ang mga tunob sa tamsi

abi mo
daghang kang makita nga
lalom tugkaron
diha lamang sa
paglantaw
diha sa pagpakahilom

makita mo ang balahibo
sa tamsi nga nahug gikan sa
sanga sa kaimito

unya madungog mo ang
iyang awit
sa iyang pagpalayo kanimo

unya ang iyang mga tunob
kaganiha
samtang nagbalhin-balhin
kini sa mga sanga
nagpabilin diha sa imong
kasingkasing

naghimog mga
sugilanon

ang gripo nga wala nimo masirad-i

sa hardin
sa ilalom sa namulak nga mga
kahoy nga lanzones

sa imong duol
nakita ko ang mga maya
nga namatog

unya adunay duha ka parisan
nga milupad
unya mibatog sa banga nga
imong gipuno ug tubig
sa kilid sa labat sa inyong balay

ang gripo nga wala nako
masirad-i
nagpunay ug sirit

dili kini bitoon

sa paglawig
gilantaw mo ang
barko nga
mihiwa sa
dagat

ngitngit ang
kalangitan
unya sa unahan
anaa ang usa
ka kahayag

dili kini
bitoon
panaghap
kini nimo
sa usa ka
kaluwasan

diha sa kanunayng pagpanikop, dili gayod managsama ang tanan

walay bisan usa
nga managsama

ang adlaw nga
misubang
kagahapon
dili na mao ang
iyang pagsubang
karon

lahi
kanunayng lahi ang
tanan

busa ako nga
nagsud-ong
sa mga bitoon
nga mibati sa
bugnaw nga hangin
nga mitunob
sa sapa
nga mikatkat
sa kahoy
sa mangga
nga naghitik
sa bunga

wala gayod
gibati ug kalaay
ang akong mga
mata
morag mga bata
nga nagdagan-dagan
sa suba
nangwitik sa
tubig
nanikop ug mga
isda

gugmang mibuswak

mga rosas nga
laya na
ang akong gihalad
kanimo

walay laba ang
akong sapot
walay hugas ang
akong mga
kamot

gihagkan mo ang
mga nalayang rosas
mipahiyom ka

unya miingon ka
dali diri sa akong
mga bukton

kang kinsang gugma kaha
ang dili
mobuswak?

wa na koy kasayoran

human mo matigom ang tanan
sud sa imong palad
apil na kadtong dili na gani
maigo
unya imong gikumkom ang
imong kamot
sama sa usa ka
balay nga nanirado sa
iyang tanang
bintana ug
pultahan

sugdan mo na usab
dayon ang
dili mo unta mahimong
buhaton

moingon ka
way bili kini
ug imo kining gisugdan ug
hulog

mopadayon ka
nganong gihawiran ko man
kining butanga
wala ko kini magamit
dili ko kini
kinahanglan

ug busa imo na usab
kining gibalhin ug
gibiyaan

usa na lang
ang imong gibilin
ang imong kalag
nga giuhaw
nga gigutom

apan sa pipila ka
tuig mo
nga wala maambat
wala gayod
mamatay

unya moingon ka
kini na lamang
ang nahibilin kanako
kini ang
tinood nga bililhon

ug gibiyaan mo ang
mga tipaka
unya
misakay ka
sa anino sa
mga pako

unya nawala ka
sa ilang mga
mata

apan nakaplagan
mo ang
imong nawala
kaniadto

lahi ka na karon
ug
wa na akoy
kasayoran

maayo ra unta

gisulat ko na
ang akong nahibaw-an
labi na
kadtong
akong gihunahuna nga
ako gayong
nasinati

paibog lang
pautot
haploy lang
sa
batong karaan

karon
sa tungang lawod sa
akong kalibog

sulayan ko ug
sulat ang wa ko mahibaw-i
ang wa nako
sukad mahibalag

pamandongan ko kini
pag-ayo

kabahin kini sa
mga misteryo
nga nagtuyok-tuyok
diha
Kanimo

sugdan ko ang
wanang
unya ianod ko
unya mawala ko

maayo unta
(ug kini mao ang
akong giampo

nga sa kaulahian
hikaplagan
mo Ako.

