ang kalabotan

adunay kalabotan ang liston sa sapatos
sa kamatayon sa usa ka
botete didto sa ilalom sa dagat
bisag lahi ang ilang mga kalibotan
dili kini layo
sa panagtabo sa kataposan
sa luwag og sa kasili
diha sa kolon
mao usab kana ang mahitabo natong
duha
walay usa kanato ang adunay katungod
nga moingon
nga ako og ikaw walay kalabotan sa bisag
unsang mahitabo
sa usag usa kanato
dili ba ikaw man ang miingon nga ang pilok
sumpay kana sa
balahibo sa imong lubot?

ang bagyo kagabii

ang bagyo kagabii
pagkakusog
pagkahadlok
busa naghawiray ta
sa atong mga kamot
nag-gakos tang duha
mora tag bagon
naglikosay sa
punoan sa kahoy

pagkabuntag linaw na
nindot na ang panahon
misilang ang adlaw og
bugnaw na ang huyuhoy
sa hangin

nakahunahuna ko
mas nindot unta
og wala dayon moundang
ang maong bagyo
kay ang akong gibati tupad nimo
haskang lamia jud kaayo.

pungak nga dako

kining akong iyaan
nga sosyal
dili gayod kontento
sa iyang ilong

iyang gipaoperahan
kay aron motugsoy
motulbong

dili kontento
sa iyang
aping og agtang
iyang gipainat
gipaguot aron
mawa ang mga
kunot

retoke diri
retoke didto
karon kulang na lang
mopalit og pako
aron mahimong pungak
nga dako

maapektahan gayod ang tanan

ang sakit nga gihatag
sa tunok nga bildo
diha sa lapa-lapa
dili lang kana
sakit
nga iya lang
sa
lapa-lapa


hinonoa
sakit
kini sa
tibook lawas

tipik lamang

a
n
g


l
u
h
a

n
a
h
u
l
o
g

subay
sa kilid
sa aping

bugnaw
apan sakit
kaayo

mantika sa tubig

tan-awa ang mantika nga misagol sa tubig
tan-awa pag-yo

ang mantika nga naa sa ibabaw sa tubig
kinsa ba ang mas kusgan
kanilang duha?

mao kana
ang akong pangutana

ang mantika miingon
giduot niya ang tubig

ang tubig miingon
giisa niya ang mantika

ang mantika miingon
ako ang gamhanan
kay ako ang naa sa kinatas-an

ang tubig miingon
ako gayod ang gamhanan
kay ako ang kusgan
nga nagpailalom alang sa minantikaan

ang mga tigulang

ang mga tigulang
kon magkagrupo na gani
naarag hisgot anang ilang mga sakit
og ilang mga tambal
naarag kwenta sa ilang galastohan
matag adlaw
naarag hisgot anang ilang mga anak
nga wala na diha
sa tumang kamingaw

pagkalooy gayod sa mga tigulang, og ako
nga nagsulat kabahin sa mga tigulang
nga nagkagrupo og naghisgot sa ilang mga sakit
og mga tambal og sa ilang mga anak sa tumang kamingaw

ania, gibatig kahadlok sa pag-abot na unya sa panahon sa akong pagkatigulang,
seguro, usahay, makapanghinuklog ko

mas maayo pa kaha'g dili na lang
ako matigulang.

walay lingaw

si tatay kaniadto kon magsugod na gani
ko og basa
sa akong mga libro

komiks, o bisan unsa na lang
sama sa mga
daan nga pamantalaan
nga gigamit na gani
sa pagputos
sa bulad
og asin

di lang matandog ang iyang kalag
apan
masuko gayod kadto siya kay ang tan-aw god
niya anang pagbasa
tinapolan
dili sama sa pagdaro sa basakan og
pagpamunglay sa kamaisan
nga panington gayod
ang akong agtang

para kaniya
mao kana ang pagkakugihan

busa aron paglikay sa among panagbingkil
didto ko magbasa sa among
atop nga nipa sa ibabaw
sa among balay nga karaan
tupad sa mga sanga sa
caimito

lahi usab siya
kay wala man god
nakaeskwela
og tarong tungod sa kasamok
sa gubat og kagubot

kon makit-an sab ko niyang magtanga
usahay
masuko gayod siya
kay kuno wala ako'y trabaho

kay ang iyang gusto kanako
mao man gayod
nga moagas ang mga singot
sa akong mga kamot
og dagkong bukton

wala lang siya masayod
nga ang pagbasa
kon sutaon labaw pa's
pagdaro

nga ang akong pagkatanga
labaw pas
pagpaagas sa mga singot
didto's huerto

wala siya masayod
nga ang pagkatanga
mao ang pagsugod
sa akong pagpamalak
maoy pagkatawo
sa akong mga hunahuna
nga ang akong pagbasa
sa kanunay mao'y
akong pagsugod og tukod
nianang akong
sakayan
lawig paingon
sa akong kagawasan