prinsipyo

kamong tanan ang dagat
og ako ang dakong bato
nga mibabag sa inyong padulngan
anaa ako sa tungatunga
sa baybayon
kay ako ang utlanan
sa tubig og yuta

sayod ako nga inyo akong lumpagon
og sama sa mga balas
sa ilang kapildihon
inyo akong pagahadlokon

apan balalewala na kana kanako
andam na akong mobalik sa akong mga
abog nga mga ginikanan

sa mga nanglupad nga mga kanaway didto sa baybay

nanglupad ang mga kanaway
sa hanap nga kapunawpunawan
mga tunob sa baybayon
milapas sa usa ka utlanan
ang mga kamot mikawaykaway
sa mga nanglupad nga mga kanaway

sa pagkahinog na sa mga uhay

sa pagkahinog na sa mga uhay
kon wala pa gani ang manganihay
paliron na lang kita sa hangin
balik sa atong gitisokan

manubo na usab kita
tumban na usab nato ang yuta
og magbalik-balik kita
sa samang mga panahon
ang pag-ulan ang pag-init
ang pagtayhop og pagkauga

bation nato ang kapuol
niining pagtubo og pagkalaya
dili kita makagawas nianang
paglibot-libot sa kinabuhi og
kamatayan

anaa ang kakapoy
kay ang manganihay
nakalimot na kanato

siya man god ang maghipos
siya man god lamang ang motapos.

unsa ba ang imong panaw?

nahisama lang ba kini sa usa ka bata
nga nagtabyog-tabyog sa iyang kaugalingon diha sa duyan
wala man gani nahago
kay nalipay man kaha
apan wala baya siya'y naabtan

tipasi

ang tipasi mamahimong duha
ang unod og
ang tahop

sa kakusog
sa imong pagtayhop
tan-awa
wala na hinoo'y
bisag usa
nga nahibilin
sa imong palad

ang tinood nga bulak nga maanyag
anaa gayo'y nawong
nga andam niyang ipaatubang
sa kahayag sa adlaw

balod

balod sa tubig
ayuyok sa matang sa atong
paghimatngon

sabwag sa atong panabot
paingon sa pagkawala
ang tinood
wala sa ibabaw
anaa baya
sa atong mga ilalom

sa mahika og fantasya

miabot na ang panahon sa pagkahibalag
ang kabahin sa engkantada nga kaniadto gipaibog ni Nanay
dili tinood
ang kabahin sa mga dwende
og mga lastiko
ang miawit nga mga serena
ang pito ka magsoon nga gitagoon sa usa ka daotan nga hari
ang mga higante sa bungtod
ang mga flora del cielos
mga mugna lamang sa hunahuna

adunay gamit ang fantasia
adunay pulos usab ang mga kamatooran

mipahiyom ako sa engkantada nga mibatong sa akong agtang
og sa sigbin nga mitapad kanako

dili ko sila papaulion
sa ilang mga lubnganan
sila ang mobuhi sa akong mga patay na nga pagtoo
niining dula sa kinabuhi
ang bulok sa mahika og ang fantasia
ibuka ko ang akong mga mata
mopahiyom ako pag-usab
kay ang akong nakita
wala gayod nimo malantaw
ang akong nadungog
wala gayod nimo mabati

ang akong pahiyom nga nagpahipi
sa akong aping
mao kana ang tinugdan sa usa ka kandiis
nga imong gikasinahan

sa kataposan

sa kataposan ang kunot nga kamot
mihawid sa
kamot nga guot

walay gibilin ang nanamilit
wala po'y gipadala ang nahibilin

ugma pagaalisdan na ang mga alugnan
og mga habol

kadtong puti, humot, dili gani bag-o
apan bag-ong uga nga nilabhan
kadtong maayo gayod
kaayo nga pagkaplantsa

wala una'y matulog didto
bisan gani ang kahadlok
nagpanuko
bisan gani ang kabalaka
nagduha-duha.

pagsalop

nagkahilis nga adlaw
dalag nga kamatyonon
kahil nga paingon sa pagkapalong
mikanaog na
padulong sa kasagbotan
mobanos na ang kangitngit
nianang pagpiyong
na sa mata sa adlaw

walay kanaas sa halas
walay kibok sa sapa
walay haguros sa hangin

haom sa akong katulugon

Ang Toro-toro

ang plawta ni Sappho
ang torotot ni Plato
ang awit ni Sophocles
ang hawid ni Aristophanes

mao kana ang pagsugod
sa pamilisopiya
mao usab kana ang
kataposan sa
pagpamalak

toro-toro

abi nimo og ang toro-toro
namugna sa atong panahon

ha ha ha
sayop ka higala

ang toro-toro maoy unod
na sa usa ka karaang bukog sa
usa ka panahon kaniadto

kinaham kana sa mga iro
nga nakig-gubat sa iyang mga igsoon nga iro
sa pag-ilog sa kalami
sa maong bukog
sa ilang kahakog

si Fanny
nagsugod didto aron siya maila nga tinood nga babaye
mao usab ang nahitabo kang
Alexander Pope
nga usa sa mga ganahan kaayong
molantaw
sa maong kataphaw

ayaw og kabalaka
sa atong panahon, gani dapat makulbaan na kita

kay sa tinood lang, ulahi ra ta sa mga kabuang nila.

ang tanday sa katulugon

gitandayan siya sa puti kaayo nga paa sa katulugon
gihapuhap sa iyang mga kamot ang bitiis
midampi ang iyang paa
sa iyahang bilahan
ang iyang ngabil mipauraray
sa iyang dughan

nabati sa kagabhion
ang nindot nga awit sa usa ka hinanok