pamalandong

ang mga damgong
nagbitay sa kisame
gustong
tukbon sa mga
dagkong tuko

ako usab nga
katulgon

naglantaw lang
hangtod nga ang usa ka
damgo

natukob gayod sa usa
ka dakong
tuko

nga mipakatap sa iyang
dakong
katawa

sud sa iyang tilaok
ang akong damgo
miiyak

ako nga katulgon kaayo
wala gayoy
gibuhat

ugma sa sayong
buntag
magsigi na usab akog
bunal sa
akong dughan

ug didto sa unahan
pangitaan ko usab
ug sala
ang uban

balik-balikon kini
hangtod
matapos na usab
ang pipila ka
adlaw
hangtod motikyop na
usab ang
pipila ka kahaponon

bun-og na kaayo
ang akong
dughan
unya ang akong
palad
gikubalan

alang sa nawad-an ug katarungan

gipangita na nako ang mga
katarungan
aron masumpayan unta ang
akong katuigan

bisag usa lang
bisag putol lang gani

apan wala na
bisag usa lang
bisag putol pa gani

busa
gidawat ko ang tanan
giandam ko ang
akong sakayan

kon moabot na
ang dakong unos
isulong ko kining
akong sakayan
nga walay katig

unya ang akong
ipabilin
mao lamang ang
sugilanon

nga dili gayod nila
masumpayan
ug tinood nga
kataposan

alang kang P.

lahi na man god
ang atong kalibotan nga gipuy-an

kini ang kalibotan sa
pag-anad-anad nga kita na lang

walay kisaw ang mga bata
sa hawanan
walay mga buak nga
porselanang duwaan

walay iyak ug katawa nga
madungog
walay samok

kagahapon gusto unta nato
nga kini mahitabo
apan gitikasan kitang duha
sa kapalaran

wala nato patya ang kahoy nga
wala mamunga
wala nato kasilaga ang
salog nga
haskang sinawa

sa hardin ni Bathala

kaganihang hapon
nakita ko ang babayeng niwang
nga nagpatotoy sa iyang anak
nga asul

milingiw ko sa pagtoo
unya nakita ko ang usa ka dalan nga
walay utlanan

nanawag ang kahayag
tungod kay ako ang gilutos sa
kahadlok

mahimong wala ko pa gayod
hisabti ang tanan

lahi man god ang pamalaod
ning atong karon

kon moadto ko sa wala
sakiton ako sa kahoy nga wala mamunga
nga unta pagkanindot man sa iyang mga
sanga ug dahon

kon moliko ko sa pikas
dagiton ako sa ngiw-ngiw nga balikog ug
sungo

kon mosalom ako sa dagat
ug kon kapoyon na ako sa akong paglangoy
ang ihatag kanako mao
ang sakayan nga bali diin ang iyang
tiyan naghayang
unya gustong mohalok
sa adlaw

gusto ko nga mobalik ako sa sabakan
sa kalibotan
unya dili ko matulog
aron akong pilion ang akong
kabag-ohan

gusto ko nga ako ang modawat
kamot nga abri ang mga tudlo
andam nga
mosalod sa ulan nga
kahayag

usbon ko ang sakayan
haployon ko ang mga bitoon
sama sa mga buwak
sa hardin ni Bathala

sama sa naandan

kuhaon mo ang tanan
kanako?

unsa ba kaha'y akong
ikasulti?

ah, imo kining tanan
wa ko'y ikasulti

kuhaon mo ako sa
kataposan

nagsulay ko ug bilin
sa mga bulak

didto sa pultahan diin
ako mibiya

ahh, sayod ako
kon unsay dangatan

malaya ang bulak
ug walay makabantay

labyan-labyan ang
pultahan

sama sa naandan.

