiubos nganong wala siya mokuyog sa mga panon
nga baga kaayo nga misabwag na sa
makamatay nga kamatooran

wala siya'y tumang kaisog apan matod pa niya wala niya kinahanglana ang maong
pagyukbo, pagluhod, pag-ampo, pagkuyog sa baga kaayong panon aron lang
siya malumos didto sa tumoy nga lalom kaayo nga dagat

dili siya bagtok sa Hamelin
og wala niya ilha nga angayan og haolangdon ang tawo nga miawit didto
kadtong mihuyop sa iyang
gamhanang selendron

sayod na siya sa nahitabo sa baga kaayong panon sa mga bagtok
og ang wala pagtuman sa saad sa mga hingtungdang gamhanan

ang iyang pangandoy mao lamang nga mabuhi siya nga malinawon
dili siya halangdon apan dili usab siya ulipon
nasabtan niya ang kalipay diha sa tungatunga og dinha siya magpabilin
hangtod nga mahurot na silang tanan
sa pagyukbo anang
gitawag nilang banggiitang kamatooran

dinhing dapita dili kaayo init ang adlaw og dili usab kaayo bugnaw ang kagabhion
dili kaayo gahi ang yuta og dili usab kaayo asgad ang dagat

dinhi siya natawo og dinhi usab siya mamatay.

adunay paghawid

adunay paghawid nga morag wala lang
kanang mihawid ka kay gilaayan lang
sa kainit sa panahon
kay laylay ang imong mga kamot

adunay paghawid aron mawala ang
kahadlok
sama sa paghawid sa iyang kilid aron
dili ka mapadpad sa hangin
aron dili ka madala sa sulog sa usa
ka baha

adunay paghawid aron pugngan nimo ang
iyang pagbiya
aron unta dili matapos ang tanan
aron unta magpadayon ang inyong mga
saad

adunay paghawid nga pagpahibalo lamang
nga ikaw natandog
nga ikaw naayo sa imong balatian
nga ikaw nakatindog na sa imong kaugalingon

aduna usa'y paghawid nga lahi kaayo
kanag hawid aron ikaw mopadayon sa imong panaw
hawid nga kon sutaon dala ang pagtuklod kanimo aron
ikaw mamahimong tinood

lisod sabton
apan ambot og nakasabot ka ba sa akong gihimo kanimo

gihawiran ko ang imong mga kamot aron paghatag kanimo og kaisog
sa pag-atubang sa imong kaugalingon
ang akong mga kamot miingon, ayaw pagdugaydugay, sugdi na ang pakigbisog!

sagol ang kahadlok og kalami

idap-ig nimo ang bugnaw kaayo nga bato
sa init kaayo nimo nga dughan
morag ang imong mabati mao ang uhipan
nga mikamang sa imong
panit
wala ka molihok, miundang ka og ginhawa
dunay kahadlok nga unya kini mohunong
og mopaak sa imong
bilbil
misuroysuroy kini sa nataran sa imong pusod
sagol ang kahadlok og
kalami
diha sa iyang gagmay kaayo nga mga tiil
nga mikamang dapit sa ubos
sa imong mga paa

unsa kaha og napaakan ka sa maong
uhipan?

mao kana ang akong pangutana apan ikaw
mitan-aw sa imong pusod
og miginhawa og lalom kuyog
sa imong tiyan nga mihiyak
sa imong mga paa
nga morag gimingaw na man hinoon
sa kalami sa mga tunob
sa maong
uhipan nga morag hikap sa imong
uyab kanhi

kadtong didto mo sa usa ka lawak
nga ang mga bintana
nanambo didto sa dagat aron molantaw
sa pag-abot sa adlaw

sa hangin nga bugnaw nga mikawat
og halok sa ilang mga aping.

soneto avantgardo: tigmo sa orom nga way ugma

nihilak ang buta'ng langit human

makit-i ang boang nga nangluwa

sa pansayan sa taphawng tinguha.

kining boanga adunay pas-an

nga misitira sa ulo, giludhan

sa mga irong kagirong nagchola.

lima ka galansiyang naghagwa,

nagduwa'g chinese garter ug takyan.

ang kometa gitukob sa kibol

nga bakonawang mibuthos lungag

nga panganod kay grabe ang tama

sa tambaloslos nga blonde ug bulbol.

ang tigmo: sa imong pagkadanghag

wa ba ka mahadlok nga madagma?

didto sa dakong bukid nga kulang na lang og dies pesos ang plite aron maabbot ang langit

didto sa dakong bungtod nga kulang na lang og dies pesos
aron maabot na nato ang langit

didto nagpaabot ang mga bitoon
og didto nag-atang ang mga gapnod

sa kangitngit sa akong kagabhion
og didto nagpaluyo ang bulan nga nagpakatibook

alang lang gayod kanatong duha
nga nangita sa atong mga kapalaran

didto wala'y udlot ng mga dahon
didto wala'y yamog

atua kuno ang langit busa ang tanan naningkamot
ang uban nanipa aron ang uban mahulog sa pangpang og mamatay

miabot na ako didto
apan suginlan ka nako, ikaw, kamong tanan,

didto walay'y udlot ang mga dahon
didto wala'y yamog

didto mao lamang ang tumang kahilom sa mga bitoon
og ang wala pagpakabana sa bulan

sayod ako nga kamo dili gayod motoo kanako
hala kapyot hala saka hala adtoa ninyo ang inyong mga damgo

nahuman na ang akong mga tuyo
og andam na ako sa akong panaw paingon sa ubos didto sa lalom

ang tingog sa baybayon

ang tingog sa baybayon mora kana
og tinuloan sa kandila
diha sa bugnaw kaayo nga tubig

nga kon unsa ang naa sa sulod sa imong
kasingkasing
sa panahon nga ikaw makig-atubang kaniya
mao usab ang
isulti niya kanimo

tungod kay ang mga balod sa dagat
maghatod lang
kon unsa usab ang imong gihatod kaniya

gibalik lang niya ang imong gitugpo
og ikaw nga namati wala gayo'y katungod

nga masuko og sila nga nangabilin
wala'y angay nga ikasudya kon nganong

nahitabo ang dili unta angay
ang dili ikapanulti sa mga dili makatoo

sayod ka nga ang dagat walay
habol nga sarang makaputos sa mga

dugo nga mubanaw
sa lawas nga madugta og sa mga bukog

nga dili na makatingog.