bahin kanako

ang gibantog nga
hait nga sundang
gitay-an

ang bintanang
lig-on sa katapusan
nadutlan sa
anay

ang sementadong
dalan
nangliki

ang dakong bato
sa pangpang
nahulog

kabawo ka
wala og wala gayo'y
molungtad
hangtod sa hangtod
dinhi

ako pa kaha?

managlahing panglantaw

ang nawong sa basahon
lahi kaysa sa sulod
niini

ang pagbasa baya usa
ka pagpanaw

bisan  ug mao ra ang
padulngan

inig abot didto lahi
na ang panglantaw

oo, ikaw ug ako
ako ug ikaw

apan nganong
mihilak ka
nganong mipahiyom
ko?

pamalandong

dalhon ko ang imong krus
suoton ko ang imong sapatos

padayon sa lakat
sa bukid mokatkat

gibitbit mo ang kasakit
ang kahadlok gikitkit

sa dugayng pamalandong
migamay ang  kamatayon

wala sa hunahuna

wala ko pangayoa nga ako
imong mabasa
wala nako gipangandoy nga
ako imong
sabton

mitubo ako sa yutang uga
gikan ako sa liki sa kawayan

nasabtan ko na sa paglabay sa
dugay nga panahon
nga ang pagsabot dili maoy
tumong
ngano nga ako mitubo ngano
nga ako milugway

gisubay ko ang ang ugat sa
liki sa kawayan
ug diha sa akong kahingangha
nalabay ko ang gahom sa
pagsabot
nagusbat ako sa tumang kalipay
wala sa hunahuna
nahikatulog ako sa lawak
sa akong
kasingkasing


pagkaanindot diay
pagkalami gayod!

ang akong tanlag

adunay koneksyon ang
tanan

ang kalay-on usa
lamang ka
pangpangilad kanato
aron
maputol ang mga
sumpay
bahin kanako dinhi
ug bahin
kanatong tanan

matag hulog sa bato
sa halayong pangpang
mabati kining
kahadlok diha sa
pako sa alibangbang
nga bag-o lang usab
nga mibukhad dungan
sa usa ka dahon

wala kita mag-ila
ni magkakuyog
apan sa dihang
mitulo ang luha
ug nahulog kini sa
yuta
milinog usab ang
gituntungan sa tiil
sa akong
tanlag.

ang akong nasaksihan

sa dihang nahibaw-an mo ang kataposan
sa imong higala
medyo natandog ka gamay

dako ang imong kaguol sa dihang
natumba ang imong amahan
sa dihang wala na kabangon ang
imong inahan

dili mo kaayo matuhog ang mga katarungan
sa pagbangutan sa uban

hangtod nga ikaw na ang gisultihan
nga ikaw na ang sunod nga moambak
sa lawod sa dagat
diin wala na kini mapa sa imong
kapaingnan

misiga ang imong mga mata
ug diha sa imong pagpiyong sa kataposang
higayon
ang imong nakita mao lamang ang
kangitngit

dayog abot sa kahilom
ang pagpapas sa tanang angayang makita

wala na ang pulong
wala na gayod sila manulti kon naunsa na

apil ka sa panon
sa malipayong pagpahigayon ngadto sa kahilom
nga walay sukod


ug ako nga nakasaksi niini
sa akong baba
mitak-om

diin

nagsulat kita
alang sa atong kaugalingon
naghandom kita nga unta
madungog na gayod nato
sa tinooray ang atong mga kaugalingong tingog
sud sa mga lawak sa atong kasingkasing
nga giabogan sa atong mga
panghimakak
nga giagup-upan sa atong
mga kasakit

gibiyaan nato ang atong mga
gipangtagik
diha sa bato tang mga tanlag
aron unta ugma
balikan nato kini ug basahan nato
sa kusog nga tingog nga
karon nagbaton na ug kaisog
sa pagdawat sa atong
mga utlanan

kay ang mga dagat adunay
lapyahan ug ang mga
kabukiran aduna may usay
mga kinatumyan diin

didto sa lapyahan mohalok na
usab ang mga balod sa mga tiil
sa baybayon

didto sa kinatumyan sa bukid
hagkan na usab sa mga kugon ang
aping sa langit

ang hangin

pamatia ang gisugid sa hangin
mas daghan kini kaysa mga pulong nga
gilatid diha sa imong mga ngabil
kay bisan man gani sa atong kaugalingon
ang nasabtan sa atong hunahuna dili kini
daling madawat sa kasingkasing ug busa
diha sa mga hunghong sa hangin
hinayhinay kita niyang
dalhin ngadto sa paraiso diin
ang hunahuna ug ang kasingkasing
magdulog sama sa usa ka
magtiayon

dakong bukid nga upaw

kon sulayan mo ug sulat ang
kamingaw

sugdan mo kini sa usa lamang
ka pulong

ayaw ug dugangi
usa lang ka pulong

diha sa dakong patag nga
kawanangan

ibutang mo kini dayon
imong biyaan

alingiing ang panahon
unya ang mga kahoy

puros walay dahon
sa ibabaw sa dakong

bukid nga upaw.

estorya

ikaw lang usa
wa kay kaestorya

gisulayan ang
facebook

naghello ka
way tubag

nag-hi ka na usab
wa gihapoy tubag

ug karong gabhiona
nahinumduman mo

ang usa ka karakter
ni Tolstoy

kadtong kutsero
unya naas karsada

nga puno sa snow
pagkatugnaw

siya lang usa ug
ang iyang kabayo

nag-estorya.

karon ikaw lang
usab usa

ug ang imong
monitor ug ang imong
keyboard

nag-estorya.

managlahi na ang atong dalan

nalibog ko nimo amigo
kataas sa mga katuigan nga ikaw
nagsunog sa imong kilay diha sa
dinaginot nga kandila

giantos mo ang kagutom ug
kauhaw
ug nakab-ot mo ang gahom
nga gihatag sa mga
makatarunganon

karon ania ka
nagpaitoy-itoy sa usa ka
bugo nga politiko nga andam
na sa pagamit kanimo

gitunulan ka sa salapi
nabudlat ang imong mga mata
gisulod mo kini sa imong bulsa
nga walay busganan

karon kon mosenyas siya
nga mosayaw ka
paspas kang mosayaw

mora kag iro nga nagpaitoy-itoy
nagpakitoykitoy sa imong ikog
naghandom nga unta kining amo
nga bugo malipay kanimo

gilabayan ka na usab ug
bukog ug imo kining gitangag
ug gitagoan sa ilalom sa
salog sa imong balay

nahimo ka na nga iro
nga kon duna man gani hait nga ngipon
giandam mo lang kini
sa sugo sa imong among bogo

pagkawalwal mo
pagkasayang gayod sa gahom nga imong
naangkon
nahimo kang iro nga ug
suguon ug paghot
mopaghot ka usab

sayang, sayang ang tanan
kay ikaw misimang na sa kaligdong
ug katarong.

usa ka adlaw nga malipayon hangtod na sa kagabhion

sa unang pag-abre sa bintana
misulod ang kahayag
midap-ig sa akong aping
ug unya nadungog ko
ang awit sa hangin nga
gikan pa sa halayong panaw

pagkagaan ko
milutaw ako sa kawanangan
daw papel ang akong
kasingkasing
daw pak-an ang akong
mga tiil


nagpabilin ko nga naglantaw
sa duha ka bungtod sa akong
atubangan

giabot ko ang dakong patag
diin ang kabulakan nagpasad

usa ka adlaw kining malipayon
nga gihipos sud sa akong dughan

nindot ang pagsugod ug
nindot usab ang akong pagtapos niini

miabot ang kahaponon
napalong ang adlaw

gisirad-an ko na usab ang bintana
ug gipalong ang mga suga

sud sa lawak gipamati ko ang awit
sa kalinaw
ang kahilom nga misuot na usab
sa mga lawak sa akong
kasingkasing

paingon na ako sa katulugon
ug kanimo Diyos ako mapasalamaton

ang mayor kanhi sa syudad nga karon mokandidato pagkagobernador

naputi na
intawon ang iyang
buhok
sa pagpamuyok

mitaas ang iyang
suwang
sa pagtabon
tabon sa
mga uwat
nga tagaliog
na sa kabuang

walay migilak
nga bitoon sa
iyang duha ka
matang kunuhay
maampoon

patay ang
lam-aw
didto
sa tunga
sa iyang kalimutaw

bisag dili mokurog
ang iyang
dila sa pagpunay
ug bungat sa
makakuryente
nga mga pulong

apan ang iyang
simod
dili na gayod
kalimod

nga ang iyang
kasingkasing
mas gahi pa
sa akong ulo
nga sigi sang
yangoyango
sa iyang
pagkakuronto

ang kabahin sa mga wala nato hisgoti

adunay butang nga
sayod ka sayod sab ko
sayod gani ang tanan

apan walay mobungat
niini nga mora bag wala
kini sa atong atubangan

matag adlaw
anaa kini, dayag, sama
sa salog sa balay
sama sa hawiranan
sa hagdan
gihikap, gitumban
apan
walay mohisgot niini

mahuman ang mga adlaw
molabay ang mga katuigan
mangamatay kitang tanan
magpabilin kini ug silang
makakita usab niini
balikon ang atong
gibuhat: walay nakita
walay nadungog

nabuhi ang tanan
nga malipayon
walay babil ang
mga tanlag
nahitabo na ang
nahitabo

apan wala gayod
gihapoy hisgot

nagpabilin kining
matood
nga dili na maambat

salamat

adunay nagsunod kanako

ikaw.

anaa ka bay usa ka
katarungan?

isulti na kini kanako.

nahutdan na ako ug
mga katarungan.

mamati ako kanimo.

gusto ko pa unta nga
buhion gihapon ako

sa kapalaran

nga sa kanunay
nangayo kanako ug
katarungan

ikaw.

ikaw ang akong
katarungan.

salamat.

wala ang gugma

ang akong gigukod
mao ang kadalanan

nga sayod ka
walay kataposan

sa dihang gikapoy
na ako ug gustong
sa kadyot lamang
mopahulay

gidapion ko ang
akong mga kamot
sa akong dughan

wala na ang akong
kasingkasing.

walay pagkaayo

wa ko magsulat ug balak
ako ang kanunayng gisulat ning
balak

dili ako ang mga tudlo
ang mga pulong mao ang mga
tudlo kanako

kon ako lang gayod ang
pabut-on
mas maayo na  lang untang
iluom

laway ko itulon
ang tanan nga moabot
imnon

apan dili ako ang balak
ikaw ang balak nga gisulat sa mga balak
diri kanako

kon mahimo lang
isalikway ko ikaw, isalikway ko ang mga balak

ako ang
walay nahimo
kay sa kanunay samdan
unya
walay pagkaayo

kwidaw!

wa siya sugod kuno
mituntong sa habog nga
bintana unya
gipatuyanan ang
pag-ambak

wa sugod niyang
gipunting ang punyal
sa iyang kasingkasing

walay pisi ang kusina
sa ilang balay
walay hait nga sundang
gitay-an ang pusil

apan kwidaw, inig-abot
na unya sa pagkasamad
sa iyang kasingkasing

adunay nagbuhat niini
nga walay gigamit

apan nagmalamposon.

bukog nga gihiktan sa usa ka ginhawaan

wa ko sugod igkita ang akong kalag
mahimong hinimo ko lang kini ug
nagpakaaron-ingnon ako nga kini
siya mao usab ako, nga ako ug ang
akong kalag morag nilikit nga
budbod, pilit nga puti ug itom nga
nahisama sa usa ka pisi, anaa ako
nga nagpabuyag ug anaa usab siya
nga tigbuyag, nga usahay nagrebelde
ako sa usa ka pangutana: ako lang ba
ang sayop unya siya ang siging sakto?


gisulayan ko paghubad ang nakatagkos
kanako, apan wala gayod kini nako
mahimo, gibati ko gihapon ang akong
usa ka pagkalambigit, nga mora akog
usa ka ugat nga napiit, diha sa tunga sa
dugha ka bukog,nga karon maoy maghukom
kon ako angayan bang buhian ug angayan
bang prisohon,  ug ang kalag, mas hadlok
ang pangutana: angayan ba akong buhion
o angayan na ba akong patyon?

nilikit nga budbod, unod nga gitagkos sa
hangin, bukog nga gihiktan sa usa ka
ginhawa, duha ka panagsangka, apan
kanunayng usa ra, lisod bulagon,
walay ilhanan, kon asa ang lingkawasan.

naglibog ko nganong naglibog ka

misanib ang tubig
sa tubig
ang hangin sa hangin
ang panganod
sa panganod

nakita mo na kini
di ba?

unsa pa ba'y imong
ipangutana?
katingalahan ba
god kini?

misanib ang kahayag
ug ang kahayag
ang kangitngit ug ang
kangitngit
ang dahon mihapnig
sa laing hapnig sa dahon
ang gamot sa kahoy
milikos sa kaugalingong
gamot sa mao lang gihapon
nga kahoy

ang pulong misalapid
sa laing pulong

unsa ba ang katingalahan
niini?
unsa pa ang ang
wa ko matubag kabahin
niini
diha kanimo?

ang nahigugma sa iyang kaugalingon lamang

ngano ba nga kon kinsa
kadtong nagustuhan mo
gihinayhinayan mo man
ug salikway?

ingon ka wa mo tuyua
sama sa tanang gugma nga
wa mo usab tuyoa nga
gikasuko mo
nganong gadungan kinig
pangabot unya ikaw lang
usa ug nagkabuang ka
kay dili ka pa andam
sa pag-abi-abi kanila

wa mo matuyo
apan ang tinood
hadlok ka sa tinood
nga ang matood mong
gihigugma
mao lamang ang
imong
kaugalingon,

ang uban
nahisama sa mga anino
lamang
nga mahimong makamantsa
sa imong
gipanghambog nga
kahayag

gibali, gituis

si rudy namakak.
ang iyang takuban ang kaligdong.
sama ni mar, namakak usab
ang iyang gitakuban mao ang
laksot nga batasan.
nagtagbo ang ilang mga dalan.
nagbinakakay silang duha,
gibali nako ang tanan
gituis,
ug silang duha nahimong
mga tawong
sa unang higayon
nagsulti sa kamatooran.

ang kaugalingon ni juan

gipangita ni juan ang
iyang kaugalinong, nawa lagi kuno kini

gilatas niya ang tinae sa manok nga dalan
gikatkat ang mga buko-buko sa bukid
gisubay ang mga liki sa kawayan
ang mga ang-ang sa langit
gisusi ang mga langob sa pangpang
ang mga dahong laya sa ilalom sa samdang
gamot sa mga kahoy

wala kuno didto, miampo siya, mihural diha
sa mga dag-om
miyaka sa kalapokan nga dipuspos sa ulan
silong sa mga kawayanan
gipaabot niya ang takdol nga bulan

miabot ang iyang kaugalingon
nagpanglingo,
nahikatulog lang kini sud sa
ilalom sa karaang kaban

kutob lang ako dinhi

giablihan mo ang
bag

gipilo pilo mo pag-usab
ang imong mga
sapot

gisukod-sukod kong
pila gayod
ang masulod
sa gamay lamang kaayong
luna

nakapangutana ko
"kon asa ka paingon?"

mitubag ka

"nanghipos lang
apan kutob lang ako dinhi"

adunay nag-andam
apan dili mobiya

adunay mamutos
aron lang  manghipos

sa dihang nahug siya sa sakayan

ang di kamaong molangoy
nahulog sa sakayan

mikapa-kapa sa iyang
mga kamot ug
tiil

wala molutaw
natiglum nga morag
sinsilyo
lalom sa dagat

sa paningkamot
kalit kining nakatunga
mihirit ug ginhawa
giwakli ang tubig sa
iyang nawong
giabli ang mga mata

nakaamgo na kaha
siya nga
ang kinabuhi diay

bililhon?

ang kabugnaw sa lapokan

kasagaran
likayan ang lapok

kinsa bay ganahan
magkalapok?

kabaw lang
man seguro ang
nangitag lapokon nga
tunaan
diin siya gustong
maglunang
bisan pa ug hutdon
ang adlaw

naglikay ko
sa lapok

apan wa nako
natuyo nga ako
nadakin-as
ug nahug sa dakong
tunaan nga
lapok

maayong pagkalapok
ang akong
tibuok kalawasan

mata na lang
ang akong
gihawanan

gilantaw ko ang
adlaw
ang langit

sa dihang mikawas
ko sa lapong
naligo
nanglimpyo

aduna'y lahing
kabugnaw
aduna'y
kagawasan
didto sa kalapokan
nga dili
ko gihapon
hikalimtan

way molungtad sa kahangtoran

 i

ang buotan nga bata
nga sa matag buntag nanilhig sa tugkaran
tigtapok sa mga nangahulog nga dahon
sa punoan sa mangga
ning ting-init nga panahon

ii

ang sulundong asawa nga sayong mimata
naglung-ag, naghikay sa pamahaw
nagputos sa balon sa duha ka anak
naghapnig sa suoton sa bana nga
nagtrabaho sa pantalan

iii

ang magtutudlo nga
nag-andam sa tulunghaan
nagbansay sa saysenta ka mga
bata nga di pa kaayong kamaong
mobasa ug mosulat

iv

silang tanan, ug sa uban pang wala
mahisgoti dinhi
nagbuhat sa angayng buhaton
nagbantay sa lihok nga sulundon
nag-amping sa ilang kaugalingon
naghambin sa gugma sa isig ka ingon

pagkamubo lang gayod sa higayon
bisan silang mga buotan, dili molungtad
sa kahangtoran

mga linya kabahin sa balda ug kabalaka

 i

gusto mong
bisibisan ang gauga nga yuta

nagsugod na ug pangalaya
ang mga gabi-gabi


ii

gisungog ka sa imong
tanlag
kabahin sa mga tamsi
nga nangitag
ulod didto sa punoan
sa nangka
nga hagbay ra nimong
giputol

iii

makahilpa sa kasingkasing
ang kamatayon sa
irong ilang nalimtan ug
pakaon
sud sa iyang prisohan

iv

bisan gani kadtong
sunoy nga milupad
sa pikas laguerta
ug wa na makita tungod
kay ang iyang
duha ka inaan
naglumlom na man
 nakabalda usab nimo

v

makabalaka ang
alingiing nga panahon
nga morag
gikawatan ug hangin
sa tibook
kagabhion

iv

giiyakan mo gihapon ang
bagtok nga natikig
sa kilid sa sandayong
nga gustong molantaw ug
adlaw
sa dihang miabot ang
iyang kamatayon

hait

gisimba ko ang
pulong

apan sa pagsimba
niini

gidagit ko usab
kini

giputos
usahay ilabay

kasagaran
gigaray gipasinaw

gihimong mga
taming

adunay uban
nga mga rebulto lamang

mga suluguon
ug mga higala

wala nako awaya
ang pulong

gianad ko kini
sa matag adlaw

sa akong kaugalingon
gihaploy

wala nako
mabantayi

naulog-ulogan ko
sa pulong

ako karon ang
iyang gidagit

gitaral, giguyod
giinat, gipakli

bunol ang akong
aping

bali ang akong
bukog

samdan ang
akong kasingkasing

apan ania
salamat

hait ang akong
kalag
talinis ang
akong
tutok